2 Amadapụ 17 - FỊAFỊA BAỊBỤLỤ

Izirẹlị Ḅẹ Amadaḅọ Hosiya

¹ Juda ḅẹ amadaḅọ Ahazi ama-da tẹ oyi maa akụra finji karama kụra ḅụ, Hosiya Ẹla owiḅọtụḅọ ḅe saakị Sameriya ḅụ sime tẹ esenia akụra kẹ ama-da Izirẹlị pịrịm.

² Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, anịsọ ọ̀ kẹ tọrọkọ tarị Izirẹlị ḅẹ amadapụ ma mịẹ ḅara-a

³ Asiriya ḅẹ amadaḅọ Salịmaneza nwẹnị ḅo owu kẹ ọ̀ paka; tẹ Hosiya nwẹnị ḅara saakị ọ̀ pịrị tẹ ama oso igbigi oso-oso ọ̀ pịrị.

⁴ Kụma Asiriya ḅẹ amadaḅọ ḅe nwẹnị ḍọkị-ẹrị mịnẹ Hosiya ḅarị ọ̀ mịẹ-mịẹ ḅara mịẹ-a; ọ̀ gbala oku kẹ Ijiputi ḅẹ amadaḅọ Soo fịrịma tẹ ḅarasụa ḅii tẹ ẹrẹsị, ọ̀ ḅarị kụra-kụra ḅụ ọ̀ gbẹẹ-gbẹẹ igbigi mẹ kẹ Asiriya ḅẹ amadaḅọ gbẹẹ-a; ọkọẹrẹsị Asiriya ḅẹ amadaḅọ ḅe nwẹnị ò kun ịkasị ikoli ḅio ḅụ.

Sameriya Ḅịkị Mẹ

⁵ Anịtẹso Asiriya ḅẹ amadaḅọ ḅe nwẹnị ḅo ama mẹmgba gbaịn-gbaịn fọịn ma ḅo Sameriya la, tẹ tẹra kụra kẹ anị ikelema-koro tẹ sime.

⁶ Hosiya ama-da tẹ eseni akụra karama kụra mie Asiriya ḅẹ amadaḅọ ḅe Sameriya ọkị yee; tẹ ọ̀ nwẹnị Izirẹlịapụ ma dogi-so Asiriya mu tẹ ịn kẹ Ẹla ḅio na Gozanị ḅẹ tọrụ, Hazọ akaka ḅụ na, Midi ḅẹ apụ opu ama ma ḅio na ḅụ koroma.

⁷ Miemẹ kẹ go tẹ ọkọ mịẹ ye anie Izirẹlịapụ ma KỊNỊNYANAḄỌ ịna Tamụnọ ḅe tẹ Ijiputi ama mẹ ḅio ịn ọkị-ḅo, Fero Ijiputi ḅẹ amadaḅọ ḅe ḅara-ḅio ịn pakama-ḅo ḅọ ḅe ḅụụ si mịẹtẹ oru-atamụnọ ḍiki-ḅalafa

⁸ tẹ KỊNỊNYANAḄỌ ḅe Izirẹlịapụ ma tọrọkọ ḅụ dee-siin opu asịẹ ma mịẹ-mịẹ aị ma tẹ Izirẹlị ḅe amadapụ ma kẹ in ḍie etela mẹ ḅụ mẹnjị tẹ ẹrẹsị

⁹ Izirẹlịapụ ma ḅọị ḅara kẹ KỊNỊNYANAḄỌ ịna Tamụnọ ḅe ḅụụ kura-a aị mịẹm. Ini ịna ama mamgba ḅio gele ayeyọ (oru awarị) nama-nama ịna aḅụụ pịrị famam, ama koru kụrọtẹ (kala-ama) ḅụ ọkị mu ọmụ-aị kẹ mịẹ kụrọma opu ama ma la;

¹⁰ gele tụndụ ọgọnọ na, eleleinda tọrụ ḅịyarị opu asịn goyegoye suku ḅụ na ini ịḅalị na Asẹra oru-afụḅara na sịẹma ịna aḅụụ pịrịm,

¹¹ tẹ arị gele ayeyọ mamgba ḅụ kụnụaị dọkịmam, opu asịẹ ma tẹ KỊNỊNYANAḄỌ ḅe ịna tọrọkọ ḅụ dogi siin apụ ma wẹrịtẹ mịẹ ḅara. Ịn si-sịḅịḅio amịẹaị mịẹm, kẹ KỊNỊNYANAḄỌ ḅe mịẹ tẹ ori ịganị,

¹² ịn sunsin oru pịrịm aniemẹ tẹ KỊNỊNYANAḄỌ ḅe ịn ḅẹẹm, “Miemẹ ọ́ mịẹ ma,” ḅẹẹ ye mẹ.

¹³ Ịn ọkọ mịẹm, anịsọ KỊNỊNYANAḄỌ ḅe ịkịankoroḅọ goḅọ-goḅọ na, so-ḅịrịḅọ goḅọ-goḅọ na Izirẹlị na Juda na aḅeri nụnụ-nụnụ tẹ ḅẹẹm, “Ọmịnị ọmịna asi etela ma ḅụ pịkịị, tẹ à tọn ọ́ pịrị aị ma kokoo, anie Oloko mẹ tẹ à kẹ ọmịna atẹngịapụ pịrị ye mẹ pịkị kẹ ị̀ afịrịmẹnjịapụ ịkịankoroapụ ma ḅara ọ́ fịrịma ye mẹ ḅụ kẹẹ wararị aị ma.”

¹⁴ Kụma ịn sịḅịḅio kụrọma tẹ poki-a, ịna aḍapụ ma wẹrịtẹ sime-ḅara inima tẹ KỊNỊNYANAḄỌ ịna Tamụnọ ḅe minini-a apụ ma,

¹⁵ Ịn kẹẹ wararị ori Oloko ma na, ori ọḅọkụ tẹ ori ịna aḍapụ na fị ye mẹ na, ọ̀ kẹ ịna aḅeri nụnụ aị ma ḍiki-simam. Ini iruo oru ma ḍukamẹnjị tẹ iruom, tẹ ini ikelema-koro wararị opu asịẹ ma ḍukamẹnjịm, inima tẹ KỊNỊNYANAḄỌ ḅe tọn ịn pịrịm mịnẹ ini ịn ḍikima ye mịẹ ma kẹ ḅẹẹ apụ ma.

¹⁶ Ịn KỊNỊNYANAḄỌ ịna Tamụnọ ḅe tọn aị mamgba sịkị tẹ ḅara kẹ tẹmẹ maa anambulo awọmẹ kịka aị tẹmẹ ịna aḅụụ pịrị tẹ; ịn Asẹra fụḅara mịẹm tẹ sunsin kẹ So-ḅio sime aị mamgba pịrị tẹ fịrịmẹnjị Balị pịrịm.

¹⁷ Ini ịna owiapụ-awọmẹ na eremịna-awọmẹ na dọkịmam kẹ agba mịẹ ḅara ḅụ, ịn ḅịrịapụ na majịkị-mịẹapụ na warị ye ḅiim, tẹ ịna aḅụụ kẹ KỊNỊNYANAḄỌ ḅe ḍiki-tọrụ ḅụ siye mịẹ dẹrịmam, kẹ ọ̀ mịẹ tẹ ori ịganị.

¹⁸ Anịẹrẹsị KỊNỊNYANAḄỌ ḅe kpọma ịganị Izirẹlị pịrịm, tẹ ò ḍiki-tọrụ ḅụ ịn saakị siinm; gbọrụḅọ-sọ kirikọn-a Juda furo mẹ ngẹrị sikima.

¹⁹ Juda sọ KỊNỊNYANAḄỌ ịna Tamụnọ ḅe tọn aị ma koko-a, kụma arị amịẹaị ma tẹ Izirẹlị kẹ ịn ḍie aị ma mie ịn ḍiki-mẹnjị ye.

²⁰ KỊNỊNYANAḄỌ ḅe nwẹnị Izirẹlị ḅụ paka-ḅo apụ mamgba sịkị, tẹ ḅụụ-fụka kẹ ịn pịrị, ịn kẹ ye sima apụ ḅara-ḅio suu, nwenii ori ò ḍiki-tọrụ ḅụ ini nguma famam.

²¹ Ò Devidi warị mẹ ḅụ Izirẹlị kan tẹso, Izirẹlị Jerobohamụ Nebatị owiḅọtụḅọ ḅe kẹ amadaḅọ sọmam. Jerobohamụ nwẹnị KỊNỊNYANAḄỌ ḅe ḍukamẹnjị ḅụ Izirẹlị dee tẹ ịn mịẹtẹ ịn gburo-gburotẹ si mịẹ.

²² Izirẹlịapụ ma arị asi ma tẹ Jerobohamụ mịẹ aị mamgba ḅụ mẹnjịm; ini arị ḅụ ḅụụ sikima-a,

²³ nwenii KỊNỊNYANAḄỌ ḅe ò ḍiki-tọrụ ḅụ ịn saakị siinm, ọ̀ wẹrịtẹ ori afịrịmẹnjịapụ ịkịankoroapụ mamgba ḅụụ ḅụ ḍuko tẹ ḅara. Mị-ḅara mie Izirẹlị kẹ ịn soku-ḅẹ ama ḅụ saakị mu Asiriya ḅụ omoni-sọ nwenii ḅo mịmgba la ye.

Asiriya Ḅẹ Apụ Ma Mu Izirẹlị Ḅụ Kuro Angam

²⁴ Asiriya ḅẹ amadaḅọ nwẹnị Babịlọnị na, Kuta na, Ava na, Hamatị na, Sẹfavemu na ḅụ kịnị ọkị-ḅo tẹ kẹ Izirẹlịapụ ma kiri ḅụ Sameriya ḅẹ opu ama ma ḅio kuroma, tẹ ini arịḅẹ opu ama ma ḅio kuro anga.

²⁵ Anịjụ, ịna suku-saakị anga ḅụ, ịn KỊNỊNYANAḄỌ ḅe ḍiki-ḅalafa-a; ọkọẹrẹsị KỊNỊNYANAḄỌ ḅe nwẹnị ọkụkụ kẹ ịna ogboku fịrịma, arị aị ma tẹ ini ḅẹ ja apụ ḅaa aị ma.

²⁶ Anieḅụ ịn nwẹnị ḍuko Asiriya ḅẹ amadaḅọ ḅe pịrị, “Opu asịẹ ma tẹ í mu dogi-so tẹ kẹ Sameriya ḅẹ opu ama ma ḅụ koroma asịẹ ma, ama mẹ ḅẹ tamụnọ ḅe oloko nimi-a; anịẹrẹsị ori ọkụkụ kẹ ịna ogbo fịrịmam, tẹ ḍikii, ini ịn ḅaarị, gbala ini ama mẹ ḅẹ tamụnọ ḅe oloko mẹ nimi-a ẹrẹsị.”

²⁷ Anịtẹso Asiriya ḅẹ amadaḅọ ḅe nwẹnị tọn, “Anịjụ ó dogi-so agbamịẹapụ ma ḅẹ gbọrụḅọ kẹ anịanga fịrịma, tẹ yee ò mu anịanga anga, tẹ ama mẹ ḅẹ tamụnọ ḅe oloko mẹ kẹ ịn toluma.”

²⁸ Anieḅụ Sameriya ḅụ ịn dogi-so agbamịẹapụ ma ḅẹ gbọrụḅọ nwẹnị ḅo Bẹtẹlị ḅụ anga, tẹ ịn KỊNỊNYANAḄỌ ḅe mangịma ḅẹ ḅara kẹ ịn tolumam.

²⁹ Kụma ọrụ sịẹ-sịẹ paa amịna oru-afụḅara mịẹ-mịẹ tẹ kẹ Sameriya ḅẹ apụ ma gele-ayeyọ ḅụ nama wararị oru-awarị ma ḅio sunm; ọrụ sịẹ-sịẹ ịn simearị opu ama ma ḅio amịna nye mịẹm.

³⁰ Babịlọnị ḅẹ apụ Sukọtị Bẹnoti oru-fụḅara mịẹm, Kuti ḅẹ apụ Nagali oru-fụḅara mịẹm, Hamatị ḅẹ apụ Asịma oru-fụḅara mịẹm,

³¹ tẹ Ava ḅẹ apụ Nibazị na Tatakị na oru-afụḅara mịẹm; Sẹfavemu ḅẹ apụ fịnị ḅio ịna awọmẹ dọkịma-dọkịma tẹ kẹ Sẹfavemu ḅẹ oru-atamụnọ Adiramẹlẹkị na Anamẹlẹkị na pịrịm.

³² Ịn KỊNỊNYANAḄỌ ḅe sọ ḍiki ḅalafaam, tẹ ịna ogboku ḅụ kịrị-kịrị apụ tọnm gele-ayeyọ ma ḅẹ agbamịẹapụ ḅara ḅụ; inima tẹ oru-awarị ma ḅio agba mịẹ ịn pịrị ḅarị apụ ma.

³³ Mị-ḅara mie ịn kẹ KỊNỊNYANAḄỌ ḅe mangịma ḅara, kụma ịn pịkị fịrịmẹnjị ịna oru-atamụnọ ma sọ pịrịm ịna opu asịẹ ma tẹ ini ịna dogi-so apụ ma ama anga anga ḅara ḅụ.

³⁴ Ọkị ḅo mịmgba mẹ sọ la ini elemu mịẹ-mịẹ ḅara mẹ mie ịn mịẹarị ḅara. Ịn KỊNỊNYANAḄỌ ḅe ḍiki-ḅalafa-a, ịn kẹẹ wararị oloko ma, anịanịa kụrọ ḅara-ḅio sime apụ ma tọn aị ma, anịanịa oloko mẹ, anịanịa KỊNỊNYANAḄỌ ḅe tọn Jekọbụ awọmẹ ma tẹ ori Izirẹlị kẹ ẹrẹ kẹ sịn apụ ma pịrị tọn ye mẹ sọ ịn ḍuka mẹnjị-a.

³⁵ KỊNỊNYANAḄỌ ḅe ini na ọḅọkụ fị tẹ tọn ịn pịrịm “Ọmịnị oru-atamụnọ ḍiki-ḅalafa, anịanịa sịḅị-tuu ịn pịrị, anịanịa fịrịmẹnjị, anịanịa agbamịẹ in pịrị ma.

³⁶ Kụma ọmịnị ì ḍiki-ḅalafaa, yẹrị ḅe tẹ opu kụrọ kẹ Ijiputi ama mẹ ḅio ọ́ pakama-ḅo ḅọ ḅe; ọmịnị ọmịna aḅụụ iderima ị̀ pịrịị; yẹrị mie ọmịnị agbamịẹ pịrị ḅarị ye.

³⁷ À kẹ ọ́ pịrị wararị kẹẹ tẹ oloko ma na, sụa wararị oloko mẹ na, tọn wararị aị ma na mie ọmịnị ẹbị tẹ mịẹ ḅarị ye. Ọmịnị oru-atamụnọ ḍiki-ḅalafa ma.

³⁸ Ọ́ pịkị àrị ọmịnị na fị tẹ ọḅọkụ mẹ kẹ ḅioḅọrọma ma.

³⁹ Ọmịnị ị̀ ḅịḅị pokii, yẹrị KỊNỊNYANAḄỌ ọmịna Tamụnọ ḅe, tẹ àrị ọmịnị na fịya-a apụ mamgba ḅara-ḅio ọ́ ḍụa-ḅọrọma ḅa.”

⁴⁰ Anịsọ ịn poki ḍụkụ-a kụma ini elemu mịẹ-mịẹ ḅara mie ịn mịẹ ye.

⁴¹ Mị-ḅara mie mịna opu asịẹ ma kẹ KỊNỊNYANAḄỌ ḅe ḍiki-ḅalafafa tẹ fịrịmẹnjị ini ḅara kẹ tẹmẹ-aị ma sọ pịrị ḅara; ịna awọmẹ ma-o, ịna awọmẹ ma awọmẹ sọ anị gbọrụ ḅara mịẹm ịna aḍapụ ma wẹrịtẹ mịẹ ḅara, mie ịn mịẹ ḅo mịmgba la ye.