1 Tẹsalonịka 5 - FỊAFỊA BAỊBỤLỤ

Ọ́ Tẹlẹma KỊNỊNYANAḄỌ Ḅe Ḅoo Mẹ Pịrịị

¹ Mịnapụ, gotẹ mịna aị ma paka ḅẹ asakị na, mịẹ ḅẹ anga ma na, kẹ ḍiri ḅio kẹẹ sụa, sụa ye ofori.

² Kẹ gotẹ ọkọ ḍukoarị, ọmịnị ḅioju sọ nimi ḅara ḅụ, KỊNỊNYANAḄỌ ḅe ḅo ḅarị Ene mẹ furuḅọ ḍin ḅụ ḅo-ḅo ḅara pembe ḅara mie anị ḅo ḅarị ḅara.

³ Tomi “Ye goyegoye kpaịn fama tẹ, wa la-la ye ḅarị ofori,” ḅẹẹarị ogbo mie, ḅiotọn-a ḅara ḅụ, ịn ḅaa guluguluma ḅarịye ḅo ịn bịan sịẹ ḅarịye. Anị kẹ ḅo ḅarị ḅiotọn-a ḅara mẹ kịka ḅarịye anie iyi akụ bẹkẹ ḅara kẹ ḅo iyi la tẹ ẹrẹḅọ la ḅara pembe ḅara, tẹ tomi anị ḅio pụkọ-paka so ḅịa.

⁴ Ọmịnị kụma, mịnapụ, ọ́ kanakana ḅio emi tẹ Ene mẹ furuḅọ ḅo ḅara kẹ bẹkẹ-ḅara-kẹ ḅo ọ́ la ḅịa.

⁵ Ọmịnị-mgba ó sime bele pịrịm, sime ḅaa ene pịrị apụ. Wa sime ḍin, anịanịa kanakana pịrị-a.

⁶ Anie ẹrẹsị, wa osi apụ monoarị ḅara kẹ mono ḅịa; wa tọrụ finji tẹ sịḅịḅio kuḅu wararị apụ ḅara kẹ simee.

⁷ Ḍin ḅụ mie tomi monoarị, ḍin ḅụ mie ịn pịkị iru ḅuu tọrụ-ḅaamarị.

⁸ Kụma wa sime ḅaaene mẹ pịrị wararị sakị goyegoye, wa sịḅịḅio kuḅu wararị apụ ḅara simee. Wa minini na, ḅẹlẹma na kẹ ekpe gbaịn ye sọma, tẹ ḅọrọma ḅụ wa nyana wararị ḅiokpọmaye mẹ kẹ okpoko-sun sọma tẹ suree.

⁹ Tamụnọ, wa ori ịganị da ḅẹ gotẹ wa sẹlẹ-ọkị-a, kụma wa wa Nyanaḅọ Jizọsị Kịrayịsị ḅụ ḅọrọ tẹ ḅọrọma nyana, mie ò gotẹ wa sẹlẹ-ọkị ye,

¹⁰ anie wa ori na gbọrụ ḅụ ḅụ ḍumo ḅẹ ẹrẹsị fịị wa pịrịị ḅọ ḅe, ò ḅo sakị, wa ḍumo ḅụ emi-o, fịị ḅụ-o.

¹¹ Anie ḅụ, ọ́ jụmọ-jụmọ ḅiokpọmaa, pịkị ḅarasụa jụmọ-jụmọ pịrịị, mị gbọrụ sakị mẹ ḅụ sọ ọ́ mịẹarị ḅara mẹ.

Ḅeri Nụnụ Akunoma Ẹkwẹn Na Ḅii-ḅịḅị Na

¹² Wamịna amịnapụ, sisi wa ọ́ tẹkẹm, ọmịna ogboku ḅụ kọrịnama kọrịarị tẹ Kịrayịsị ḍukamẹnjị ḍumo mẹ ḅụ ọ́ datụkụma tẹ ye kẹ ó tolumarị apụ ma, ọ́ karakara ḅara kẹ ịn kụn.

¹³ Ọmịnị opu kụn na ḅẹlẹma na nyana ịn pịrị ḅara kẹ ini na mịẹ, ịn kọrịarị kọrịnama mẹ ẹrẹsị. Ọmịnị ogboku ḅụ ó deinma angaa.

¹⁴ Wamịna amịnapụ, wa ḍuko kụrọma ọ́ pịrịarị, ọ́ gbọrụ kọrịnama sọ kọrị ḅẹ ḅii-a apụ ma ḅeri nụnụụ, ḅioḅẹngbọ lọkọarị apụ ma ḅiokpọmaa, ḅarasụa ịnyọ nyana-a apụ pịrịị, tẹ ye-inema nyana ḅẹḅọ-ḅẹḅọ pịrịị.

¹⁵ Ọmịnị ẹrị mịnẹ gbọrụḅọ-sọ kura-aye kẹ si kẹ mḅọ mịẹ ḅọ mịẹ ọkị-a, kụma sakị mamgba ọ́ kẹ ọ́ mịẹ ḅẹ tẹ kẹ ḅiotọn wararị ye sọma, mịnẹ ọmịnị iḅi kẹ jụmọ-jụmọ mịẹm, pịkị tomi mamgba na.

¹⁶ Sakị mamgba ó ḅioḅẹlẹẹ,

¹⁷ sakị mamgba ọ́ tẹkẹẹ,

¹⁸ paka ye, paka ye sọ, ọmịnị ịmịẹtẹ kẹ Tamụnọ ḅẹẹ. Miemẹ anie Tamụnọ ọmịna aḅara ḅiiarị ye, ọ́ Kịrayịsị na gbọrụ ḅụ sime tẹ kọn-arị ḍumo mẹ ḅụ.

¹⁹ Ọ́ Fịafịa Tẹmẹ ḅe kiki ma;

²⁰ ọ́ Tẹmẹ ḅe tomina tẹmẹ jike tẹ in ḍukoarị oku ma ḍiki-sima ma.

²¹ Ó ye mamgba sọkịrị ḍikii; ọmịnị iḅiye mẹ ọlọ-sịẹmaa,

²² tẹ siye goyegoye kọkọrọọ.

²³ Yee dein kẹ wa pịrịarị Tamụnọ ḅe ọ́ mịẹ fịafịama, ḅọkọ, ḅọkọ ḅụ, tẹ ọmịna bebe ḅụụ mẹ koko — tẹmẹ na, ḅioḅẹngbọ na oju na — tẹ wa Nyanaḅọ Jizọsị Kịrayịsị ḅo sakị mẹ ḅụ, gbọrụ siye sọ ó gboloma ḅịa ḅara.

²⁴ Ọ́ sịn mị etela mẹ ḅụ suu ḅọ ḅe anị mịẹ ḅa, ori ọ̀ ḅịḅị sima sima-a ẹrẹsị.

²⁵ Mịnapụ, ọ́ tẹkẹ wamịnị sọ pịrịị.

²⁶ Ọ́ ḅẹlẹma ḅara ḅụ ekpe kẹ minini apụ mamgba fịnama-fịnama tẹ in ḅii.

²⁷ KỊNỊNYANAḄỌ ḅe kụrọ ḅụ, à ḍuko kụrọma ọ́ pịrịarị mịnẹ ọ́ mị ḍiri mẹ go minini apụ mamgba pịrịị.

²⁸ Wa Nyanaḅọ Jizọsị Kịrayịsị ḍiki-ḅụụjịrị mẹ ọmịnị-mgba na simee.