1 Timoti 6 - FỊAFỊA BAỊBỤLỤ

¹ Omoniapụ ma kẹ ḅiokoroma tẹ ẹrị mịnẹ ịna nyana apụ ma ịna ḅara ḅintẹ kụn nyanam, mịẹtẹ gbọrụḅọ sọ ḅarị Tamụnọ ẹrẹ mẹ na wa tolumarị ye mẹ na ḍuko sima ḅịa ḅara.

² Kịrayịsị ḍukamẹnjịarị omoni ma ini ịn nyana apụ ma ḍiki-sima ma, ini ịna amịnapụ gotẹ. Anie nakara ini iḅiọkụ fịrịmẹnjị ịn pịrị tarị ḅara nẹngị, ịna kọrịnama mẹ ḅẹ iḅi fịarị apụ ma anie in pembema minini apụ tẹ ịn ḅẹlẹmarịapụ ẹrẹsị. Mịna ịn mịẹ ḅẹ aị ma toluma tẹ pịkị ḍuko kụrọmaa.

Iruo Tolumaye Na Karakara Ngọ Na

³ Ḅẹḅọ-ḅẹḅọ, tẹ jen kịrị ye tolumarị ḅọ, tẹ wa Nyanaḅọ Jizọsị karakara ẹkwẹn ma na wamịna Tamụnọ nimi ḅara mẹ tẹ wa tolumarị ye mẹ na kura-aye tolumarị ḅọ,

⁴ mḅọ papaa ḅụụ-gelema mịẹye mịẹarị, tẹ mḅọ pịkị nimi gberie-sọ ofori. Ḅarasụa tomḅọ pịrị-a kuroma nyana wararị apụ tẹ ẹkwẹn-ngbọ-ngbọ kẹ ye-nụnụa tẹ kamụ-sọ ma ḅọrọ, tẹ miemẹ nwẹnị afana na, ịgbanịya na, kịnị mịẹ-sima na, si kẹ ḅiotọn jụmọ-jụmọ pịrị na dogi-ḅoarị,

⁵ tẹ tomi tẹ kuno-a aḅara kẹ ye-nụnụarị apụ, anie amịna akuroma ḅarịye kuroma-a apụ, tẹ ḅarị karakara mẹ ḅụ ofori apụ. Ini ọkịarị mịnẹ Tamụnọ nimi etela mẹ anie ḅọrọ tẹ ngọ kọn-kọn ḅọkọ.

⁶ Karakaraye, Tamụnọ nimi etela mẹ mịẹtẹ tomḅọ ngọ kọn lama lamam, mḅọ nyana ye mḅọ na iḅi wararị ḅẹḅẹ.

⁷ Wa kẹ tomikiri ḅio sọ ḅo ye tiye? Gberie sọ ofori. Wa inetẹ kẹ tomikiri ḅio paka so ḅẹ ye tiye? Gberie sọ ofori!

⁸ Anie ḅụ, wa fịye na kapa na nyana wararị ḅẹḅẹ, anie wamịnị na iḅi.

⁹ Kụma ye kọn ḅẹ-ḅiiarị apụ mu daaḍiki ḅio sọ sọm, tẹ oḅori kẹ tomḅọ sịn na, ye kẹ mḅọ lama ḅẹ akuroma na ḍiein ḅio sọ, anị nwẹnị ịn nụnụ mu fịị na fa na ḅio suu.

¹⁰ Kẹ gotẹ ọkọ ḍukoarị, igbigi ḅẹlẹma ḅụ mie kịrị-kịrị asi paka-ḅoarị. Ja apụ anị nyana ḅẹ ḅio-sẹsẹ nyana nwenii tẹ mininiye mẹ ḅụ etela-iri fa so tẹ, tẹ tọnwa akururu pịkị ịna aḅioḅẹngbọ kan sara tẹ.

Timoti Ḅụụ Ḅẹ Aị Tẹ Ọ̀ Mịẹ Ḅẹ Aị

¹¹ Kụma, Tamụnọ tomḅọ, mịna aị mamgba kọkọrọ. Ḅụụkụrọma tẹ karakara mịẹ na, Tamụnọ nimi na, minini na, ḅẹlẹma na, ye-inema na, gbene ḍumo na nyana ḅẹ ḅara ḍọkịị.

¹² Minini mangị ịrụa mẹ ḅụ í inetẹ ḅara, inetẹ ḅara mịẹ, tẹ sime gbamaso ḍumo nyana ị́ ḅụụ pịrịị; kẹ gotẹ ọkọ ḍukoarị, mị ḍumo mẹ nyana mie Tamụnọ gotẹ ị́ sịn ye, tọnwa-apụ tọrọkọ ḅụ í í minini mẹ mịẹ kụrọma sakị mẹ ḅụ.

¹³ Tamụnọ, ḍumo kẹ ye mamgba pịrịarị ḅọ ḅe tọrọkọ, na Kịrayịsị Jizọsị, Pọnịtịyọsị Payịleti tọrọkọ amịna minini mịẹ kụrọma ḅọ ḅe, tọrọkọ, à tọn ị́ pịrịarị,

¹⁴ ḅịḅị poki tẹ ịn sụa ị́ pịrị oloko ma kokoo, tẹ ḅioḅẹngbọ-kẹ-sịrẹrẹ-niḅi ḅara kẹ arị ọlọ-sịẹma, nwenii wa Nyanaḅọ Jizọsị Kịrayịsị tolu-sịẹ ḅarị Ene mẹ la.

¹⁵ Ò tolu-sịẹ ḅarị sakị mẹ Tamụnọ ḅarana anị ọkị-ḅo ḅa, anị ḅẹ karakara sakị ḅụ, ori anie bomatẹ Ngẹrị Ḅẹrẹtọn ḅo ḅe, amadapụ mamgba Amadaḅọ, pịkị kịnịnyanapụ mamgba KỊNỊNYANAḄỌ.

¹⁶ Ori ngẹrị mie fịị fịị-a ḅọ; gbọrụḅọ-sọ inetẹ mu kpeki ḅịa bele ḅio ori angarị. Jen sakị gbọrụḅọ-sọ amụ ori ẹrị-a; gbọrụḅọ-sọ pịkị inetẹ ori ẹrị ḅịa. Kụn na sime gbamaso ama-da na sime ọ̀ pịrịm. Amẹnị.

¹⁷ Tọn mị ḍumo mẹ ḅẹ ngọ-kọn apụ pịrị, ini anị kẹ kịnị aḅịḅị dama, kụma ini ịna ḅiokpọ kẹ Tamụnọ ọgọnọ gbana, tomikiri ḅẹ ngọ tẹ tomḅọ ḅaa ḅụ anị sime ḅẹ ḅara nimi-a ye mẹ ọgọnọ-a. Kụma ori Tamụnọ ḅe mie kịẹn-a ḅara kẹ ye goyegoye kẹ wa pịrị tẹ wa anị ḅẹ tọrụ-ḅẹlẹ nyanarị.

¹⁸ Tọn ịn pịrị, ini iḅi mịẹ, ini iḅi akọrịnama ḅẹ ngọ kọn, ịn tẹlẹma tẹ kịẹn-a ḅara kẹ ja apụ na ịn nyana aị ḍiya.

¹⁹ Mị ḅọkọ ḅụ ini ngọ koko ịna aḅụụ wẹrịma tẹ, karakara suku-saakị tọrọkọ-jụ ḅo ḅarị sakị pịrị ḅa. Anịtẹso ịn nwẹnị ḍumo mẹ ḅẹ karakaraye mẹ nyana ḅa.

²⁰ Timoti, ịn kẹ ị́ ḅarasụa wararị ye mẹ wẹrị kpaịnmaa. Ofori-ofori ẹkwẹn na oḅori ye anụnụa, tẹ ja atomi kura-a ḅara kẹ “Nimi” sịn-arị ye mẹ ḍiki ḅụụ kịẹn.

²¹ Kẹ gotẹ ọkọ ḍukoarị, ja apụ nwẹn ḅẹẹ nimi mẹ nyana tẹ ḅara kẹ amịna aḅụụ ọkịm; anị dogi-ḅo ye, ịn karakara minini mẹ etela mẹ ḅụ iri-faa tẹ. Tamụnọ ḍiki-ḅụụjịrị ọmịnị-mgba na simee.