2 Amadapụ 15 - FỊAFỊA BAỊBỤLỤ

Juda Ḅẹ Amadaḅọ Uzaya

¹ Izirẹlị ḅẹ amadaḅọ Jerobohamụ ama-da tẹ tẹra akụra fa suei karama kụra ḅụ Amazaya owiḅọtụḅọ Uzaya, Juda ḅẹ amadaḅọ saakị ama-dam.

² Inia akụra fa si ọ̀ sịḅị ḅọrọ tẹso, ọ̀ saakị ama-dam, tẹ kụra amesi oyi finji na maa kụra na kẹ Jeruselemu ḅụ ama-dam. Ò iyingi ẹrẹ Jekolaya, Jeruselemu ḅẹ ḅọ.

³ Ọ̀ KỊNỊNYANAḄỌ ḅe ḍiki-tọrụ ḅụ kuraye mịẹm, ọ̀ da Amazaya wẹrịtẹ ye mamgba ḅụ mịẹ ḅara.

⁴ Anịsọ oru-koroapụ ma agba mịẹ-mịẹ gele ayeyọ ma, ini arị kan-sara-a. Tomi ma paa agba mịẹ-mịẹ tẹ kụnụaị dọkịmarị, gele ayeyọ ma ọgọnọ ḅụ.

⁵ KỊNỊNYANAḄỌ ḅe nwẹnị sofịnị-obi kẹ amadaḅọ ḅe fomu tẹ ori anị kọn nwenii ọ̀ fịị ene lam. Ori ngẹrị anie ḅele wararị warị-ḅio anga yee. Amadaḅọ ḅe owiḅọtụḅọ Jotamụ nwẹnị bebe warị mẹ onyo-sẹịn, tẹ ḅẹrẹtọn tomi ma pịrị ama mẹ ḅio.

⁶ Mịọkụ kirikọntẹ Uzaya ye-mịẹ-ḅara na, ọ̀ mịẹ aị mamgba na, Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

⁷ Uzaya nwẹnị fịị, tẹ ịn nwẹnị ọ̀ kẹ Devidi opu ama mẹ ḅio ori aḍapụ ma na ḍiḅi gboloma tẹ ori owiḅọtụḅọ Jotamụ nwẹnị ò kiri ḅụ ama-da.

Izirẹlị Ḅẹ Amadaḅọ Zẹkaraya

⁸ Juda ḅẹ Amadaḅọ Uzaya ama-da tẹ maa kụra fa kụra amesi karama kụra ḅụ Jerobohamụ owiḅọtụḅọ Zẹkaraya sonioa akalụ kẹ Sameriya ḅụ sime tẹ Izirẹlị dam.

⁹ Ọ̀ ḍa mịẹ ḅara, ọ̀ KỊNỊNYANAḄỌ ḅe ḍiki-tọrụ ḅụ siye mịẹm. Nebatị owiḅọtụḅọ Jerobohamụ mịẹ asi ma ḅụ ori ọ̀ ḅụụ wẹrị ḅelema-a, arị aị ma tẹ ọ̀ mịẹ tẹ Izirẹlị si mịẹ aị ma.

¹⁰ Jabẹsị owiḅọtụḅọ Salumu nwẹnị ḅẹrẹ-ḅiya ọ̀ pịrị tẹ ọ̀ ḅaa, eneḅaka-fịafịa-ogbo ḅụ, tẹ nwẹnị ò kiri ọkị tẹ ama mẹ da.

¹¹ Mịọkụ kirikọntẹ Zẹkaraya mịẹ aị ma ḍikii, Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

¹² Miemẹ mie KỊNỊNYANAḄỌ ḅe minini Jehu piri ye mẹẹ, “Ị́ owiapụ-awọmẹ Izirẹlị ḅẹ emine mẹ ọgọnọ lẹgị mu inia aḅụọ ama ḅụọ la ḅa.” Anie anị mịẹ ḅara.

Izirẹlị Ḅẹ Amadaḅọ Salumu

¹³ Juda ḅẹ amadaḅọ Uziya ama-da tẹ gbọrụ kụra fa kụra amesi karama kụra ḅụụ Jabẹsị owiḅọtụḅọ Salumu saakị ama-dam, tẹ gbọrụ akalụ kẹ Sameriya ḅụ ama-dam.

¹⁴ Anịtẹso Tariza ḅụ ḅo Gadi owiḅọtụḅọ Mẹnahẹmụ nwẹnị Sameriya ḅọ, tẹ Jabẹsị owiḅọtụḅọ Salumu fomu gbin tẹ ọ̀ ḅaa Sameriya mẹ ḅụ, tẹ ò kiri ọkị tẹ ama-dam.

¹⁵ Mịọkụ kirikọntẹ Salumu mịẹ aị ma, na ò ḅiya-ḅẹrẹ mẹ na, Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

¹⁶ Mẹnahẹmụ nwẹnị Tariza ḅụ saakị Tapuwa ye-yọ anị ḅio sime apụ mamgba na ḅaa fama anị sakị mẹ ḅụ; gbala ini anị ḅẹ ogigo-aḅọkọ ma finji ọ̀ pịrị-a ẹrẹsị ori ama mẹ ọkị tẹ anị ḅio fura tẹ ereme mamgba furo puum (tẹ awọmẹ ma pakama-ḅom.)

Izirẹlị ḅẹ Amadaḅọ Mẹnahẹmụ

¹⁷ Juda ḅẹ amadaḅọ Azaraya ama-da tẹ gbọrụ kụra fa kụra amesi karama kụra ḅụ Mẹnahẹmụ Gadi owiḅọtụḅọ ḅe saakị Izirẹlị dam Sameriya ḅụ, tẹ oyia kụra kẹ ama-dam.

¹⁸ Ọ̀ KỊNỊNYANAḄỌ ḅe ḍiki-tọrụ ḅụ siye mịẹm Jerobohamụ Nebatị owiḅọtụḅọ ḅe asi mamgba ḅụ ori ọ̀ ḅụụ wẹrị ḅelema-a ori ene mamgba ḅụ, aniemẹ tẹ ọ̀ mịẹtẹ Izirẹlị si mịẹ ye mẹ.

¹⁹ Tigilati-Pilesa, Asiriya ḅẹ amadaḅọ ḅe nwẹnị owu kẹ ama mẹ paka ḅẹ ḅo; Mẹnahẹmụ nwẹnị seleḅa apakịrị-apakịrị puku jeia si tesi finji na jei apuku na kẹ ọ̀ pịrị mịnẹ ọ̀ ḅarasụa ọ̀ pịrị tẹ mịẹtẹ ori ọlọ tẹ ama-da kụrọ mẹ mịẹ kụrọma ḅẹ ḅara.

²⁰ Mẹnahẹmụ kụrọ-ḅara kẹ Izirẹlị ḅụ ye nyana apụ mamgba ḅara igbigi mẹ oso ọkịm sịḅị-sịḅị seleḅa pakịrị amesi amesi gbẹẹm, kẹ Asiriya ḅẹ amadaḅọ ḅe pịrị ḅe ḅara. Anieḅụ Asiriya ḅẹ amadaḅọ ḅe nwẹnị ọḅụ pịkị tẹ mẹnjị-so tẹ ḅarị anịjụ ḅụ ama mẹ ḅio sime-a.

²¹ Mịọkụ kirikọntẹ Mẹnahẹmụ amịẹaị na, ọ̀ mịẹ aị mamgba na, Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

²² Mẹnahẹmụ nwẹnị fịị, tẹ ori owiḅọtụḅọ Pẹkahaya nwẹnị ò kiri ọkị tẹ ama-da.

Izirẹlị Ḅẹ Amadapụ Pẹkahaya

²³ Juda ḅẹ amadaḅọ Azaraya ama-da tẹ kụra amesi oyi finji karama kụra ḅụ Pẹkahaya Mẹnahẹmụ owiḅọtụḅọ ḅe saakị Izirẹlị dam Sameriya ḅụ tẹ maa kụra kẹ ama-dam.

²⁴ Ọ̀ KỊNỊNYANAḄỌ ḅe ḍiki-tọrụ ḅụ siye mịẹm. Jerobohamụ Nebatị owiḅọtụḅọ ḅe asi ma tẹ ọ̀ mịẹtẹ Izirẹlị si mịẹ aị ma ḅụ ọ̀ pịkịma-so-a.

²⁵ Pẹka, Rẹmalaya owiḅọtụḅọ, ori ọmụ-alaḅọ ḅe na Gilẹdị ḅẹ owiapụ mesi oyi finji na nwẹnị ḅẹrẹ-ḅiya ọ̀ pịrị tẹ ọ̀ ḅaa Sameriya ḅụ; amadaḅọ ḅe warị mẹ ḅẹ kụrọ tẹ gele ḅọị anga ḅụ ori ọ̀ ḅaam; tẹ ò kiri ọkị tẹ ama-dam.

²⁶ Mịọkụ kirikọntẹ Pẹkahaya amịẹaị, na ọ̀ mịẹ aị mamgba na, Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

Izirẹlị Ḅẹ Amadaḅọ Pẹka

²⁷ Juda ḅẹ amadaḅọ Azaraya ama-da tẹ kụra amesi oyi finji na maa kụra na karama kụra ḅụ Pẹka Rẹmalaya owiḅọtụḅọ ḅe saakị Izirẹlị dam Sameriya ḅụ, tẹ si kụra kẹ ama-dam.

²⁸ Ọ̀ KỊNỊNYANAḄỌ ḅe ḍiki-tọrụ ḅụ siye mịẹm; ò Jerobohamụ Nebatị owiḅọtụḅọ mịẹ asi ma tẹ mịẹtẹ Izirẹlị si mịẹ aị ma ḅụ ọ̀ ḅụụ ḅelema-a.

²⁹ Pẹka, Izirẹlị ḅẹ amadaḅọ ḅe ene ma ḅụ mie Asiriya ḅẹ amadaḅọ Tigilati-Pilesa ḅo Nafutali ama mamgba Ijọnị na, Ebẹlị-bẹtị-mahaka na, Janoha, na, Kẹdẹsị na, Hazọ na, Gilẹdị na, Galili na ọkị tẹ omoni ḅara ḅụ tomi mamgba kun so Asiriya mum.

³⁰ Anịtẹso Hosiya, Ẹla owiḅọtụḅọ ḅe nwẹnị ḅẹrẹ-ḅiya Pẹka, Rẹmalaya owiḅọtụḅọ ḅe pịrị, tẹ ò fomu gbin tẹ ọ̀ ḅaa tẹ ò kiri ọkị tẹ ama mẹ da Jotamụ Uziya owiḅọtụḅọ ḅe ama-da tẹ si kụra karama kụra ḅụ.

³¹ Mịọkụ kirikọntẹ Pẹka amịẹaị na, ọ̀ mie aị mamgba na, Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

Juda Ḅẹ Amadaḅọ Jotamụ

³² Izirẹlị ḅẹ amadaḅọ, Pẹka, Rẹmalaya owiḅọtụḅọ ḅe ama-da tẹ maaịn karama kụra ḅụ Jotamụ Uziya owiḅọtụḅọ, Juda ḅẹ amadaḅọ ḅe saakị ama-dam.

³³ Ọ̀ sịḅị si sọnọa kụra finji ḅọrọ tẹso ọ̀ saakị ama-dam, tẹ ini akụra fa si kẹ Jeruselemu ḅụ ama-dam. Ò iyingi ẹrẹ Jerusiya, Zadọkụ ẹrẹḅọtụḅọ.

³⁴ Ọ̀ KỊNỊNYANAḄỌ ḅe ḍiki-tọrụ ḅụ kuraye mịẹm, ọ̀ ḍa Uziya wẹrịtẹ mịẹ ḅara.

³⁵ Anịsọ oru mịẹ apụ ma gele ayeyọ ma ini arị sin-a; tomi ma paa mu agba mịẹ-mịẹ tẹ kụnụaị dọkịmarị gele anga ma ḅụ. Ori mie KỊNỊNYANAḄỌ ḅe warị mẹ ḅụ ọgọnọ-jụ ḅe ogigo-ḅọkọ mẹ nama ye.

³⁶ Mịọkụ kirikọntẹ Jotamụ amịẹaị, na ọ̀ mịẹ aị mamgba na Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

³⁷ Arị ene ma mie KỊNỊNYANAḄỌ ḅe saakị Rezini Siriya ḅẹ amadaḅọ ḅe na Pẹka, Rẹmalaya owiḅọtụḅọ ḅe na fịrịma Juda si anga sịẹarị asakị ma.

³⁸ Jotamụ nwẹnị fịị, tẹ ịn nwẹnị ò ḍiḅi ọ̀ ḍa Devidi opu ama mẹ ḅio; tẹ ori owiḅọtụḅọ Ahazi nwẹnị ò kiri ọkị tẹ ama-da.