1 Timoti 2 - FỊAFỊA BAỊBỤLỤ

Kẹ Sọsị Wẹrị Ḅẹ Ḅara

¹ Ọkọẹrẹsị, ye mamgba ḅụ tarị ye, à ḍuko kụrọma ọ́ pịrịarị, ọ́ Tamụnọ ḅara ye ḅii-ḅii tẹ, pịkị ọ̀ tẹkẹ tẹkẹ tẹ ịmịẹtẹ kẹ ọ̀ ḅẹẹ tomi mamgba pịrịị;

² kẹ amadapụ na, kụrọ-ḅara ḅụ simearị apụ mamgba na pịrịị, mịẹtẹ wa gbene na dein na ḍumo kọn ḅarị ḅara, kụn goyegoye kẹ Tamụnọ pịrị na-iḅi ye mịẹ ḅara na ḅụ.

³ Miemẹ iḅim, tẹ anị pịkị Tamụnọ, wamịna Ḅọrọmaḅọ ḅe ḅụụ ḅẹlẹarị,

⁴ anie ḅiiarị ḅẹḅọ-ḅẹḅọ ḅọrọma tẹ karakara mẹ nimi ḅẹẹ ḅọ ḅe.

⁵ Kẹ gotẹ ọkọ ḍukoarị, gbọrụ Tamụnọ ngẹrị emi, tẹ Tamụnọ na tomi na kẹ ḅo gbolomarị ḅọ pịkị gbọrụḅọ, anie Kịrayịsị Jizọsị Tomḅọ Ḅe,

⁶ anie amịna ḅụụ saakị pịrị tẹ kẹ tomi mamgba pakịrị ḅọ ḅe. Anie mẹ anị ḅẹ karakara sakị ḅụ ḍie-paka tẹ mịnẹ Tamụnọ ḅiiarị ḅẹḅọ-ḅẹḅọ ḅọrọmaa,

⁷ tẹ anie mie in gotẹ ị̀ fịrịma ye, Ja asịẹ ḅẹ apụ ma fịrịmẹnjịḅọ na ye-tolumaḅọ na ḅara ḅụ, à mu minini na karakara na oku mẹ ḍuko wasama. Àrị iruo ye ḍuko-a; karakara mẹ mie à ḍukoarị!

⁸ Sọsị wẹrịarị anga goyegoye ḅụ, à ḅiiarị owiapụ tẹkẹẹ, amịna aḅụụ wẹrị kpaịnma Tamụnọ pịrị tẹ owiapụ, tẹ inetẹ ịna aḅara saakị-gelema tẹ tẹkẹ ḅarị apụ, ịganị anịanịa nụnụa ye ofori ḅara.

⁹ À pịkị ḅiiarị mịnẹ ereme, ịna akapa na ye-ḅiri ḅara na ḅụ kịsị ḅara na sịḅịḅio nyana ḅara na sime; kịrị-kịrị ḅara kẹ sịḅị-ḅẹ-inume mịẹ ḅụ-a, anịanịa, golu opu aḅiri aị, anịanịa pahalị anịanịa opu yela ḅiriaị,

¹⁰ kụma iḅi-aị mịẹ ḅara ḅụ, anie Tamụnọ etela mẹnjịarị ḅara kẹ ḅụụ ọkịarị ereme ḅara ḅụ.

¹¹ Ereme yaụ-sime, tẹ ḅụụ iderima ḅụ ye ḍawọọ.

¹² In ye-toluma tẹ ḅẹrẹtọn owiapụ pịrị ḅa mẹ à ḍụkụ ịn pịrị-a; in gbene simee.

¹³ Kẹ gotẹ ọkọ ḍukoarị, Tamụnọ tarị Adamụ tẹmẹm, tẹso, Ivu.

¹⁴ Anịsakị Ekwesu ḅe oḅori kẹ sịn ḅọ Adamụ-a; árị ẹrẹḅọ ma mie ori oḅori kẹ sịn tẹ á Tamụnọ oloko kan ye.

¹⁵ Kụma ẹrẹḅọ awọ iyi ḅụ ḅọrọ tẹ ḅọrọma ḅa, á nwẹnị minini na, ḅẹlẹma na, fịafịa na kịsị ḅara kẹ ye mịẹ na ḍumo ḅụ ye-inema tọrọkọ-tọrọkọ mu kụma.