1 Samụẹlị 28 - FỊAFỊA BAỊBỤLỤ

¹ Arị ene ma ḅụ Filisiteniapụ ma nwẹnị Izirẹlị na owu sọ ḅẹ tẹ ịna ọmụgbin-apụ kobiri. Tẹ Akisi nwẹnị Devidi ḅẹẹ, “Nimi mịnẹ ị́yẹrị na, ị́ atomi na ọmụ-ogbo mẹ ḅụ sọ tẹ ị̀ na mu ḅa.”

² Devidi nwẹnị Akisi ḅẹẹ, “Iḅi lamam, ị́ ị́ fịrịmẹnjịḅọ inetẹ mịẹ ḅarịye nimi ḅa.” Akisi nwẹnị Devidi ḅẹẹ, “Iḅi lamam, àrị ị́ kẹ ị̀ ḅụụ-ḍikiḍikiḅọ mịẹ ḅa í ḍumo-ene mamgba ḅụ.”

Sọlụ Mu Ḅịrịḅọ Warị Ye Ḅiim

³ Mịọkụ Samụwẹlị fịị tẹẹ, tẹ Izirẹlị mẹmgba ò ḍuum, tẹ Rama ò soku-ḅẹ opu ama ḅụ ò ḍiḅi tẹẹ. Sọlụ pịkị ama mẹ ḅio fụḅara-ḍiki-ḅịrịapụ ma na majịkị-mịẹapụ ma na dee tẹẹ.

⁴ Filisiteniapụ ma kobirim, tẹ ḅo Sunemu ḅụ akpụrụ-warị pikem; tẹ Sọlụ Izirẹlị mẹmgba kobirim, tẹ in Giliboha ḅụ akpụrụ-warị pikem.

⁵ Sọlụ Filisiteniapụ ọmụ-ogbo mẹ ẹrị tẹso, ọ̀ nwẹnị ḅalafaa, tẹ ò ḅioḅẹngbọ nwẹnị ḅẹlẹma tukutuku lama.

⁶ Tẹ Sọlụ KỊNỊNYANAḄỌ ḅe ḅịḅị ḅii tẹso, KỊNỊNYANAḄỌ ọ̀ pakịrị-a ḍawọ ḅụ-o, anịanịa ye ḅii ḍụḅarị ịn kẹ Yurimu sịn ye mẹ ḅụ-o, anịanịa ịkịankoroapụ ḅụ so.

⁷ Anịtẹso Sọlụ nwẹnị ori afịrịmẹnjịapụ ḅẹẹ, “Ọ́ gbọrụ ẹrẹḅọ tẹ fụḅara ḍiki ḅịrịkọn-arị ḅọ ḍọkị pakama-ḅo ị̀ pịrịị, mịẹtẹ arị á ḍọkụma-mu tẹ á ḅara ye gbela ḅẹ ḅara.” Tẹ ori afịrịmẹnjịapụ nwẹnị ọ̀ pakịrị, “ḍikii, Enidọ ḅụ gbọrụ ẹrẹḅọ tẹ fụḅara ḍiki ḅịrịkọn-arị gbọrụ ẹrẹḅọ emi.”

⁸ Anieḅụ Sọlụ ọ̀ ḅụụ ḍimam, tẹ ja opu akapa sụa, tẹ mum, ori na, ọ̀ ḅụụ sọ maa owiapụ na; tẹ in ḍin ḅụ ḅo ẹrẹḅọ ma lam. Tẹ ọ̀ nwẹnị ḅẹẹ, “Gbọrụ tẹmẹ sịn tẹ ye gbela ị̀ pịrịị, anịsakị oriḅe tẹ arị ẹrẹ goo ị̀ pịrị-ḅọ pịrị-ḅọ, ọkị-ḅo ị̀ pịrịị.”

⁹ Ẹrẹḅọ ma nwẹnị ọ̀ ḅẹẹ, “Tụkụma ḅara ḅụ ị́ Sọlụ mịẹ ye nimi wararị, ọ̀ wẹrịtẹ ama mẹ ḅụ fụḅara-ḍiki-ḅịrịapụ ma na majịkị-mịẹapụ ma na pẹlẹ-siin tẹ ḅara. Í tiegotẹ anịtẹrẹmẹ ḍiein tuu ì ḍumo pịrị, tẹ ị́ fịị ọkị-ḅo ị̀ pịrị ḅẹ ḍọkịarị?”

¹⁰ Kụma Sọlụ KỊNỊNYANAḄỌ ḅe ẹrẹ ḅụ ḅụụ-pikima á pịrịm, “KỊNỊNYANAḄỌ ḅe ḍumo-sime wararị ogbo mị ye mẹ gotẹ gbọrụ fomu-ḅara sọ ḅo ị́ ọgọnọ gbana ḅịa.”

¹¹ Anịtẹso ẹrẹḅọ ma nwẹnị ḅẹẹ, “À tụḅọ sịn ḅo ị́ pịrị ḅẹ?” Ọ̀ nwẹnị pakịrị, “Samụwẹlị sịn ḅo ị̀ pịrịị.”

¹² Ẹrẹḅọ ma Samụwẹlị ẹrị tẹso, á nwẹnị gele pọkọ kẹ oloku, tẹ Sọlụ ḅẹẹ, “Í tiegotẹ oḅori kẹ ị̀ sịn? Ị́yẹrị anie Sọlụ.”

¹³ Amadaḅọ ḅe nwẹnị á ḅẹẹ, “Ḅalafa nyana ma; í tiye ẹrị?” Ẹrẹḅọ ma nwẹnị Sọlụ ḅẹẹ, “À gbọrụ tamụnọ ẹrịm, kiri mẹ ḅio mẹnjị paka-ḅoarị.”

¹⁴ Ọ̀ nwẹnị á gbela, “ọ̀ tọ-ḅara sime?” Á nwẹnị pakịrị, “Gbọrụ omongitẹ owiḅọ mẹnjị ma-ḅoarị; tẹ vọrọrọ-kapa sụa wararị.” Sọlụ nwẹnị nimi mịnẹ anie Samụwẹlị, tẹ ọ̀ nwẹnị kụn kẹ ọ̀ pịrị ḅụ ọ̀ sịḅị-tuu mu ọ̀ tọrụ kẹ kiri lama.

¹⁵ Anịtẹso Samụwẹlị nwẹnị Sọlụ ḅẹẹ, “Í tiegotẹ ị̀ ḅụụ-fụkama ị̀ ọkị-ḅo ḅụ?” Sọlụ nwẹnị pakịrị, “À gburo-gburotẹ ḅụụ-ḅalaḅala ḅụ emi; kẹ gotẹ ọkọ ḅẹẹarị, Filisiteniapụ ma ị̀ na ọmụgbin-arị, tẹ Tamụnọ ị̀ ḅụụ tọrụ pịkị siin tẹ ḅarị jen-maaịn kẹ ḅịḅị-fie ị̀ pịrị-a, ịkịankoroapụ ḅụ-o, ḍawọ ḅụ sọ, anịẹrẹsị ị́ à mịẹ ḅẹ ye ḍuko ị̀ pịrị ḅẹ, arị ị́ sịn ḅom.”

¹⁶ Samụwẹlị nwẹnị ḅẹẹ, “Anịtẹrẹmẹ í tiegotẹ ị̀ gbelarị, KỊNỊNYANAḄỌ ḅe ị́ ḅụụ pịkị-so tẹ ḅo ị́ na fịya-a ḅọ sọ tẹ ḅẹẹ-sakị?

¹⁷ KỊNỊNYANAḄỌ ḅe ori ị̀ ḅụụ ḅụ ḍuko tẹ ḅara mịẹ tẹẹ, kẹ gotẹ ọkọ ḅẹẹarị, KỊNỊNYANAḄỌ ḅe ị́ ḅara ḅụ ama-da mẹ kan-siin tẹ anị kẹ Devidi í kpeki ḅọ ḅe pịrị tẹẹ.

¹⁸ Gbala ị́ KỊNỊNYANAḄỌ ḅe pọkọ poki, tẹ ori Amalẹkị ḅụ nyana ḅalafama ịganị mẹ mịẹ-a ẹrẹsị, KỊNỊNYANAḄỌ ḅe anịẹrẹsị mịmgba mị ye mẹ kẹ ị́ mịẹ tẹẹ.

¹⁹ Anie sikima, KỊNỊNYANAḄỌ ḅe Izirẹlị sọ kẹ ị́ ḅụụ sụa tẹ kẹ Filisiteniapụ ma ḅara-ḅio suu tẹẹ; anịsakị ḅaa ḅụ ị́yẹrị na, í owiapụ-awọmẹ ma na ḅo ị̀ na sime ḅa; KỊNỊNYANAḄỌ ḅe Izirẹlị ḅẹ ọmụ-ogbo mẹ sọ kẹ Filisiteniapụ ma ḅara-ḅio ịn pịrị ḅa.”

²⁰ Anịtẹso Sọlụ nwẹnị ò gele la ḅara ḅụ kiri-ḅio ḅịkị siin-koro, Samụwẹlị ẹkwẹn-aḅịḅị ma ḅẹ ḅalafa ọ̀ ḅụụ ḅin ḅara ẹrẹsị; tẹ ọ̀ ḅụụ ịnyọ ḅarị ofori, gbala eneḅaka mẹmgba na, ḍin mẹmgba na ḅụ amụ ò gberie-sọ fị-a ẹrẹsị.

²¹ Ẹrẹḅọ ma nwẹnị Sọlụ ḍọkụma-ḅo, tẹ ẹrịm mịnẹ ọ̀ tẹmẹ-naịn-naịnarị tẹso, á nwẹnị ọ̀ ḅẹẹ, “ḍikii, ị́ fịrịmẹnjị-ẹrẹḅọtụḅọ ma ị́ ḅịḅị poki tẹẹ; arị ị̀ fịị kẹ ị̀ sịḅị-ogbo gbana tẹ ị́ ị̀ ḅẹẹ ye ḅụ ị́ ḅịḅị poki tẹẹ.

²² Anịẹrẹsị, ị́yẹrị sọ mịọkụ ị́ fịrịmẹnjị-ẹrẹḅọtụḅọ ma ḅịḅị pokii; yee à fịye kalịye kẹ ị́ tọrọkọ gbana, tẹ ị́ fị, mịẹtẹ ị́ ịnyọ nyana ḅẹ ḅara ị́ í muarị anga mu ḅẹ sakị.”

²³ Ọ̀ nwẹnị anị sịkị tẹ ḅẹẹ, “À fịye fị ḅịa.” Kụma ori afịrịmẹnjịapụ na, ẹrẹḅọ ma na nwẹnị gboloma tẹ tọn ọ̀ pịrị, tẹ ọ̀ nwẹnị ịna ẹkwẹn-aḅịḅị poki. Anieḅụ ò kiri mẹ ḅio saakịm, tẹ iḅila mẹ ọgọnọ lẹgị-simem.

²⁴ Mịọkụ ẹrẹḅọ ma á ḍikiḍiki tẹ ḅẹlẹkị sụa gbọrụ asambịrịma nambulo nyana wararị, á nwẹnị sarama anị ḅaa, tẹ fịturu mịẹ fịlawa ọkị, tẹ anị mịẹ tẹlẹma, tẹ anị kẹ fịturu sunmaye ofori ḅara kẹ fịturu fọịnm,

²⁵ tẹ á nwẹnị anị kẹ Sọlụ na, ori afịrịmẹnjịapụ na tọrọkọ gbana tẹ in fịm. Anịtẹrẹmẹ ini anị ḍin mẹ ḅụ saakị tẹ mẹnjị-som.