2 Amadapụ 16 - FỊAFỊA BAỊBỤLỤ

Juda Ḅẹ Amadaḅọ Ahazi

¹ Pẹka, Rẹmalaya owiḅọtụḅọ ḅe ama-da tẹ tẹra kụra fa si karama kụra ḅụ, Juda ḅẹ amadaḅọ Ahazi Jotamụ owiḅọtụḅọ ḅe saakị ama-dam.

² Ahazi sịḅị si kụra ḅọrọ tẹso, ọ̀ saakị ama-dam, tẹ ini akụra fa si kẹ Jeruselemu ḅụ ama-dam. Ọ̀ KỊNỊNYANAḄỌ ọ̀ Tamụnọ ḅe ḍiki-tọrụ ḅụ kuraye mịẹ-a ọ̀ ḍa Devidi wẹrịtẹ mịẹ ḅara,

³ kụma Izirẹlị ḅẹ amadapụ ma etela mie ọ̀ mẹnjị ye, Ori ọ̀ tụḅọ sọ dọkịma tẹ kẹ agba mịẹm, tọn-tọn amịẹaị tẹ KỊNỊNYANAḄỌ ḅẹ Izirẹlịapụ ma tọrọkọ dee opu asịẹ ma wẹrịtẹ mịẹ-mịẹ ḅara mẹ.

⁴ Ori agba mịẹtẹ kụnụaị dọkịmam gele ayeyọ ma na, tụndụ ma na ọgọnọ ḅụ na eleleinda tọrụ sụa opu sin goyegoye suku ḅụ na.

⁵ Anịtẹso Rezini Siriya ḅẹ amadaḅọ na, Pẹka Rẹmalaya owiḅọtụḅọ, Izirẹlị ḅẹ amadaḅọ ḅe na ḅo owu kẹ Jeruselemu paka ḅẹ tẹ Ahazi ikelema-korom, kụma ini inetẹ ọ̀ nẹngịma-a

⁶ Anị sakị mie Idọmụ ḅẹ amadaḅọ Juda ḅara ḅụ siin Elatị ọkị tẹ Juda ḅẹ apụ ma dee-siin sakị; tẹ Idọmụ ḅẹ apụ ma nwẹnị Elatị ḅo tẹ anga, ini anga nwenii ḅo mịmgba la anga mẹ.

⁷ Anieḅụ Ahazi nwẹnị oku kẹ Asiriya ḅẹ amadaḅọ Tigilati-Pilesa fịrịma, tẹ ḅẹẹm, “Yẹrị anie ị́ fịrịmẹnjịḅọ, pịkị ị́ tụḅọ. Ḅoo, tẹ ị̀ ḅọrọmaa, owu kẹ ị̀ pakarị Siriya ḅẹ amadaḅọ ḅe na, Izirẹlị ḅẹ amadaḅọ ḅe na aḅara-ḅio.”

⁸ Ahazi seleḅa na golu na tẹ KỊNỊNYANAḄỌ ḅe warị mẹ ḅio na amadaḅọ ḅe ngọ warị ḅio ọ̀ ḍọkị-ẹrị aị ma sọ ọkị tẹ kẹ ḍiepịrịye ḅụ Asiriya ḅẹ amadaḅọ fịrịmam

⁹ Asiriya ḅẹ amadaḅọ ḅe nwẹnị ọ̀ ḅịḅị poki tẹ mẹnjị-ḅo owu kẹ Damasịkọsị paka tẹ anị ọkị; ọ̀ nwẹnị omoni ḅara kẹ anị ama ḅẹ apụ ma kun-so Ka-a mu, tẹ Rezini ḅaa.

¹⁰ Amadaḅọ Ahazi Damasịkọsị ḅụ Asiriya ḅẹ ama-da Tigilati-pilesa na donia ḅẹ mu tẹso, ọ̀ nwẹnị Damasịkọsị sime ebeka (anie agbamịẹ-anga) mẹ ẹrị. Amadaḅọ Ahazi nwẹnị anị gbọrsịḅị sime-ḅara mẹ tọnma tẹ kẹ Uraya agbamịẹḅọ ḅe fịrịma.

¹¹ Yuraya agbamịẹḅọ ḅe nwẹnị Amadaḅọ Ahazi kẹ Damasịkọsị ḅụ ọ̀ fịrịma agbamịẹ-anga mẹ wẹrịtẹ sime-ḅara mẹmgba kẹ anị nama tẹrẹmẹ Amadaḅọ Ahazi Damasịkọsị ḅụ ḅo lam.

¹² Amadaḅọ ḅe Damasịkọsị ḅụ ḅo la tẹso, ọ̀ nwẹnị mu agbamịẹ-anga mẹ ḍiki. Anịtẹso amadaḅọ ḅe nwẹnị mẹnjị agbamịẹ-anga mẹ kpeki, tẹ anị ọgọnọ kpọlị,

¹³ tẹ ọ̀ mịẹ ḅẹ dọkịma-agba na, ḍọkọḍọkọ asịnmgbọlụ agba na, iru sara agba na mịẹ, tẹ nwẹnị ò dein-pịrị-agba mẹ ḅẹ ọmbie mẹ kẹ agbamịẹ-anga mẹ ọgọnọ wakị-sara.

¹⁴ Ọ̀ nwẹnị KỊNỊNYANAḄỌ ḅe tọrọkọ sime ojo agbamịẹ-anga tẹ KỊNỊNYANAḄỌ ḅe warị mẹ tọrọkọ na ori ebeka mẹ na ogboku sime ye mẹ, anị sime anga mẹ ḅụ anị saakị-siin tẹ anị kẹ ori ebeka mẹ ọgọnọ-jụ pakịrị anga ḅụ sịẹma.

¹⁵ Amadaḅọ Ahazi nwẹnị tọn Yuraya agbamịẹḅọ ḅe pịrị tẹ ḅẹẹ, “Opu ebeka mẹ ọgọnọ dede agba mẹ na, ḅoḅiri ḍọkọḍọkọ sịnmgbọlị agba mẹ na, amadaḅọ ḅe dọkịma-agba mẹ na, ọ̀ ḍọkọḍọkọ sịnmgbọlị agba mẹ na, kẹ ama mẹ ḅio ḅẹ atomi mamgba dọkịma-agba ḅụ sụa ịna ḍọkọḍọkọ asịnmgbọlụ agba na, ịna iru agba na dọkịmaa. Tẹ dọkịma-agba mẹ ḅẹ ọmbie mẹmgba na, agba mẹ ọmbie mẹmgba na kẹ anị ọgọnọ sara; kụma ojo agbamịẹ-anga mẹ sime ị̀ pịrịtẹ àrị anị ḅụ ye gbela ḅa.”

¹⁶ Yuraya agbamịẹḅọ ḅe nwẹnị Amadaḅọ Ahazi wẹrịtẹ tọn ọ̀ pịrị ḅara mẹmgba mịẹm.

¹⁷ Amadaḅọ Ahazi nwẹnị ịn mịẹ sịẹma yedogi-kirimẹnjị-arụ mẹ dogi sịẹma aḅụọ ma pẹlẹ, tẹ arị ḅụ ojo ẹfẹrẹ ma saakị-siin, nwẹnị pịkị in ojo kẹ tẹmẹ pootẹ-anambulo ma ọgọnọ sime minji sụa opu-apanị ma sin tẹ arị kẹ ḍụḅarị kẹ nama saakị ye ọgọnọ gbana.

¹⁸ Ọ̀ nwẹnị pịkị KỊNỊNYANAḄỌ ḅe warị mẹ ḅụụ ịn gbaịn tẹ kẹ Ịnyọsara-Ene mẹ pịrị etela mẹ tẹ ịn amadaḅọ warị mẹ ḅio nama tẹ ye mẹ na, sime amadaḅọ ḅe pịrị mẹnjị-paka ḅọkọ mẹ na sin Asiriya ḅẹ amadaḅọ ḅe gotẹ.

¹⁹ Mịọkụ kirikọntẹ Ahazi amịẹaị tẹ ọ̀ mịẹ aị ma, Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

²⁰ Ahazi nwẹnị fịị, tẹ ịn nwẹnị Devidi opu ama mẹ ḅio ò ḍiḅi. Tẹ ori owiḅọtụḅọ Hẹzịkaya nwẹnị ò kiri ọkị tẹ ama-da.