1 Tẹsalonịka 3 - FỊAFỊA BAỊBỤLỤ

¹ Kunoma ḅụ, wa ḅarị inetẹ inema-a tẹso, wa nwẹnị tọn mịnẹ wamịnị Atẹnịsị ḅụ paa

² simearị ogbo, Timoti, wamịna mịnaḅọ tẹ wamịnị na Kịrayịsị gboloma Iḅi Oku ḍuko kọrịnama mẹ kọrị Tamụnọ pịrịarị ḅọ ḅe kẹ ọ́ fịrịmam. Wa ọ̀ fịrịmam ò ḅo ịwọ ịnyọ kẹ ọmịna ḅụụ suu, tẹ ḅarasụa ọ́ pịrị ọmịna minini ḅụ,

³ mịẹtẹ ọmịna ḅụụ ḅẹ gbọrụḅọ-sọ mịna ḅaa-ḅọkọ ma kẹ ọ́ ḍọkịm ẹrẹsị ọḅụ da ḅịa ḅara. Ọmịnị sọ nimi ḅara ḅụ ọkọ sime-ḅara kẹ ḅaa-ḅọkọ kẹ wa ḍọkị mẹ anie Tamụnọ ḅii ḅara.

⁴ Kẹ gotẹ ọkọ ḍukoarị, wa ọmịnị na sime, sime sakị, wa ḍuko ọ́ pịrị wẹrị tẹ mịnẹ ịn ḅaa-ḅọkọ kẹ wa ḍọkị ḅa, tẹ ó nimi lama wararị ḅara ḅụ, kọkọ-kọkọ, wa ḍuko ye mẹ paka tẹ.

⁵ Anịẹrẹsị à Timoti kẹ fịrịmam. À ḅo ḅarị inema-a ḅiri la tẹso, à nwẹnị ọ̀ fịrịma mịnẹ ò ḅo ọmịna minini sime ḅara ḍọkị-nimi. Karakara-ḅara-ḅụ Ekwesu inetẹ ó toluma fama mu wamịna kọrịnama mẹmgba papaa fa ḅara lama ḅịa.

⁶ Mịọkụ Timoti pịkịma-ḅo tẹ ọmịna minini na, ọmịna ḅẹlẹma na gboloma aị ḍuko wa pịrị tẹ wamịna ḅioḅẹlẹ tẹ. Ò ḍuko wa pịrịm mịnẹ ọ́ kpọma iḅi kuroma nyana wa pịrị, tẹ pịkị wamịnị ẹrị ḅẹ ḅiiarị, wamịnị sọ kẹ ọmịnị ẹrị ḅẹ-ḅiiarị gbọrụ ḅara mẹ

⁷ Mie ḅụ, mịnapụ, wa ẹrịarị tọrụsiẹrị na, wa daarị ḅụụ-fụka na la ḅara, la ḅara sọ wamịna ḅiokpọ tẹ ó gbolomaye ḅụ. Ọmịna minini mie wamịna ḅiokpọmaye,

⁸ kẹ gotẹ ọkọ ḍukoarị, mịọkụ mie wa karakaramatẹ ḍumoarị, ọ́ KỊNỊNYANAḄỌ ḅe na gbọrụ ḅụ sime tẹ kọn-arị ḍumo mẹ ḅụ sịẹ-kụrọ wararị ḅẹḅẹ.

⁹ Mịọkụ wa ó gotẹ ịmịẹtẹ kẹ wamịna Tamụnọ ḅe ḅẹẹarị ọ̀ tọrọkọ wa ó gotẹ nyanarị ḅioḅẹlẹ ẹrẹsị, wa ịmịẹtẹ kẹ ọ̀ ḅẹẹarị.

¹⁰ Eneḅaka na ḍin na ḅụ wa ọ̀ tẹkẹarị mịnẹ ọ̀ paa mịẹtẹ wa ḅo ọmịnị ẹrị, tẹ ọmịna minini ḅụ kọn anga emi-emii wa anị mịẹ busunuma.

¹¹ Yee wamịna Tamụnọ, pịkị Ḍaḅọ ḅe ḅarana wa Nyanaḅọ Jizọsị ḅe na, etela tẹlẹma wa pịrị tẹ wa ḅo ọ́ la!

¹² Yee KỊNỊNYANAḄỌ ḅe mịẹtẹ ọ́ nyana jụmọ-jụmọ pịrị ḅẹlẹma na, tomi mamgba pịrị ḅẹlẹma na ḍụḅa tọrọkọ-tọrọkọ mu, tẹ ḍụḅa ḅo wa nyana ọ́ pịrị ḅẹlẹma na gbasị.

¹³ Mị ḅọkọ ḅụ ori ịnyọ kẹ ọmịna ḅụụ ḅio suu ḅa, tẹ mịẹtẹ ọ́ kara-gbasị tẹ fịafịa ḅa, wamịna Tamụnọ pịkị wamịna Ḍaḅọ ḅe tọrọkọ, wa Nyanaḅọ Jizọsị sime ọ̀ pịrị apụ ma na ḅoarị sakị mẹ ḅụ.