1 Samụẹlị 21 - FỊAFỊA BAỊBỤLỤ

Devidi Sọlụ Ḅụụ Ḅụ Ḍumo Mangị Kọnm

¹ Anịtẹso Devidi nwẹnị Nọbụ ḅụ Ayimẹlẹkị agbamịẹḅọ ḅe dama-ḅo; tẹ Ayimẹlẹkị nwẹnị oju sẹkị ḅụ Devidi na bịama ḅẹ ḅo, tẹ ọ̀ ḅẹẹ, “Tiye gotẹ ị́yẹrị ngẹrị emi, tẹ gbọrụḅọ-sọ ị́ na ofori?”

² Devidi nwẹnị Ayimẹlẹkị agbamịẹḅọ ḅe pakịrị, “Amadaḅọ ḅe gbọrụ ḅẹrẹ tọn ị̀ ọgọnọ gbanam, tẹ ị̀ ḅẹẹm, ‘Yee gbọrụḅọ-sọ ḅẹrẹ mẹ tẹ à tọn ị̀ ọgọnọ gbana tẹ ị̀ fịrịma muarị ye mẹ gbolomaye ḅụ gberie-sọ nimi ma.’ Àrị asawọ ma na ḍuko tẹ in ḅo nwẹn pembema anga ḅụ ị̀ na bịamaa.

³ Mịọkụ ị́ ḅara ḅụ í tiye nyana? Fịturu sọnọ akpo kẹ ị̀ pịrịị, anịanịa mịanga sime-ye sime-ye.”

⁴ Agbamịẹḅọ ḅe nwẹnị Devidi pakịrị, “Ḅara-ḅio ḅụ à papaa fịturu nyana-a, kụma fịafịatẹ fịturu emi; asawọ ma paa ereme ngẹrị ḅụ ịna aḅụụ wẹrị kpaịnma-kpaịnma.”

⁵ Devidi nwẹnị agbamịẹḅọ ḅe pakịrị, “karakaraye ḍuko ḅụ, wa ereme kẹ ḅụụ kpekima-kpekima-a sakị mamgba à nwẹn sime ye muarị sakị goyegoye ḅụ; ị̀ asawọ ma amịna aḅụụ wẹrị fịafịama wararị, anị papaa igoni mu sakị ḅụ sọ; ọkụma ndẹẹ jen-a jen-a mịmgba mẹ ḅụ ini ịna aḅụụ wẹrị fịafịama ḅịa ḅara!”

⁶ Anieḅụ agbamịẹḅọ ḅe nwẹnị fịafịa fịturu mẹ kẹ ọ̀ pịrị; gbala anị sakị mẹ anịjụ Tamụnọ tọrọkọ ḅẹ fịturu mẹ tẹ in saakị-siin ye mẹ sikima jen fịturu ofori ẹrẹsị, ini anị ọkị so wararị ene mẹ ḅụ ini ọfịrịarị fịturu kẹ anị sime kiri koroma ḅẹ ḅara.

⁷ Mịọkụ anị ene mẹ, anịjụ ḅụ in KỊNỊNYANAḄỌ ḅe tọrọkọ Sọlụ afịrịmẹnjịapụ ma ḅẹ gbọrụ owiḅọ ọlọ koroma wararị tẹ emi, ori ẹrẹ Dowẹgị, Edọmụ ḅẹ ḅọ, Sọlụ anama ogbo ma ḍikiḍikiarị owiapụ ma ḅẹ sịḅịdaḅọ ḅe.

⁸ Devidi nwẹnị Ayimẹlẹkị ḅẹẹ, “Anịsakị mịanga ị́ ḅara ḅụ ị́ sụḅa, anịanịa okologie nyana-a? Kẹ gotẹ ọkọ ḅẹẹarị, amadaḅọ ḅe kọrịnama mẹ fọnya ḅara ḅiim ẹrẹsị arị ì okologie kẹ ḅo-a, anịanịa ị̀ ọmụ-aị, gberie-sọ ị̀ na ofori.”

⁹ Ayimẹlẹkị agbamịẹḅọ ḅe nwẹnị pakịrị, “Golayatị, Filisiteniḅọ ḅe tẹ Ẹla ḅẹ Tụndụ ogboku mẹ ḅụ ị́ ḅaa ḅọ ḅe okologie mẹ sikima ọkụma, jen gberie-sọ mịanga ofori, ị́ aniemẹ ọkị ḅarị ḅẹḅẹ, anị ọkịị; ẹfọdị nwẹn-sịn kapa mẹ ọḅụjụ in ḅịtẹ kẹ anị fịna wararị.” Tẹ Devidi nwẹnị ḅẹẹ, “Aniemẹ pembema ye ofori, anị kẹ ị̀ pịrịị.”

¹⁰ Devidi nwẹnị saakị, tẹ anị ene ḅụ Sọlụ ḍumo-mangị kọnma so Akisi, Gati ḅẹ amadaḅọ ḅe ḍọkụma-mu.

¹¹ Akisi afịrịmẹnjịapụ ma nwẹnị ọ̀ ḅẹẹ, “ḅie Devidi, ama mẹ ḅẹ amadaḅọ ḅe ori-a? Ori mie in nume su-su jụmọ-jụmọ pịrị ma sẹkị-sẹkị tẹ ḅẹẹm, ‘Sọlụ ọ̀ kịnị maa ẹndẹ oyia asi finji-finji ḅaa tẹẹ, anịsakị Devidi ọ̀ kịnị puku sọnọ ẹndẹ finji-finji ḅaa tẹẹ,’ kẹ boma ḅọ ḅe ori-a?”

¹² Devidi nwẹnị mịna ẹkwẹn-aḅịḅị ma ọkị ò ḅioḅẹngbọ suu, tẹ kpọma Akisi, Gati ḅẹ amadaḅọ ḅe ḍiki-ḅalafa lama.

¹³ Anieḅụ ọ̀ nwẹnị ò ye-mịẹ-ḅara ḍima ịna tọrọkọ, tẹ ịna aḅara-ḅio nọmụ ịḍa, tẹ ogigo mẹ ḅẹ aḅọkọ ma ḅụ elekima sụa-sụa sara, tẹ fịla bụrọma-bụrọma ò ḅekeke ḅẹ mpọrị ḅụ sarasara iderima.

¹⁴ Tẹ Akisi nwẹnị ori afịrịmẹnjịapụ ḅẹẹ, “ḍikii, ọmịnị ẹrịarị tomḅọ ḅe ọ̀ nọmụarị; ó tiegotẹ anịtẹrẹmẹ ori ọkị-ḅo ị̀ pịrị?

¹⁵ À nọmụapụ nyana-a, tẹ ó ḅị tomḅọ ḅe kẹ ḅo tẹ ori ị̀ tọrọkọ nọmụapụ amịẹaị ma mịẹarị? Ḅị tomḅọ ḅe ori ị̀ warị-ḅio sọ-ḅo ḅẹ?”