1 Samụẹlị 16 - FỊAFỊA BAỊBỤLỤ

In Pulo kẹ Devidi Sịḅị Sara Tẹ Ori Amadaḅọ Sọm

¹ KỊNỊNYANAḄỌ ḅe nwẹnị Samụwẹlị ḅẹẹ, “Ị́ Sọlụ gotẹ ḅioḅu nwenii mu tọ sakị la ḅẹ, ị́yẹrị sọ ẹrịarị arị ọ̀ sịkị tẹẹ, amadaḅọ sọ Izirẹlị pịrị ḅụ? Pulo kẹ ị́ ịfalị mẹ ḅio sụa ḅinmaa, tẹ mẹnjị muu; arị ị́ kẹ Jese, Bẹtịlịhẹmụ ḅẹ ḅọ ḅe fịrịma ḅa, gbala arị ori owiapụ-awọmẹ ma ogbo-ḅio ḅụ gbọrụ amadaḅọ pakama-ḅo ị̀ ḅụụ pịrịtẹ ẹrẹsị.”

² Samụwẹlị nwẹnị gbela, “Ndẹẹ arị inetẹ mu ḅarị ḅara? Sọlụ anị naa kụma ori ì ḅaa ḅa.” KỊNỊNYANAḄỌ ḅe nwẹnị ḅẹẹ, “Amụ iyi-a asambịrịma nambulo ọkị tẹ ḅẹẹ, ‘Arị agba mịẹ KỊNỊNYANAḄỌ ḅe pịrị ḅẹ ḅom.’

³ Tẹ Jese sịn agbamịẹ mẹ ḅoo, anịsakị arị ị́ mịẹ ḅẹ ye kẹ í ḍie ḅa; tẹ í pulo kẹ oriḅe tẹ arị ẹrẹ go ị́ pịrị ḅarị ḅọ ḅe sịḅị sara ḅa.”

⁴ Samụwẹlị KỊNỊNYANAḄỌ ḅe tọn ọ̀ pịrị ye ma mịẹm, tẹ Bẹtịlịhẹmụ ḅom. Opu ama mẹ ḅẹ omongiapụ ma nwẹnị oju sẹkị ḅụ ori na bịama ḅẹ ḅo, tẹ nwẹnị gbela, “Í gbeke dein ḅara ḅụ ḅo?”

⁵ Tẹ ọ̀ nwẹnị pakịrị, “À dein ḅara ḅụ ḅom; arị agba mịẹ KỊNỊNYANAḄỌ ḅe pịrị ḅẹ ḅom; ọmịnị ọmịna aḅụụ mịẹ fịafịama tẹ ị̀ ḅụ sọ tẹ agbamịẹ mẹ ḅoo.” Tẹ ori nwẹnị Jese na, ori owiapụ-awọmẹ na mịẹ fịafịama tẹ in sịn agbamịẹ mẹ ḅo.

⁶ In ḅo la tẹso, ọ̀ nwẹnị tọrụ saakị Ẹlịyabụ ḍiki tẹ ḅiotọn, “Tụkụma ḅara ḅụ KỊNỊNYANAḄỌ ḅe pulo kẹ sịḅị ḅụ sara tẹ ḅọ ḅe ọ̀ tọrọkọ emii.”

⁷ Kụma KỊNỊNYANAḄỌ ḅe nwẹnị Samụwẹlị ḅẹẹ, “Ọ̀ sime-ḅara, anịanịa ò gele la ḅara ḍiki ma. Àrị ọ̀ sịkị tẹẹ ẹrẹsị, kẹ gotẹ ọkọ ḅẹẹarị, à tomḅọ ye ḍiki ḅara kẹ ye ḍiki-a. Tomḅọ paka-ḅo tẹ sime-ḅara mie tomi ḍikiarị ye, kụma yẹrị, ḅioḅẹngbọ mẹ mịẹ à ḍikiarị ye.”

⁸ Anịtẹso Jese nwẹnị Abinadabụ sịn tẹ mịẹtẹ ọ̀ nwẹnị Samụwẹlị tọrọkọ mẹnjị-ḅọrọ. Samụwẹlị nwẹnị ḅẹẹ, “ḅieḅe sọ KỊNỊNYANAḄỌ ḅe ọ̀ sẹlẹ-ọkị-a.”

⁹ Anịtẹso Jese Sama mịẹtẹ ọ̀ mẹnjị-ḅọrọ. Samụwẹlị nwẹnị ḅẹẹ, “ḅieḅe sọ KỊNỊNYANAḄỌ ḅe ọ̀ sẹlẹ-ọkị-a.”

¹⁰ Tẹ Jese nwẹnị ori owiapụ-awọmẹ ma ḅụ sọnọma awọmẹ mịẹtẹ in Samụwẹlị tọrọkọ mẹnjị-ḅọrọ. Kụma Samụwẹlị nwẹnị Jese ḅẹẹ, “KỊNỊNYANAḄỌ mịna apụ ma ḅụ gbọrụḅọ-sọ sẹlẹ-ọkị-a.”

¹¹ Samụwẹlị nwẹnị Jese gbela, “Í owiapụ-awọmẹ mamgba in mịanga emi?” Jese nwẹnị pakịrị, “Asambịrịma tẹịn ḅọ ḅe paa kọn wararị, kụma ori anana ma ḍikiḍikiarị.” Samụwẹlị nwẹnị Jese ḅẹẹ, “Fịrịma tẹ in mu ori ọkị-ḅo; kẹ gotẹ ọkọ ḅẹẹarị, wa lẹgị-sime ḅịa nwenii ò ḅo mịanga la ḅa.”

¹² Tẹ Jese nwẹnị fịrịma, tẹ ini ori ọkị-ḅom. Mịọkụ ori mẹmgba tim-tim, tẹ awụ-awụ-awụ ḅịya tẹ sanịarị, ori iḅi-fịtẹ atọrụngbọ nyanam tẹ owiḅọ kọnm. Tẹ KỊNỊNYANAḄỌ ḅe nwẹnị Samụwẹlị ḅẹẹ, “Saakịị, pulo kẹ ọ̀ sịḅị sara-a; kẹ gotẹ ọkọ ḅẹẹarị, ḅieḅe anie ori.”

¹³ Anịtẹso Samụwẹlị nwẹnị pulo ḅio ḅụ simearị ịfalị mẹ ọkị, tẹ pulo kẹ ori owiapụ-amịnapụ ma ogboku ḅụ ọ̀ sịḅị sara; tẹ anị ene mẹ saakị tọrọkọ mu ḅụ KỊNỊNYANAḄỌ ḅe Tẹmẹ ḅe ḅo Devidi ọgọnọ gbanam. Samụwẹlị nwẹnị saakị tẹ so Rama mu.

Devidi Sọlụ Warị Ḅio Fịrị Mẹnjịm

¹⁴ Mịọkụ KỊNỊNYANAḄỌ ḅe Tẹmẹ ḅe Sọlụ ḅụụ ḅụ som, tẹ KỊNỊNYANAḄỌ ḅe gbọrụ si-tẹmẹ kẹ ọ̀ fịrịma tẹ anị ọ̀ kẹ tọrụsiẹrịmam.

¹⁵ Sọlụ fịrịmẹnjịḅọ nwẹnị ọ̀ ḅẹẹ, “Wa nimi wararị mịnẹ KỊNỊNYANAḄỌ ḅe gbọrụ si-tẹmẹ kẹ ị́ fịrịma tẹ anị ị́ kẹ tọrụsiẹrịmarị.

¹⁶ Ọkọ ẹrẹsị, wa nyanaḅọ, tọn wamịnị ị́ afịrịmẹnjịapụ ma pịrị, tẹ wa gbọrụ owiḅọ tẹ ọbọ mẹ farị ḍin ḅọ ḍọkị pakama-ḅo; tẹ Tamụnọ ḅe kẹ ị́ fịrịma si-tẹmẹ ḅe ị́ ọgọnọ gbana sakị gbana sakị ori anị farị ḅa tẹ í oju iḅi ḅa.”

¹⁷ Anieḅụ Sọlụ nwẹnị ori afịrịmẹnjịapụ ḅẹẹ, “Ọ́ gbọrụ owiḅọ tẹ inetẹ iḅiọkụ farị ḅẹ ḅọ ḍọkị tẹ ori ọkị-ḅo ị̀ pịrịị.”

¹⁸ Asawọ ma ḅẹ gbọrụḅọ nwẹnị pakịrị, “ḍikii, à Jese, Bẹtịlịhẹmụ furo mẹ ḅẹ ḅọ ḅe gbọrụ owiḅọtụḅọ tẹ anị farị ḍin lama, ḅiokpọtẹ ọmụgbin ḅara-ḅaa, owu-kụrọnịḅọ, nimi ẹkwẹn kọn ḍin ḅọ, tẹ iḅi-fịtẹ gbọrụ owiḅọ ẹrị tẹẹ; anịsakị KỊNỊNYANAḄỌ ḅe pịkị ori na emi.”

¹⁹ Anịẹrẹsị Sọlụ nwẹnị fịrịmẹnjịapụ kẹ Jese fịrịmatẹ ḅẹẹ, “Í owiḅọtụḅọ Devidi tẹ anana ma ḍikiḍikiarị ḅọ ḅe kẹ ị̀ fịrịmaa.”

²⁰ Jese nwẹnị gbọrụ yedogi-nama ọkị tẹ fịturu kẹ ori ọgọnọ gbana ḅinma, iru gbọrụ akpa na, gbọrụ kala oḅori na kẹ ori owiḅọtụḅọ Devidi ḅara ḅụ Sọlụ fịrịma.

²¹ Devidi nwẹnị Sọlụ ḍọkụma-ḅo tẹ fịrịmẹnjị ọ̀ pịrị. Sọlụ nwẹnị gburo-gburo ḅara kẹ Devidi ḅẹlẹma, tẹ ọ̀ nwẹnị ḅo ori ekpeke dogiḅọ sọ.

²² Sọlụ nwẹnị oku kẹ Jese fịrịma, tẹ ḅẹẹm, “yee Devidi fịrịmẹnjị ị̀ pịrịị.”

²³ Tẹ Tamụnọ ḅara ḅo si-tẹmẹ ḅe Sọlụ ọgọnọ gbana sakị gbana sakị, Devidi ọbọ ọkị tẹ ọ̀ ḅara anị farịm. Anị ḅara ḅụ si-tẹmẹ ḅe Sọlụ ḅụụ ḅụ som tẹ ori ịwọ ịnyọ sụa tẹ oju iḅim.