1 Samụẹlị 3 - FỊAFỊA BAỊBỤLỤ

KỊNỊNYANAḄỌ Ḅe Ḅụụ Pakama Samụwẹlị Ḍiem

¹ Mịọkụ Samụwẹlị, owiḅọtụḅọ ḅe fịrịmẹnjị KỊNỊNYANAḄỌ ḅe pịrịarị Ịlayị suku-ḅio. Arị ene ma ḅụ KỊNỊNYANAḄỌ ḅe ẹkwẹn-ḅịḅị kụrọarị, mono-a ḅara kẹ wọlọ-wọlọ ye ẹrị ofori.

² Anị sakị mẹ ḅụ Ịlayị oriḅe tẹ tọrụngbọ saakị ḅutuḅutu tẹ anieḅụ ọ̀ ḅarị inetẹ ye ẹrị-a ḅọ ḅe ò soku-ḅẹ sime anga ḅụ koro-sime wararị;

³ Tamụnọ tọnjọ mẹ amụ biin-a, tẹ Samụwẹlị, KỊNỊNYANAḄỌ ḅe tẹkẹ-warị mẹ ḅio ḅọlọlọ sime wararị, Tamụnọ Ọḅọkụ-Igbe mẹ sime anga ḅụ.

⁴ Anịtẹso KỊNỊNYANAḄỌ ḅe nwẹnị sịn, “Samụwẹlị! Samụwẹlị!” Tẹ ọ̀ nwẹnị pakịrị, “Mie yẹrịị”

⁵ tẹ nwẹnị mangị Ịlayị ḍọkụma-mu, tẹ ḅẹẹ, “Mie yẹrịị, gbala ị́ ị̀ sịnm.” Kụma Ịlayị nwẹnị ọ̀ ḅẹẹ, “Àrị ị́ sịn-a; mu siin ḅọlọlọ simee.” Anieḅụ Samụwẹlị sọ-mu ḅọlọlọ simem.

⁶ KỊNỊNYANAḄỌ ḅe nwẹnị pịkị siin sịn, “Samụwẹlị!” Samụwẹlị nwẹnị saakị tẹ Ịlayị ḍọkụma-mu tẹ ḅẹẹ, “Mie yẹrịị, gbala ị́ ị̀ sịnm.” Kụma Ịlayị nwẹnị ḅẹẹ, “Ị̀ owiḅọtụḅọ arị ị́ sịn-a mu siin ḅọlọlọ simee.”

⁷ Mịọkụ Samụwẹlị amụ paa KỊNỊNYANAḄỌ ḅe lekiri-a, anịsakị amụ ịn paa KỊNỊNYANAḄỌ ḅe ẹkwẹn-ḅịḅị mẹ mịẹfinji ọ̀ pịrị-a.

⁸ KỊNỊNYANAḄỌ ḅe nwẹnị siin tẹrẹị karama sakị kẹ Samụwẹlị sịn. Ọ̀ nwẹnị saakị tẹ Ịlayị ḍọkụma-mu tẹ ḅẹẹ, “Mie yẹrịị, gbala ị́ ị̀ sịnm.” Anịtẹrẹmẹ Ịlayị nwẹnị tọnma nimi mịnẹ KỊNỊNYANAḄỌ ḅe mie owiḅọtụḅọ ḅe sịn-arị ye.

⁹ Anịẹrẹsị Ịlayị nwẹnị Samụwẹlị ḅẹẹ, “So mu ḅọlọlọ simee; tẹ ò siin ị́ sịn-sịịn, ị́ ḅẹẹ ḅa, ‘Ẹkwẹẹn, KỊNỊNYANAḄỌ, gbala ị́ fịrịmẹnjịḅọ naarị’ ” Anieḅụ Samụwẹlị so mu ori anga ḅụ ḅọlọlọ simem.

¹⁰ KỊNỊNYANAḄỌ ḅe nwẹnị ḅo tẹ anịjụ sịẹsime, tẹ ori osi asakị ma ḅụ sịn ḅara sịn, “Samụwẹlị! Samụwẹlị!” Samụwẹlị nwẹnị pakịrị, “Ẹkwẹẹn, gbala ị́ fịrịmẹnjịḅọ naarị.”

¹¹ Anịtẹso KỊNỊNYANAḄỌ ḅe nwẹnị Samụwẹlị ḅẹẹ, “Ḍikii, àrị Izirẹlị ḅụ gberie mịẹ ḅẹ-yearị, aniemẹ ḅụ tomḅọ goḅọ-goḅọ tẹ maa aḅeri kẹ anị naa ḅọ naa ḅọ ḅeri-ḅio anị woo-fie ḅa.

¹² Anị ene mẹ ḅụ, arị Ịlayị da-paka ḅa ọ̀ warị gbolomaye ḅụ à Suku-saakị ḅụ mu kunoma la ḍuko tẹ aị mamgba mịẹ ḅinma ḅụ.

¹³ À ḍuko ọ̀ pịrịm mịnẹ arị ọ̀ warị fomu gbamaso ḅẹ-yearị, mịẹ-irima tẹ ò nimim, ori owiapụ-awọmẹ ḅịḅị kẹ Tamụnọ lamarị tẹ ori ịn dasịẹma-a ye gotẹ.

¹⁴ Anịẹrẹsị à ye karị Ịlayị warị mẹ pịrịm mịnẹ, Ịlayị warị mẹ ḅẹ mịẹ-irima mẹ agbamịẹye, anịanịa agba inetẹ anị ḅẹ fomu-ḅara mẹ gbẹẹ ḅịa gbamaso ḅa.”

¹⁵ Samụwẹlị ḅọlọlọ sime nwenii ḅo dede-ḅio lam anịtẹrẹmẹ ọ̀ KỊNỊNYANAḄỌ ḅe warị mẹ ḅẹ aḅọkọ ma finjim. Ịkịan mẹ ḍuko Ịlayị pịrị nwẹnị Samụwẹlị ḅalafama.

¹⁶ Kụma Ịlayị nwẹnị Samụwẹlị sịn tẹ ḅẹẹ, “Ì owiḅọtụḅọ Samụwẹlị!” Samụwẹlị nwẹnị pakịrị, “Mie yẹrịị.”

¹⁷ Ịlayị nwẹnị gbela, “KỊNỊNYANAḄỌ ḅe ò tiye ḍuko ị́ pịrị? Anị kẹ ị̀ ḅọịma ma. Yee Tamụnọ ọkọ mịẹ ị́ pịrị, pịkị ọkọ nẹngị ḅara sọ mịẹ, ò ḍuko ị́ pịrị aị mamgba ḅụ ị́ ḅẹẹye-ḅẹẹye ḅọị ị̀ pịrị, pịrị.”

¹⁸ Anieḅụ Samụwẹlị ye goyegoye ḍuko ọ̀ pịrịm, tẹ gberie-sọ ḅọị ọ̀ pịrị-a. Tẹ Ịlayị nwẹnị ḅẹẹ, “KỊNỊNYANAḄỌ ḅe ori, yee ori ẹrịm ọ̀ ḅụụ iḅim nwẹn ḅẹẹ ye mịẹ.”

¹⁹ Tẹ Samụwẹlị ḍụḅam, anịsakị KỊNỊNYANAḄỌ ḅe ori na simem, tẹ ori ẹkwẹn-ḅịḅị fụn so-a.

²⁰ Izirẹlị mẹmgba Danị ḅụ ọkị mu Biyasẹba la nimim mịnẹ KỊNỊNYANAḄỌ ḅe ịkịankoroḅọ ḅara ḅụ Samụwẹlị sịẹ-kụrọ tẹ.

²¹ KỊNỊNYANAḄỌ ḅe Silo ḅụ siin ḅụụ ḍie-pakamam, gbala KỊNỊNYANAḄỌ ḅe Silo ḅụ ọ̀ ḅụụ mịẹ-pakama Samụwẹlị pịrịm ẹrẹsị, KỊNỊNYANAḄỌ ḅe ẹkwẹn-ḅịḅị ḅụ.