2 Amadapụ 14 - FỊAFỊA BAỊBỤLỤ

Juda Ḅẹ Amadaḅọ Amazaya

¹ Jehohahazị owiḅọtụḅọ Jehohazị Izirẹlị ḅẹ amadaḅọ ḅe ama-da tẹ maaịn karama kụra ḅụ Amazaya, Johasị owiḅọtụḅọ, Juda ḅẹ amadaḅọ saakị ama-dam.

² Si sọnọa kụra finji ọ̀ sịḅị ḅọrọ tẹso ọ̀ saakị ama-dam, tẹ gbọrụ kụra fa suei kẹ Jeruselemu ḅụ sime tẹ ama-dam. Ò iyingi ẹrẹ Jehohadini, árị anie Jeruselemu ḅẹ ḅọ.

³ Ọ̀ KỊNỊNYANAḄỌ ḅe tọrụ ḅụ kuraye mịẹm, anịsọ anị ori atẹngịḅọ Devidi mịẹ ḅara kịka-a; ye mamgba ḅụ ori ọ̀ da Johasị mịẹ ḅara mịẹm.

⁴ Kụma oru mịẹ apụ ma gele ayeyọ ma ini arị saakị siin-a tẹ tomi ma paa agba mịẹ-mịẹ tẹ kụnụaị dọkịmarị gele ayeyọ ma ḅụ.

⁵ Ama-da kụrọ mẹ ọ̀ ḅara-ḅio sọ kụrọ gbọrụ sakị ọ̀ nwẹnị ori afịrịmẹnjịapụ ma tẹ ọ̀ ḍa amadaḅọ ḅe ḅaa apụ ma ḅaa.

⁶ Kụma kịnị-ḅaapụ ma awọmẹ ma ori ịn ḅaa-a, KỊNỊNYANAḄỌ ḅe tọn anga mẹ, Mozizi Oloko Ḍiri mẹ ḅio kẹẹ wararị ye ḅụụ ḅụ, “Ịn ḍapụ-na-iyingiapụ-na ḅaa ma ịna awọmẹ ma mịẹ ḅo ye gotẹ, anịanịa ini awọmẹ ma ḅaa ma ịna ḍapụ-na-iyingiapụ-na sịḅị ẹrẹsị; kụma ọrụḅọ-ọrụḅọ mḅọ mịẹ si ḅẹ fịị kọn ḅa.”

⁷ Ịn Fụn kẹ sịn tụndụ-ogboku ḅụ ori Idọmụ ḅẹ kịnị puku sọnọa ẹndẹ finji ḅaam, tẹ kụrọ-ḅara ḅụ Sẹla nwẹn-sịn ye-yọ mẹ ọkị tẹ anị sịnm Jokitili anie anị ẹrẹ nwenii ḅo mịmgba lam.

⁸ Anịtẹso Amazaya nwẹnị fịrịmẹnjịapụ kẹ Jehohazị fịrịma Jehohahazị owiḅọtụḅọ, Jehu Izirẹlị ḅẹ amadaḅọ ḅe owiḅọtụḅọ ḅe, tẹ ḅẹẹm, “Ḅoo, yee wa owu sọ.”

⁹ Jehohazị Izirẹlị ḅẹ amadaḅọ ḅe nwẹnị Amazaya Juda ḅẹ amadaḅọ ḅe pakịrị, “Lẹbanọnị tụndụ ọgọnọ mẹ ḅụ, gbọrụ nangị nwẹnị ịn kẹ sida sịn-arị sịn mẹ ḅẹẹ, ‘Ị́ ẹrẹḅọtụḅọ kẹ ì owiḅọtụḅọ pịrị ò sime.’ Gbọrụ Lẹbanọnị ḅẹ piri-ḅio-ḅẹ nama nwẹnị mẹnjị-ḅọrọ tẹ nangị mẹ nanga ḅaa.

¹⁰ Ị́ karakara ḅara kẹ Idọmụ ḅẹ apụ ma ḅaam, tẹ anị ị́ sịḅị ḍụḅama tẹẹ. Anị boma mẹ í furo ḅiin, tẹ ama ọgọnọ simee. Í tiegotẹ okuro-na-ọkpaị-na ḅụ ịganị sịn-saakịarị, mịẹtẹ í Juda kẹ ị́ ḅụụ sụa tẹ ḅịkị ḅẹ ḅara?”

¹¹ Kụma Amazaya poki ḍụkụ-a. Anieḅụ Jehohazị Izirẹlị ḅẹ amadaḅọ ḅe nwẹnị paka-mu, tẹ ori na Amazaya Juda ḅẹ amadaḅọ ḅe na nwẹnị Bẹtị-semesi, anie sime Juda pịrị anga ḅụ jụmọ-jụmọ na ẹrịya-ẹrịya ọmụ ḅụ.

¹² Izirẹlị nwẹnị Juda nẹngịma tẹ ọmụgbin apụ ma ḅụụ ọrụḅọ-ọrụḅọ nwẹnị mangị mḅọ ama mu.

¹³ Jehohazị Izirẹlị ḅẹ amadaḅọ ḅe nwẹnị Amazaya Juda ḅẹ amadaḅọ Jehohasị owiḅọtụḅọ, Ahazaya taa-owiḅọtụḅọ ḅe kuun-ọkị Bẹtị-semesi ḅụ, tẹ nwẹnị Jeruselemu ḅo tẹ nwẹnị Jeruselemu onu mẹ ḅụ Iferemu Ogigo-ḅọkọ mẹ ḅụ so mu Ịkọlị ḅẹ Ogigo-ḅọkọ mẹ la ḅụ gbọrụ ẹndẹ na oyia asi aḅụọ-kuḅu finji (200 m) ḅẹ nangwọ kan sara.

¹⁴ KỊNỊNYANAḄỌ ḅe warị-ḅio na amadaḅọ ḅe ngọ-warị ḅio ọ̀ ḍọkị-ẹrị golu na, seleḅa na, ẹfẹrẹ mamgba na, pakịrị aị sọ ọ̀ tan-ọkị tẹ kẹ pịkịma-so Sameriya mum,

¹⁵ Mịọkụ kirikọntẹ Jehohazị ye-mịẹ-ḅara na, ori opu na, ọ̀ kẹ Amazaya Juda ḅẹ amadaḅọ na owu-sọ ḅara na, Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

¹⁶ Jehohazị nwẹnị fịị. In nwẹnị ọ̀ kẹ Sameriya ḅụ Izirẹlị ḅẹ amadapụ ma na ḍiḅi; tẹ ori owiḅọtụḅọ Jerobohamụ nwẹnị ò kiri ḅụ ama-da.

Juda ḅẹ Amadaḅọ Amazaya Fịịm

¹⁷ Amazaya Johasị owiḅọtụḅọ Juda ḅẹ amadaḅọ ḅe jei akụra kẹ ḍumo simem Jehohasị owiḅọtụḅọ Jehohazị Izirẹlị ḅẹ amadaḅọ ḅe fịị tẹso.

¹⁸ Mịọkụ kirikọntẹ Amazaya mịẹ aị ma Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

¹⁹ Ịn Jeruselemu ḅụ ḅẹrẹ-ḅiya ọ̀ pịrịm, tẹ ọ̀ mangị kẹ so Lakisi mum. Kụma ịn kịnị fịrịma Lakisi ḅụ ọ̀ ḍọkụma-mum, tẹ anịjụ ọ̀ ḅaam.

²⁰ Ịn nwẹnị asụ ọgọnọ ḅụ ò dogi Jeruselemu ḅo tẹ Devidi opu ama mẹ ḅio ọ̀ kẹ ori aḍapụ ma ḍiḅi anga ḅụ ḍiḅim.

²¹ Juda ḅẹ apụ mamgba nwẹnị Azaraya, inia kụra fa si sịḅị ḅụ ḅọrọ tẹ ḅọ ọkị kẹ ọ̀ da Amazaya kiri ḅụ amadaḅọ sọma.

²² Ori siin Elatị ọkị tẹ namam, tẹ anị pịkịma-ḅo Juda pịrịm ọ̀ ḍa fịị tẹso.

Izirẹlị Ḅẹ Amadapụ Ḅụ Maaịn Karama Jerobohamụ

²³ Amazaya Johasị owiḅọtụḅọ, Juda ḅẹ amadaḅọ ḅe ama-da tẹ jei akụra karama kụra ḅụ, Izirẹlị ḅẹ amadaḅọ Jerobohamụ, Johasị owiḅọtụḅọ ḅe saakị ama-dam Sameriya ḅụ, tẹ kụra amesi gbọrụ kụra finji kẹ ama-dam.

²⁴ Ọ̀ KỊNỊNYANAḄỌ ḅe ḍiki-tọrụ ḅụ siye mịẹm. Nebatị owiḅọtụḅọ Jerobohamụ mịẹ asi mamgba ḅụ ori ọ̀ ḅụụ wẹrị ḅelema-a, arị aị ma tẹ ọ̀ mịẹtẹ Izirẹlị si mịẹ aị ma.

²⁵ Tarị sime Izirẹlị pịrị ye-yọ, mẹnjị Hamatị soarị anga mẹ ḅụ ọkị mu Araba Tọrụ mẹ la mẹ ori anị pịkịma ḅom, KỊNỊNYANAḄỌ Izirẹlịapụ tẹkẹarị Tamụnọ ḅe ẹkwẹn-ḅịḅị mẹ tẹ ori ọ̀ fịrịmẹnjịḅọ Amitayị owiḅọtụḅọ Jona, Gati-hefa ḅụ ḅo ịkịankoroḅọ ḅe ḅụụ ḅọrọtẹ wẹrịtẹ ḍuko ḅara.

²⁶ Gbala KỊNỊNYANAḄỌ ḅe ẹrịm mịnẹ Izirẹlị ḅụụ-fụka mẹ kpọma akụ lamam, kẹ gotẹ ọkọ ḅẹẹarị, omoni ḅara-ḅio anịanịa sịḅị-nyana tẹ kirikọn gbọrụḅọ-sọ ofori, anịsakị ḅarasụa Izirẹlị pịrị-pịrị gbọrụḅọ-sọ pịkị ofori.

²⁷ Kụma KỊNỊNYANAḄỌ ḅe amụ ḅẹẹ-a mịnẹ ò so mẹ suku-ḅio ḅụ Izirẹlị ẹrẹ mẹ kọrọrọ-siin ḅa, ọkọẹrẹsị ọ̀ nwẹnị Johasị owiḅọtụḅọ Jerobohamụ ḅụụ ḅụ ḅọrọtẹ ịn ḅọrọma.

²⁸ Mịọkụ kirikọntẹ Jerobohamụ ye-mịẹ-ḅara na, ọ̀ mịẹ aị mamgba na, ọ̀ kụrọ na, ori owu-sọ ḅara na, Juda ọkị tẹ sime ịn pịrịtẹ Damasịkọsị na, Hamatị na pịkịma ḅo Izirẹlị pịrị ḅara mẹ Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

²⁹ Jerobohamụ nwẹnị fịị, tẹ ori owiḅọtụḅọ Zẹkaraya nwẹnị ò kiri ḅụ ama-da.