1 Timoti 5 - FỊAFỊA BAỊBỤLỤ

Minini Apụ Ma Gbolomaye Ḅụ Mịẹ Ḅẹ Aị

¹ Omongiḅọ ḍiki-ịganị ma, kụma ọ̀ kẹ ị́ ḍa ḅara ọkị tẹ pọkọ iderima tẹ ye sime-ḅara ḍuko ò ḍie. Asawọ ma kẹ ị́ amịnapụ owiapụ-awọmẹ ḅara ọkịị,

² eremịna omongiapụ ma kẹ iyingiapụ ḅara ọkịị, iriawọ ma kẹ mịnapụ ereme ḅara ọkị, fịafịa ḅioḅẹngbọ ḅụ.

³ Kụn kẹ karakara ḅara kẹ amịna ḅụụ kẹ anị ḅara wẹrịarị diapụ-fịtẹ-ereme ma pịrịị.

⁴ Kụma awọmẹ na taa-awọmẹ na nyana wararị diḅọ-fịtẹ-ẹrẹḅọ ma, yee arị awọmẹ ma na taa-awọmẹ ma na Tamụnọ etela ḅụ ịn mịẹ na-iḅi aị ma kẹ tarị ịna warị ḅio saakị, ịna ḍapụ-na-iyingiapụ-na, ịna opu ḍapụ-na-iyingiapụ-na ḍikiḍiki ḅụ; kẹ gotẹ ọkọ ḍukoarị, anie mie Tamụnọ ḅụụ-ḅẹlẹarị ḅara.

⁵ Gbọrụḅọ-sọ nyana-a diḅọ-fịtẹ-ẹrẹḅọ ma, á ḅarasụa-pịrịḅọ nyana-a ḅara ḅụ, árị á ḅiokpọ mẹmgba kẹ Tamụnọ ọgọnọ gbana tẹ, ọ̀ tẹkẹ tẹ ọ̀ ḅarasụa ḅiiarị ḍin na eneḅaka na ḅụ.

⁶ Kụma amịna ḅụụ kẹ tomikiri ḅẹ tọrụ-ḅẹlẹ pịrị tẹ diḅọ-fịtẹ-ẹrẹḅọ ma, á fịị tẹ simearị kụra-ḅio iḅerea, á ḍumoarị nwẹn ḅẹẹ sọ.

⁷ Ma ịn mịẹ ḅẹ aị ma ḍuko ịn pịrị, mịẹtẹ gbọrụḅọ-sọ ḅarị ịna ḅụ mịẹkọn ḍọkị ḅịa ḅara.

⁸ Kụma ḅẹḅọ-ḅẹḅọ tẹ mḅọ amịnapụ ḍikiḍiki-a ḅọ, jen-a jen-a mḅọ warị ḅẹ apụ, anị ḅọ mẹ mḅọ mininiye mẹ pịkị tẹ, mḅọ pịkị sii amụ Kịrayịsị minini-a ḅọ nẹngị tẹẹ.

⁹ Kụra atesi sịḅị ḅụ ḅọrọtẹ diḅọ-fịtẹ-ẹrẹḅọ mie ị́ kẹ diapụ-fịtẹ-ereme ma ḅụ sụa kịẹn ḅarịye. Anị ḅụ simearị jen ye anie, á gbọrụ sakị ngẹrị kẹ owiḅọ sime tẹ ḅọ sọ ḅa,

¹⁰ tẹ pịkị iḅiye mịẹ ḅụ tomi iḅima lekiri wararị ḅọ. Karakara ḅara kẹ amịna awọmẹ ḍikiḍiki pakama-ḅo tẹ ẹrẹḅọ. Tọrụ nimi-a apụ daa á warị suu tẹ ḅọ. Ḅụụ-iderima tẹ fịrị mẹnjị á pembema Kịrayịsị ḍukamẹnjịapụ pịrị tẹ ḅọ. Ḅarasụa ḅụụ-fụka kiri ḅụ sime apụ pịrị tẹ ḅọ; tẹ nwẹnị gbọrsịḅị amịna ḅụụ saakị iḅiye mịẹ pịrị tẹ ẹrẹḅọ.

¹¹ Kụma diapụ-fịtẹ-iriawọ kẹ sụa kịẹn ma; kẹ gotẹ ọkọ ḍukoarị, owiapụ sime ịn tarị sakị ini ọḅụ pịkị Kịrayịsị gbin

¹² tẹ ḅo tarị-pịrịpịrị-ḅụ in minini ọ̀ pịrị tẹ ye mẹ ḅụ ḅịḅị ḍima tẹ apụ sọ ḅa.

¹³ Ịn pịkị ḍawọ tẹ saakị fama tẹ mẹnjị warị, warị sọ ma ḅọrọ ḅa; kụma arịmgba ḅụ sii tẹịn ye, ịn ḍawọ tẹ kịnị kẹ ọḅụjụ fiema ḅọrọ tẹ in gboloma-a aị dogi-mu anga-anga ḅụ ḍuko ḅa, nwẹnị in ḍuko gbẹẹ-a aị sọ ḍuko.

¹⁴ Anie ḅụ ị̀ ḅụụ-ḅẹlẹ tẹịn ye anie, iriawọ tẹ diapụ-fịtẹ-ereme ma owiapụ simee, tẹ awọ iyi tẹ ịna awarị nyana tẹ ḍikiḍiki, mie ḅụ ịn ḅarị kiri kẹ si kẹ wa tọn-arị apụ ma pịrị tẹ ịn wamịna ḅụụ siye ḍuko ḅịa.

¹⁵ Kẹ gotẹ ọkọ ḍukoarị, ja diapụ-fịtẹ-ereme saakị pịkị mu Ekwesu ḍukamẹnjị tẹ.

¹⁶ Kụma Kịrayịsị minini wararị ẹrẹḅọ, tẹ amịna warị ḅụ diapụ-fịtẹ-ereme emi ḅọ emi ḅọ, árị in ḍikiḍiki, tẹ anị ḅẹ ikuye mẹ kẹ sọsị mẹ ponoma ma, mịẹtẹ sọsị mẹ ḅarasụa pịrị apụ nyana-a diapụ-fịtẹ-ereme ma ngẹrị ḍikiḍiki ḅarị ḅara.

¹⁷ Omongiapụ ma tẹ, kịnị kẹ sịḅịdapụ ḅara ḅụ iḅi kọrịnama kọrịarị apụ ma ini ịna gbẹẹ-ye mẹ ḅẹ maa kiri nyana na-iḅim, jen-a jen-a Tamụnọ ẹkwẹn kọn na ye-toluma na kụrọ kọrịnama mẹ kọrịarị apụ ma.

¹⁸ Kẹ gotẹ ọkọ ḍukoarị, Fịafịa Ḍiri mẹ ḅẹẹarị, “Ị́ kẹ mbịaka sẹlẹ kọrịnama kọrịarị nambulo ḅe ḅịḅị fịnama”, anị pịkị ḅẹẹarị, “Kọrịnama-kọrịḅọ ḅe gbẹẹ-ye kẹ ọ̀ gbẹẹ.”

¹⁹ Maa apụ anịanịa ọkọ nẹngị apụ ḅo ịn kẹ ye ẹrị ḅara ḍuko-a ogbo ịn kẹ omongiḅọ sịḅị sẹịn-arị ḅẹrẹ poki ma.

²⁰ Tomina ogboku ḅụ siye mịẹarị apụ mamgba ḍiki-ịganịị, mịẹtẹ kirikọn-apụ ḅalafa ḅarị ḅara.

²¹ Tamụnọ tọrọkọ ḅụ, pịkị Kịrayịsị Jizọsị tọrọkọ ḅụ, pịkị fịafịa enjẹlị apụ tọrọkọ ḅụ na, à tẹmẹ la ḅara kẹ ị́ sịn tẹ ị́ ḅẹẹarị mịnẹ ị̀ ḅịḅị poki tẹ mịna àrị ị́ ḅẹẹm mịẹ ḅẹ aị ma mịẹ, tẹ ị́ mịẹarị ye goyegoye ḅụ ḍụkụ tẹ ị́ ḅẹrẹ kẹ ḅioḅẹngbọ sụa, anịanịa aḍụa nyana, gbọrụḅọ-sọ pịrị ma.

²² Owima owima, ị́ aḅara kẹ gbọrụḅọ-sọ ọgọnọ gbana tẹ mḅọ wẹrị sikima KỊNỊNYANAḄỌ ḅe fịrị mẹ pịrị ma. Ja apụ asi ḅụ ḅara kẹ suu ma; ị́ ḅụụ wẹrị fịafịamaa.

²³ Í obi-ịkọnị la ḅara ḅụ, minji kịngẹ ḅuu ma, kụma iru kalịye ḅuu tẹ kẹ ḅarasụa ị́ fị fịye daḅọrọmaa.

²⁴ Ja apụ asi giregire paka tẹ kịnị ẹrịarị, tẹ ịn kẹ mu ḅẹrẹkọn laarị; kụma osi apụ asi ma kịnị kpekele ẹrị-a.

²⁵ Anị gbọrụ ḅara ḅụ giregire wararị iḅi amịẹaị emi, tẹ giregire ḅaka-a aị ma sọ arị ḅọị fa ḅịa.