1 Samụẹlị 19 - FỊAFỊA BAỊBỤLỤ

Sọlụ Ḅaa-ḅọkọ kẹ Devidi Ḍọkị Tẹẹ

¹ Sọlụ nwẹnị ẹkwẹn ori owiḅọtụḅọ Jonatanị na, ori afịrịmẹnjịapụ na pịrị mịnẹ in Devidi ḅaa. Kụma Sọlụ owiḅọtụḅọ Jonatanị Devidi ḅẹlẹma lama wararị.

² Jonatanị nwẹnị ḍuko Devidi pịrị, “Ị̀ ḍa Sọlụ ị́ ḅaa ḅẹ ḍọkịarị; anịẹrẹsị ị́ ḅụụ ẹbị dede-ḅio ḅụ, kikima anga ḅụ sime tẹ ị́ ḅụụ ḅọị;

³ anịsakị à paka mu piri mẹ ḅio í simearị anga ḅụ ị̀ ḍa akaka sịẹsime ḅa, tẹ arị í gboloma ye kẹ ẹkwẹn ị̀ ḍa pịrị ḅa.”

⁴ Jonatanị nwẹnị Devidi ḅụụ iḅi ẹkwẹn kọn ọ̀ ḍa Sọlụ pịrị, tẹ ọ̀ ḅẹẹ, “Ye amadaḅọ ḅe si kẹ ọ̀ fịrịmẹnjịḅọ Devidi mịẹ ma; kẹ gotẹ ọkọ ḅẹẹarị, amụ ò si kẹ ị́ mịẹ-a, anịsakị ori amịẹaị ma iḅi afịrị mẹnjị-mẹnjị ị́ pịrịm,

⁵ kẹ gotẹ ọkọ ḅẹẹarị, ori ọ̀ fịị kẹ ọ̀ sịḅị-ogbo gbanam tẹ ò Filisiteniḅọ ḅe ḅaam, tẹ KỊNỊNYANAḄỌ ḅe gburo-gburotẹ owu-ḅara-iḅi kọrịnama kọrị Izirẹlị mamgba pịrịm. Ị́ anị ẹrịm, tẹ ḅioḅẹlẹm; ị́ tiegotẹ anịtẹrẹmẹ mịẹye-ofori ḅara kẹ Devidi ḅaa ḅụ si kẹ mịẹye nimi-a ọmbie mịẹ ḅẹ?”

⁶ Sọlụ nwẹnị Jonatanị pọkọ poki; Sọlụ nwẹnị ye karị, “KỊNỊNYANAḄỌ ḅe ḍumo sime wararị ogbo in ọ̀ ḅa ḅịa.”

⁷ Anieḅụ Jonatanị, Devidi sịnm, tẹ mịna aị mamgba ḍuko ọ̀ pịrịm. Tẹ Jonatanị nwẹnị Devidi ọkị-ḅo Sọlụ pịrị, tẹ ori ò sime anga ḅụ tarị ò sime-sime ḅara simem.

⁸ Filisiteniapụ na gbin ḅẹ ọmụ nwẹnị pịkị saakị, tẹ Devidi paka mum, tẹ Filisiteniapụ ma na owu sọm, tẹ ịna ogbo-ḅio ḅụ gburo-gburoma in ḅaam, anieḅụ in nwẹnị ọ̀ tọrọkọ ḍumo-mangị kọn.

⁹ Anịtẹso KỊNỊNYANAḄỌ ḅe ḅụ ḅo si-tẹmẹ nwẹnị ori ọ̀ warị ḅio lẹgị-sime tẹ ọ̀ ḅara-ḅio ọ̀ sụḅa ọlọ wararị ogbo ori ọgọnọ gbana, anịsakị Devidi ọbọ mẹ farịarị.

¹⁰ Sọlụ nwẹnị sụḅa mẹ kẹ Devidi gbin mu warị-anga mẹ ḅụ kpara ḅẹ ḍọkị; kụma ọ̀ sụḅa mẹ ẹkịlẹm anie mịẹtẹ sụḅa mẹ nwẹnị warị-anga mẹ kpara, Devidi nwẹnị ḍumo-mangị kọn tẹ mangị-so.

¹¹ Anị ḍin mẹ Sọlụ fịrịmẹnjịapụ fịrịma mu Devidi warị korum, mịẹtẹ dede-ḅio mẹ ḅụ ori ọ̀ ḅaa ḅẹ ḅara. Mịkalị Devidi ta nwẹnị ḍuko ọ̀ pịrị, “Mị ḍin, ị́ í ḍumo ḅọrọma-a ḅẹḅẹ, ḅaa ini ị́ ḅaa ḅa.”

¹² Anieḅụ Mịkalị nwẹnị ikiḅa-ḅọkọ ḅụ Devidi toluma koroma, tẹ ọ̀ nwẹnị ò ḍumo-mangị kọn, tẹ mangị-so.

¹³ Mịkalị nwẹnị gbọrụ kpokobia ọkị, tẹ anị kẹ iḅila mẹ ọgọnọ koroma, tẹ oḅori oju ḅẹ isuke sịḅị-sakịye kẹ anị sịḅị saakị, tẹ gbọrụ opu kapa kẹ anị gbaịn.

¹⁴ Tẹ Sọlụ fịrịmẹnjịapụ fịrịma mu Devidi ọkị ḅẹ tẹso, á nwẹnị ḅẹẹ, “ori oju iḅi-a,”

¹⁵ Anịtẹso Sọlụ nwẹnị fịrịmẹnjịapụ ma fịrịma in mu Devidi ḍikii, tẹ ḅẹẹm, “ọmịnị iḅila mẹ na ori ọkị-ḅoo mịẹtẹ arị inetẹ ọ̀ ḅaa ḅẹ ḅara.”

¹⁶ Tẹ fịrịmẹnjịapụ ma sọ-ḅo tẹso, kpokobia mẹ mie iḅila mẹ ọgọnọ simearị ye, oḅori oju ḅẹ isuke sịḅị-sakịye anị sịḅị saakị wararị.

¹⁷ Sọlụ nwẹnị Mịkalị ḅẹẹ, “Í tiegotẹ mị-ḅara kẹ oḅori kẹ ị̀ sin, tẹ ị̀ na fịya-a ḅọ wẹrịso tẹ ọ̀ mangị-so?” Mịkalị nwẹnị Sọlụ pakịrị, “ori ị̀ ḅẹẹm, ‘Ị̀ wẹrịso à so; à tiegotẹ ị́ ḅaa na-iḅi?’”

¹⁸ Mịọkụ Devidi ḍumo-mangị kọnm, tẹ mangị-som, tẹ ọ̀ nwẹnị Rama ḅụ Samụwẹlị ḍọkụma-ḅo, tẹ Sọlụ kẹ ọ̀ mịẹ tẹ aị mamgba ḍuko ọ̀ pịrị. Tẹ ori na, Samụwẹlị na so mu Nayihọtị ḅụ sime angam.

¹⁹ In nwẹnị anị ḍuko Sọlụ pịrị, “ḍikii, Devidi Rama ḅẹ Nayihọtị ḅụ emi.”

²⁰ Anịtẹso Sọlụ nwẹnị fịrịmẹnjịapụ fịrịma in mu Devidi ọlọọ, tẹ in ḅo ịkịankoroarị ịkịankoroapụ ogbo mẹ na, Samụwẹlị ịn kẹ sịḅịda ḅara kẹ sịẹsime wararị ẹrị tẹso, Tamụnọ Tẹmẹ ḅe nwẹnị ḅo Sọlụ afịrịmẹnjịapụ ma ọgọnọ gbana, tẹ ini sọ nwẹnị ịkịankoro.

²¹ Ini anị ḍuko Sọlụ pịrị tẹso, ọ̀ nwẹnị ja afịrịmẹnjịapụ kẹ fịrịma, ini sọ nwẹnị ịkịan koro. Sọlụ nwẹnị tẹrẹị karama sakị kẹ fịrịmẹnjịapụ kẹ pịkị fịrịma, tẹ ini sọ nwẹnị pịkị ịkịankoro.

²² Anịtẹso ori nwẹnị ḅarana Rama mu, tẹ ḅo opu suḅe mẹ tẹ Seku ḅụ simearị ye mẹ la; tẹ ọ̀ nwẹnị gbela, “Samụwẹlị na Devidi na in tọ-anga emi.?” Tẹ gbọrụḅọ nwẹnị pakịrị, “ḍikii, in Rama ḅẹ Nayihọtị ḅụ emi.”

²³ Ọ̀ nwẹnị anịjụ ḅụ so Rama ḅẹ Nayihọtị mu; tẹ Tamụnọ Tẹmẹ ḅe nwẹnị pịkị ori sọ ọgọnọ gbana; tẹ ọ̀ nwẹnị ịkịankoro ma-mu nwenii ò ḅo Rama ḅẹ Nayihọtị lam.

²⁴ Ori sọ ori akapa sin famam, tẹ ori sọ Samụwẹlị tọrọkọ ịkịan korom, tẹ paụ simem anị bebe ḍin na eneḅaka mẹmgba na ḅụ. Anị gotẹ in gbelam, “Sọlụ sọ ori ịkịankoroapụ ma ogbo-ḅio emi?”