2 Amadapụ 13 - FỊAFỊA BAỊBỤLỤ

Izirẹlị ḅẹ Amadaḅọ Jehohahazị

¹ Ahazaya owiḅọtụḅọ Johasị Juda ḅẹ amadaḅọ ḅe ama-da tẹ si tẹra akụra finji karama kụra ḅụ Jehu owiḅọtụḅọ Jehohahazị saakị Sameriya ḅụ tẹra kụra fa si kẹ Izirẹlị dam.

² Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, tẹ Nebatị owiḅọtụḅọ Jerobohamụ mịẹ asi ma mịẹm anị aị ma tẹ Izirẹlị mịẹtẹ si mịẹ aị ma; ori arị ḅụ ḅụụ-sikima-a.

³ KỊNỊNYANAḄỌ ḅe ịganị nwẹnị Izirẹlị ọgọnọ gbana, tẹ ọ̀ nwẹnị sịkọpẹlẹ-a ḅara kẹ ịn kẹ Azẹlị Siriya ḅẹ amadaḅọ na, Azẹlị owiḅọtụḅọ Bẹnị-hadadị na ḅara-ḅio suu.

⁴ Anịtẹso Jehohahazị nwẹnị KỊNỊNYANAḄỌ ḅe tẹkẹ, tẹ KỊNỊNYANAḄỌ ḅe nwẹnị ọ̀ naa, ọ̀ gbala Siriya ḅẹ amadaḅọ kẹ Izirẹlị mẹ ponoma la ḅara ẹrịm ẹrẹsị.

⁵ Ọkọẹrẹsị KỊNỊNYANAḄỌ nwẹnị gbọrụ ḅọrọmaḅọ kẹ Izirẹlị pịrị, anie mịẹtẹ ịn Siriya ḅẹ apụ ma ḅara-ḅio paka-ḅom, tẹ Izirẹlịapụ ma nwẹnị tarị tarị ini ịna ama anga-anga ḅara kẹ angam.

⁶ Anịsọ Jerobohamụ warị ḅẹ asi ma ḅụ ịn ḅụụ-sikima-a aniemẹ tẹ ọ̀ mịẹtẹ Izirẹlị si mịẹ ye mẹ, kụma in paa arị ḍukamẹnjị tẹ Asịra fụḅara mẹ sọ Sameriya ḅụ simem.

⁷ Gbala-kọọn Jehohahazị pịrị ọmụ-ogbo anie asụ-dọkụ-ọmụapụ ḅụ kịnị amesi oyi finji, oyia akirimẹnjị-ọmụarụ na, ḅụọ kẹ mẹnjị ọmụgbin apụ ḅụ kịnị puku, sọnọ ẹndẹ finji nẹngị-a apụ; gbala Siriya ḅẹ amadaḅọ ịn ḅaa tẹ kẹ nanga ḅọrọ fọọn pembe ḅara mịẹ tẹ.

⁸ Mịọkụ kirikọntẹ Jehohahazị ye-mịẹ-ḅara na, ọ̀ mịẹ aị mamgba na, ịn kẹ Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

⁹ Anieḅụ Jehohazị nwẹnị fịị, tẹ in nwẹnị Sameriya ḅụ ò ḍiḅi. Ori owiḅọtụḅọ Johasị nwẹnị ḅo ò kiri ḅụ ama-da.

Izirẹlị Ḅẹ Amadaḅọ Johasị

¹⁰ Johasị Juda ḅẹ amadaḅọ ama-da tẹ tẹra kụra fa kụra amesi karama kụra ḅụ Jehohahazị owiḅọtụḅọ Jehohazị saakị Sameriya ḅụ Izirẹlị dam, tẹ ini akụra fa kẹ ama-dam.

¹¹ Ori sọ siye mịẹm KỊNỊNYANAḄỌ ḅe ḍiki-tọrụ ḅụ. Nebatị owiḅọtụḅọ Jerobohamụ asi mamgba ḅụ ọ̀ ḅụụ sikima-a ọ̀ mịẹtẹ Izirẹlị si mịẹ ye mẹ, kụma arị ḅụ mie ọ̀ sịẹ mẹnjị ye.

¹² Mịọkụ kirikọntẹ Jehohazị ye-mịẹ-ḅara na, ọ̀ kẹ Amazaya, Juda ḅẹ amadaḅọ na owu-sọ kụrọ mẹ ịn kẹ Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

¹³ Anieḅụ Jehohazị nwẹnị fịị, tẹ Jerobohamụ nwẹnị ori emine mẹ ọgọnọ Lẹgị. Ịn nwẹnị Jehohazị kẹ Sameriya ḅụ Izirẹlị ḅẹ amadapụ ma na ḍiḅi.

Ịlayịsa Fịịm

¹⁴ Ịlayịsa ọ̀ kọn tẹ fịị ḅẹ obi mẹ kọn-arị ogbo, Izirẹlị ḅẹ amadaḅọ Jehohazị nwẹnị toluma ò ḍiki ḅẹ mu tẹ ọ̀ tọrọkọ ḅụ owu, “Ị̀ ḍa, ị̀ ḍa! Izirẹlị ḅẹ kirimẹnjị-ọmụarụ ma na anị ḅẹ asụ-dọkụ-ọmụapụ na!”

¹⁵ Ịlayịsa nwẹnị ọ̀ ḅẹẹ, “Gbọrụ iboli na anị ḅẹ aḍịẹịn na ọkịị.” Anieḅụ ọ̀ nwẹnị gbọrụ iboli na anị ḅẹ aḍịẹịn na ọkị.

¹⁶ Anịtẹso ọ̀ nwẹnị Izirẹlị ḅẹ amadaḅọ ḅe ḅẹẹ, “Iboli mẹ nụnụụ!” Ọ̀ nwẹnị anị nụnụ. Ịlayịsa nwẹnị ori aḅara kẹ amadaḅọ ḅe aḅara ọgọnọ gbana.

¹⁷ Ọ̀ nwẹnị ọ̀ ḅẹẹ, “Ịrụa-saakịarị-anga ḅẹ ikiḅa-ḅọkọ mẹ finjii,” tẹ ọ̀ nwẹnị anị finji. Anịtẹso Ịlayịsa nwẹnị ḅẹẹ, “Tẹịịn!” tẹ ọ̀ nwẹnị tẹịn. Ịlayịsa nwẹnị ḅẹẹ, “Mie KỊNỊNYANAḄỌ ḅe owu-ḅara-iḅi ḍiein mẹ, Siriya ḅụụ ḅụ owu-ḅara-iḅi nyana ḍiein mẹ! Gbala Afẹkị ḅụ í Siriya ḅẹ apụ ma na owu-sọ nwenii tẹ ị́ ịna nẹngịma tuu ḅa.”

¹⁸ Anịtẹso ọ̀ nwẹnị ḅẹẹ, “Ḍiein ma ọkịị,” tẹ ọ̀ nwẹnị arị ọkị. Ọ̀ nwẹnị Izirẹlị ḅẹ amadaḅọ ḅe ḅẹẹ, “Arị kẹ kiri fomuu.” Ọ̀ nwẹnị tẹra sakị kẹ arị kẹ kiri fomu tẹ dasịẹma.

¹⁹ Anịtẹso Ịlayịsa nwẹnị ọ̀ ḅụụ ḅụ ịganị nyana, tẹ ḅẹẹ, “Mimgbe sọnọ, anịanịa sonio asakị mie ị́ kẹ fomu na-iḅi ye; anịtẹrẹmẹ mie í Siriya fomu-fomu gbin nwenii anị mu tuukoro ḅarịye, kụma mịọkụ tẹra sakị ngẹrị mie ị́ kẹ Siriya fomu ḅarịye.”

²⁰ Anịtẹso Ịlayịsa nwẹnị fịị, tẹ ini ò ḍiḅim. Kụra mẹ ḅo kala fẹngụ la sakị la sakị, Mohabụ furo-ḅẹ-apụ ogbo-ogbo ḅụ ḅo ama mẹ gbaịn tẹ anị fọịn fọịnm.

²¹ Sakị ḅẹ gbọrụ sakị ḅụ, ịn gbọrụ fịtẹ owiḅọ ḍiḅiarị ogbo, in nwẹnị gburo-gburotẹ gbọrụ ogbo ẹrị, tẹ ịn nwẹnị ḍụẹịn mẹ kẹ Ịlayịsa ḍiḅi ḍuḅu mẹ ḅio wakị-su. Ori oju mẹ Ịlayịsa mgbe ma lama gbọrụ-kirikiri, ọ̀ nwẹnị fị-ḅụ-saakị tẹ sịẹsime.

²² Azẹlị Siriya ḅẹ amadaḅọ mịna ene mamgba tẹ Jehohahazị Ama-daarị sakị ḅụ Izirẹlị ponomam.

²³ Kụma KỊNỊNYANAḄỌ ḅe ḍiki-ḅụụjịrị nyana ịn pịrị tẹ sịḅị-kụrụkụrụ ḅụ ye wẹrịso ịn pịrịm, tẹ nwẹnị tọrụ pịkị in da ori Ebira-amụ na, Ayịzịkị na, Jekọbụ na fị ọḅọkụ sịḅị ẹrẹsị, tẹ ḅarị ịn ḅaa-a, anịanịa ọ̀ ḅụụ ḅụ in wakị nguma-a wenii ḅo mịọkụ lam.

²⁴ Siriya ḅẹ amadaḅọ Azẹlị fịị tẹso, ori owiḅọtụḅọ Bẹnị-hadadị nwẹnị ḅo amadaḅọ sọ ò kiri ḅụ.

²⁵ Anịtẹso Jehohahazị owiḅọtụḅọ Jehohazị nwẹnị pịkị Azẹlị owiḅọtụḅọ Bẹnị-hadadị ḅẹ ḅara ḅụ opu ama ma tẹ ọmụ ḅio ori ọ̀ ḍa Jehohahazị ḅara ọkị aị ma ọkịm Tẹra sakị Jehohazị nwẹn kẹ ọ̀ nẹngịmam tẹ siin Izirẹlị opu ama ma nyana ọkịm.