1 Samụẹlị 26 - FỊAFỊA BAỊBỤLỤ

Devidi Pịkị Siin Sọlụ Ḍumo Wẹrịsom

¹ Anịtẹso Zifu ḅẹ apụ ma Gibiya ḅụ Sọlụ dama-ḅo tẹ ḅẹẹm, “Hakila ḅẹ tụndụ mẹ tẹ Jesimoni ḅụ ịrụa-saakịarị-anga ḅụ simearị ye mẹ ọgọnọ ḅọị wararị ḅọ ḅe Devidi ori-a?”

² Anieḅụ Sọlụ saakịm, tẹ Izirẹlị ḅẹ owiapụ ḅụ sẹlẹtẹ kịnị sọnọma ẹndẹ na oyia asi finji (3,000) na ideri Zifu ḅẹ ịkpa mẹ mum, in mu Zifu ḅẹ ịkpa mẹ ḅio Devidi ḍọkị ḅẹ ḅara.

³ Sọlụ nwẹnị Hakila ḅẹ tụndụ mẹ tẹ Jesimoni ḅụ ịrụa-saakịarị-anga ḅụ etela akaka ḅụ simearị ye mẹ ọgọnọ akpụrụ-warị pike tẹ sime. Kụma Devidi ịkpa mẹ ḅio angarị tẹ ori ẹrịm mịnẹ Sọlụ ò ḍukama ịkpa mẹ ḅio sọ-ḅo tẹso,

⁴ Devidi nwẹnị kịnị fịrịma pakama ori ẹnyẹ, tẹ nimi mịnẹ karakaraye ḅụ Sọlụ ḅo tẹẹ.

⁵ Anịtẹso Devidi nwẹnị saakị, tẹ Sọlụ akpụrụ-warị mẹ pike anga mẹ ḅo, tẹ Devidi nwẹnị Sọlụ ḅọlọlọ anga mẹ ẹrị, Abụna, Naha owiḅọtụḅọ, ọmụ-ogbo mẹ ḅẹ sịḅịdaḅọ ḅe na ori na; Sọlụ akpụrụ-warị mẹ ḅio ogboku ḅụ ḅọlọlọ simem ọmụ-ogbo mẹ nwẹnị akpụrụ-warị pike ò gbori-ikelemakoro.

⁶ Anịtẹso Devidi nwẹnị Ayimẹlẹkị, Itayịti ḅọ ḅe na, Johabụ iyimbere Abisahị, Zeruya owiḅọtụḅọ ḅe na gbela, “Tụḅọ ị̀ na ideri Sọlụ akpụrụ-warị mẹ ḅio sọ-mu ḅẹ?” Abisahị nwẹnị pakịrị, “Àrị ị́ na ideri-mu ḅa.”

⁷ Anieḅụ Devidi na, Abisahị na ḍin ḅụ ọmụ-ogbo mẹ mum. Anịsakị Sọlụ akpụrụ-warị mẹ ḅio ọ̀ sụḅa kẹ ọ̀ sịḅị akaka kiri mẹ ḅio pike tẹ anịjụ ḅọlọlọtẹ monoarị; anịsakị Abụna na, ọmụ-ogbo mẹ na ḅọlọlọ ori ikelema-koro wararị.

⁸ Anịtẹso Abisahị nwẹnị Devidi ḅẹẹ, “Tamụnọ mịmgba ị́ na fịya-a ḅọ ḅe kẹ ị́ ḅara-ḅio ị́ pịrị tẹẹ, anịẹrẹsị yee à mịọkụ gbọrụ sakị ḅụ sụḅa mẹ kẹ ò gbin kiri mẹ ḅio kpara, à maa sakị kẹ ò gbin ḅịa.”

⁹ Kụma Devidi nwẹnị Abisahị ḅẹẹ, “ọ̀ ḅaa ma! Kẹ gotẹ ọkọ ḅẹẹarị, tụḅọ inetẹ ḅara kẹ KỊNỊNYANAḄỌ ḅe pulo kẹ sịḅị ḅụ saratẹ ḅọ ḅe ọgọnọ gbana tẹ ḅẹrẹ-ḅarasii nyana ḅịa?”

¹⁰ Tẹ Devidi nwẹnị ḅẹẹ, “KỊNỊNYANAḄỌ ḅe ḍumo-sime wararị ogbo, KỊNỊNYANAḄỌ ḅe ḅarana ò fomu ḅa; anịanịa ọ̀ fịị ḅẹ ene paa ḅo ḅa; anịanịa ori ideri owu-sọ ḅẹ mu ḅa tẹ fịị-faa ḅa.

¹¹ KỊNỊNYANAḄỌ ḅe minini ma mịnẹ yẹrị ị̀ ḅara sụn-pakama tẹ kẹ KỊNỊNYANAḄỌ ḅe pulo kẹ sịḅị ḅụ saratẹ ḅọ da-paka ḅa; kụma ọ̀ sịḅị akaka simearị sụḅa mẹ sin ọkịị mịọkụ, na minji jongo mẹ na, tẹ yee wa so.”

¹² Anieḅụ Devidi, Sọlụ sịḅịkọ ḅụ sụḅa mẹ na, minji jongo mẹ na ọkịm; tẹ ịn mẹnjị-som. Gbọrụḅọ-sọ anị ẹrị, anịanịa anị nimi-a, anịanịa naa-saakị ḅọ sọ ofori; kẹ gotẹ ọkọ ḅẹẹarị, inimgba monoarị, gbala KỊNỊNYANAḄỌ ḅe ḅụ ḅo opu mono ini ọgọnọ gbana tẹ ẹrẹsị.

¹³ Anịtẹso Devidi nwẹnị saḅa so osi pakịrị mu, tẹ ala-jụ tụndụ mẹ sịḅị ọgọnọ gburo-gburotẹ ḅele anga ini maa apụ ogboku simearị anga ḅụ sịẹsime,

¹⁴ tẹ Devidi nwẹnị ọmụ-ogbo mẹ na, Abụna, Naha owiḅọtụḅọ ḅe na sịn, tẹ ḅẹẹm, “Abụna, í ì pokiarị?” Anịtẹrẹmẹ Abụna nwẹnị gbela, “Ị́yẹrị tụḅọ tẹ amadaḅọ ḅe sịn-arị?”

¹⁵ Devidi nwẹnị Abụna pakịrị, “Ị́yẹrị kọkọ owiḅọ, tẹ Izirẹlị ḅụ í pembema ịnyọ nyana ḅọ ofori. Í tiegotẹ anịtẹrẹmẹ ị́ nyanaḅọ, amadaḅọ ḅe ḍikiḍiki-a? Kẹ gotẹ ọkọ ḅẹẹarị, tomi ma ḅẹ gbọrụḅọ amadaḅọ, ị́ nyanaḅọ ḅe ḅaa ḅẹ sọ-ḅom.

¹⁶ Miemẹ tẹ ị́ mịẹ ye mẹ iḅi-a. KỊNỊNYANAḄỌ ḅe ḍumo-sime wararị ḅara ḅụ, ị́ fịị na-iḅim, gbala ị́ ị́ nyanaḅọ, KỊNỊNYANAḄỌ ḅe pulo kẹ sịḅị ḅụ saratẹ ḅọ ḅe ḍikiḍiki-a ẹrẹsị. Anịsakị mịọkụ ḍikii, amadaḅọ ḅe sụḅa mẹ na, minji jongo mẹ na tẹ amadaḅọ ḅe sịḅịkọ ḅụ sime aị ma tọ-anga emi?”

¹⁷ Sọlụ nwẹnị Devidi pọkọ lekiri, tẹ ḅẹẹ, “Ì owiḅọtụḅọ Devidi mie ị́ pọkọ anị?” Devidi nwẹnị pakịrị “Ị̀ nyanaḅọ, yei amadaḅọ, ị̀ pọkọ mẹ anịị.”

¹⁸ Tẹ ọ̀ nwẹnị ḅẹẹ, “Ị̀ nyanaḅọ ḅe tiegotẹ ọ̀ fịrịmẹnjịḅọ ḍukarị? Kẹ gotẹ ọkọ ḅẹẹarị, à tiye mịẹ tẹ? Ị̀ aḅara ḅụ, à tọ ḅẹrẹ-ḅarasii nyana?

¹⁹ Anịẹrẹsị yee mịọkụ ị̀ nyana amadaḅọ ḅe ọ̀ fịrịmẹnjịḅọ ḅe ẹkwẹn-aḅịḅị ma naa. Oriḅe tẹ í jike saakị tẹ ị́ ị̀ da-pakarị ḅọ ḅe nwẹnị KỊNỊNYANAḄỌ ḅe ḅẹḅẹ, yee ori agba daa-ọkị; kụma anị nwẹnị tomi ḅẹḅẹ, yee KỊNỊNYANAḄỌ ḅe tọrọkọ in woritẹ apụ sọ, kẹ gotẹ ọkọ ḅẹẹarị, mịmgba ḅụ ini ì dee-pakama tẹẹ, mịnẹ à KỊNỊNYANAḄỌ ḅe ḍuu ḅụ ḍiekiri nyana ma, tẹ ḅẹẹm, ‘mu fịrịmẹnjị ja oru-atamụnọ pịrịị.’

²⁰ Anịẹrẹsị yee mịọkụ ị̀ ọmbie KỊNỊNYANAḄỌ ḅe tọrọkọ ḅụ ọsụ-paka mu kiri mẹ ḅio sara ma; kẹ gotẹ ọkọ ḅẹẹarị, Izirẹlị ḅẹ amadaḅọ ḅe paka-ḅo tẹ gbọrụḅọ tẹ tụndụ ma ḅio mu kuun pẹị ḅẹ afeni ḍọkị ḅara kẹ ì ḍumo ḍọkịarị.”

²¹ Anịtẹso Sọlụ nwẹnị pakịrị, “À mịẹ-irima tẹẹ; ì owiḅọtụḅọ Devidi, pịkịma-ḅoo! Kẹ gotẹ ọkọ ḅẹẹarị, à ḅarị jen-maaịn kẹ ye kẹ ị́ lama ḅịa, gbala ì ḍumo mịmgba ị́ tọrụ-ḅio yelam ẹrẹsị; ḍikii, arị oḅori-sọ tẹẹ, tẹ gburo-gburo ḅara kẹ mịẹ-irima tẹẹ.”

²² Devidi nwẹnị pakịrị, “yei amadaḅọ, mie sụḅa mẹẹ! Yee asawọ ma ḅẹ gbọrụḅọ saḅa ḅo anị ọkị.

²³ KỊNỊNYANAḄỌ ḅe ọrụḅọ-ọrụḅọ karakara na ọrụḅọ-ọrụḅọ minini na kẹ ọrụḅọ-ọrụḅọ gbẹẹarị; kẹ gotẹ ọkọ ḅẹẹarị, KỊNỊNYANAḄỌ ḅe mịmgba ị́ kẹ ị̀ ḅara-ḅio ị̀ pịrịm, kụma arị ị̀ ḅara sụn-pakama tẹ kẹ KỊNỊNYANAḄỌ ḅe pulo kẹ sịḅị ḅụ saratẹ ḅọ ḅe lama ḅịa.

²⁴ Ḍikii, í ḍumo mẹ mịmgba ì ḍiki-tọrụ ḅụ yela ḅara, yee ì ḍumo mẹ anị ḅara kẹ KỊNỊNYANAḄỌ ḅe ḍiki-tọrụ ḅụ yela, tẹ yee ori ị̀ ḅụụ-fụka mẹmgba ḅụ ị̀ ḍụa-ḅọrọma.”

²⁵ Anịtẹso Sọlụ nwẹnị Devidi ḅẹẹ, “Boma sime ị́ pịrịị, ì owiḅọtụḅọ, Devidi! Ị́ tọnwa aị mịẹ ḅa, tẹ arị í na iḅi ḅa.” Anieḅụ Devidi ori etela dama-mum, Sọlụ pịkị so ò sime anga mum.