2 Amadapụ 18 - FỊAFỊA BAỊBỤLỤ

Juda Ḅẹ Amadaḅọ Hẹzịkaya

¹ Izirẹlị ḅẹ Amadaḅọ Hosiya, Ẹla owiḅọtụḅọ ḅe ama-da tẹ tẹra akụra karama kụra ḅụ, Hẹzịkaya Ahazi owiḅọtụḅọ ḅe saakị ama-dam.

² Ọ̀ sịḅị si sọnọa akụra finji ḅọrọ tẹso ọ̀ saakị ama-dam, tẹ gbọrụ kụra fa suei kẹ ama-dam, Jeruselemu ḅụ. Ò iyingi ẹrẹ Abija, Zẹkaraya ẹrẹḅọtụḅọ.

³ Ọ̀ KỊNỊNYANAḄỌ ḅe ḍiki-tọrụ ḅụ kuraye mịẹm, ọ̀ ḍa Devidi wẹrịtẹ mịẹ ḅara.

⁴ Ò gele ayeyọ — oru mịẹ apụ ma tẹkẹarị anga — ma kan siinm, ịna ịḅalị ma anyịma, tẹ Asẹra oru-fụḅara mẹ pẹlẹ-gbinm. Ọ̀ nwẹnị ojo oronwi tẹ Mozizi tẹmẹ ye mẹ anyịma kọsịma, ọkị mu arị ene ma la sọ Izirẹlịapụ ma kụnụaị dọkịma dọkịma anị pịrịarị; ini anị sịnm Nehusutanị.

⁵ Ori ò minini kẹ KỊNỊNYANAḄỌ Izirẹlịapụ tẹkẹarị Tamụnọ ḅe ḅụụ wẹrịm; anie mịẹtẹ Juda ḅẹ amadapụ mamgba ḅụụ ò pembe ḅọ ofori, ọ̀ da tẹrẹmẹ da apụ-o, da tẹrẹmẹ ori ḅo da apụ-o.

⁶ Gbala ọ̀ katapụma KỊNỊNYANAḄỌ ḅe ọlọ-sịẹmam ẹrẹsị ori ò ḍukamẹnjị ḅụ igbema-a, kụma ori oloko ma tẹ KỊNỊNYANAḄỌ ḅe tọn Mozizi pịrị oloko ma kokom.

⁷ KỊNỊNYANAḄỌ ḅe ori na simem; ò mu anga, mu anga, ò lolom. Ọ̀ sịḅịḅio kụrọma Asiriya ḅẹ amadaḅọ pịrịm, tẹ fịrịmẹnjị ọ̀ pịrị-a.

⁸ Ama koru kụrọ gele-warị ḅụ ọkị mu ọmụ-aị kẹ mịẹ kụrọma opu ama ma la ḅụ, ò Filisiteniapụ ma ḅaa nwenii mu Gaza na, anị ḅẹ ye-yọ na lam.

⁹ Amadaḅọ Hẹzịkaya ama-da tẹ ini akụra karama kụra, anie Hosiya, Ẹla owiḅọtụḅọ, Izirẹlị ḅẹ amadaḅọ ḅe, ama-da tẹ sọnọma kụra karama kụra ḅụ Salimaniza Asiriya ḅẹ amadaḅọ ḅe ḅo Sameriya si anga sịẹ tẹ anị ikelema-koro tẹ simem.

¹⁰ Tẹra kụra kunoma ḅụ ori anị ọkịm. Hẹzịkaya ama-da tẹ sonio karama kụra, anie Hosiya, Izirẹlị ḅẹ amadaḅọ ama-da tẹ eseni karama kụra mie in Sameriya ọkị ye.

¹¹ Asiriya ḅẹ amadaḅọ ḅe Izirẹlịapụ ma dogi-so Asiriya mum, tẹ ịn kẹ Ẹla na, Gozanị ḅẹ tọrụ, Habọ akaka ḅụ na, Midi ḅẹ apụ opu ama ma ḅio koromam,

¹² gbala ịn KỊNỊNYANAḄỌ ịna Tamụnọ ḅe ḅịḅị poki-a, pịkị ori ọḅọkụ mẹ sima, jen-a jen-a Mozizi KỊNỊNYANAḄỌ ḅe fịrịmẹnjịḅọ ḅe tọn ye mẹ; ini anị poki-a pịkị ọ̀ ḅịḅị poki-a.

Asiriya Ḅẹ Apụ Jeruselemu Ẹrẹmam

¹³ Hẹzịkaya ama-da tẹ ngei kụra fa jei karama kụra ḅụ Asiriya ḅẹ amadaḅọ Sẹnakeribu ḅo owu kẹ ọmụ-aị kẹ mịẹ kụrọmatẹ Juda ḅẹ opu ama ma paka tẹ arị ọkịm.

¹⁴ Hẹzịkaya Juda ḅẹ amadaḅọ ḅe nwẹnị ḅịḅị kẹ Asiriya ḅẹ amadaḅọ ḅe fịrịma Lakisi ḅụ, tẹ ḅẹẹm, “À mịẹ-irima tẹ; ị̀ ḅụụ ḅụ ị́ ḅụụ nụnụ ọkịị; ị́ kẹ ị̀ ọgọnọ gbana ye gbana ye à dogi ḅa.” Asiriya ḅẹ amadaḅọ ḅe nwẹnị ḅii Hẹzịkaya Juda ḅẹ amadaḅọ seleḅa pakịrị-pakịrị puku sọnọa si, oyi maa apuku finji, na pakịrị oyi ẹndẹ (900,000) na golu kpoo oyi apuku, gbọrụ puku finji, na kpoo sọnọa ẹndẹ (90,000) na gbẹẹ

¹⁵ Hẹzịkaya nwẹnị KỊNỊNYANAḄỌ ḅe warị ḅio na, amadaḅọ ḅe ngọ-warị ḅio na ḅụ ọ̀ ḍọkị-ẹrị seleḅa mamgba kẹ ọ̀ piri.

¹⁶ Anị sakị mẹ ḅụ ori Hẹzịkaya Juda ḅẹ amadaḅọ ḅe sọ tẹ kẹ KỊNỊNYANAḄỌ ḅe Tẹkẹ-warị aḅọkọ ma na, warị-ḅọkọ amasịn ma na sara gbaịn agolu ma, Hẹzịkaya ḅọkọ ma na, warị-ḅọkọ amasịn ma na ḅụ golu ma kpakpa tẹ kẹ Asiriya ḅẹ amadaḅọ pịrịm.

¹⁷ Asiriya ḅẹ amadaḅọ ḅe nwẹnị amadaḅọ palị in kẹ Tatanị sịn kiri la tẹ ọmụ-alaḅọ na, Rabisarị sịn kiri la tẹ ọmụ-alapụ na, kụrọtẹ ḅẹrẹ na oku-mẹnjịḅọ ịn kẹ Rabisake sịn ḅọ ḅe na, gburo-gburotẹ ọmụ-ogbo na kẹ Lakisi ḅụ sime tẹ kẹ Amadaḅọ Hẹzịkaya fịrịma Jeruselemu ḅụ. Ịn nwẹnị saakị tẹ Jeruselemu ḅo. Ịn ḅo la tẹso, in nwẹnị opu etela mẹ ḅụ ọgọnọ ḅẹ ḍawa ḅio minji ḅọrọ ḅoarị anga mẹ tẹ ḅịtẹ ḍori apụ kọrịnama kọrịarị anga ḅụ sime.

¹⁸ Anịtẹso ịn nwẹnị fịrịma amadaḅọ ḅe sịn: amadaḅọ warị mẹ onyo-sẹịnḅọ Ẹlịyakịmụ, Hilikaya owiḅọtụḅọ ḅe na, Sẹbina ḍiri-kẹẹḅọ ḅe na, Joha, Asafụ owiḅọtụḅọ kẹẹtẹ aḍiri koko ḅo ḅe na nwẹnị ịn ḍọkụma-mu.

¹⁹ Kụrọtẹ ḅẹrẹtọn oku-mẹnjịḅọ in kẹ Rabisake sịn ḅọ ḅe nwẹnị ịn ḅẹẹ, “Ọmịnị Hẹzịkaya ḅẹẹ mie gburo-gburotẹ amadaḅọ, Asiriya ḅẹ amadaḅọ ḅe ḅẹẹ ḅara; ‘tiye í ḅio kpọma?

²⁰ Ị́ sịnm papaa ẹkwẹn-ḅịḅị anie ọmụ aka na kụrọ mẹ na mọ? Ị́ tụḅọ ḅụụ ḅụ sịrẹrẹ, tẹ ị̀ ḅụụ sịḅị-kụrọ nyanarị?

²¹ Ḍikii, mịọkụ Ijiputi ḅụ mie ị́ sịrẹrẹ wararị ye, anị kpọ-a sịn mkpara tẹ anyị tẹ anị kẹ ḅụụ daa ḅọ daa ḅọ ḅara temi ḅarịye mẹ. Anị ḅara mie Fero Ijiputi ḅẹ amadaḅọ ḅe kẹ ọ̀ ḅụụ ḅụ sịrẹrẹ apụ mamgba na sime-ḅara.’ ”

²² “Kụma ị́ nwẹnị ị̀ ḅẹẹm, ‘Wa KỊNỊNYANAḄỌ wamịna Tamụnọ ḅe ḅụụ sịrẹrẹm’ ḅẹḅẹ — Hẹzịkaya kan siin gele ayeyọ ma na ebeka ma na nyana ḅọ ori ḅị Tamụnọ ḅe-a, tẹ Juda na Jeruselemu na ḅẹẹm, ‘Mị ebeka mẹ tọrọkọ mie ọ́ sunsin ḅarị ye Jeruselemu ḅụ?’

²³ Mịọkụ ḅoo, tẹ àrị ị́nịna ḅịḅị-ọkịya, ị̀ sịḅịdaḅọ Asiriya ḅẹ amadaḅọ ḅe ẹrẹ ḅụ; àrị asụ sọnọa ẹndẹ kẹ ị́ pịrị ḅa í inetẹ í soku ḅụ arị dọkụ ḅarị apụ nyana ḅarị ḅẹḅẹ.

²⁴ Ọkọ kụma ị́ tọ-ḅara kẹ inetẹ ị̀ sịḅịdaḅọ ḅe afịrịmẹnjịapụ ḅụ ịrụ tẹịnḅọ dee-siin ḅa, kirimẹnjị-ọmụarụ na asụ-dọkụ-ọmụapụ na ḅụ í Ijiputi ḅẹ amadaḅọ ḅụụ sịrẹrẹ wararị ḅẹẹ-sakị?

²⁵ Miemẹ sikima, à ḅo mị yọ mẹ fama ḅẹ ḅo ye mẹ KỊNỊNYANAḄỌ ḅe ofori ḅara mie à kẹ ḅo ye? KỊNỊNYANAḄỌ ḅe ị̀ ḅẹẹm, ‘Mị yọ mẹ muu, tẹ anị famaa.’ ”

²⁶ Anịtẹso Ẹlịyakịmụ, Hilikaya owiḅọtụḅọ ḅe na, Sẹbina na, Joha na nwẹnị Rabisake sịn ḅọ ḅe ḅẹẹ. “Sisi, Aremịya ḅịḅị ḅụ ẹkwẹn ị́ afịrịmẹnjịapụ pịrị, wa anị fieye naarị, Hiburu ama-ḅịḅị kẹ ẹkwẹn wa pịrị ma aniemẹ tẹ onu mẹ ọgọnọ lẹgị wararị apụ sọ naarị ama-ḅịḅị mẹ.”

²⁷ Kụma ịn kẹ Rabisake sịn ḅọ ḅe nwẹnị ịn pakịrị, “Ị̀ sịḅịdaḅọ ḅẹ ori ị̀ fịrịmam mịnẹ à mịna ẹkwẹn ma kọn kẹ ọmịna sịḅịdaḅọ na ọmịnị na ngẹrị pịrị? Ẹn-ẹn, onu mẹ ọgọnọ lẹgị tẹ ọmịnị na amịnẹ pọkụ-muaị fị na amịnẹ san ḅuu ḅarị apụ ma sọ, mịna ẹkwẹn ma sime ịn pịrịm.”

²⁸ Anịtẹso ịn kẹ Rabisake sịn ḅọ ḅe nwẹnị Hiburu ama-ḅịḅị ḅụ opu pọkọ kẹ oloku pakama ịn ḅẹẹ. “Ó gburo-gburotẹ amadaḅọ, Asiriya ḅẹ amadaḅọ ḅe ẹkwẹn-ḅịḅị mẹ naa! Mie amadaḅọ ḅe ḍuko yee,

²⁹ ‘Ó minini tẹ Hẹzịkaya oḅori kẹ ọ́ sịn ma, kẹ gotẹ ọkọ ḅẹẹarị, ori inetẹ ị̀ ḅara-ḅio ọ́ ḅọrọma ḅịa.’

³⁰ Ó minini tẹ Hẹzịkaya mịẹtẹ ọ́ KỊNỊNYANAḄỌ ḅe ḅụụ ḅụ sịrẹrẹ ma, ọ̀ nwẹnị ọ́ ḅẹẹm, ‘Karakara-ḅara-ḅụ KỊNỊNYANAḄỌ ḅe wa ḅọrọma ḅa, tẹ mị opu ama mẹ Asiriya ḅẹ amadaḅọ ḅe ḅara-ḅio sọ ḅịa’ ḅẹḅẹ.

³¹ Ọmịnị Hẹzịkaya poki ma. Mie Asiriya ḅẹ amadaḅọ ḅe ḍuko yee, ‘Ọmịnị ọmịna dein mẹ pakamaa, yẹrị na ọmịnị na ogboku, tẹ paka ị̀ ḍọkụma-ḅoo; anịsakị ọmịna aḅụụ ḅụ ḅụọ-ḅụọ mḅọ kụrọ ḅụ paka-ḅo ye fị ḅa, ḅụọ-ḅụọ mḅọ ịla sịn ḅụ paka-ḅo ye fị ḅa, ḅụọ-ḅụọ pịkị mḅọ suḅe ḅio paka-ḅo minji ḅuu ḅa,

³² nwenii à ḅo ọmịnị ọkị tẹ kẹ sọ-mu ọmịna ama mẹ pembe ama, tẹ sịnmgbọlị na, iru na, fịye na, kụrọ-aḍụọ na, olivu asịn na, ḅẹm na sime ama ḅụụ koroma ḅa, mịẹtẹ ó ḍumo ḅa, tẹ fịị ḅịa ḅara. Ọmịnị Hẹzịkaya poki ma ori ọmịna toluma irima ḅụ ḅẹẹ ḅa, KỊNỊNYANAḄỌ ḅe wa ḅọrọma ḅa.

³³ Opu asịẹ ma ḅẹ oru-atamụnọ ma ḅẹ gberie jene Asiriya ḅẹ amadaḅọ ḅara-ḅio ori ama ḅọrọma tẹ?

³⁴ Hamatị na Apadi na oru-atamụnọ ma ịn tọ-anga ḅụ emi? Sẹfavemu na, Ena na, Iva na oru-atamụnọ ma ịn tọ-anga ḅụ emi? Ịn Sameriya ḅọrọma tẹ ị̀ ḅara-ḅio?

³⁵ Opu asịẹ sịẹ ma ḅẹ oru-atamụnọ mamgba ḅụ tọ apụ amịna opu asịẹ ma ḅọrọma tẹ ị̀ ḅara-ḅio ḅụ tẹ KỊNỊNYANAḄỌ ḅe Jeruselemu ḅọrọma ḅa ị̀ ḅara-ḅio ḅụ?’ ”

³⁶ Kụma tomi ma gbọsime ò poki tẹ gbọrụ ẹkwẹn-ḅịḅị sọ kẹ ọ̀ pakịrị-a, gbala amadaḅọ ḅe tọn ịn piri ye anie, “Ọmịnị ọ̀ pakịrị ma.”

³⁷ Anịtẹso Ẹlịyakịmụ Hilikaya owiḅọtụḅọ, warị mẹ onyo-sẹịnḅọ ḅe na, Sẹbina, ḍiri-kẹẹḅọ ḅe na, Joha, Asafụ owiḅọtụḅọ, kẹẹtẹ aḍiri kokoḅọ ḅe na nwẹnị ịna akapa kaan wararị ḅara mẹ na Hẹzịkaya ḍọkụma-ḅo tẹ Rabisake sịn ḅọ ḅe ẹkwẹn-aḅịḅị ma ḍuko ọ̀ pịrịm.