2 Amadapụ 1 - FỊAFỊA BAỊBỤLỤ

Ịlayịja na Amadaḅọ Ahazaya na

¹ Ehabụ fịị tẹso, Mohabụ nwẹnị sịḅị-kụrọma Izirẹlị pịrị.

² Mị sakị mẹ ḅụ Amadaḅọ Ahazaya Sameriya ḅụ amadapụ ḅekin-warị ọgọnọ ḅụ ịn sụa-pakama wararị ye ḅụ ḅịkị ḅo kiri koro tẹ anị ḅẹ obi kọn-arị. Anieḅụ ọ̀ nwẹnị fịrịmẹnjịapụ fịrịma tẹ ịn ḅẹẹ, “Mu Balị-zibọbụ Ẹkịrọnị ḅẹ oru-tamụnọ ḅe gbela mị obi mẹ ḅụ à gbeke kụrọma ḅẹ.”

³ Kụma KỊNỊNYANAḄỌ ḅe enjẹlị nwẹnị Tisibi ḅẹ Ịlayịja ḅe ḅẹẹ, “Saakị, mu Sameriya ḅẹ amadaḅọ ḅe afịrịmẹnjịapụ ma na bịama tẹ ịn ḅẹẹ, ‘Í gotẹ mu Balị-zibọbụ Ẹkịrọnị ḅẹ oru-tamụnọ ḅe gbela ḅẹ muarị ye anie Izirẹlị ḅụ Tamụnọ ḅarị ofori ẹrẹsị, ọkọ-a?’

⁴ Anịẹrẹsị mịọkụ mie KỊNỊNYANAḄỌ ḅe ḍuko yee, ‘Í mu mono tẹ iḅila mẹ ọgọnọ ị́ ḅarị kuro-ḅo ḅịa, karakara-ḅara-ḅụ ị́ fịị ḅa.’ ” Anịtẹso Ịlayịja nwẹnị mu.

⁵ Fịrịmẹnjịapụ ma nwẹnị pịkịma so amadaḅọ ḅe ḍọkụma-mu, tẹ ọ̀ nwẹnị ịn gbela, “Ó tiegotẹ pịkịma-ḅo?”

⁶ Ịn nwẹnị ọ̀ ḅẹẹ, “Gbọrụ owiḅọ ḅo wamịnị na bịama tẹ wa ḅẹẹm wa pịkị-so wa fịrịma amadaḅọ ḅe ḍọkụma-muu, tẹ ọ̀ ḅẹẹ mie KỊNỊNYANAḄỌ ḅe ḍuko yee, ‘Ị́ gotẹ mu Balị-zibọbụ Ẹkịrọnị ḅẹ oru-tamụnọ ḅe gbela ḅẹ muarị ye anie Izirẹlị ḅụ gbala Tamụnọ ḅarị ofori ẹrẹsị, ọkọ-a? Anịẹrẹsị í mu mono tẹ iḅila mẹ ọgọnọ ị́ ḅarị kuro-ḅo ḅịa, kụma karakara-ḅara-ḅụ ị́ fịị ḅa.’ ”

⁷ Ọ̀ nwẹnị ịn ḅẹẹ, “Tọ-ḅara sime owiḅọ ḅo ọmịnị na bịama tẹ mịna aị ma ḍuko ọ́ pịrị?”

⁸ Ịn nwẹnị ọ̀ pakịrị, “Ọ̀ Nama oju ḅẹ isuke kẹ mịẹ opu kapa sụa tẹ nama apara kẹ ò ḅiri ponom.” Ọ̀ nwẹnị ḅẹẹ, “Anie Tisibi ḅẹ Ịlayịja ḅee.”

⁹ Anịtẹso amadaḅọ ḅe nwẹnị kịnị amesi oyi finji kẹ sịḅịda wararị ọmụ-alaḅọ na ọ̀ kịnị amesi oyi finji ma na kẹ ọ̀ fịrịma. Ọ̀ nwẹnị Ịlayịja ḍọkụma-mu, oriḅe tẹ tụndụ sịḅị ọgọnọ ḅụ lẹgị wararị ḅọ ḅe, tẹ nwẹnị ọ̀ ḅẹẹ, “Yei Tamụnọ Ịkịankoroḅọ, amadaḅọ ḅe mẹẹ, Ideri-ḅoo!”

¹⁰ Kụma Ịlayịja nwẹnị kịnị amesi oyi finji kẹ sịḅịda ọmụ-alaḅọ ḅe pakịrị, “Yẹrị Tamụnọ Ịkịankoroḅọ ḅẹḅẹ, yee kọrị-fịnị So-ḅio kuro-ḅo tẹ ị́yẹrị na ị́ kịnị amesi oyi finji ma na dọkịma.” Anịtẹso kọrị-fịnị nwẹnị So-ḅio kuro-ḅo tẹ ori na ọ̀ kịnị amesi oyi finji ma na dọkịma.

¹¹ Amadaḅọ ḅe nwẹnị jen kịnị amesi oyi finji kẹ sịḅịda wararị ọmụ-alaḅọ na ọ̀ kịnị amesi oyi finji ma na kẹ ọ̀ fịrịma, tẹ ọ̀ nwẹnị kpọlị mu tẹ ọ̀ ḅẹẹ, “Yei Tamụnọ Ịkịankoroḅọ, mie amadaḅọ ḅe tọn ḅara, ‘Fọnya ideri-ḅoo.’ ”

¹² Kụma Ịlayịja nwẹnị ịn pakịrị. “Yẹrị nwẹnị Tamụnọ Ịkịankoroḅọ ḅẹḅẹ, yee kọrị-fịnị So-ḅio kuro-ḅo ị́yẹrị na ị́ kịnị amesi oyi finji ma na dọkịma.” Anieḅụ Tamụnọ ḅe nwẹnị So-ḅio kọrị-fịnị kẹ fịrịma tẹ ori na ọ̀ kịnị amesi oyi finji ma na dọkịma.

¹³ Amadaḅọ ḅe nwẹnị pịkị tẹrẹị karama kịnị amesi oyi finji kẹ sịḅịda wararị ọmụ-alaḅọ na ọ̀ kịnị amesi oyi finji ma na kẹ fịrịma. Tẹrẹị karama kịnị amesi oyi finji ma kẹ sịḅịda ọmụ-alaḅọ ḅe nwẹnị kpọlị iwo Ịlayịja ḍọkụma-mu tẹ ọ̀ tọrọkọ kparakị tẹ ọ̀ tẹkẹ, “yei, Tamụnọ Ịkịankoroḅọ, àrị ị́ tẹkẹm yee ì ḍumo na mịna ị̀ afịrịmẹnjịapụ apụ kịnị amesi oyi finji ma aḍumo ma ị̀ tọrụ ḅụụ ye la.

¹⁴ Ḍikii, kọrị-fịnị So-ḅio kuro-ḅo tẹ tarị ḅo sịḅịda kịnị amesi oyi finji finji pịrị maa ọmụ-alapụ ma na ịna kịnị amesi oyi finji finji ma na dọkịmam; kụma yee ì ḍumo mẹ mịọkụ ị̀ tọrụ ḅụụ ye sọ.”

¹⁵ Anịtẹso KỊNỊNYANAḄỌ ḅe enjẹlị nwẹnị Ịlayịja ḅẹẹ, “Ò ḍiki-ḅalafa ma, ideri tẹ ori na muu.” Anieḅụ ọ̀ nwẹnị saakị tẹ ideri tẹ ori na amadaḅọ ḅe ḍọkụma-mu,

¹⁶ tẹ nwẹnị ọ̀ ḅẹẹ, “Mie KỊNỊNYANAḄỌ ḅe ḅẹ ḅara, ‘ị́ fịrịmẹnjịapụ fịrịma mu Balị-zibọbụ, Ẹkịrọnị ḅe oru-tamụnọ ḅe gbela ḅe mum — anie gbala Izirẹlị ḅụ ị́ ḅịḅị ḅii ḅẹ Tamụnọ ofori-a? Ọkọẹrẹsị í mono tẹ iḅila mẹ ọgọnọ í kuro-ḅo ḅịa, kụma karakara-ḅara-ḅụ ị́ fịị ḅa.’ ”.

¹⁷ Anieḅụ KỊNỊNYANAḄỌ ḅe ẹkwẹn-ḅịḅị mẹ tẹ Ịlayịja wẹrịtẹ ḍuko tẹ ḅara ḅụ, Ahazaya fịịm. Ahazaya owiḅọtụḅọ iyi-a ẹrẹsị ori iyimbere Jehoramụ nwẹnị ò kiri ọkị tẹ ḅo ama-da, Jehosafatị owiḅọtụḅọ Joramụ Juda ḅẹ amadaḅọ ḅe maaịn karama kụra ḅụ.

¹⁸ Mịọkụ kirikọntẹ Ahazaya ye-mịẹ-ḅara tẹ ọ̀ mịẹ aị ma Izirẹlị Amadapụ Ma Aḅụụ Paka-aị Ḍiri mẹ ḅio kẹẹ wararị.