2 Amadapụ 11 - FỊAFỊA BAỊBỤLỤ

Atalaya Juda ḅẹ Ama-da Ẹrẹḅọ

¹ Ahazaya iyingi Atalaya árị owiḅọtụḅọ fịị tẹ ẹrị tẹso, á nwẹnị tọn ịn mu amada-furo ḅẹ apụ mamgba ḅaa.

² Kụma Jehosẹba, amadaḅọ Joramụ ẹrẹḅọtụḅọ ma, pịkị Ahazaya ịyịmbara ma nwẹnị Johasị Ahazaya owiḅọtụḅọ ḅe dogi-ḅọị ịn ḅaa ḅe mịẹarị amadaḅọ owiapụ-awọmẹ ma ogboku ḅụ. Á nwẹnị ori na ò ḍikiḍikiarị ḅo ma na kẹ mono kala-ḅio ḅụ ḅọị. Mị-ḅara mie á kẹ ọ̀ ḅọị tẹ ini ọ̀ ḅaa-a so yee.

³ Ò sonio akụra kẹ árị na angam, tẹ árị ọ̀ kẹ KỊNỊNYANAḄỌ ḅẹ Fịafịa-warị mẹ ḅio ḅọịm Atalaya ama mẹ da sakị ḅụ.

⁴ Kụma sọnọma akụra karama kụra ḅụ Jehohada agbamịẹḅọ ḅe nwẹnị fịrịma Kariti apụ ma na, amada-furo mẹ ḍikiḍikiarị ọmụ-alapụ ma sịn tẹ ịn mịẹtẹ ịn nwẹnị ọ̀ ḍọkụma-ḅo KỊNỊNYANAḄỌ ḅe warị mẹ ḅio ḅụ; ọ̀ nwẹnị ini na ọḅọkụ fị tẹ kụrọ tẹ ḅịḅị-kẹ-ogbosọ nyana KỊNỊNYANAḄỌ ḅe warị mẹ ḅio tẹ nwẹnị amadaḅọ ḅe owiḅọtụḅọ ḅe kẹ ịn ḍie.

⁵ Ọ̀ nwẹnị tọn ịn pịrị. “Miemẹ anie ọ́ mịẹ ḅarịye, Ịnyọsara-Ene mẹ ḅụ ọ́ kọrịnama ḅo tẹ ḅẹḅẹ, ọmịnị kẹ tẹra kiri ḍie ḅẹ gbọrụ kiri amadaḅọ warị mẹ ḍikiḍikii;

⁶ jen gbọrụ kiri ịn kẹ Sọ Ogigo-ḅọkọ sịn anga mẹ ḍikiḍikii, tẹrẹị karama kiri mẹ ye-yọ ḍikiḍiki apụ ma ọḅụjụ simearị ogigo-ḅọkọ mẹ ḍikiḍiki;

⁷ anịsakị ọmịnị maa itu ma tẹ Ịnyọsara-Ene mẹ ḅụ kọrịnama ịnyọsararị apụ ma ọmịna ọmụ-aị na KỊNỊNYANAḄỌ ḅe warị mẹ ḍikiḍiki ḅa

⁸ ọmịna aḅụụ ḅẹḅọ-ḅẹḅọ mḅọ ọmụ-aị ọkị tẹ amadaḅọ ḅe gbori-ikelemakoro ḅa. Ḅo ó simearị anga mẹ ḅụ, ọ́ laa ḅọ laa ḅọ ọmịnị mḅọ ḅaa ḅa. Ọmịnị amadaḅọ ḅe kpeki tẹ simee, ò mu anga mu anga ḅụ.”

⁹ Ọmụ-alapụ ma Jehohada agbamịẹḅọ ḅe tọn ịn piri ḅara mẹmgba mịẹm, tẹ ọrụḅọ-ọrụḅọ Ịnyọsara-Ene mẹ ḅụ amịnẹ kọrịnama kiri ḅẹ ịnyọsararị apụ na, anị Ịnyọsara-Ene mẹ ḅụ kọrịnama kọrị ḅẹ apụ ma na kẹ Jehohada agbamịẹḅọ ḅe ḍọkụma-ḅom.

¹⁰ Agbamịẹḅọ ḅe nwẹnị Amadaḅọ Devidi asụḅa ma na, ekpeke ma na tẹ KỊNỊNYANAḄỌ ḅe warị mẹ ḅio sime-sime aị ma kẹ ọmụ alapụ ma pịrị;

¹¹ tẹ ye-yọ ḍikiḍikiapụ ma ọrụḅọ-ọrụḅọ nwẹnị mḅọ owuaị ọkị ḅara-ḅio ọlọ tẹ sịẹsime warị mẹ na agbamịẹ-anga mẹ na pakịrị anga suku-jụ da anga mẹ ḅụ ọkị mu ọgọnọ da anga mẹ la.

¹² Anịtẹrẹmẹ Jehohada nwẹnị Johasị amadaḅọ ḅe owiḅọtụḅọ ḅe pakama-ḅo, tẹ amada-sun mẹ kẹ ò sure, in kẹ amadaḅọ ḍie pakamarị oloko ḍiri mẹ kẹ ọ̀ pịrị, nwẹnị ori amadaḅọ mẹ kẹ oloku ikelema tẹ pulo kẹ ọ̀ sịḅị sara, tẹ ịna aḅara farị-farị tẹ ḅẹẹ “Amadaḅọ ḍumo nangwọma!”

¹³ Atalaya ye-yọ ḍikiḍikiapụ ma na, tomi ma na ye-yọ mẹ fiemarị ḅara mẹ naa tẹso, á nwẹnị mẹnjị KỊNỊNYANAḄỌ ḅe warị mẹ ḅio tomi ma ḍọkụma-mu;

¹⁴ á ḍiki sakị, á nwẹnị ịna ama-anganga-ḅara ḅụ amadaḅọ ḅe ḅeriye mẹ akaka ḅụ sịẹ wararị ẹrị, tẹ ọmụ-alapụ ma na, ọdụ ofuro apụ ma na amadaḅọ ḅe palị sịẹ wararị, tẹ ama mẹ ḅio ḅe atomi mamgba ḍereku-ḍereku tẹ ọdụ ofuroarị. Atalaya nwẹnị arị akapa kan tẹ oloku, “Ama kan! Ama kan!”

¹⁵ Anịtẹso Jehohada nwẹnị tọn ọmụ-ogbo mẹ kẹ sịḅịda ọmụ-alapụ ma pịrị, “Ọmịnị ọmịna ogboku ḅụ á pakama-ḅo tẹ okologie mẹ kẹ arị na á ḍuka ḅoḅọ-ḅoḅọ na ḅaa, kụma ọ́ KỊNỊNYANAḄỌ ḅe warị mẹ ḅio á ḅaa ma.”

¹⁶ Anieḅụ ịn nwẹnị árị ọlọ pakama Asụ Ogigo-Ḅọkọ mẹ ḅụ, tẹ á kẹ amadaḅọ ḅe warị mu, tẹ anịjụ nwẹnị á ḅaa.

Jehohada Iḅi Ḅara Kẹ Ye Ḍimam

¹⁷ Jehohada nwẹnị amadaḅọ ḅe na tomi ma na mịẹtẹ ịn KỊNỊNYANAḄỌ ḅe na ọḅọkụ fịm mịnẹ ịn sime KỊNỊNYANAḄỌ ḅe pịrị atomi sọọ, amadaḅọ ḅe na tomi ma na pịkị ọḅọkụ fịm,

¹⁸ Anịtẹso ama mẹ ḅio ḅe atomi mamgba nwẹnị Balị warị mu tẹ anị kan sara; ori ebeka ma na, ịn kẹ ọ̀ kịkama tẹmẹ-aị ma ịn kẹ pakịrị-pakịrị puu famam, tẹ nwẹnị Balị oru-alaḅọ Matani ḅaa ebeka ma tọrọkọ. Agbamịẹḅọ ḅe nwẹnị kịnị kẹ koroma tẹ KỊNỊNYANAḄỌ ḅe warị mẹ ḍikiḍiki.

¹⁹ Ọ̀ nwẹnị ọmụ-alapụ ma na, Kiriti apụ ma na, ye-yọ ḍikiḍikiapụ ma na, ama mẹ ḅẹ atomi mamgba na ọkị; tẹ nwẹnị KỊNỊNYANAḄỌ ḅe warị ḅụ amadaḅọ ḅe ḅọrọma ye-yọ ḍikiḍikiapụ ma ḍikiḍikiarị mẹnjị amadaḅọ ḅe warị muarị ogigo-ḅọkọ mẹ ḅụ mẹnjị tolu mu amadaḅọ ḅe warị la tẹ ọ̀ nwẹnị ọ̀ lẹgị anga amadapụ ma emine ọgọnọ ḅụ lẹgị.

²⁰ Anieḅụ ama mẹ ḅio ḅẹ atomi mamgba nwẹnị ḍereku; amadaḅọ ḅe warị ḅụ ini okologie mẹ kẹ Atalaya ma ḅaa tẹso, mẹ opu ama mẹ nwẹnị yaụ-sime.

²¹ Johasị sịḅị sọnọma akụra mie ḅọrọ tẹ ọ̀ saakị ama-da ye.