2 Amadapụ 19 - FỊAFỊA BAỊBỤLỤ

Amadaḅọ Ḅe Ayịzaya Ḅara Datụkụma Ẹkwẹn Ḅiim

¹ Amadaḅọ Hẹzịkaya anị naa tẹso, ọ̀ nwẹnị ori akapa kan, tẹ akpa kẹ ọ̀ ḅụụ gbaịn tẹ mẹnjị KỊNỊNYANAḄỌ ḅe warị ḅio sọ-mu.

² Ọ̀ nwẹnị Ẹlịyakịmụ, warị mẹ onyo-sẹịnḅọ ḅe na, Sẹbina ḍiri-kẹẹḅọ ḅe na, sịḅịda agbamịẹapụ ma na, akpa kẹ ḅụụ gbaịn wararị ḅara ḅụ ịn kẹ ịkịankoro Ayịzaya Emọzị owiḅọtụḅọ ḅe fịrịma.

³ Ịn nwẹnị ọ̀ ḅẹẹ, “Mie Hẹzịkaya ḍuko yee, mịmgba mẹ anie ḅụụ-ḅalaḅala na, ịganị kịnị pịrị na, tọrụ-tuu na eneḅaka; awọ ḅo iyi pakama-ḅo ḅiri la tẹ, kụma kẹ ịngịma-ịngịma ịnyọ ofori.

⁴ Sosi-ọkụma KỊNỊNYANAḄỌ ị́ Tamụnọ ḅe in kẹ Rabisake sịn ḅọ ḅe ọ̀ sịḅịdaḅọ Asiriya ḅẹ amadaḅọ ọ̀ fịrịma tẹ ọ̀ kẹ ḍumo wararị Tamụnọ ḅe kombo ẹkwẹn-aḅịḅị mamgba naam, ọkọẹrẹsị tẹkẹ kirikọn-apụ ma pịrị, mịẹtẹ KỊNỊNYANAḄỌ ị́ Tamụnọ ḅe ịganị ọ̀ naa ẹkwẹn-aḅịḅị ma pịrị ḅe ḅara.”

⁵ Amadaḅọ Hẹzịkaya afịrịmẹnjịapụ ma ḅo Ayịzaya la tẹso,

⁶ Ayịzaya nwẹnị ịn ḅẹẹ, “Ọmịnị ọmịna sịḅịdaḅọ ḅẹẹ: ‘Mie KỊNỊNYANAḄỌ ḅe ḅẹẹ ḅara; ị́ naa ẹkwẹn-aḅịḅị ma gotẹ ḅalafa ma, arị aị ma tẹ Asiriya ḅẹ amadaḅọ ḅe fịrịmẹnjịapụ kẹ ị̀ mịẹ sima aị ma.

⁷ Ḍikii, à gbọrụ tẹmẹ kẹ ọ̀ ḅụụ ḅio sụa ḅa tẹ mịẹtẹ ori ịba naa tẹ pịkịma-so ori ama mu ḅa; anịsakị arị ọ̀ mịẹ tẹ ori ama-kuḅu ḅẹ okologie ḅụ ọ̀ ḅịkị ḅa.’ ”

Asiriya Ḅẹ Apụ Ma Jen Ẹrẹma Oku Fịrịmam

⁸ Ịn kẹ Rabisake sin ḅọ ḅe pịkịma-so tẹ nwẹnị ḍọkị-ẹrị Asiriya ḅẹ amadaḅọ ḅe Libina na owu sọarị gbala ọ̀ naam amadaḅọ ḅe Lakisi ḅụ so tẹ.

⁹ Amadaḅọ ḅe Kusi ḅẹ amadaḅọ Tayaka gboloma ye naam mịnẹ, “Ḍikii ò ḅo owu kẹ ị́ paka ḅẹ ḅoarị” nwẹn naa sakị, ọ̀ nwẹnị ḍiri pakịrị kẹ fịrịmẹnjịapụ ḅụ pịkị Hẹzịkaya fịrịma tẹ ḅẹẹ,

¹⁰ “Mị-ḅara mie ọmịnị ẹkwẹn Juda ḅẹ amadaḅọ Hẹzịkaya pịrị ḅarị ḅara, ‘Minini tẹ ọ́ ḅụụ ḅụ sịrẹrẹ wararị ọmịna Tamụnọ ḅe oḅori kẹ ọ́ sin ye kẹ ọ́ karịma ma mịnẹ Jeruselemu Asiriya ḅẹ amadaḅọ ḅara-ḅio sọ ḅịa.

¹¹ Asiriya ḅẹ amadapụ ịkatakirikọn-a-ḅara kẹ ama mamgba ḅaa ḅara mẹ ị́ kọkọ naa, ị́yẹrị ị́ ḅọrọma ḅẹ?

¹² Gozanị na, Eranị na, Rezefụ na opu asịẹ ma na Ideni ḅẹ apụ tẹ Tẹlasa ḅụ sime apụ ma tẹ ị̀ aḍapụ ma ḅaa apụ ma ịna oru-atamụnọ ma ini ịn ḅọrọma tẹ?

¹³ Hamatị na, Apadi na, Sẹfavemu na, Ena na, Iva na ḅẹ amadapụ ma ịn tọ-anga emi?’ ”

¹⁴ Hẹzịkaya nwẹnị fịrịmẹnjịapụ ma ḅara ḅụ ḍiri pakịrị mẹ da ọkị, tẹ anị go; tẹ Hẹzịkaya nwẹnị mẹnjị KỊNỊNYANAḄỌ ḅe warị mẹ ḅio sọ-mu tẹ anị finji KỊNỊNYANAḄỌ ḅe tọrọkọ koroma

¹⁵ tẹ Hẹzịkaya nwẹnị KỊNỊNYANAḄỌ ḅe tẹkẹ tẹ ḅẹẹ, “Yei KỊNỊNYANAḄỌ Izirẹlị ḅẹ Tamụnọ, oriḅe tẹ Sẹrubimu ma ọgọnọ ḅụ emine ọgọnọ lẹgị-sime wararị ḅọ, ị́yẹrị ngẹrị anie tomikiri sịẹ-sịẹ mamgba ḅụ Tamụnọ; ị́yẹrị so mẹ na kiri mẹ na tẹmẹm.

¹⁶ Í ḅeri-tokoloma tẹ naa, Yei KỊNỊNYANAḄỌ, ị́ atọrụngbọ ma finji tẹ ẹrị, Yei KỊNỊNYANAḄỌ tẹ Sẹnakeribu ẹkwẹn-aḅịḅị ma tẹ ọ̀ kẹ fịrịma tẹ kẹ ḍumo wararị Tamụnọ ḅe komboarị aị ma naa.

¹⁷ Yei KỊNỊNYANAḄỌ karakaraye ḅụ Asiriya ḅẹ amadapụ ma sịẹ-sịẹ na, ama-ama na guluguluma tẹ

¹⁸ ịna oru-atamụnọ ma kẹ fịnị ḅio dọkịma tẹ gbala ini ma tamụnọ-a, kụma tomina aḅara sịn na, ḍụḅarị na kẹ mịẹ aị; anịẹrẹsị ini arị gulugulumam.

¹⁹ Ọkọẹrẹsị Yei KỊNỊNYANAḄỌ wamịna Tamụnọ, ọ̀ ḅara ḅio wa ḅọrọma, mịọkụ arị ị́ tẹkẹm, mịẹtẹ tomikiri ḅe asịẹ mamgba nimi ḅarị ḅara mịnẹ, Yei KỊNỊNYANAḄỌ, ị́yẹrị ngẹrị anie Tamụnọ.”

Ayịzaya Oku-ḅịḅị Kẹ Amadaḅọ Ḅe Fịrịmam

²⁰ Anịtẹso Ayịzaya Emọzị owiḅọtụḅọ ḅe nwẹnị fịrịma mu ḍuko Hẹzịkaya pịrị, tẹ ḅẹẹm, “Mie KỊNỊNYANAḄỌ Izirẹlịapụ tẹkẹarị Tamụnọ ḅe ḅẹẹ ḅara: Sẹnakeribu Asiriya ḅẹ amadaḅọ ḅe gboloma tẹkẹ tẹ ị́ kọn ye mẹ à naa tẹ.”

²¹ Mie ò gboloma ye ḅụ KỊNỊNYANAḄỌ ḅe kọn ẹkwẹn-ḅịḅị: Kpọma-ḅẹlẹma Jeruselemu Í ḍiki-sima tẹ ị́ ḍẹrịarị; Kpọma-ḅẹlẹma Jeruselemu Ị́ ọḅụjụ á sịḅị jikearị.

²² Ị́ tụḅọ kombo tẹ wori? Ị́ oloku tụḅọ pịrị tẹ opu amịẹaị ḅụ ị́ tọrụkuḅu sakị? Yẹrị Izirẹlịapụ tẹkẹarị Fịafịa Ḅọ ḅe anie ị́ wọlọarị!

²³ Ị́ afịrịmẹnjịapụ ḅụụ, ị́ KỊNỊNYANAḄỌ kombo tẹẹ, tẹ ḅẹẹm: Ị̀ tọnwa kirimẹnjị-ọmụarụ ḅụ, À kpọlị mu tụndụ ma sịḅị la tẹẹ, Lẹbanọnị ḅẹ ala tẹịn yọ mẹ; Anị ḅẹ gele tẹịn asida ma à ḅịkịmam, anị ḅe sụụn tẹịn kpọ asịn ma; À sọ anị ḅẹ ala-tẹịn anga lam, arị ḅin tẹịn piri ḅụ.

²⁴ À tọnwa suḅe sokum tẹ igoni aminji ḅuum, Àrị ị̀ ḅụọ-kuḅu kẹ Ijiputi ḅẹ atọrụ mamgba samụnọmam.

²⁵ Amụ ị́ anị naa, mịnẹ àrị anị tọn kụra-ḅio iḅerea? Elemu sakị ḅụ arị anị tọnm mịọkụ à mịẹarị ye mẹ, mịnẹ ị́ ịn tẹlẹma ọmụ pịrị ama ma, pịkị sịra sọma ḅa mẹ;

²⁶ anịsakị ịnyọ arị ḅio anga apụ ḅụụ fa tẹẹ, ịn ḅụụ-bua tẹ ḅụụ-jịrị tẹ ịn ḅo piri asịn na, ịwọma pakarị osuka na kịka tẹẹ, isun ọgọnọ so-paka osuka ọkụ; anị fọị tẹrẹmẹ anị so-pakarị.

²⁷ Kụma àrị ị́ lẹgị-sime na, ị́ mẹnjị paka na, ị́ mẹnjị sọ-ḅo na, ị́ kọọn ị̀ pịrị ịganị na, nimi wararị.

²⁸ Ị́ ịganị ị̀ pịrị tẹ, ị́ ḅụụ-gelema mẹ ḅo ì aḅeri ḅio sọ tẹ ẹrẹsị, Àrị ị̀ arị kẹ ị́ nini kpịra ḅa, Àrị ị̀ ḅịḅị-sụaye kẹ í ḅịḅị sụa ḅa, tẹ ị́ nụnụ-pịkị í ḅo anga da ḅa.

²⁹ Miemẹ elekima sọ ị́ pịrị ḅa: mị kụra ngẹrị so-paka aị ị́ nwẹn fị ḅa, maaịn karama kụra ḅụ anị gbọrụ ḅara ḅụ paka-ḅo aị ọ́ nwẹn fị ḅa; anịtẹrẹmẹ, tẹrẹị karama kụra ḅụ ọ́ fịaị ḍiḅi tẹ soku ḅa, ọ́ girepu-ḍụọ ḍiḅi tẹ arịḅẹ asịnmgbọlị fị ḅa.

³⁰ Anịsakị Juda warị mẹ ḅụ fịị kọn apụ ma opu akuno sụa ḅa, tẹ ọgọnọ sịnmgbọlị sụa ḅa.

³¹ Kẹ gotẹ ọkọ ḅẹẹarị, Jeruselemu ḅụ kọn apụ paa paka ḅa, tẹ Zayọnị ḅẹ tụndụ ḅụụ fịị kọn tomina-ogbo sime ḅa. KỊNỊNYANAḄỌ ḅe miemẹ mịẹ ḅẹ ḅiim ẹrẹsị.

³² Anịẹrẹsị mie KỊNỊNYANAḄỌ ḅe Asiriya ḅẹ amadaḅọ ḅe gboloma ye ḅụ ḍuko ḅara, “Ọ̀ mị opu ama mẹ ḅio sọ-ḅo ḅịa, anịanịa mịanga ḅụ gbọrụ ḍiein tẹịn, anịanịa gbọrụ ekpeke kẹ anị tọrọkọ sịẹsime, anịanịa lịka tan kpolima anị pịrị.

³³ Ọ̀ mẹnjị ma-ḅo etela, mie ọ̀ pịkịma-so ḅarị ye, tẹ mị opu sịẹ mẹ ḅio sọ-ḅo ḅịa, KỊNỊNYANAḄỌ ḅe ọkọ ḅẹẹm.

³⁴ Kẹ gotẹ ọkọ ḅẹẹarị, à sịẹ kẹ mị opu sịẹ mẹ pịrị tẹ, anị ḅọrọma ḅa, ì soku-ḅẹ ye, na ị̀ fịrịmẹnjịḅọ Devidi sịḅị ẹrẹsị.”

Jeruselemu Ḅọrọma Tẹẹ

³⁵ Anị ḍin ḅụ KỊNỊNYANAḄỌ ḅe enjẹlị nwẹnị Asiriya ḅẹ ọmụ-ogbo mẹ sime anga mu tẹ ịna ḅụụ si tẹra puku finji, na kịnị maa ẹndẹ oyia asi (185,000) na ḅaa; tẹ dede-ḅio dede-ḅio kịnị saakị sakị, ḍikii, mịnapụ mamgba fịị sara wararị.

³⁶ Anieḅụ Asiriya ḅẹ amadaḅọ Sẹnakeribu nwẹnị mẹnjị-so ori ama mu, tẹ sọ-mu Ninive ḅụ anga.

³⁷ Ò Nizirọkụ ori oru-tamụnọ ḅe warị mẹ ḅio sunsin ọ̀ pịrịarị ogbo, ori owiapụ-awọmẹ Adaramẹlẹki na, Sareza na, nwẹnị okologie kẹ ọ̀ ḅaa tẹ mangị-so Araratị ḅẹ ama mu. Ori owiḅọtụḅọ Esaradọnị nwẹnị ò kiri ḅụ ama-da.