1 Timoti 4 - FỊAFỊA BAỊBỤLỤ

Iruo Ye-tolumapụ

¹ Tẹmẹ ḅe ḍuko giregirema wararị mịnẹ mu ma mu sakị Ja atomi mininiye mẹ ḅụ ḅara-siin ḅa; iruo atẹmẹ ḍuko ye mie in poki tẹ oru amẹẹ atoluma-aị ḍukamẹnjị ḅarịye.

² Ọkọ sime toluma aị ma iruo kẹ oḅori-kẹ-kịnịsịn ḅụ mie ini arị wasamarị, anịsakị aniemẹ mịẹarị apụ ma ịna tẹmẹ aḅioḅẹngbọ fịị tẹ, gbala ọfịrịarị ikulele kẹ dọkịma ye ọkụ.

³ Ọkọ sime atomi ma tolumarị mịnẹ ama-na-ere-na sime na, ja afịaị fị na kura-a. Kụma arị afịaị ma Tamụnọ tẹmẹm tomi fị, ịn tẹkẹ tẹ ịmịẹtẹ kẹ Tamụnọ ḅẹẹ tẹ ḅẹḅẹ, anie Kịrayịsị minini tẹ karakara mẹ nimi tẹ apụ ma.

⁴ Tamụnọ tẹmẹ ye goyegoye iḅim; tomḅọ sịkị ḅẹ ye ofori, kụma mḅọ inetẹ ḅẹẹye-ḅẹẹye fị ḅa, mḅọ Tamụnọ tẹkẹ tẹ ịmịẹtẹ ḅẹẹ tẹ ḅẹḅẹ,

⁵ gbala Tamụnọ ẹkwẹn mẹ na tẹkẹ mẹ na anị mịẹtẹ anị ḅo Tamụnọ ọkị gbẹẹ ḅara sime tẹ ẹrẹsị.

Kịrayịsị Jizọsị Iḅi Fịrịmẹnjịḅọ

⁶ Ị́ ma ịn mịẹ ḅẹ aị ma ḍuko mịnapụ ma pịrị kụma, ị́ Kịrayịsị Jizọsị iḅi fịrịmẹnjịḅọ sọ ḅa, anie ḅioju nwẹnị minini ẹkwẹn ma na, í ḍukamẹnjịarị karakara tolumaye mẹ na kẹ tẹmẹ fịye sọma fị-fị.

⁷ Kụma mịna Tamụnọ kẹ ye-sịn-a ịlụkụ ma ḅẹ aḅẹrẹ ma ḅụ ị́ ḅụụ sikima, anie ḅịḅị finji tẹ ḍuko gbẹẹ sọ gbẹẹ-a aị ma. Ị́ ḅụụ tẹlẹma Tamụnọ kẹ ye-sịn ḍumo pịrị sakị mamgba.

⁸ Meni-oju mẹ aḍaka ḍiki tẹ anị mịẹ kụrọma mẹ nyana iḅi emi, kụma tẹmẹ gboloma ye ḅụ ḅụụ aḍaka ḍiki tẹ anị mịẹ kụrọma mẹ ḅọkọ-ḅọkọ ḅụ iḅi famam, kẹ gotẹ ọkọ ḍukoarị, mịọkụ simearị ḍumo mẹ ḅụ anị nyana iḅi emi, pịkị tọrọkọ-jụ ḅo ḅarị ḍumo mẹ ḅụ sọ anịḅẹ iḅi emi.

⁹ Miemẹ karakara ẹkwẹn, pakịrị-pakịrị ḅụ ọkị tẹ pịkị minini na-iḅi ye.

¹⁰ Wa ḍumo wararị Tamụnọ ḅe, inweni-mgba Ḅọrọmaḅọ ḅe, jen-a jen-a, ini ma tẹ minini apụ ma, kẹ ḅiokpọma wararị ẹrẹsị, wa ḅụụ-kọsị tẹ kụrọma kọrịnama kọrịarị.

¹¹ Mịna ịn mịẹ ḅẹ aị ma ḍuko ịn pịrị tẹ pịkị mịna aị ma kẹ in tolumaa.

¹² Ḍụkụ tẹ gbọrụḅọ-sọ ị́ kala mẹ kẹ í ḍiki-sima ma, kụma kịnị í ḍikima mịẹ ḅẹ ḅara sime Kịrayịsị minini apụ ma pịrị, ị́ ẹkwẹn na, í ye-mịẹ-ḅara na, í ḅẹlẹma na, minini na, fịafịa ḍumo na ḅụ.

¹³ Ḅụụkụrọma tẹ sakị ḍọkị pakama tẹ kẹ tomina ogbo ḅụ Fịafịa Ḍiri mẹ gotẹ, tẹ Tamụnọ ẹkwẹn mẹ kọn ịn pịrị, pịrị tẹ ye kẹ in toluma nwenii à ḅo sakị la.

¹⁴ Tẹmẹ ḍiepịrịye tẹ ị́ ḅụụ ḅio ḅụ simearị ye mẹ kẹ gbin koroma tẹ anị papaa fama, anị ḍiepịrịye mẹ tẹ ịkịankoroapụ ma Tamụnọ ẹkwẹn kọn tẹ omongiapụ ma ịna aḅara kẹ ị́ ọgọnọ gbana sakị ị́ nyana ye mẹ.

¹⁵ Mịna aị ma mịẹ ma ḅọrọ, tẹ ị́ ḅụụ saakị arị pịrịị, mịẹtẹ kịnị mamgba mịna aị ma ḅụ í loloarị mẹ ẹrị.

¹⁶ Ị́ ḅụụ ẹbịị, pịkị í tolumarị ye sọ ẹbịị. Mịna aị ma mịẹ ma tọrọkọ muu, kẹ gotẹ ọkọ ḍukoarị, ị́ ọkọ mịẹ kụma ị́ ị́ ḅụụ ḅọrọma ḅa, pịkị ị́ naarị apụ sọ.