1 Samụẹlị 18 - FỊAFỊA BAỊBỤLỤ

¹ Devidi, Sọlụ na ẹkwẹn fama tẹso, Jonatanị tẹmẹ nwẹnị Devidi tẹmẹ na donia tẹ gberie mịẹ, tẹ Jonatanị nwẹnị ori ò soku-ḅẹ tẹmẹ ḅẹlẹma ḅara kẹ ọ̀ ḅẹlẹma.

² Tẹ Sọlụ nwẹnị anị ene mẹ ḅụ ori ọkị, tẹ ọ̀ wẹrịso tẹ ọ̀ ḅarị so ọ̀ ḍa warị mu-a.

³ Anịtẹso Jonatanị nwẹnị Devidi na ọḅọkụ fị. Gbala ori ò soku-ḅẹ tẹmẹ ḅẹlẹma ḅara kẹ ọ̀ ḅẹlẹmam ẹrẹsị.

⁴ Jonatanị nwẹnị ori oju ọ̀ sụa wararị vọrọrọ-kapa mẹ sin, tẹ anị kẹ Devidi pịrị; ori owu-aḅiriaị-o, ori okologie sọ-o, iboli-o, ò ḅiri-ponoye na sọ.

⁵ Tẹ Devidi mẹnjị-pakam, anịsakị Sọlụ ọ̀ fịrịma tẹ ò mu anga mu anga, ye ori na-iḅim; anieḅụ Sọlụ ọ̀ kẹ ọmụ akụrọnịapụ ma sịḅị-damam. Anịsakị miemẹ tomi mamgba ḍiki-tọrụ na, Sọlụ ḅẹ afịrịmẹnjịapụ mamgba ḍiki-tọrụ ḅụ sọ iḅim.

Sọlụ Ḅo Devidi Afanam

⁶ Devidi Filisiteniḅọ ḅe ḅaa tẹso, ini ama ḅoarị ogbo ereme ma nwẹnị Izirẹlị ḅẹ ama mamgba ḅụ paka-ḅo tẹ ḍereku anume su-su, saịn-saịn-aị na, ja farị-farịaị na, farị tẹ sẹkịma Amadaḅọ Sọlụ na bịama ḅẹ mu.

⁷ Ereme ma ịna ḅioḅẹlẹ ḅụ nwẹnị su jụmọ-jụmọ pịrị, “Sọlụ ọ̀ kịnị maa ẹndẹ oyia asi finji-finji ḅaa tẹẹ, anịsakị Devidi ọ̀ kịnị puku sọnọ ẹndẹ finji-finji ḅaa tẹẹ.”

⁸ Mị ḍukoye mẹ Sọlụ ḅụụ-ḅẹlẹ-a tẹ ori ịganịma lamam, ọ̀ nwẹnị ḅẹẹ, “In Devidi boma ye kịnị puku sọnọ ẹndẹ finji-finji kụma kịnị maa ẹndẹ oyia asi finji-finji mie ịn kẹ ì boma yee, anịsakị ama-da mẹ sikima ori inetẹ nyana ḅẹ ye ḅụ tiye pịkị kọọn?”

⁹ Tẹ anị ene ḅụ saakị tọrọkọ mu Sọlụ nwẹnị Devidi kẹ tọrụ sụa.

¹⁰ Anị ḅẹ ene-ḅaa ḅụ, Tamụnọ ḅụ ḅo si-tẹmẹ nwẹnị kiri fọịn ḅara kẹ ḅo Sọlụ ọgọnọ gbana, tẹ ọ̀ nwẹnị ọ̀ warị mẹ ḅio sime tẹ nọmụḅọ ẹkwẹn ḅara ẹkwẹn; Devidi ene-ḅaaene-ḅaaene ori ọbọ farị-farị ḅara farịarị sakị Sọlụ ọ̀ ḅara ḅụ ọ̀ sụḅa ọlọ wararị;

¹¹ tẹ ọ̀ gbala kuromam, “À Devidi gbin mu warị-anga mẹ ḅụ kpara ḅa,” ẹrẹsị Sọlụ sụḅa mẹ gbinm. Kụma Devidi maa sakị ma ḅụ sụḅa mẹ ẹkịlẹm.

¹² Sọlụ nwẹnị Devidi ḍiki-ḅalafaa, gbala KỊNỊNYANAḄỌ ḅe Sọlụ ḅụ so tẹ kụma Devidi na emi ẹrẹsị.

¹³ Anieḅụ Sọlụ nwẹnị ọ̀ simearị anga ḅụ Devidi ḅelema, tẹ ọ̀ kẹ ḅẹrẹtọnḅọ mịẹ kịnị maa ẹndẹ oyia asi finji pịrị; tẹ ò tomi ma tọrọkọ mẹnjị sọ-sọ pakam.

¹⁴ Tẹ KỊNỊNYANAḄỌ ḅe Devidi na emi ẹrẹsị, ọ̀ nyanatẹ mịẹ aị mamgba ori na-iḅim.

¹⁵ Sọlụ ẹrịm mịnẹ ori opu ye-ḅara-ḅẹ-sọ nyana tẹso, ọ̀ nwẹnị ò ḍiki-ḅalafa lama.

¹⁶ Kụma Izirẹlị na, Juda na mamgba Devidi ḅẹlẹmam; gbala ịna tọrọkọ mie ọ̀ mẹnjị sọ-sọ pakarị ye.

Devidi, Sọlụ Ẹrẹḅọtụḅọ Simem

¹⁷ Anịtẹso Sọlụ nwẹnị Devidi ḅẹẹ, “Mịanga ḅụ mie ị̀ ẹrẹḅọtụḅọ Mẹrabụ, omongiḅọ ma, àrị á kẹ ị́ pịrị tẹ árị ị́ ta sọ ḅa; ị́yẹrị paa ḅiokpọtẹ kụrọma KỊNỊNYANAḄỌ ḅe owu ma sọ-sọ ị̀ pịrịị.” Gbala Sọlụ ḅiotọnm, “Yee ị̀ ḅara ori ọgọnọ gbana ma, kụma yee Filisiteniapụ ma ḅara mẹ ori ọgọnọ gbana.”

¹⁸ Devidi nwẹnị Sọlụ pakịrị, “Yẹrị tụḅọ, anịsakị ì furo-ḅẹ-apụ ma anie Izirẹlị ḅụ ị̀ ḍa furo-ḅẹ-apụ ma nwẹnị tọ apụ tẹ à ḅo amadaḅọ ḅe fụanḅọ sọ na-iḅi?”

¹⁹ Kụma anị sakị mẹ tẹ Mẹrabụ, Sọlụ ẹrẹḅọtụḅọ ma mimgbe Devidi na sime na-iḅi sakị mẹ, ini á kẹ Adirẹlị, Mẹhola ḅẹ ḅọ ḅe pịrị simem.

²⁰ Mịọkụ Sọlụ ẹrẹḅọtụḅọ Mịkalị Devidi ḅẹlẹmam, tẹ in ḍuko Sọlụ pịrịm, tẹ ye mẹ nwẹnị ọ̀ ḅụụ-ḅẹlẹ.

²¹ Sọlụ kuroma, “Yee arị á kẹ ọ̀ pịrị, mịẹtẹ á ḍiein sọ ọ̀ pịrị tẹ Filisiteniapụ ma ḅara ọ̀ da-paka ḅẹ ḅara.” Anịẹrẹsị Sọlụ nwẹnị maaịn karama sakị kẹ Devidi ḅẹẹ, “Mịọkụ ị́ ị̀ fụanḅọ sọ ḅa.”

²² Sọlụ nwẹnị tọn ori afịrịmẹnjịapụ pịrị, “ọ́ ḅọị ḅara ḅụ ẹkwẹn Devidi pịrị tẹ ḅẹẹ, ‘ḍikii, amadaḅọ ḅe ị́ ḅụụ ḅioḅẹlẹ nyana wararị, anịsakị ori afịrịmẹnjịapụ mamgba ị́ ḅẹlẹmarị; mịọkụ mẹ ḅụ ḅo amadaḅọ ḅe fụanḅọ sọọ.’ ”

²³ Sọlụ afịrịmẹnjịapụ nwẹnị arị ẹkwẹn-aḅịḅị ma kọn Devidi aḅeri ḅio suu. Tẹ Devidi nwẹnị ḅẹẹ, “ọmịnị ẹrịarị mịnẹ yẹrị anie igoinḅọ, tẹ tomi kẹ ye sọ sịn-a ḅọ ḅo amadaḅọ ḅe fụanḅọ sọ mẹ ọ́ kala tọrụ kẹ anị ḍiki?”

²⁴ Sọlụ afịrịmẹnjịapụ ma nwẹnị ḍuko Sọlụ pịrị, “Mị-ḅara mie Devidi ẹkwẹn kọn ḅara.”

²⁵ Anịtẹso Sọlụ nwẹnị ḅẹẹ, “Mị-ḅara mie ọ́ kẹ Devidi ḅẹẹ ḅarị ḅara, ‘Amadaḅọ ḅe ere-sime ḅụ in mịẹ-mịẹ gberie-sọ ḅii-a, kụma Filisiteniapụ ma tarị-aḅụụ ḅẹ sọnọa si sikima, mịẹtẹ ori amadaḅọ ḅe na fịya-a apụ ma ḅụụ ḅụ gbẹẹfị ḅii ḅẹ ḅara.’ ” Mịọkụ Sọlụ kẹ ḅiotọn ye, Devidi mịẹ tẹ ọ̀ ḅịkị Filisiteniapụ ma ḅara-ḅio koro ḅẹ ḅara.

²⁶ Ori afịrịmẹnjịapụ ẹkwẹn-aḅịḅị ma ḍuko Devidi pịrị tẹso, Amadaḅọ ḅe fụanḅọ sọ mẹ anị nwẹnị Devidi ḅụụ-ḅẹlẹ lama. Tẹrẹmẹ pẹlẹ wararị sakị mẹ faa ḅụ,

²⁷ Devidi saakị tẹ ori atomi kẹ ọ̀ ḅụụ sụa tẹ Filisiteniapụ ma ḅụụ ḅụ kịnị oyia asi ḅaam, tẹ Devidi ịna tarị-aḅụụ ma tẹ ọ̀ kẹ amadaḅọ ḅe pịrị aị ma kịẹn-ḅịḅị kịẹn gbasịma tẹ ọkị-ḅo ọ̀ pịrịm, mịẹtẹ ò ḅo amadaḅọ ḅe fụanḅọ sọ ḅẹ ḅara. Tẹ Sọlụ ori ẹrẹḅọtụḅọ Mịkalị kẹ ọ̀ pịrị simem.

²⁸ Kụma Sọlụ ẹrịtẹ nimim mịnẹ KỊNỊNYANAḄỌ ḅe Devidi na emi, anịsakị Izirẹlị mẹmgba pịkị ọ̀ ḅẹlẹmarị tẹso,

²⁹ Sọlụ nwẹnị paa Devidi ḍiki-ḅalafa tọrọkọ-tọrọkọ mu. Mị-ḅara mie Sọlụ kẹ Devidi na fịya-a ḅọ sọ tọrọkọ-tọrọkọ mu ḅara.

³⁰ Anịtẹso Filisiteni ḅẹ ọmụapụ ma paka-paka-ḅo owu sọm, anịsakị in paka-ḅo sakị paka-ḅo sakị, ye Devidi na-iḅi Sọlụ afịrịmẹnjịapụ mamgba nẹngịm; anieḅụ ọ̀ nwẹnị ereso lama.