1 Samụẹlị 31 - FỊAFỊA BAỊBỤLỤ

Sọlụ Na Ori Owiapụ-Awọmẹ Na Fịị

¹ Mịọkụ Filisiteniapụ ma owu kẹ Izirẹlị pakam; tẹ Izirẹlịapụ ma Filisiteniapụ ma tọrọkọ ḍumo-mangị kọnm, tẹ Giliboha Tụndụ ọgọnọ ḅụ fịị ḅọlọlọm.

² Tẹ Filisiteniapụ ma Sọlụ na, ori owiapụ-awọmẹ na ḍuka tẹ in lam; tẹ Filisiteniapụ ma Jonatanị na, Abinadabụ na, Malikisuwa na, Sọlụ owiapụ-awọmẹ ma na ḅaam.

³ Owu mẹ ḅẹlẹma Sọlụ ponoma kuromam; iboli-tẹịn-apụ ma ọ̀ ḍọkị-ẹrịm, tẹ iboli-tẹịn-apụ ma si ḅara kẹ ye kẹ ọ̀ lama lamam.

⁴ Anịtẹso Sọlụ nwẹnị ori owuaị dogiḅọ ḅẹẹ, “Í okologie nụnụ pakama-ḅoo, tẹ anị kẹ ì temi tolumaa, anieofori mịna ḅụụ-pẹlẹa apụ ma ḅofa ḅo ì temi toluma tẹ ị̀ kẹ kpọọti.” Kụma ori ọmụ-aị dogiḅọ ḅe anị mịẹ ḍụkụ-a gbala ò gburo-gburo ḅara kẹ ḅalafaam ẹrẹsị. Anịẹrẹsị Sọlụ nwẹnị ò soku-ḅẹ okologie ọkị tẹ ḅịkị anị ọgọnọ koro.

⁵ Ori ọmụ-aị dogiḅọ ẹrịm mịnẹ Sọlụ fịị tẹẹ tẹso, ori sọ nwẹnị ḅịkị ori okologie ọgọnọ koro, tẹ ori na fịị.

⁶ Mị-ḅara mie Sọlụ na, ori tẹra owiapụ-awọmẹ na, ori ọmụ-aị dogiḅọ na, ori atomi mamgba na gbọrụ ene ḅụ fịị gboloma ḅara.

⁷ Izirẹlịapụ ma tẹ tụndụ ogboku mẹ ḅẹ osi akaka sime apụ ma na, Jodanị mẹ sime apụ ma na ẹrịm mịnẹ Izirẹlịapụ ḍumo-mangị kọn tẹẹ, anịsakị Sọlụ na, ori owiapụ-awọmẹ na sọ fịị tẹẹ tẹso, in nwẹnị ịna opu ama ma sịkị, tẹ ḍumo-mangị kọn; tẹ Filisiteniapụ ma nwẹnị ḅo tẹ arị ḅio anga.

⁸ Anị ḅẹ ene-ḅaa ḅụ, Filisiteniapụ ma fịtẹ-apụ ma oju ḅẹ aị ma siin ọkị ḅẹ ḅo tẹso, in nwẹnị Sọlụ na, ori tẹra owiapụ-awọmẹ na ḍọkị-ẹrị Giliboha tụndụ ọgọnọ ḅụ in ḅịkị koro wararị.

⁹ In nwẹnị Sọlụ sịḅị pẹlẹ-siin, tẹ ori ọmụ-aị sin ọkị, tẹ nwẹnị oku-mẹnjịapụ kẹ Filisiteni ḅẹ ama ma fịrịma ikelema-koro iḅi-oku mẹ dogi-mu ḍuko ịna oru awarị ma na, tomi ma na pịrị ḅẹ ḅara.

¹⁰ Ini ori ọmụ-aị kẹ Asịtarọtị nkpu mẹ ḅio suu koromam, tẹ ori oju-akpakpa kẹ Ḅẹtị-seyani onu ḅụ ḅakụm.

¹¹ Kụma Jabẹsị-giliyadị ḅụ sime apụ ma, Filisiteniapụ ma kẹ Sọlụ mịẹ tẹ ye mẹ naa tẹso,

¹² ḅiokpọ tẹ kụrọma owu-sọarị owiapụ mamgba nwẹnị saakị, tẹ bebe ḍin mẹmgba kẹ mẹnjị, tẹ mu Ḅẹtị-seyani ḅẹ onu mẹ ḅụ Sọlụ oju-akpakpa mẹ na, ori owiapụ-awọmẹ oju-akpakpa ma na ọkịm; tẹ ini arị kẹ Jabẹsị ḅom tẹ anịjụ arị dọkịmam.

¹³ In nwẹnị ịna mgbe ma ọkị, tẹ arị kẹ Jabẹsị ḅụ Ẹsịyẹlị nwẹn-sịn opu sịn-suku ḍiḅi, tẹ nwẹnị sọnọma aḍin kẹ ḅuru-ịmọ.