1 Samụẹlị 4 - FỊAFỊA BAỊBỤLỤ

Ọḅọkụ-Igbe Mẹ Ḅẹ Kuun-ọkị Mẹ

¹ Samụwẹlị ẹkwẹn-ḅịḅị mẹ ḅo Izirẹlị mẹmgba lam. Mịọkụ Izirẹlị paka-mu Filisiteniapụ na owu-sọ ḅẹ mum; ini Ebeniza ḅụ akpụrụ-warị pike tẹ kobirim, tẹ Filisiteniapụ ma Afẹkị ḅụ akpụrụ-warị pike tẹ kobirim.

² Filisiteniapụ ma ọgbụrụ-sụn tẹ Izirẹlị da-pakam, tẹ owu mẹ finjima sakị, Filisiteniapụ ma nwẹnị Izirẹlị nẹngịma, inima tẹ owu siri mẹ ḅụ kịnị oyi ẹndẹ (4,000) pembe apụ ḅaa apụ ma.

³ Tẹ itu-itu ma ḅo kobiri anga mẹ la tẹso, Izirẹlị ḅẹ omongiapụ ma nwẹnị ḅẹẹ, “KỊNỊNYANAḄỌ ḅe tiegotẹ wa kẹ mangị ḅụ suu mịmgba Filisiteniapụ ma tọrọkọ? Ó yee wa Silo ḅụ KỊNỊNYANAḄỌ ḅe Ọḅọkụ-Igbe mẹ kẹ mịanga ḅo, mịẹ tẹ ori inetẹ wamịna ogbo-ḅio ḅo tẹ wamịnị na fịya-a apụ kụrọ mẹ ḅụ wa ḍụa-ḅọrọma ḅẹ ḅara.”

⁴ Anieḅụ tomi ma fịrịma Silo mum, tẹ anịjụ Ọmụ-ogbo ma ḅẹ KỊNỊNYANAḄỌ ḅe tẹ Sẹrubimu ma ọgọnọ ḅụ emine ọgọnọ lẹgị-sime wararị ḅọ ḅe Ọḅọkụ-Igbe mẹ ọkị-ḅom; tẹ Ịlayị maa owiapụ-awọmẹ Hofini na, Finihasi na anịjụ Tamụnọ Ọḅọkụ-Igbe mẹ na simem.

⁵ KỊNỊNYANAḄỌ ḅe Ọḅọkụ-Igbe mẹ ḅo akpụrụ-warị mẹ ḅio sọ tẹso, Izirẹlị mẹmgba kụrọ-nyanatẹ oloku kọnm, anieḅụ kiri mẹ jikem.

⁶ Filisiteniapụ ma oloku mẹ ḅẹ ye-yọ fiema mẹ naa tẹso, ịn nwẹnị ḅẹẹ, “Hiburu ḅịḅị fiearị apụ ma akpụrụ-warị mẹ ḅio mị gburo-gburotẹ oloku pọkọ mẹ tiye fie?” Ịn naam mịnẹ KỊNỊNYANAḄỌ ḅe Ọḅọkụ-Igbe mẹ ḅo akpụrụ-warị mẹ ḅio la tẹ ḅẹẹ ye ḅụ,

⁷ Filisiteniapụ ma nwẹnị ḅalafa; gbala ini mẹẹ, “Gbọrụ tamụnọ ḅo akpụrụ-warị mẹ ḅio sọ tẹ ẹrẹsị.” Ịn nwẹnị ḅẹẹ, “Ḅụụ-ḅalaḅala wori nume sime wa pịrịm! Kẹ gotẹ ọkọ ḅẹẹarị, jene-jene nwẹn sime ye amụ paka-a.

⁸ Ḅụụ-ḅalaḅala Wori-nume sime wa pịrịm! Tụḅọ inetẹ mịna kụrọ-nyanatẹ atamụnọ ma kụrọ ḅụ wa ḍụa-ḅọrọma ḅẹ? Mịna atamụnọ ma mie ịkpa mẹ ḅio kịrị-kịrị obi na, ḅụụ-fụka na kẹ Ijiputi-ḅẹ-apụ ma fomu atamụnọ ma.

⁹ Ó ḅiokpọ nyana-a, tẹ owiapụ ḅara kẹ ọmịna aḅụụ mịẹ-pakamaa, yei mịẹ-pakamaa, yei Filisiteniapụ, anieofori ó ḅofa omoniapụ sọ Hiburu ḅịḅị fiearị apụ ma pịrị, ịn wẹrịtẹ omoni-sọ wa pịrị ḅara; ọmịnị owiapụ ḅara kẹ ọmịna aḅụụ mịẹ-pakama tẹ owu-sọọ.”

¹⁰ Anieḅụ Filisiteniapụ ma owu sọm, tẹ Izirẹlị nẹngịmam, tẹ ịn ḍumo-mangị kọnm; ọrụḅọ-ọrụḅọ so mḅọ ama mum; tẹ ịn gburo-gburoma ịn ḅaa lamam, kẹ gotẹ ọkọ ḅẹẹarị, ḅụọ kẹ mẹnjịarị ọmụgbin-apụ ḅụ ịn kịnị tẹra apuku jeia ẹndẹ finji (30,000) ḅaam Izirẹlị ḅụ.

¹¹ Tamụnọ Ọḅọkụ-Igbe mẹ ịn nwẹn kuun-ọkịm; tẹ Ịlayị maa owiapụ-awọmẹ ma Hofini na, Finihasi na ḅaam.

Ịlayị Fịị Mẹ

¹² Benijamịnị furo ḅẹ gbọrụ owiḅọ owu-siri mẹ ḅẹ ọgbụrụ mẹ ḅụ mangị-som, tẹ anị gbọrụ ene ḅụ ḅo Silo lam; ori akapa kaan-sara wararị tẹ ọ̀ sịḅị mẹmgba lịka, lịka, lịka.

¹³ Ò ḅo la sakị Ịlayị opu etela mẹ akaka ori ịkasiye ọgọnọ lẹgị-sime tẹ ẹbịarị, gbala Tamụnọ Ọḅọkụ-Igbe mẹ gotẹ ò ḅioḅẹngbọ ḅụ ọ̀ ḅalafa tẹ oju sẹkịarị ẹrẹsị. Tomḅọ ḅe ḅo opu ama mẹ ḅio la, tẹ pakaye mẹ ḍuko tẹso, opu ama mẹmgba nwẹnị owu pakama.

¹⁴ Ịlayị fiearị owu pọkọ mẹ naa tẹso, ọ̀ nwẹnị gbela, “Mị sule pọkọ mẹ tiye fiearị?” Anịtẹso tomḅọ ḅe nwẹnị fọnya ḅo, tẹ ḍuko Ịlayị pịrị.

¹⁵ Mịọkụ Ịlayị sịḅị maa kụra fa kụra sonioa si ḅọrọ tẹ, ori atọrụngbọ ḅutuḅutu tẹ anie mịẹ tẹ ọ̀ ḅarị inetẹ ye ẹrị-a.

¹⁶ Tomḅọ ḅe nwẹnị Ịlayị ḅẹẹ, “Yẹrị anie ori tẹ owu mẹ ḅụ ḅo ḅọ ḅee; owu mẹ ḅụ mịmgba à ḍumo-mangị kọnm.” Ịlayị nwẹnị ò gbela, “ì owiḅọtụḅọ, ndẹẹ anị sime-ḅara?”

¹⁷ Oriḅe tẹ oku mẹ kẹ ḅo ḅọ ḅe nwẹnị pakịrị, tẹ ḅẹẹ, “Izirẹlị, Filisiteniapụ ma tọrọkọ ḍumo-mangị kọn tẹẹ, gburo-gburotẹ kịnị ḅaa pịkị tomi ma ogbo-ḅio paka tẹẹ; ị́ maa owiapụ-awọmẹ Hofini na, Finihasi na sọ fịị tẹẹ, tẹ Tamụnọ Ọḅọkụ-Igbe mẹ ịn nwẹn kuun-ọkị tẹẹ.”

¹⁸ Ọ̀ Tamụnọ Ọḅọkụ-Igbe mẹ go tẹso, Ịlayị nwẹnị ogigo-ḅọkọ mẹ akaka, ori ịkasiye mẹ ḅụ ḅịkị ọḅụ pịrị tẹ ọ̀ kọngọ anyịma, tẹ ọ̀ nwẹnị fịị, gbala ori anie omongi tẹ owiḅọ, anịsakị ori iku tẹ. Ọ̀ kụra amesi kẹ Izirẹlị ḅụ ḅẹrẹkọn tẹẹ.

Finihasi Ta, Diḅọ-fịtẹ-ẹrẹḅọ Ma Fịị Mẹ

¹⁹ Mịọkụ Ịlayị fụanḅọ, Finihasi ta ma sime-kọn ḍụḅa wararị tẹ iyi ḅẹ-yearị. Árị oku mẹ naam mịnẹ Tamụnọ Ọḅọkụ-Igbe mẹ ịn nwẹn kuun-ọkị tẹẹ, á fụanḅọ á di ḍa na, á di na sọ fịị tẹẹ ḅẹẹ ye ḅụ, bẹkẹ iyi á lam, tẹ á nwẹnị sombi tẹ iyi koroma, gbala akụ ḅo á lam ẹrẹsị.

²⁰ Á fịị ḅẹ-yearị sakị mẹ ḅụ, ḅarasụa á pịrịarị ẹrẹḅọ ma nwẹnị á ḅẹẹ, “Ḅalafa ma gbala ị́ gbọrụ owiḅọ iyi tẹ ẹrẹsị.” Kụma á pakịrị-a, anịanịa tọrụ pịkị á ḍiki.

²¹ Á nwẹnị ẹrẹ kẹ tụḅọ ḅe sịn, Ịkabọdị, tẹ ḅẹẹm, “Boma mẹ Izirẹlị ḅụ so tẹ!” Gbala Tamụnọ Ọḅọkụ-Igbe mẹ ịn nwẹn kuun-ọkị tẹ, pịkị á fụanḅọ á di ḍa na, á di na fịị ẹrẹsị.

²² Á nwẹnị ḅẹẹ, “Boma mẹ Izirẹlị ḅụ so tẹ, kẹ gotẹ ọkọ ḅẹẹarị, ịn Tamụnọ Ọḅọkụ-Igbe mẹ kuun-ọkị tẹ.”