1 Samụẹlị 8 - FỊAFỊA BAỊBỤLỤ

Tomi Ma Gbọrụ Amadaḅọ Ḅiim

¹ Samụwẹlị ḅo omongi tẹso, ọ̀ nwẹnị ori owiapụ-awọmẹ kẹ ḅẹrẹkọn-apụ mịẹ Izirẹlị ḅụ.

² Ori mgbe ḅe ẹrẹ anie Jowẹlị, anịsakị ò gbolo ḅe ẹrẹ Abija; ini anie Biyasẹba ḅụ ḅẹrẹkọn sime apụ.

³ Anịsọ ori owiapụ-awọmẹ ma ori etela ma ḅụ mẹnjị-a, kụma tọrụ pịkị akaka-ḅio sọye fị ḍọkịm; ini ọḅụ-fịm, tẹ karakara ḅẹrẹ pịkị iḅom.

⁴ Anịtẹso Izirẹlị ḅẹ omongiapụ mamgba nwẹnị ḅo kobiri gboloma tẹ Rama ḅụ Samụwẹlị dama-ḅo,

⁵ tẹ ọ̀ ḅẹẹ, “ḍikii ị́ omongi tẹẹ, anịsakị í owiapụ-awọmẹ ma í etela ma ḅụ mẹnjị-a; anịẹrẹsị mịọkụ ḅẹrẹtọn wa pịrị ḅẹ gbọrụ amadaḅọ tọn wa pịrịị, anị opu asịẹ mamgba ḅụ sime-ḅara pembema ḅara.”

⁶ Kụma ye mẹ Samụwẹlị ḅụụ ḅẹlẹ-a, ịn “ḅẹrẹtọn wa pịrị ḅẹ gbọrụ amadaḅọ kẹ wa pịrịị,” ḅẹẹ tẹso. Tẹ Samụwẹlị nwẹnị KỊNỊNYANAḄỌ ḅe tẹkẹ.

⁷ KỊNỊNYANAḄỌ ḅe nwẹnị Samụwẹlị ḅẹẹ, “Tomi ma kẹ ị́ ḅẹẹ ye mẹmgba ḅụ ịna pọkọ pokii; kẹ gotẹ ọkọ ḅẹẹarị, ini amụ ị́ sịkị-a, kụma yẹrị mie in sịkị ḅọọ, ama-da ịn pịrị ḅụ.

⁸ Ijiputi ḅụ arị ịn pakama-ḅo ene mẹ ḅụ ọkị-ḅo mịmgba mẹ sọ la, mịẹ-aị ma tẹ in wẹrịtẹ kẹ ị̀ mịẹ tẹ ḅara mẹ ini ị̀ sịkịarị tẹ fịrịmẹnjị oru-atamụnọ pịrịarị ḅara mẹ, mie in pịkị kẹ ị́yẹrị sọ mịẹarị ḅara.

⁹ Mịọkụ anie mịẹtẹ ịna pọkọ pokii, ị́ ị́ tẹmẹ-la ḅara ngẹrị kẹ ịna ḅeri nụnụ ḅa tẹ ama mẹ da ịn pịrị ḅarị amadaḅọ ḅe etela ma kẹ in ḍie ḅa.”

¹⁰ Anieḅụ Samụwẹlị KỊNỊNYANAḄỌ ḅe ẹkwẹn-aḅịḅị mamgba ḍuko tomi ma tẹ ọ̀ ḅara ḅụ amadaḅọ ḅiiarị apụ ma pịrịm.

¹¹ Ori ḅẹẹm, “Mịna aḅara ma mie amadaḅọ ḅe tẹ ama mẹ da ọ́ pịrị ḅarị ḅọ ḅe etela ma sime ḅarị ḅara: ori ọmịna owiapụ-awọmẹ ma ọkị tẹ in tọn ò kirimẹnjị-ọmụarụ pịrị na, ori asụ-dọkụ-ọmụapụ na, ori kirimẹnjị-ọmụarụ ma tọrọkọ mangị-na-koro-na apụ mịẹ ḅa;

¹² anịsakị ọ̀ ḅẹrẹtọn kịnị maa ẹndẹ oyia asi finji-finji na, kịnị amesi oyi finji-finji na pịrị apụ tọn ọ̀ ḅụụ pịrị ḅa, tẹ jen-apụ ori afịaị ḍiḅi kiri soku-ḅẹ apụ na, ori afịaị soku-ḅẹ apụ na, ori ọmụgbin aị tẹmẹ ḅẹ apụ na, ò kirimẹnjị-ọmụarụ ma ḅio kẹ ye mịẹ na-iḅi aị mịẹ karakarama ḅẹ apụ mịẹ ḅa.

¹³ Ori ọmịna eremịna-awọmẹ kẹ sẹntị sọ apụ na, fịye sọ apụ na, ịrụa anịanịa fịnị ọfịrị kẹ fịye fọị apụ na mịẹ ḅa.

¹⁴ Ori ọmịna iḅitẹịn aḍụọ na, kụrọ aḍụọ na, olivu aḍụọ na ọkị tẹ arị kẹ ori afịrịmẹnjịapụ pịrị ḅa.

¹⁵ Ori ọmịna sịnmgbọlị na, kụrọ aḍụọ na kẹ oyia akiri ḍiya ḅẹ gbọrụ kiri mẹ ọkị tẹ anị kẹ ọ̀ fịrịmẹnjị-opuapụ na, ori afịrịmẹnjịapụ na pịrị ḅa.

¹⁶ Ori ọmịna fịrịmẹnjị-ereme na, ọmịna anambulo ma ḅẹ iḅitẹịn aị ma ọkị tẹ kẹ ọ̀ kọrịnama ḅụ suu ḅa.

¹⁷ Ori ọmịna anana-ogbo ma kẹ oyia akiri ḍiya ḅẹ gbọrụ kiri ọkị ḅa, tẹ ọmịnị ori omoniapụ sọ ḅa.

¹⁸ Anịsakị anị ene mẹ ḅụ ọmịnị ọmịna amadaḅọ gotẹ peema owu pakama ḅa, oriḅe tẹ ọ́ sẹlẹ-ọkị ọmịna aḅụụ pịrị ḅọ ḅe; kụma KỊNỊNYANAḄỌ ḅe ọ́ pakịrị ḅịa anị ene mẹ ḅụ.”

¹⁹ Kụma tomi ma Samụwẹlị pọkọ poki ḍụkụ-a tẹ in nwẹnị ḅẹẹ, “Ẹn-ẹn, kụma wa amadaḅọ nyana wamịna-aḅụụ pịrị ḅa,

²⁰ mịẹtẹ wamịnị sọ opu asịẹ mamgba sime-ḅara sime ḅẹ ḅara, tẹ mịẹtẹ wamịna amadaḅọ ḅẹrẹtọn wa pịrị, tẹ wamịna tọrọkọ tarị, tẹ wamịna owu ma sọ ḅẹ ḅara.”

²¹ Samụwẹlị tomi ma ẹkwẹn-aḅịḅị mamgba naa fama tẹso, ọ̀ nwẹnị pịkị siin anị ḍuko KỊNỊNYANAḄỌ ḅe aḅeri ḅio suu.

²² KỊNỊNYANAḄỌ ḅe nwẹnị Samụwẹlị ḅẹẹ, “ịna pọkọ pokii, tẹ amadaḅọ pakama-ḅo in pịrịị.” Samụwẹlị nwẹnị anịtẹrẹmẹ Izirẹlịapụ ma ḅẹẹ, “ọrụḅọ-ọrụḅọ so amịna opu ama muu.”