2 Amadapụ 10 - FỊAFỊA BAỊBỤLỤ

Ini Ehabụ Ḅụụ Paka-ḅo Apụ Ḅaa Tẹ

¹ Sameriya ḅụ Ehabụ owiapụ-awọmẹ tesi oyia apụ finji nyanam. Anieḅụ Jehu nwẹnị ḍiri kẹẹ tẹ kẹ Sameriya ḅụ sime tẹ ḅẹrẹtọn kẹ opu ama mẹ pịrịarị apụ ma na, omongiapụ ma na, Ehabụ owiapụ-awọmẹ ma ḍikiḍikiarị apụ ma na fịrịma. Ọ̀ ḅẹẹm:

² “Mịọkụ, mị ḍiri mẹ ḅo ọmịna la gbọrụ sakị, mịna sịḅịdaḅọ ḅe owiapụ-awọmẹ ma na, ọmụgbin kirimẹnjị-arụ ma na, asụ ma na, ọmụ gotẹ nama kụrọ tẹ opu ama ma na, ọmụgbin aị ma na sọ ọmịnị aḅara emi ḅẹẹ-sakị

³ ọmịnị ọmịna amadaḅọ ḅe owiapụ-awọmẹ ma ḅụụ iḅitẹịn tẹ ama mẹ da gbẹẹ ḅọ sẹlẹẹ, tẹ kẹ ịna ḍaḅọ ngada mẹ ọgọnọ lẹgịmaa, tẹ owu-sọ kẹ ọmịna sịḅịdaḅọ ḅe warị mẹ pịrịị.”

⁴ Kụma ịn nwẹnị kpọma ḅalafa lama tẹ ḅẹẹ, “Ḍikii, maa amadapụ mamgba sọ inetẹ ò kuḅuu sịẹ-a kụma, wamịnị tọ-ḅara kẹ inetẹ ò kuḅuu sịẹ ḅe?”

⁵ Anieḅụ, ama mẹ ḅẹ omongiapụ ma na, ama ḍikiḍikiapụ ma na nwẹnị ori tẹ amadaḅọ warị mẹ kẹ sịḅịdaḅọ ḅe na, opu ama mẹ ḍikiḍikiarị ḅọ ḅe na ḅụụ sọ tẹ ḅịḅị kẹ nwẹnị Jehu fịrịma tẹ ḅẹẹ, “Wamịnị anie ị́ afịrịmẹnjịapụ, ị́ wa ḅẹẹm mịẹ ḅẹ ye goyegoye wa mịẹ ḅa. Wa ama-da kẹ kuun ḅẹ gbọrụḅọ-sọ ofori; ị́ ẹrịm iḅi tẹ ị́ mịẹ ḅẹ ye goyegoye mịẹ.”

⁶ Anịtẹso ọ̀ nwẹnị maaịn karama ḍiri kẹẹ ịn fịrịma tẹ ḅẹẹ, “Ọ́ nwẹnị ị̀ jụụ ḅụ emi tẹ tẹlẹma tẹ ị̀ ḅịḅị poki ḅarị ḅẹḅẹ, ọmịnị ọmịna sịḅịdaḅọ ḅe owiapụ-awọmẹ ma asịḅị pẹlẹ tẹ ḅaa nwẹn pembe sakị Jẹzirili ḅụ ị̀ ḍọkụma-ḅo.” Mị sakị mẹ, amadaḅọ ḅe owiapụ-awọmẹ kịnị atesi oyi finji ma opu ama mẹ ḅio ịna ḍikiḍikiarị ḅẹ gburo-gburotẹ atomi ma aḅara-ḅio emi.

⁷ Ḍiri mẹ ḅo ịna aḅara la tẹso, ịn nwẹnị amadaḅọ ḅe owiapụ-awọmẹ ma ọkị tẹ ịn ḅaa, tẹ nwẹnị ịna asịḅị ma kẹ kana ḅio sụa tẹ kẹ ọ̀ fịrịma Jẹzirili ḅụ.

⁸ Fịrịmẹnjịḅọ ḅe ḅo tẹ ḍuko ọ̀ pịrịm, “ini amadaḅọ ḅe owiapụ-awọmẹ ma asịḅị ma kẹ ḅo tẹ,” ḅẹẹ tẹso, ọ̀ nwẹnị ịn ḅẹẹ, “Ọmịnị arị kẹ mẹnjị ogigo-ḅọkọ sọarị anga ḅụ maa kiri ḅụ sara kpolima wẹrị tẹ arị sime nwenii ḅo dede-ḅio la.”

⁹ Anị ḅo dede-ḅio mẹ la tẹ ọ̀ paka-ḅo tẹso, ọ̀ nwẹnị sịẹsime tẹ tomi mamgba ḅẹẹ, “Ọmịnị ma mịẹ ye ofori. Yẹrị mie ị̀ sịḅịdaḅọ ḅe kẹ ḅẹrẹ-ḅiya tẹ ọ̀ ḅaa ye kụma tụḅọ mịnapụ mamgba ḅaa?

¹⁰ Ó nimi mịnẹ KỊNỊNYANAḄỌ ḅe ẹkwẹn-ḅịḅị ḅụ siin kiri koro fa-fa gberie-sọ ofori, KỊNỊNYANAḄỌ ḅe Ehabụ warị mẹ gbolomaye ḅụ ḍuko ye ḅụ; KỊNỊNYANAḄỌ ḅe gbala ọ̀ fịrịmẹnjịḅọ Ịlayịja ḅụ ḅụ ò ḍuko ye mẹ mịẹ tẹ.”

¹¹ Anieḅụ Jehu nwẹnị ịkatakirikọn-a-ḅara kẹ Jẹzirili ḅụ Ehabụ warị na, ori opu atomi mamgba na, ori na ḅụụ-kura ikiapụ mamgba na, ori agbamịẹapụ mamgba na ḅaa fama.

Ini Amadaḅọ Ahazaya Amịnapụ Ḅaa Tẹ

¹² Anịtẹso ọ̀ nwẹnị dọkụ paka Sameriya mu. Bẹtị-ẹkẹdị ḅụ ori emi ogbo,

¹³ Jehu nwẹnị Juda ḅẹ amadaḅọ Ahazaya amịnapụ na bịama, ọ̀ nwẹnị ịn gbela, “ọmịnị tọ apụ?” Ịn nwẹnị pakịrị, “Wamịnị Ahazaya amịnapụ, wa ideri-ḅo amada-furo mẹ ḅẹ owiapụ-awọmẹ ma na, owiapụ-awọmẹ ma iyingiḅọ amadaḅọ ta ma na ḍiki ḅẹ ḅom.”

¹⁴ Ọ̀ nwẹnị tọn, “Ó ḍumo tọrụ ḅụ ini ọlọ.” Ịn nwẹnị ịn ọlọ tẹ Bẹtị-ẹkẹdị ḅụ simearị gbọrụ olulu akaka ịn ḅaa. Ini kịnị amesi maa apụ finji ma ḅụ gbọrụḅọ-sọ kọn-a.

Ịn Ehabụ Amịnapụ Ḅụ Kirikọn-Apụ Mamgba Ḅaa Tẹẹ

¹⁵ Ori anịjụ so tẹso, ọ̀ nwẹnị ḅo Rekabụ owiḅọtụḅọ Jehonadabụ na bịama, ò ḅo ori na bịama ḅẹ ḅoarị; Jehu nwẹnị sịn-ḅịḅị kẹ ọ̀ pịrị tẹ ò gbela, “Í ḅioḅẹngbọ gbeke iḅi ị̀ pịrị wararị, ì ḅioḅẹngbọ wẹrịtẹ iḅi ị́ pịrị ḅara?” Jehonadabụ nwẹnị pakịrị, “Iḅi wararị.” Jehu nwẹnị ḅẹẹ, “Iḅi wararị ḅẹḅẹ ị́ ḅara kẹ ị̀ pịrị.” Anieḅụ ọ̀ nwẹnị ọ̀ ḅara kẹ ọ̀ pịrị, tẹ Jehu nwẹnị ọ̀ saakị kirimẹnjị-ọmụarụ mẹ ḅio sẹịn,

¹⁶ tẹ nwẹnị ọ̀ ḅẹẹ, “Ị̀ ḅụụ sọ tẹ ḅo à ḅụụ saakị KỊNỊNYANAḄỌ ḅe pịrị ḅara ẹrị.” Anieḅụ ọ̀ nwẹnị ori kirimẹnjị-ọmụarụ mẹ ḅio ọ̀ dọkụ.

¹⁷ Ịn ḅo Sameriya la tẹso, Jehu nwẹnị Sameriya ḅụ kirikọntẹ sime Ehabụ pịrị apụ mamgba ḅaa fama KỊNỊNYANAḄỌ ḅe ẹkwẹn-ḅịḅị mẹ tẹ ọ̀ wẹrịtẹ kọọn Ịlayịja pịrị ḅara ḅụ.

Ịn Sunsin Balị Pịrịarị Apụ Ḅaa Tẹ

¹⁸ Anịtẹso Jehu nwẹnị tomi mamgba sịn kobiri tẹ ịn ḅẹẹ, “Ehabụ kẹ Balị mininiye kalịye kụma Jehu opu ḅara kẹ ò minini ḅa.

¹⁹ Ọkọẹrẹsị mịọkụ ó mu Balị ịkịankoroapụ mamgba na, sunsin Balị pịrịarị apụ mamgba na, ori agbamịẹapụ mamgba na sịn ḅoo; yee ịna aḅụụ gbọrụḅọ-sọ kọn ma, gbala à gburo-gburotẹ agba nyana tẹ mịẹ Balị pịrị ḅẹ tẹ. Ịna aḅụụ ofori ḅọ goḅọ-goḅọ ḍumo ḅịa.” Kụma Jehu epele tii-arị mịẹtẹ ò sunsin Balị pịrịarị apụ mamgba ḅaa ḅẹ ḅara.

²⁰ Anịtẹso Jehu nwẹnị tọn tẹ ịn kpo-kpo gbolo mịnẹ, “Ọ́ ḅụụ mịẹ fịafịa ma tẹ kẹ Balị tẹkẹ kobiri pịrị.” Anieḅụ ịn nwẹnị anị kẹ kpo-kpo mẹ gbolo.

²¹ Jehu nwẹnị ḅịḅị kẹ bebe Izirẹlị mẹmgba fịrịma, tẹ sunsin Balị pịrịarị apụ mamgba nwẹnị gbọrụḅọ sọ kọn-a ḅara kẹ ḅo. Ịn nwẹnị Balị warị mẹ ḅio sọ gbịm-gbịm gbọrụ ịkọlị ḅụ so mu osi ịkọlị la.

²² Ọ̀ nwẹnị ịn sunsin Balị pịrịarị sakị ịn sụa-sụa akapa ma koko igbe mẹ ḍikiḍikiarị ḅọ ḅe ḅẹẹ, “Kapa ma pakama-ḅo sunsin Balị pịrị ḅẹ ḅo apụ mamgba pịrị ịn sụa.” Anieḅụ ọ̀ nwẹnị kapa ma pakama-ḅo ịn pịrị.

²³ Anịtẹso Jehu nwẹnị Rekabụ owiḅọtụḅọ Jehonadabụ na mẹnjị Balị warị mẹ ḅio sọ mu, tẹ nwẹnị sunsin Balị pịrịarị apụ ma ḅẹẹ, “Ọ́ sọkịrị ḍiki tẹ ẹrị mịnẹ mịanga ọmịna ogboku ḅụ KỊNỊNYANAḄỌ ḅe fịrịmẹnjị gbọrụḅọ-sọ ofori, kụma sunsin Balị pịrịarị apụ ngẹrị ngẹrị.”

²⁴ Anịtẹso ịn nwẹnị mẹnjị sọ agba na, dọkịma agba na mịẹ ḅẹ ḅara kẹ mu. Mịọkụ Jehu owiapụ inia si kẹ etela-ogbo koroma tẹ ḅẹẹ tẹ, “Anị ḅọ mẹ tẹ minini tẹ à kẹ ọ̀ mịna aḅara-ḅio su tẹ apụ ma ḅẹ gbọrụḅọ mangị-so ḅọ so ḅọ mḅọ amịna ḍumo fama ḅa.”

²⁵ Anieḅụ Jehu agba mẹ na, dọkịma-agba mẹ na mịẹ fama gbọrụ sakị, mie ò ye-yọ mẹ ḍikiḍikiarị apụ ma na, fịrịmẹnjị-opuapụ ma na ḅẹẹ ye, “Ọ́ sọ-mu tẹ ịn ḅaa; gbọrụḅọ-sọ mangị-so ma.” Anieḅụ, ini okologie mẹ kẹ ịn pẹlẹ pẹlẹ-ḅaa tẹso, ye-yọ ḍikiḍikiapụ ma na, fịrịmẹnjị-opuapụ ma na nwẹnị ịn saakị saakị etela pakama; ịn nwẹnị pịkị Balị warị mẹ ḅẹ kala-ḅio sọ

²⁶ tẹ Balị warị mẹ ḅẹ ịḅalị mẹ pakama-ḅo tẹ anị dọkịma.

²⁷ Ịn nwẹnị Balị warị mẹ na, ebeka mẹ na kan-sara tẹ anị kẹ posuku mu anga mịẹ nwenii ḅo mịmgba la.

²⁸ Mị-ḅara mie Jehu kẹ Balị ọfịn-siin ḅara Izirẹlị ḅụ.

²⁹ Kụma Nebatị owiḅọtụḅọ Jerobohamụ mịẹ si mẹ tẹ mịẹtẹ Izirẹlịapụ si mịẹ ye mẹ ḅụ ọ̀ pịkịma so-a, anie ịn sunsin pịrịarị golu kẹ mịẹ asambịrịma nambulo tẹ Bẹtẹlị na Danị na ḅụ sime aị ma.

³⁰ Tẹ KỊNỊNYANAḄỌ ḅe nwẹnị Jehu ḅẹẹ, “Ị́ gbala ị̀ tọrụ ḅụụ kura ḅara kẹ iḅiọkụ mịẹ tẹ, tẹ anị wẹrị ì ḅioḅẹngbọ sime-ḅara mẹmgba kẹ Ehabụ warị mẹ mịẹm ẹrẹsị, ị́ ḅụụ paka-ḅo apụ mu ini karama ḅụọ la Izirẹlị ḅụ ama-da ḅa.”

³¹ Kụma Jehu ọ̀ ḅụụ ẹbị tẹ ò ḅioḅẹngbọ mẹmgba kẹ KỊNỊNYANAḄỌ Izirẹlị ḅe Tamụnọ ḅe oloko mẹ ḅụ wẹrị mẹnjị-a; ò Jerobohamụ asi ma tẹ mịẹtẹ Izirẹlị si mịẹ ye mẹ ḅụ pịkịma-so-a.

Jehu Fịị

³² Arị ene ma ḅụ ḅụ KỊNỊNYANAḄỌ ḅe nwẹnị saakị Izirẹlị ḅụ pakịrị-pakịrị pẹlẹ pẹlẹ sin. Azẹlị Siriya ḅẹ amadaḅọ ḅe nwẹnị bebe Izirẹlị ye-yọ mamgba nẹngịma,

³³ Jodanị ḅụ ọkị ịrụa-saakịarị-anga mẹ da-mu Gilẹdị ama mẹmgba, Gadi na, Rubẹnị na, Manasẹ na afuro ḅẹ apụ sime anga ma ḅụ ideri-mu Arowa, Anọnị tụndụ-ogboku mẹ akaka saakị ọkị mu. Mịna anga ma anie Gilẹdị na Basani na ye-yọ.

³⁴ Mịọkụ kirikọntẹ Jehu ye-mịẹ-ḅara na, ọ̀ mịẹ aị mamgba na, ori opu mẹmgba na ịn kẹ Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.

³⁵ Anieḅụ Jehu nwẹnị fịị, tẹ ịn nwẹnị ọ̀ kẹ Sameriya ḅụ ḍiḅi. Ori owiḅọtụḅọ Jehohazị nwẹnị ò kiri ọkị tẹ ama-da.

³⁶ Jehu kẹ Sameriya ḅụ sime tẹ Izirẹlị da sakị anie maa kụra ofori kụra asuei.