1 Samụẹlị 30 - FỊAFỊA BAỊBỤLỤ

Amalẹkị Ḅẹ Apụ Na Gbin Ọmụ Mẹ

¹ Mịọkụ Devidi na ori atomi na tẹra aḍin karama ene mẹ ḅụ ḅo Zikilagị la sakị, Amalẹkị ḅẹ apụ ma ḅo Kenanị Suku-jụ mẹ na Zikilagị na gbaịn tẹ arị fọịn tẹẹ. In Zikilagị nẹngịmam, tẹ fịnị kẹ anị dọkịmam.

² Tẹ ereme na, ye mamgba tẹ anị ḅio sime aị ma na kala-o, opu-o kun ọkị-som; in gbọrụḅọ-sọ ḅaa-a; kụma ini in dogi-som, tẹ in muarị anga mum.

³ Tẹ Devidi na, ori atomi na ḅo ama mẹ la sakị, in nwẹnị ḍọkị-ẹrị fịnị anị dọkịma tẹẹ, anịsakị ịna sime-ereme na, owiapụ-awọmẹ na, eremịna-awọmẹ na, in nwẹn kun ọkị-so tẹẹ.

⁴ Anịtẹso Devidi na, tomi ma tẹ ori na sime apụ ma na nwẹnị ịna apọkọ saakị tẹ tẹmẹ-la ḅara kẹ owu nwenii kẹ owu-owu ịnyọ sọ in ḅarị nyana-a.

⁵ Devidi amaa ereme Jẹzirili ḅẹ Ayinohamụ na, Abigẹlị, Kamẹlị ḅẹ fịtẹ Nabalị ta ma na sọ in kun ọkị-so tẹẹ.

⁶ Devidi gburo-gburo ḅara kẹ ḅụụ-ḅalaḅalam, gbala tomi mamgba ọrụḅọ-ọrụḅọ mḅọ owiapụ-awọmẹ na, eremịna-awọmẹ na gotẹ tẹmẹ akụ nyana ọ̀ pịrịm, tẹ ḍụḅarị kẹ ò gbin ḅẹ ḍukom ẹrẹsị. Kụma Devidi KỊNỊNYANAḄỌ ọ̀ Tamụnọ ḅe ḅụ ịnyọ kẹ amịna ḅụụ pịrịm.

⁷ Devidi nwẹnị Abịyata, agbamịẹḅọ ḅe, Ayimẹlẹkị owiḅọtụḅọ ḅe ḅẹẹ, “Ẹfọdị nwẹn-sịn kapa mẹ ọkị-ḅo ị̀ pịrịị.” Anieḅụ Abịyata agbamịẹapụ kapa mẹ ọkị-ḅo Devidi pịrịm.

⁸ Devidi nwẹnị KỊNỊNYANAḄỌ ḅe ḅịḅị gbela, “Mie ama gbaịn tẹ fọịn ogbo mẹ arị in ḍuka? Arị in la ḅẹ?” Ọ̀ nwẹnị ọ̀ pakịrị, “In ḍukaa; kẹ gotẹ ọkọ ḅẹẹarị, tụkụma ḅara ḅụ ị́ ịn la tẹ tụkụma ḅara ḅụ in ḍụa-ḅọrọma ḅa.”

⁹ Anieḅụ Devidi na, ori na sime kịnị ẹndẹ oyia asi finji ma na saakị pakam, tẹ in ḅo Bẹsọ Kuroro mẹ lam, ini inima tẹ kọn apụ ma koroma-so anga mẹ.

¹⁰ Kụma Devidi ò ḍukarị apụ ma ḍuka ma-mum, ori na kịnị ẹndẹ ma na; inima tẹ ịnyọ ḅụụ ḅụ fa lama tẹ ḅarị inetẹ Bẹsọ Kuroro mẹ mẹnjị saḅa-a kịnị oyia asi ma ọḅụ kọnm.

¹¹ Ịn nwẹnị ama na kpeki-a anga ḅẹ Ijiputi ḅẹ gbọrụḅọ ḍọkị-ẹrị, tẹ ori ọkị-ḅo Devidi pịrị; in nwẹnị fịye kẹ ọ̀ pịrị fị, minji kẹ ọ̀ pịrị ḅụ,

¹² nwẹnị pịkị ịla kẹ mịẹ kiki gbọrụ pakịrị na, ịn kẹ rezini sịn sịnmgbọlụ amaa alikali kẹ ọ̀ pịrị. Tẹ ọ̀ fị fama tẹso, ọ̀ tẹmẹ nwẹnị naa-ḅo; kẹ gotẹ ọkọ ḅẹẹarị, tẹra aḍin na tẹra eneḅaka na ḅụ amụ ò fịye fị-a, anịanịa minji ḅuu.

¹³ Devidi nwẹnị ò gbela, “Í sime tụḅọ pịrị? Anịsakị ị́ tọ-anga ḅụ simetẹ ḅo?” Ọ̀ nwẹnị pakịrị, “Yẹrị anie Ijiputi ḅẹ asambịrịma owiḅọ, Amalẹkị ḅẹ gbọrụḅọ fịrịmẹnjịḅọ; tẹra aḍin ḅọrọtẹ sakị ḅụ àrị obim ẹrẹsị, ị̀ sịḅịdaḅọ ì koroma-som.

¹⁴ Wa Juda suku-jụ simearị Keretayịtị apụ ma na Kẹlẹbụ suku-jụ simearị apụ ma na gbaịn tẹ fọịnm. Wa pịkị fịnị kẹ Zikilagị dọkịma kiri lamam.”

¹⁵ Devidi nwẹnị ò gbela, “Í gbeke ị̀ ọkị tẹ kẹ ideri mị ama gbaịn tẹ fọịn ogbo mẹ ḍọkụma-mu ḅẹ?” Ọ̀ nwẹnị pakịrị, “ḅụụ-pikima ị̀ pịrịị, Tamụnọ ḅụ, mịnẹ ị́ ị̀ ḅaa, anịanịa ị̀ ḅọrọma mu ị̀ sịḅịdaḅọ ḅe aḅara-ḅio suu ḅịa, anịsakị àrị ị́ ọkị tẹ kẹ ideri mị ama gbaịn tẹ fọịn ogbo mẹ ḍọkụma-mu ḅa.”

¹⁶ Ori ori ọkị ideri-mu sakị, ini ama mẹmgba ḅio wasama tẹ fịye fị-fị, iru ḅuu-ḅuu sẹkịarị, in gbala Filisiteniapụ ma ama mẹ na, Juda ḅẹ ama mẹ na ḅio fọịn ọkị aị mamgba ḅẹ gburo-gburo mẹ ẹrẹsị.

¹⁷ Tẹ Devidi nwẹnị in ḅaa nwenii ḅo ene-ḅaa ḅẹ jen ḅoḅiri-so la; kịnị ẹndẹ tẹ ike-sụa-anama kpọlị tẹ ḍumo-mangị kọn apụ sikima, gbọrụ tomḅọ sọ mangị-soa.

¹⁸ Amalẹkị ḅẹ apụ ma ọkị tẹ aị mamgba, Devidi siin arị ọkị famam; tẹ Devidi ori amaa ereme ma ḍụa-ḅọrọmam.

¹⁹ Kpọkpọ gberie-sọ fa-a, anị ye ḅụ ḅẹ kalịye-o, anịanịa opuye-o, owiapụ-awọmẹ-o, anịanịa eremịna-awọmẹ-o, in fọịn ọkị aị-o, anịanịa ḅẹẹye-ḅẹẹye tẹ ini ọkị tẹ aị ma, Devidi arịmgba pịkịma-ḅom.

²⁰ Devidi anana ogbo-ogbo ma na, opu anama ogbo-ogbo mamgba na so kuun-ọkịm; tẹ tomi ma ọ̀ tọrọkọ ḅụ arị opu anama ma deema-deema mẹnjịm, tẹ ḅẹẹm, “Miemẹ anie Devidi ọmụ ḅio fọịn ọkị ye.”

²¹ Anịtẹso Devidi nwẹnị ḅo kịnị oyia asi ma tẹ ò ḍuka mu ḅụ ịnyọ ḅụụ ḅụ fa lama tẹ Bẹsọ Kuroro ḅụ ò koroma-so apụ ma la; tẹ in nwẹnị mẹnjị paka mu Devidi na, tomi ma tẹ ori na sime apụ ma na bịama ḅẹ mu, tẹ Devidi sọma tomi ma kpeki tẹso, ọ̀ nwẹnị sịn-ḅịḅị kẹ in pịrị.

²² Anịtẹso si-sịḅịḅio-sụa, ofori-ofori atomi mamgba tẹ tomi ma ogbo-ḅio Devidi ḅụ sọ tẹ mu apụ mamgba nwẹnị ḅẹẹ, “In wamịna-aḅụụ sọ tẹ mu-a ẹrẹsị, ḅẹẹ owiḅọ-owiḅọ inetẹ mḅọ taḅọ na, mḅọ awọmẹ na kẹ tọrọkọ tarị mẹnjị-so ḅẹ ye sikima, wa ọmụ mẹ ḅio fọịn tẹ siin nyana aị ma ḅụ wa gberie-sọ kẹ in pịrị ḅịa.”

²³ Kụma Devidi nwẹnị ḅẹẹ, “ọ́ KỊNỊNYANAḄỌ ḅe kẹ wa pịrị tẹ ye mẹ kẹ ọkọ mịẹ ḅịa, ị̀ owiapụ-amịnapụ; ọ̀ wa gbaịn tẹẹ, tẹ wa da-paka apụ ma kẹ wamịna ḅara-ḅio ḅụ wa pịrị tẹẹ.

²⁴ Tụḅọ mị ḅẹrẹ mẹ ḅụ ó poki ḅẹ? Ideri-mu owu mẹ sọ ḅọ ḅe ḍiekiri sime-ḅara mie oriḅe tẹ ọmụ ḅio fọịn ọkị aị ma ḍikiḍikiḅọ ḅe ḍiekiri sọ sime ḅarị ḅara. Ini arịmgba ḍie gbasịma ḅa.”

²⁵ Anị ene mẹ ḅụ saakị tọrọkọ mu, ori anị kẹ Izirẹlị ḅụ kẹẹ wararị oloko na, kụrọ ḅara-ḅio simearị ḅọ sụa oloko na mịẹ ḅo mịmgba lam.

²⁶ Devidi ḅo Zikilagị la tẹso, ọ̀ nwẹnị ọmụ mẹ ḅio ọ̀ fọịn ọkị aị ma ḅẹ pakịrị kẹ ori ikiapụ na, Juda ḅẹ omongiapụ na fịrịma, tẹ ḅẹẹm, “Mie sime ọ́ pịrị ḍiepịrịye KỊNỊNYANAḄỌ ḅe na fịya-a apụ ma na gbin ọmụ ḅio fọịn ọkị aị ma ḅụ.”

²⁷ Anị sime inima tẹ Bẹtẹlị na, Kenanị Suku-jụ ḅẹ Ramọtị na, Jataya na,

²⁸ Arowa na, Sifimọtị na, Ẹsịtẹmoha na,

²⁹ Rakali na, Jeramili apụ ama ma na, Kẹnayịtị apụ ama ma na,

³⁰ Họma na, Borasanị na, Ataki na,

³¹ Hẹbụrọnị na, anga-anga mamgba tẹ Devidi na, ori atomi na ikelekele mu la anga ma ḅụ sime apụ ma pịrịm.