1 Samụẹlị 20 - FỊAFỊA BAỊBỤLỤ

Jonatanị Ḅarasụa Devidi Pịrịm

¹ Anịtẹso Devidi nwẹnị Rama ḅẹ Nayihọtị ḅụ ḍumo-mangị kọn, tẹ ḅo tẹ Jonatanị tọrọkọ ḅụ gbela, “À tiye mịẹ tẹ.? À tọ mịẹ gbẹẹ-a ye mịẹ? Anịsakị ị́ ḍa tọrọkọ à tọ si mịẹ, tẹ ori ị̀ ḅaa ḅẹ ḍọkịarị?”

² Jonatanị nwẹnị ọ̀ pakịrị, “Iḅieri-o! Ị́ fịị ḅịa. Ḍikii, opuye, anịanịa kalịye tẹ ị̀ ḍa anị kẹ ị̀ ḅọịma tẹ mịẹ ḅẹ ye ofori; anịsakị ị̀ ḍa tiegotẹ miemẹ kẹ ị̀ ḅọịma na-iḅi? Anị ọkọ sime-a.”

³ Kụma Devidi nwẹnị pakịrị, “Ị́ ḍa nimi lama wararị mịnẹ arị ị́ tọrụ ḅụ ḍiki-ḅụụjịrị nyana wararị; tẹ ọ̀ sịn-arị, ‘Yee Jonatanị miemẹ nimi ma, anieofori ò ḅofa ḅioḅu.’ Kụma karakaraye ḍuko ḅụ, KỊNỊNYANAḄỌ ḅe ḍumo-sime wararị, tẹ ị́ tẹmẹ sọ ḍumo-sime wararị ogbo, yẹrị na fịị na ogboku gbọrụ mẹnjị-ḅụọ kịngẹ anie simearị ye.”

⁴ Anịtẹso Jonatanị nwẹnị Devidi ḅẹẹ, “Í ḍukoye ḍukoye à mịẹ ị́ pịrị ḅa.”

⁵ Devidi nwẹnị Jonatanị ḅẹẹ, “ḍikii, ḅaa anie ịwọ Akalụ mẹ, anịsakị à gbarị-a ḅara ḅụ amadaḅọ ḅe na dẹbịlẹ suku lẹgị na-iḅim; kụma yee à so, mịẹtẹ à mu piri mẹ ḅio ị̀ ḅụụ ḅọị nwenii tẹra aḍin karama ene mẹ ḅẹ ḅoḅiri-so la.

⁶ Ị́ ḍa àrị ofori mẹ nimi-nimi, anịrẹ ḅẹẹ, ‘Devidi mangị Bẹtịlịhẹmụ ori opu ama mu ḅẹ ị̀ ḅara ḅụ tẹmẹ-la ḅara kẹ kụrọ ḅiim; gbala furo mẹmgba kụra-kụra ḅụ mịẹ-mịẹ agba anịjụ emi ẹrẹsị.’

⁷ Ọ̀ nwẹnị ‘Iḅim,’ ḅẹẹ ḅẹẹ, anị ị́ fịrịmẹnjịḅọ na-iḅi ḅa; kụma anị ọ̀ ḅụụ-ḅẹsọ-sọọ, anịrẹ nimi mịnẹ ò siye kẹ ḅiotọn wararị.

⁸ Anịẹrẹsị iḅi ḅara kẹ ị́ fịrịmẹnjịḅọ na mịẹ, kẹ gotẹ ọkọ ḅẹẹarị, ị́ ị̀ fịrịmẹnjịḅọ ọkị-ḅo ị́ na KỊNỊNYANAḄỌ ḅe ọḅọkụ fị tẹẹ. Kụma ị̀ ḅụụ ḅụ mịẹkọn emi-emii, ị́yẹrị ḅara na ị̀ ḅaa; í tiegotẹ ị̀ ọkị-ḅo ị́ ḍa pịrị ḅẹ?”

⁹ Jonatanị nwẹnị pakịrị, “Ị́ ḅụụ ḅụ iḅieri! À nwẹnị nimim mịnẹ ị̀ ḍa anị tọn pẹlẹm mịnẹ siye ḅo ị́ ọgọnọ gbana ḅa kụma à ḍuko ị́ pịrị ḅịa?”

¹⁰ Anịtẹso Devidi nwẹnị gbela, “Tụḅọ ḍuko ị̀ pịrị ḅa, ị́ ḍa nwẹnị si ḅara kẹ ị́ pakịrị ọkụma?”

¹¹ Jonatanị nwẹnị Devidi ḅẹẹ, “ḅoo, yee wa paka-so piri mẹ ḅio mu.” Anieḅụ ini maa apụ ma paka-so piri mẹ ḅio mum.

¹² Jonatanị nwẹnị Devidi ḅẹẹ, “KỊNỊNYANAḄỌ ḅe, Izirẹlịapụ tẹkẹarị Tamụnọ ḅe ḅẹrẹ kiri sime ḅọ sọọ! Ḅaa nwẹn pembe sakị ḅụ, anịanịa tẹrẹị karama ene mẹ ḅụ, arị ị̀ ḍa gbela sakị, ḍikii, ọ̀ nwẹnị Devidi na iḅiọkụ sime ọkụma, à fịrịma tẹ ḅo anị mịẹ pakama ị́ pịrị ḅịa?

¹³ Kụma anị nwẹnị ye kẹ ị́ lama ị̀ ḅụụ-ḅẹlẹ ye sọm, tẹ arị mịẹ-pakama ị́ pịrị-a ḅẹḅẹ, KỊNỊNYANAḄỌ ḅe ọkọ kẹ Jonatanị mịẹ, pịkị ọkọ nẹngị ḅara sọ mịẹ, mịẹtẹ ị́ kpaịn ḅara ḅụ sọ ḅẹ ḅara. Yee KỊNỊNYANAḄỌ ḅe ị́ na sime, ọ̀ wẹrịtẹ ị̀ ḍa na sime-ḅara.

¹⁴ À nwẹnị paa ḍumo-sime-sime, sịḅị-tuu KỊNỊNYANAḄỌ ḅe pịrị ḅara ḅẹ ḅẹlẹma nyana ị̀ pịrị, mịẹtẹ à fịị ḅịa ḅara,

¹⁵ anịsakị ị̀ warị ḅụ í minini ḅẹlẹma mẹ pẹlẹ-siin ma gbamasoo, KỊNỊNYANAḄỌ ḅe tomikiri mẹ ḅẹ tọrụkuḅu mẹ ḅụ ḅẹḅọ-ḅẹḅọ tẹ Devidi na fịya-a ḅọ pẹlẹ-siin ḅẹ sakị,

¹⁶ yee Jonatanị ẹrẹ mẹ Devidi warị mẹ ḅụ pẹlẹ-so ma. Anịsakị yee KỊNỊNYANAḄỌ ḅe Devidi na fịya-a apụ ma ọgọnọ gbẹẹfị ḅii.”

¹⁷ Jonatanị nwẹnị ọ̀ nyana Devidi pịrị ḅẹlẹma ḅụ ọ̀ mịẹtẹ ọ̀ ḅụụ-pikima ọ̀ pịrịm; gbala ori ò soku-ḅẹ tẹmẹ ḅẹlẹma ḅara kẹ ọ̀ ḅẹlẹmam ẹrẹsị.

¹⁸ Anịtẹso Jonatanị nwẹnị ọ̀ ḅẹẹ, “ḅaa anie Ịwọ Akalụ ene mẹ; anịsakị í ofori, gbala ị́ lẹgịye mẹ ọgọnọ kịnị paka ḅịa ẹrẹsị.

¹⁹ Anịsakị tẹrẹị karama ene mẹ ḅụ í ofori mẹ giregire lama ḅa; anịsakị mẹ, mu ḅẹrẹ mẹ saakị sakị ḅụ ị́ ị́ ḅụụ ḅọị anga mẹ ḅẹ ọgọnọ-jụ ḅụ kpoli wararị aḍụḅarị ma akaka ḅụ simee.

²⁰ À ḅala kẹ ye da tẹ tẹịn-arị ḅara kẹ ḍiein tẹra mgbọ tẹịn anị akaka ḅo ḅa.

²¹ Anịsakị ḍikii, à gbọrụ fịrịmẹnjịḅọ fịrịma ḅa, tẹ ḅẹẹm, ‘Mu ḍiein ma ḍọkịị.’ À nwẹnị fịrịmẹnjịḅọ ḅe ḅẹẹm, ‘ḍikii, ị́ ḅụụ ḅụ ḍiein ma mị pakịrị arị emi, arị kolokoloo’ ḅẹḅẹ, anịrẹ í ḅo ḅa, kẹ gotẹ ọkọ ḅẹẹarị, KỊNỊNYANAḄỌ ḅe ḍumo-sime wararị ogbo, anị ị́ na kpaịn ḅa, anịsakị ye kịnị lama ye ofori.

²² Kụma à nwẹnị asatụḅọ ḅe ḅẹẹm, ‘ḍikii, ḍiein ma arị ị́ tọrọkọ-jụ ḅụ emi’ ḅẹḅẹ, anịrẹ mangị-soo, kẹ gotẹ ọkọ ḅẹẹarị, KỊNỊNYANAḄỌ ḅe ị́ fịrịma sin tẹẹ.

²³ Anịsakị ḅẹrẹ mẹ tẹ ị́yẹrị na yẹrị na ogboku ẹkwẹn tẹ ye mẹ ọkụma, ḍikii, KỊNỊNYANAḄỌ ḅe ị́yẹrị na yẹrị na ogboku emi gbamasom.”

²⁴ Anieḅụ Devidi piri mẹ ḅio ọ̀ ḅụụ ḅọịm; tẹ Ịwọ Akalụ ene mẹ la tẹso, amadaḅọ ḅe nwẹnị ideri-ḅo fịye fị ḅẹ ḅo.

²⁵ Amadaḅọ ḅe osi asakị ḅụ ọ̀ wẹrịtẹ lẹgị-lẹgị ḅara ḅụ warị-anga mẹ ḅẹ lẹgịye ḅụ ọ̀ lẹgịye ọgọnọ ḅụ lẹgịm, Jonatanị ori na dama-dama ḅụ lẹgịm, tẹ Abụna, Sọlụ akaka lẹgịm, kụma Devidi sime anga foo wararị.

²⁶ Anịsọ Sọlụ anị ene mẹ ḅụ gberie-sọ ḍuko-a; gbala ò ḅiotọnm, “Gberie ọ̀ la tẹẹ, tẹ amụ ori ọ̀ ḅụụ mịẹ fịafịama-a, tụkụma ḅara ḅụ ọ̀ fịafịa-a.”

²⁷ Kụma maaịn karama ene mẹ, Ịwọ Akalụ ene mẹ ḅọrọ tẹ ḅẹ ene-ḅaa ḅụ Devidi sime anga paa foo wararị. Tẹ Sọlụ nwẹnị ori owiḅọtụḅọ Jonatanị gbela, “Tiegotẹ Jese owiḅọtụḅọ ḅe ḅịẹịn, anịanịa mịmgba fịye mẹ suku ḅo-a?”

²⁸ Jonatanị nwẹnị Sọlụ pakịrị, “Devidi Bẹtịlịhẹmụ mu ḅẹ tẹ tẹmẹ-la ḅara kẹ ị̀ ḅara kụrọ ḅiim;

²⁹ ori ḅẹẹm, ‘yee à mu; gbala wamịna furo opu ama mẹ ḅio agba mịẹ nyana wararị, tẹ ị̀ iyimbere tọn ị̀ pịrị tẹ àrị anịjụ simee. Anieḅụ à nwẹnị mịọkụ ị̀ tọrụ ḍiki-ḅụụjịrị ḍọkị-ẹrị-ẹrị, yee à so, tẹ mu ị̀ owiapụ-amịnapụ ma ẹrị.’ Miemẹ mie ò gotẹ amụ amadaḅọ ḅe dẹbịlẹ mẹ suku ḅo-a ye.”

³⁰ Anịtẹso Sọlụ ịganị nwẹnị Jonatanị ọgọnọ kẹngẹma, tẹ ọ̀ nwẹnị ọ̀ ḅẹẹ, “Ị́yẹrị karakara mịẹ-a, sịḅị-kụrọtẹ ẹrẹḅọ iyi owiḅọtụḅọ, í nimi-a mịnẹ í Jese owiḅọtụḅọ ḅe sẹlẹ-ọkị ye mẹ ị́ ḅụụ-jịrịma ḅẹ ye na, í iyingi ma paụ mẹ na ḅụụ-jịrịma ḅẹ ye ị́ nwẹn sẹlẹ-ọkị tẹẹ.

³¹ Kẹ gotẹ ọkọ ḅẹẹarị, Jese owiḅọtụḅọ ḅe tomikiri mẹ ḅụ ḍumo-sime wararị ogbo, ị́yẹrị anịanịa ị́ ama-da sọ in nwẹn mịẹ pakama ḅịa. Anịẹrẹsị, fịrịma tẹ ori ọkị-ḅo ị̀ pịrịị, kẹ gotẹ ọkọ ḅẹẹarị, tụkụma ḅara ḅụ ọ̀ fịị ḅa.”

³² Anịtẹso Jonatanị nwẹnị ọ̀ ḍa Sọlụ pakịrị, “Ò tiegotẹ fịị na-iḅi? Ò tiye mịẹ tẹ?”

³³ Kụma Sọlụ nwẹnị ọ̀ ḅaa ḅẹ tẹ ọ̀ sụḅa kẹ ò gbin; anieḅụ Jonatanị nimim mịnẹ ọ̀ ḍa Devidi ḅaa ḅẹ tọn pẹlẹ tẹẹ.

³⁴ Jonatanị nwẹnị akalụ mẹ ḅẹ maaịn karama ene mẹ ḅụ fịye fị-a ḅara kẹ kụrọ ịganị ḅụ dẹbịlẹ mẹ suku virikama saakị, gbala ò Devidi gotẹ ḅioḅum, ọ̀ ḍa ọ̀ ḅụụ-jịrịma tẹ ẹrẹsị.

³⁵ Dede-ḅio ḅụ Jonatanị nwẹnị ò Devidi na ḍuko ḅara ḅụ gbọrụ owiḅọtụḅọ kẹ ọ̀ ḅụụ sụa tẹ piri mẹ ḅio so mu.

³⁶ Ọ̀ nwẹnị ori owiḅọtụḅọ ḅe ḅẹẹ, “Mangị mu ḍiein mẹ tẹ à tẹịn ye mẹ ḍọkịị.” Owiḅọtụḅọ ḅe mangị muarị ogbo ọ̀ nwẹnị ḍiein gbọrụmgbọ tẹịn ọ̀ sịḅị saḅama, tọrọkọ-jụ mu.

³⁷ Owiḅọtụḅọ ḅe ḅo ḍiein mẹ tẹ Jonatanị tẹịn ye mẹ koro anga mẹ la tẹso, Jonatanị nwẹnị owiḅọtụḅọ ḅe sịn tẹ ḅẹẹ, “Ḍiein mẹ ị́ tọrọkọ-jụ ḅụ ofori?”

³⁸ Jonatanị nwẹnị owiḅọtụḅọ ḅe sịn, “Fọnya-fọnya mịẹẹ, sime ma.” Anieḅụ Jonatanị owiḅọtụḅọ ḍiein ma kobiri ọkị tẹ ọ̀ sịḅịdaḅọ ḍọkụma-ḅom.

³⁹ Kụma owiḅọtụḅọ ḅe ò gberie-sọ nimi-a; Jonatanị na Devidi na ngẹrị mie ḅẹrẹ mẹ nimi apụ.

⁴⁰ Jonatanị nwẹnị ori ọmụ-aị ma kẹ owiḅọtụḅọ ḅe pịrị tẹ ọ̀ ḅẹẹ, “Soo, tẹ arị dogi opu ama mẹ muu.”

⁴¹ Tẹ owiḅọtụḅọ ḅe paa so gbọrụ sakị, Devidi nwẹnị kpoli wararị aḍụḅarị ma akaka ḅụ saakị, tẹ ọ̀ tọrụkuḅu kẹ kiri-ḅio ḅịkị-koro, tẹ tẹra asakị kẹ sịḅị-tuu, tẹ in nwẹnị ḅẹlẹma ḅara ḅụ ekpe kẹ jụmọ-jụmọ fịnama, tẹ tẹmẹ-la ḅara kẹ owu gbolomam, nwenii Devidi siin amịna ḅụụ kẹ ḅiokoromam.

⁴² Anịtẹso Jonatanị nwẹnị Devidi ḅẹẹ, “Dein na muu, wamịnị maa apụ ma KỊNỊNYANAḄỌ ḅe ẹrẹ ḅụ ḅụụ-pikima tẹẹ, tẹ ḅẹẹm, ‘KỊNỊNYANAḄỌ ḅe ogbo-sịẹḅọ sọ yẹrị na ị́yẹrị na, ị̀ ḅụụ paka-ḅo apụ na, ị́ ḅụụ paka-ḅo apụ na pịrị gbamasoo.’ ” Tẹ Devidi nwẹnị saakị tẹ mẹnjị so; Jonatanị nwẹnị pịkị so opu ama mẹ ḅio mu.