1 Samụẹlị 9 - FỊAFỊA BAỊBỤLỤ

Sọlụ Samụwẹlị Na Bịamam

¹ Benijamịnị furo ḅẹ ngọ-kọn wararị gbọrụ owiḅọ simem. Oriḅe ẹrẹ anie Kisi, Abiyẹlị owiḅọtụḅọ, pịkị Zẹrọ taa-owiḅọtụḅọ, pịkị Bekorati ile-owiḅọtụḅọ, pịkị Afịya ọsịkịsịkị-owiḅọtụḅọ.

² Ọ̀ gbọrụ owiḅọtụḅọ iyim; oriḅe ẹrẹ anie Sọlụ, iḅi-fịtẹ asatụḅọ. Izirẹlịapụ ma ogbo-ḅio iḅi ọ̀ nẹngị ḅọ ofori, ori ori apana ḅụ ọkị iwo kẹ gele tomi ma ḅụụ ḅẹḅọ-ḅẹḅọ nẹngịm.

³ Mịọkụ Kisi, Sọlụ ḍa ḅe yedogi-anama faam. Anieḅụ Kisi nwẹnị ori owiḅọtụḅọ Sọlụ ḅẹẹ, “Fịrịmẹnjịapụ ma ḅẹ gbọrụḅọ ọkị ị́ ḅụụ sụa, tẹ saakị mu tẹ yedogi-anama ma ḍọkịị.”

⁴ Ịn Iferemu tụndụ ọgọnọ ḅẹ opu sịẹ mẹ mẹnjị-tolum tẹ pịkị Salisa nwẹn-sịn ama mẹ sọ mẹnjị-tolum, kụma ini ịn ḍọkị-ẹrịa. Ịn nwẹnị Salimu nwẹn-sịn ama mẹ mẹnjị-toluḅọrọ, kụma anịjụ sọ ini ofori. Anịtẹso ịn nwẹnị Benijamịnị ama mẹ mẹnjị-toluḅọrọ, kụma ini ịn ḍọkị-ẹrịa.

⁵ In ḅo Zufu nwẹn-sịn ama mẹ la tẹso, Sọlụ nwẹnị ọ̀ fịrịmẹnjịḅọ ḅe tẹ ori na sime ḅọ ḅe ḅẹẹ, “Ḅoo, ye wa pịkịma-so, anieofori ị̀ ḍa ḅofa ḅarị yedogi-anama ma gbolomaye bala-a tẹ ḅo wa gotẹ ḅio-sẹsẹ.”

⁶ Kụma fịrịmẹnjịḅọ ḅe nwẹnị ọ̀ ḅẹẹ, “ḍikii, mị opu ama mẹ ḅio gbọrụ Tamụnọ tomḅọ emi, anịsakị ori anie tomḅọ tẹ kụn nyana wararị ḅọ, ò ḍukoye ḍukoye, ḅo karakaraye sọarị. Yee wa anịjụ mu; sosi-ọkụma ori inetẹ miemẹ tẹ wa gotẹ igoni mẹ kẹ paka-ḅo ye gbolomaye ḍuko wa pịrị ḅa.”

⁷ Anịtẹso Sọlụ nwẹnị ọ̀ fịrịmẹnjịḅọ ḅe gbela, “Wa mu kụma wa inetẹ tiye ọkị-ḅo tomḅọ ḅe pịrị ḅẹ? Kẹ gotẹ ọkọ ḅẹẹarị, wamịna akpa ma ḅio sime fịturu fa tẹẹ, anịsakị wa ọkị-ḅo Tamụnọ tomḅọ ḅe pịrị ḅẹ ḍiepịrịye sọ ofori, wa tiye nyana?”

⁸ Fịrịmẹnjịḅọ ḅe nwẹnị pịkị Sọlụ pakịrị, “Mịanga à seleḅa gbọrụ pakịrị kẹ inia akiri ḍiya ḅẹ gbọrụ pakịrị nyana wararị, arị anị kẹ Tamụnọ tomḅọ ḅe pịrị ḅa, ọ̀ wa mu ḅẹ etela ḍuko wa pịrị ḅẹ ḅara.”

⁹ (Ḅọrọtẹ sakị, Izirẹlị tomḅọ Tamụnọ ḅịḅị ḅii ḅẹ mu-muu, mḅọ ḅẹẹ ḅẹẹm, “Ḅoo, yee wa so-ḅịrịḅọ ḅe warị mu.” Anie oriḅe tẹ mịọkụ ịn kẹ ịkịankoroḅọ sịn ḅọ ḅe, ḅọrọtẹ sakị ḅụ ini ọ̀ sịnm so-ḅịrịḅọ)

¹⁰ Tẹ Sọlụ nwẹnị ọ̀ fịrịmẹnjịḅọ ḅe ḅẹẹ, “Í ḍuko ḅara kuram, ḅoo, yee wa mu.” Anieḅụ in so opu ama mẹ, Tamụnọ tomḅọ ḅe sime anga mẹ mum.

¹¹ In tụndụ mẹ kpọlị iwo opu ama mẹ muarị ogbo, in nwẹnị mẹnjị paka minji ḍuu ḅẹ ḅoarị asambịrịma iriawọ na bịama, tẹ ịn nwẹnị ịn gbela, “So-ḅịrịḅọ ḅe mịanga ori emi?”

¹² In nwẹnị pakịrị, Ori emi; ḍikii, mie ọ̀ paa ọmịna tọrọkọ mẹnjị muarị ḅara. Ọ́ fọnya muu, mie ọ̀ paa mịọkụ opu ama mẹ ḅo ḅara, gbala tomi ma mịmgba gele yọ mẹ ọgọnọ agba mịẹ nyana wararị ẹrẹsị.

¹³ Ọmịnị opu ama mẹ ḅio mẹnjị sọ-mu gbọrụ sakị, ọmịnị ọ̀ ḍọkị-ẹrị tẹrẹmẹ ò so gele yọ mẹ ḅụ fịye fị ḅẹ mu ḅa; kẹ gotẹ ọkọ ḅẹẹarị, agba mẹ ori anị boma nyanam, anịtẹrẹmẹ inima tẹ ịn sịn ḅo apụ ma fịye mẹ fị ḅa nwẹn ḅẹẹ sakị, tomi ma fịye mẹ fị ḅịa nwenii ò ḅo ḅa. Mịọkụ ọmịnị iwo muu, kẹ gotẹ ọkọ ḅẹẹarị, anị gbọrụ sakị ḅụ ọmịnị ori na bịama ḅa.

¹⁴ Anieḅụ ini iwo opu ama mẹ mum. In mẹnjị opu ama mẹ sọ-muarị ogbo ịn Samụwẹlị ẹrịm mẹnjị paka ịn dama-ḅoarị, ori ori etela ḅụ iwo gele yọ mẹ muarị ḅara ḅụ.

¹⁵ Mịọkụ Sọlụ ḅo ene mẹ ḅẹ ḅịẹịn ḅụ, KỊNỊNYANAḄỌ ḅe mịẹfinji Samụwẹlị pịrị tẹẹ;

¹⁶ “ḅaa nwẹn pembe sakị ḅụ à Benijamịnị ama mẹ ḅụ ḅo gbọrụ owiḅọ kẹ ị́ fịrịma ḅa, anịsakị amadaḅọ owiḅọtụḅọ sọ ị̀ atomi Izirẹlịapụ ma pịrị ḅarị ḅọ ḅara ḅụ í pulo kẹ ọ̀ sịḅị sara ḅa. Ori ị̀ atomi Izirẹlị ḅọrọma ḅa Filisiteniapụ ma ḅara ḅụ, kẹ gotẹ ọkọ ḅẹẹarị, àrị ị̀ atomi ma tọrụsiẹrị mẹ ẹrị tẹẹ, gbala ịna owu mẹ ḅo ị̀ la tẹẹ ẹrẹsị.”

¹⁷ Samụwẹlị Sọlụ ẹrị tẹso, KỊNỊNYANAḄỌ ḅe nwẹnị ḍuko ọ̀ pịrị, “Mịanga ḅụ ḅie owiḅọ ḅe tẹ à ḍuko ị́ pịrị sime ḅọ ḅee. Ori anie anịḅọ ḅe tẹ ḅẹrẹtọn ị̀ atomi pịrị ḅarị ḅọ ḅee.”

¹⁸ Anịtẹso Sọlụ mẹnjị sọma Samụwẹlị kpekim ogigo-ḅọkọ mẹ ḅụ, tẹ nwẹnị gbela, “ḍuko ị̀ pịrịị, ndẹẹ so-ḅịrịḅọ ḅe warị sime anga?”

¹⁹ Samụwẹlị nwẹnị Sọlụ pakịrị, “Yẹrị anie so-ḅịrịḅọ ḅee. Ị̀ tọrọkọ tarị mẹnjị iwo gele yọ mẹ muu, gbala mịmgba ị́ ị̀ na fịye fị ḅa ẹrẹsị, anịsakị ḅaa dede-ḅio mie arị ị́ wẹrịso tẹ í so ḅarị ye, tẹ í ḅioḅẹngbọ simearị ye mẹmgba ḍuko ị́ pịrị ḅarị ye.

²⁰ Ị́ yedogi-anama ma tẹ tẹra aḍin ḅọrọtẹ sakị ḅụ fa aị ma kụma, í ḅioḅẹngbọ kẹ ḅarị ịna ọgọnọ gbana ma, kẹ gotẹ ọkọ ḅẹẹarị, ini ịn ḍọkị-ẹrị tẹẹ. Anịsakị Izirẹlị ḅụ in ḅii na-iḅi ye mẹmgba sime tụḅọ pịrị? Anị sime kẹ ị́yẹrị na, ị́ ḍa warị mẹmgba na pịrị-a?”

²¹ Sọlụ nwẹnị pakịrị, “Yẹrị Benijamịnị furo-ḅẹ-ḅọ-a, Izirẹlị ḅẹ afuro ma ḅụ ịrụ-tẹịn furo mẹ? Anịsakị Benijamịnị ḅụ simearị afuro mamgba ḅụ ì furo mẹ iderima tẹịn-a? Í tiegotẹ anịtẹrẹmẹ mị-ḅara kẹ ẹkwẹn ị̀ pịrị?”

²² Anịtẹso Samụwẹlị Sọlụ na, ọ̀ fịrịmẹnjịḅọ na ọkịm tẹ ịn kẹ sara-sime ḅio mẹ ḅom, tẹ inima tẹ in sịn ḅo apụ ma sime anga mẹ ḅẹ sịḅịkọ ḅụ sime anga kẹ ịn pịrịm, ịn sịn ḅo apụ ma kịẹn-ḅịḅị kịnị suei pembe apụ.

²³ Tẹ Samụwẹlị nwẹnị fịye-sọ ḅọ ḅe ḅẹẹ, “Anị ḍiekiri mẹ tẹ à kẹ ị́ pịrịm, tẹ arị ị́ ḅẹẹm, ‘anị sikima koroma,’ nwẹn ḅẹẹ ye mẹ ọkị-ḅoo.”

²⁴ Anieḅụ fịye-sọ ḅọ ḅe ḅụọ eleke mẹ na, etemi mẹ na saakị ọkịm, tẹ arị kẹ Sọlụ tọrọkọ gbanam, tẹ Samụwẹlị nwẹnị ḅẹẹ “ẹrịị, aniemẹ tẹ ịn kẹ wẹrị ye mẹ ị́ tọrọkọ gbana tẹẹ. Pẹịị, kẹ gotẹ ọkọ ḅẹẹarị, anị sime ị́ pịrị nwenii ḅo tọọn wararị sakị mẹ tẹ í inetẹ igoni apụ ma na fịye fị ḅẹ sakị mẹ la ḅẹ ḅara.” Anieḅụ Sọlụ anị ene ḅụ Samụwẹlị na fịye fịm.

²⁵ In gele yọ mẹ ḅụ simetẹ ideri-ḅo opu ama mẹ ḅio sọ tẹso, ịn nwẹnị warị isun mẹ ọgọnọ gbọrụ iḅila anya Sọlụ pịrị, tẹ ọ̀ nwẹnị mono ḅẹ anị ọgọnọ ḅọlọlọ.

Samụwẹlị Pulo kẹ Sọlụ Sịḅị Saram Ḅẹrẹtọnḅọ Ḅara Ḅụ

²⁶ Anịtẹso ene mẹ ḅaa tẹ finji-koro ḅụ, Samụwẹlị iwo mu warị isun mẹ ọgọnọ Sọlụ sịnm, “Saakịị, mịẹtẹ arị ị́ kẹ í muarị anga fịrịma ḅẹ ḅara.” Anieḅụ Sọlụ saakịm, tẹ ori-o, Samụwẹlị-o mẹnjị paka etela mẹ mum.

²⁷ Ini opu ama mẹ ḅio ideri ama akaka mẹ la ḅẹ-muarị ogbo, Samụwẹlị nwẹnị Sọlụ ḅẹẹ, “ḍuko fịrịmẹnjịḅọ ḅe pịrị ọ̀ mẹnjị wa ḅọrọ tọrọkọ mu, tẹ ọ̀ mẹnjị ḅọrọ mu sakị, ị́yẹrị boowa sakị kẹ daasịẹ, mịẹtẹ à Tamụnọ ḅẹẹ ye ḍuko ị́ pịrị.”