1 Samụẹlị 2 - FỊAFỊA BAỊBỤLỤ

Ana Tẹkẹ

¹ Ana pịkị tẹkẹ tẹ ḅẹẹm: Ì ḅioḅẹngbọ KỊNỊNYANAḄỌ ḅe ḅụ gburo-gburo ḅioḅẹlẹ nyanam; ị̀ ịnyọ saakị gele tẹẹ, KỊNỊNYANAḄỌ ḅe ḅụ. Ị̀ ḅịḅị ị̀ na fịya-a apụ ḍẹrị pọndọm, arị ị́ ḅọrọma ḅụ ḍerekum ẹrẹsị.

² KỊNỊNYANAḄỌ ḅe fịafịa ḅara fịafịa gbọrụḅọ-sọ ofori í sikima gbọrụḅọ-sọ ofori; wamịna Tamụnọ pembema ịkụ ofori.

³ Ḅẹlẹma opu amịẹaị mịẹ ḅara kẹ ḅarị jen-maaịn kẹ ẹkwẹn ma, yee opu amịẹaị ẹkwẹn-ḅịḅị ḅarị ị́ ḅịḅị ḅụ paka-ḅo ma; gbala KỊNỊNYANAḄỌ ḅe anie mịẹ ye mịẹ ye nimi Tamụnọ anịsakị ori mie ye-mịẹ-ḅara ma iku tọn-arị ḅọ

⁴ Kụrọ-nyana apụ ma okuro aḍịẹịn ma anyị tẹ, kụma ịnyọ nyana-a ḅọ ḅe ịnyọ sụa tẹ.

⁵ Inima tẹ nyana furo ḅinma apụ ma, fịye gotẹ ịna aḅụụ kẹ ọkọ fịrị mẹnjị pịrị tẹ, kụma inima tẹ ḅuru-pọkọtarị sime apụ ma, ḅuru-pọkọtarị ḅụ daasịẹ tẹẹ, Furo pụụn tẹ ḅọ ma sọnọma dogi tẹẹ, kụma arị tẹ tọnwa awọmẹ nyana ḅọ ma, sịkị tẹ ḅọ sọ tẹẹ.

⁶ KỊNỊNYANAḄỌ ḅe fị dogi-ḅoarị, ọ̀ pịkị ḍumo pịrịarị; ò tomi iderima ḍuḅu muarị, pịkị tomi saakị-gelemarị.

⁷ KỊNỊNYANAḄỌ ḅe tomi igoinmarị, ọ̀ pịkị ngọ kẹ tomi kọnmarị; ori ọkị-ḅo iderimarị, pịkị saakị-gelemarị.

⁸ Ọ̀ fọọn mẹ ḅio igoinḅọ ḅe saakị-gelemarị, kpoli wararị fọọn mẹ ḅụ, ori ngiri-ngiriḅọ ḅe saakị-gelemarị; mịẹ tẹ in sịḅịdapụ na lẹgị, tẹ kụn nyana ịkasiye nyana ḅẹ ḅara. Gbala tomikiri mẹ ḅẹ ḅeriaị ma KỊNỊNYANAḄỌ ḅe aị, tẹ arị ọgọnọ ò tomikiri mẹ nama tẹ ẹrẹsị.

⁹ Ori ọ̀ ḅụụ minini nyana apụ ma aḅụọ ḍikiḍiki ḅa; kụma kanakana ḅio si-sịḅịḅio-sụaḅọ ḅe pẹlẹ-so ḅa; gbala kụrọ ḅụ tomḅọ owu-ḅara-iḅi nyana ḅịa ẹrẹsị.

¹⁰ KỊNỊNYANAḄỌ ḅe ḍiki ḅioḅẹlẹ-a apụ ma, pakịrị-pakịrị puu sara ḅa; ini mie ò So-ḅio so-alagba kẹ tẹịn ḅarịye. KỊNỊNYANAḄỌ ḅe tomikiri mẹ ḅẹ akunoma ma kọn ḅa; ori ịnyọ kẹ ori amadaḅọ pịrị ḅa, tẹ ò pulo kẹ sịḅị ḅụ sara tẹ ḅọ ḅe ịnyọ mẹ saakị-gelema ḅa.

¹¹ Anịtẹso Ẹlịkena so ori ama Rama mum. Tẹ owiḅọtụḅọ ḅe Ịlayị agbamịẹḅọ ḅe simearị anga ḅụ fịrịmẹnjị KỊNỊNYANAḄỌ ḅe pịrịm.

Ịlayị Owiapụ-awọmẹ Ma

¹² Mịọkụ Ịlayị owiapụ-awọmẹ ma anie papaa owiapụ; ịn KỊNỊNYANAḄỌ ḅe kẹ ye-sịn-a.

¹³ Agbamịẹapụ ma kẹ tomi ma na mịẹ-mịẹ ḅara anie, ḅẹḅọ-ḅẹḅọ agba mịẹ sakị, mịẹ sakị, agbamịẹḅọ ḅe fịrịmẹnjịḅọ tẹra ḅịḅị sụa ye gbọn ḅala kẹ ọ̀ ḅara-ḅio ọlọ tẹ ḅo ḅa, nama mẹ ḅẹlẹ ḅio ḍarịarị ogbo,

¹⁴ tẹ ọ̀ kẹ panị, anịanịa ḅịḅị-gbaịnye na, minji-pẹlẹma anga nyana tẹ ọlọ ye emi ḅẹlẹ, anịanịa opu ḅẹlẹ, anịanịa fịye sọ ḅẹlẹ ḅio anị kẹ gbọn ḅa arịmgba tẹ ye gbọn ḅala mẹ gbọn pakama-ḅo aị mamgba, agbamịẹḅọ ḅe ọkị ọ̀ ḅụụ pịrị ḅa. Anị ḅara mie ịn kẹ Silo ḅụ Izirẹlịapụ mamgba tẹ anịjụ ḅo apụ ma mịẹ ḅara.

¹⁵ Anie sikima, tẹrẹmẹ ịn ḅẹlẹkị mẹ dọkịma, agbamịẹḅọ ḅe fịrịmẹnjịḅọ ḅe ḅo tẹ oriḅe tẹ agba mẹ mịẹarị owiḅọ ḅe ḅẹẹ ḅa, “Kẹ agbamịẹḅọ ḅe pịrị ḅẹ nama kẹ ị̀ pịrị tẹ à fọị; kẹ gotẹ ọkọ ḅẹẹarị, ori ị́ ḅara sọọtẹ nama ọkị ḅịa, kụma amụ sọọ-a ye.”

¹⁶ Tomḅọ ḅe nwẹnị ọ̀ ḅẹẹm, “Yee ịn tarị ḅẹlẹkị mẹ dọkịma tẹrẹmẹ ị́ í ḅii ḅara ọkị,” ḅẹḅẹ, ọ̀ ḅẹẹ ḅa, “Ẹn-ẹn, mịọkụ ị́ anị kẹ ị̀ pịrị nyanam; anieofori-ofori, à kụrọ-ḅara kẹ anị ọkị ḅa.”

¹⁷ Mị-ḅara ḅụ asambịrịma owiapụ ma sime gburo-gburo lamam KỊNỊNYANAḄỌ ḅe ḍiki-tọrụ ḅụ; gbala owiapụ ma ye-sịn-a ḅara kẹ KỊNỊNYANAḄỌ ḅe agba mẹ mịẹm ẹrẹsị.

Samụwẹlị Silo Ḅụ Simem

¹⁸ Samụwẹlị anie agbamịẹapụ sịnịnị kapa sụa gbọrụ owiḅọtụḅọ tẹ KỊNỊNYANAḄỌ ḅe tọrọkọ fịrịmẹnjịarị ḅọ.

¹⁹ Kụra goyegoye ḅụ ò iyingi vọrọrọtẹ gbọrụ kala kapa gbin tẹ kẹ mu ọ̀ pịrị-pịrịm, arị á di na iwo mu kụra agba mẹ mịẹ ḅẹ sakị-sakị.

²⁰ Anịtẹso ọkụma Ịlayị, Ẹlịkena na, ọ̀ ta na boma tẹ ḅẹẹ ḅa, “KỊNỊNYANAḄỌ ḅe mị ẹrẹḅọ ma ḅụ awọmẹ kẹ ị́ pịrịị, tụḅọ ḅe tẹ á kẹ KỊNỊNYANAḄỌ ḅe pịrị ḅọ ḅe gotẹ.” Aniemẹ ḅọrọ tẹ ḅẹḅẹ ịn pịkịma-so ịna ama mum.

²¹ KỊNỊNYANAḄỌ ḅe toluma Ana ḍikim, tẹ á sime kọn, tẹ tẹra owiapụ-awọmẹ na, maa eremịna-awọmẹ na iyim. Anịsakị Samụwẹlị, owiḅọtụḅọ ḅe KỊNỊNYANAḄỌ ḅe tọrọkọ ḅụ sime tẹ ḍụḅam.

Ịlayị Na, Ori Owiapụ-Awọmẹ Na

²² Mịọkụ Ịlayị omongi lama tẹ, tẹ ori owiapụ-awọmẹ kẹ Izirẹlị mẹmgba mịẹarị ye mẹ na, ịn wẹrịtẹ ereme ma tẹ mẹnjị tomi kobiriarị Akpụrụ-warị mẹ sọarị ḅọkọ mẹ tọrọkọ fịrịmẹnjịarị apụ ma na ḅọlọlọ gbolomarị ḅara na naam.

²³ Ọ̀ nwẹnị ịn ḅẹẹ, “Ó tiegotẹ ọkọsime aị mịẹarị? Kẹ gotẹ ọkọ ḅẹẹarị, tomi mamgba ḅụ arị ọ́ mịẹarị si aị ma naarị.

²⁴ Ẹn-ẹn, ì owiapụ-awọmẹ; KỊNỊNYANAḄỌ ḅe atomi ma ḍuko wasamarị tẹ à naa ye mẹ anị iḅi ḍuko sụa ye-a.

²⁵ Gbọrụ tomḅọ si kẹ jen tomḅọ mịẹ-mịẹ, Tamụnọ ogbo-sịẹ ọ̀ pịrị ḅa; kụma gbọrụ tomḅọ si kẹ KỊNỊNYANAḄỌ ḅe mịẹ kụma, tụḅọ inetẹ sịẹ mḅọ pịrị ḅẹ?” Kụma ini ịna ḍaḅọ pọkọ poki-a; gbala KỊNỊNYANAḄỌ ḅe ịn ḅaa ḅẹ tọn tẹ ye mẹ ẹrẹsị.

²⁶ Mịọkụ Samụwẹlị, owiḅọtụḅọ ḅe ḍụḅa tọrọkọ-tọrọkọ mum KỊNỊNYANAḄỌ ḅe ḅụụ-o, tomina aḅụụ-o.

In Kuro Ịlayị Na, Ò Furo Na, Pịrị Ịkịan Mẹ

²⁷ Gbọrụ Tamụnọ ịkịankoroḅọ anịjụ Ịlayị dama-ḅom, tẹ KỊNỊNYANAḄỌ ḅe kẹ ọ̀ fịrịma oku ḍuko ọ̀ pịrịm: “Àrị ị̀ ḅụụ mịẹ pakama ị́ ḍa Erọnị warị mẹ ḍiem ini Ijiputi ḅụ Fero warị mẹ suku-ḅio sime sakị.

²⁸ Izirẹlị ḅẹ afuro mamgba ḅụ, àrị ọ̀ sẹlẹ-ọkị tẹ kẹ ị̀ agbamịẹḅọ mịẹm, iwo ị̀ agbamịẹ-anga mu kụnụaị dọkịma ị̀ pịrị, ị̀ tọrọkọ Ẹfọdị nwẹn-sịn kapa mẹ sụa, anịsakị Izirẹlịapụ ma fịnị ḅụ mịẹ ḅẹ ị̀ agba mamgba à kẹ ị́ ḍa warị mẹ pịrịm.

²⁹ Í tiegotẹ anịtẹrẹmẹ opu fịye fị tọrụngbọ kẹ ị̀ agbamịẹ-aị na, ị̀ agba ma tẹ à tọn aị ma ḍikiarị? Tiegotẹ ị́ kụn kẹ í owiapụ-awọmẹ pịrị ị̀ nẹngịarị? Ị̀ atomi Izirẹlịapụ ma mịẹ ị̀ pịrị ḅẹ agba goyegoye ḅụ ọmịnị iḅitẹịn apakịrị ma sẹlẹ-ọkị ọmịna aḅụụ pịrịarị.

³⁰ Anịẹrẹsị yẹrị KỊNỊNYANAḄỌ, Izirẹlịapụ tẹkẹarị Tamụnọ ḅe mininim mịnẹ ị́ warị na, ị́ ḍa warị mẹ na ị̀ tọrọkọ mẹnjị sọ na, paka na gbamaso ḅa; kụma mịọkụ à ḅarị ọkọ mịẹ ḅịa, kẹ gotẹ ọkọ ḅẹẹarị, inima tẹ kụn kẹ ị̀ pịrị apụ ma, àrị ịn kụn ḅa; anịsakị inima tẹ ì ḍiki iderima apụ ma, à feke-feke ḅara kẹ in ọkị ḅa.

³¹ Ḍikii ene ma ḅoarị, àrị ị́ ịnyọ na, ị́ ḍa warị ḅẹ ịnyọ mẹ na pẹlẹ-siin ḅarị sakị mẹ. Aniemẹ mịẹ tẹ gbọrụ omongi tẹ owiḅọ sọ ḅarị ị́ warị paka ḅịa.

³² Anịtẹso ọkụma ḅụụ-ḅalaḅala ḅụ ị́ pọkọsọlị tọrụngbọ kẹ lọkọlọkọ mẹmgba tẹ à kẹ Izirẹlị ọgọnọ sara ḅẹ ye mẹ ḍiki ḅa; anịsakị ị́ warị ḅio omongi tẹ gbọrụ owiḅọ sọ ḅarị paka ḅịa gbamaso ḅa.

³³ Í furo-ḅẹ-apụ ḅụụ ḅụ àrị ị̀ agbamịẹ-anga mẹ ḅụ pẹlẹ-siin ḅịa owiḅọ ḅe, ini ọ̀ wẹrịso tẹ ori ori atọrụngbọ owu pakama-ḅo tẹ ò ḅioḅẹngbọ kururuma ḅa; anịsakị ị́ warị ḅẹ apụ mamgba kụrọ fị kọn ḅa.

³⁴ Anịsakị miemẹ tẹ ị́ maa owiapụ-awọmẹ Hofini na, Finihasi na la ḅarịye mẹ elekima sọ ị́ pịrị ḅa; ini maa apụ ma gbọrụ ene mẹ ḅụ fịị ḅa.

³⁵ Tẹ à minini nyana gbọrụ agbamịẹḅọ saakị pakama-ḅo ị̀ ḅụụ pịrị ḅa, oriḅe tẹ ì ḅioḅẹngbọ na, ì kuroma na ḅụ ye wẹrịtẹ sime-ḅara kẹ ye mịẹ ḅarị ḅọ; tẹ à gbọrụ karakara warị nama ọ̀ pịrị ḅa, tẹ à pulo kẹ sịḅị ḅụ sara tẹ ḅọ ḅe tọrọkọ mẹnjị sọ na, paka na gbamaso ḅa.

³⁶ Anịsakị ḅẹḅọ-ḅẹḅọ tẹ ị́ warị mẹ ḅio kirikọnḅọ goḅọ-goḅọ, ḅo ọ̀ ḅara seleḅa gbọrụ pakịrị, anịanịa fịturu gbọrụ kpo ḅii gotẹ ọ̀ tẹkẹ tẹ ḅẹẹ ḅa, ‘àrị ị́ tẹkẹm, ị̀ kẹ agbamịẹapụ ma akiri ma ḅe gberie ḅụ suu, mịẹtẹ à paa fịye kalịye fị ḅẹ ḅara.’ ”