1 Samụẹlị 15 - FỊAFỊA BAỊBỤLỤ

Amalẹkị Ḅẹ Apụ Ma Na Gbin Ọmụ

¹ Samụwẹlị, Sọlụ ḅẹẹm, “KỊNỊNYANAḄỌ ḅe ị̀ fịrịmam à pulo kẹ ị́ sịḅị sara tẹ ị́ ama-da ori atomi Izirẹlị pịrị; anịẹrẹsị mịọkụ KỊNỊNYANAḄỌ ḅe ẹkwẹn-aḅịḅị ma pokii.”

² Mie KỊNỊNYANAḄỌ ọmụ-ogbo ma nyana ḅọ ḅe ḍuko yee, “À fomu-ḅara kẹ Amalẹkị pịrị ḅa ịn kẹ Izirẹlị, Ijiputi ḅụ paka-ḅoarị sakị etela ḅụ ini na tụḅụrụ ḅara ḅụ kẹ in mịẹ ye ḅụ.

³ Mịọkụ mu Amalẹkị ḅẹ apụ ma ḅaa tẹ ịkatakirikọn-a-ḅara kẹ ịn nyana aị mamgba sima famaa; àrị wẹrịso ma, kụma owiḅọ-o, ẹrẹḅọ-o, kalatụḅọ-o, ndo-ndoarị tụḅọ-o, pootẹ-nambulo-o, anana-o, ike-sụa-nama-o, yedogi-nama sọ.”

⁴ Anieḅụ Sọlụ tomi ma sịn kobiri tẹ in kịẹnm Tẹlẹmụ ḅụ; ḅụọ kẹ mẹnjị ọmụgbin-apụ kịnị si sọnọ apuku finji (200,000), anịsakị Juda ḅụ ḅo apụ kịnị gbọrụ puku, sọnọ ẹndẹ finji (10,000).

⁵ Sọlụ nwẹnị Amalẹkị ḅẹ opu ama mẹ ḅo, tẹ tụndụ ogboku mẹ ḅụ sime koru.

⁶ Sọlụ nwẹnị Kenayịtị apụ ma ḅẹẹ, “Ó soo, ọ́ paka-soo, ọmịnị Amalẹkị ḅẹ apụ ma ogbo-ḅio ideri-soo, anieofori à ḅofa ọ́ kẹ ini na sụa ḅaa; kẹ gotẹ ọkọ ḅẹẹarị, Izirẹlịapụ ma Ijiputi ḅụ paka-ḅo tẹ iwo ḅoarị sakị ọmịnị iḅi-anga kẹ inimgba na kọnm.” Anieḅụ Kenayịtị apụ ma Amalẹkị ḅẹ apụ ma ogbo-ḅio paka-som.

⁷ Sọlụ nwẹnị Havila ḅụ saakị Amalẹkị ḅẹ apụ ma nẹngịma mu Sọọ, tẹ Ijiputi ḅụ ịrụa-saakịarị-anga mẹ jụjụ-ḅio la,

⁸ tẹ ò ḍumo tọrụ ḅụ Egagị, Amalẹkị ḅẹ apụ ma amadaḅọ ḅe ọkịm, tẹ ịkatakirikọn-a-ḅara okologie mẹ tọrụ kẹ tomi mamgba pẹlẹ-pẹlẹ-ḅaa famam.

⁹ Kụma Sọlụ na, tomi ma na nwẹnị Egagị na, anana amẹẹ ma na, pootẹ-anambulo ma na, in ḍikiḍiki ḅẹlẹkị pakama tẹ aị ma ḅụ iḅitẹịn aị ma na, anana awọmẹ ma na, mie kụma iḅi wararị aị mamgba, ini ịkatakirikọn-a-ḅara kẹ arị sima-a. Arị aị mamgba tẹ in ḍiki-sima tẹ yela-a aị ma mie ini ịkatakirikọn-a-ḅara kẹ sima fama ye.

Amadaḅọ Ḅara Ḅụ In Sọlụ Sịkị Tẹẹ

¹⁰ KỊNỊNYANAḄỌ ḅe nwẹnị ẹkwẹn Samụwẹlị pịrị,

¹¹ “À Sọlụ kẹ amadaḅọ mịẹ ye à tiye-ì-gbo ḅẹẹm, kẹ gotẹ ọkọ ḅẹẹarị, ì ḍukamẹnjị ḅụ ọ̀ tọrụ-pịkị ọḅụ ḍiki tẹẹ, tẹ ḅarị à tọn aị mịẹ-a.” Anị nwẹnị Samụwẹlị ḅụụ-ḅẹsọọ; tẹ ọ̀ nwẹnị bebe ḍin mẹmgba kẹ owu KỊNỊNYANAḄỌ ḅe pịrị.

¹² Tẹ Samụwẹlị nwẹnị ḅaso kẹ saakị, mịẹtẹ ò dede-ḅio mẹ kẹ Sọlụ na bịama ḅẹ ḅara; tẹ ịn nwẹnị ḍuko Samụwẹlị pịrị, “Sọlụ Kamẹlị nwẹn-sịn ama mẹ ḅom, tẹ ḍikii, ịn kẹ ọ̀ kẹ ḅiokoroma ḅẹ ḅụụ kịkama tẹmẹ kpokobia saakị sịẹma ọ̀ ḅụụ pịrị tẹ pịkịma-som, tẹ ọkọ wẹrị ḅọrọ ideri Giligalị mum.”

¹³ Tẹ Samụwẹlị, Sọlụ ḍọkụma-ḅom, tẹ Sọlụ nwẹnị ḅẹẹ, “KỊNỊNYANAḄỌ ḅe ḅụ boma sime ị́ pịrịị; à KỊNỊNYANAḄỌ ḅe tọn ye mịẹ tẹẹ.”

¹⁴ Samụwẹlị nwẹnị gbela, “Anịsakị mie mḅẹẹ-mḅẹẹ ma ị̀ aḅeri ḅio olokuarị anana ma na muu-muu fiearị pootẹ-anambulo ma tẹ à naarị aị ma tọ aị?”

¹⁵ Sọlụ nwẹnị pakịrị, “Amalẹkị ḅẹ apụ ma ḅara ini ini ọkị-ḅom; tomi ma gbala ịn kẹ agba mịẹ KỊNỊNYANAḄỌ ị́ Tamụnọ ḅe pịrị ḅẹ ẹrẹsị ini anana ma ḅụ iḅitẹịn aị ma na, pootẹ-anambulo ma ḅụ iḅitẹịn aị ma na wẹrịsom; tẹ wa ịkatakirikọn-a-ḅara kẹ kirikọn-aị ma ḅaa tẹẹ.”

¹⁶ Anịtẹso Samụwẹlị nwẹnị Sọlụ ḅẹẹ, “Dasịẹmaa! À KỊNỊNYANAḄỌ ḅe kẹ mị ḍin ị̀ ḅẹẹ ye ḍuko ị́ pịrị ḅa.” Tẹ ọ̀ nwẹnị ọ̀ ḅẹẹ, “ḍuko-mẹnjịmaa.”

¹⁷ Samụwẹlị nwẹnị ḅẹẹ, “Í soku-ḅẹ atọrụngbọ ḅụ ị́ ịrụ wararị ḅẹsọ, Izirẹlị ḅẹ afuro ma ḅẹ sịḅịdaḅọ ị́yẹrị-a? KỊNỊNYANAḄỌ ḅe pulo kẹ ị́ sịḅị sara tẹ ị́ kẹ amadaḅọ mịẹ Izirẹlị pịrịm,

¹⁸ tẹ KỊNỊNYANAḄỌ ḅe gbọrụ fịrị kẹ ị́ fịrịmam, tẹ ḅẹẹm, ‘Muu owu kẹ si-mịẹapụ ma anie Amalẹkị ḅẹ apụ ma paka tẹ ọ́ sọ nwenii ịn fịị fama.’

¹⁹ Ị́ anịtẹrẹmẹ tiegotẹ ḅarị KỊNỊNYANAḄỌ ḅe ḅịḅị poki-a. Í tiegotẹ gbọrsịḅị koro ọmụ mẹ ḅio ḅẹ ngọ ma fọịn tẹ aniemẹ tẹ KỊNỊNYANAḄỌ ḅe ḍiki-tọrụ ḅụ siye mẹ mịẹ?”

²⁰ Sọlụ nwẹnị Samụwẹlị ḅẹẹ, “À KỊNỊNYANAḄỌ pọkọ poki tẹẹ, à fịrị mẹ tẹ KỊNỊNYANAḄỌ ḅe kẹ ị̀ fịrịma ye mẹ mẹnjị tẹẹ, arị Egagị, Amalẹkị ḅẹ amadaḅọ ḅe ọkị-ḅo tẹẹ, arị ịkatakirikọn-a-ḅara kẹ Amalẹkị ḅẹ apụ ma ḅaa tẹẹ.

²¹ Kụma tomi ma ọmụ mẹ ḅio ḅẹ ngọ ma tẹ sime sima pịrị aị ma ḅẹ iḅitẹịn anana ma na, pootẹ-anambulo ma na ọkịm, kẹ Giligalị ḅụ agba mịẹ KỊNỊNYANAḄỌ ị́ Tamụnọ ḅe pịrị ḅẹ ẹrẹsị.”

²² Samụwẹlị nwẹnị ḅẹẹ, “KỊNỊNYANAḄỌ ḅe ọ̀ ḅịḅịpoki ḅụ nyana gburo-gburotẹ tọrụ-ḅẹlẹ na gbasị ye, nyana dọkịma-agba na, agbamịẹ-aị na emi? Ḍikii, ḅịḅịpoki iḅi agbamịẹ nẹngịm; anịsakị ḍukoye naa iḅi ejimina ḅẹlẹkị nẹngịm.

²³ Ḅịrị-tọrụ kẹ ye ẹrị si ḅara, mịẹ sịḅị-kụrọ sọ si ḅara; anịsakị kịnị na kura-a si ḅara, mie iri-mịẹye na, sunsin oru pịrị na si ḅara. Gbala ị́ KỊNỊNYANAḄỌ ḅe ẹkwẹn-ḅịḅị mẹ sịkị tẹ ẹrẹsị, ori sọ ị́ sịkị tẹẹ amadaḅọ sọ ḅụ.”

²⁴ Sọlụ nwẹnị Samụwẹlị ḅẹẹ, “À si mịẹ tẹẹ, kẹ gotẹ ọkọ ḅẹẹarị, à KỊNỊNYANAḄỌ ḅe tọn ye mẹ na, ị́ ẹkwẹn-aḅịḅị na kan tẹẹ, à gbala tomi ma ḍiki-ḅalafaam, tẹ ịna pọkọ pokim.

²⁵ Anịẹrẹsị mịọkụ àrị ị́ tẹkẹm, ị̀ si mẹ wẹrịsoo, tẹ ị̀ na pịkịma-soo, mịẹtẹ arị inetẹ sunsin KỊNỊNYANAḄỌ ḅe pịrị ḅẹ ḅara.”

²⁶ Samụwẹlị nwẹnị Sọlụ ḅẹẹ, “Àrị ị́ na pịkịma-so ḅịa, kẹ gotẹ ọkọ ḅẹẹarị, ị́ KỊNỊNYANAḄỌ ḅe ẹkwẹn-ḅịḅị mẹ sịkị tẹẹ, anịsakị KỊNỊNYANAḄỌ ḅe sọ ị́ sịkị tẹ amadaḅọ sọ Izirẹlị pịrị ḅụ.”

²⁷ Samụwẹlị pịkị tẹ mẹnjị-so ḅẹ-yearị ogbo, Sọlụ nwẹnị ori opu kapa mẹ suku ọlọ, tẹ anị nwẹnị kaan.

²⁸ Samụwẹlị nwẹnị ọ̀ ḅẹẹ, “KỊNỊNYANAḄỌ ḅe mịmgba ị́ ḅụụ ḅụ Izirẹlị ḅẹ ama-da mẹ kan-siin tẹẹ, tẹ anị kẹ ị́yẹrị ḅe na kpeki, tẹ iḅi ị́ nẹngị ḅọ pịrị tẹẹ.

²⁹ Anịsakị Izirẹlị ḅẹ Ebube ḅe sọ iruo anịanịa ḅioḅẹngbọ ḍima ḅịa, kẹ gotẹ ọkọ ḅẹẹarị, ori tomḅọ tẹ amịna ḅioḅẹngbọ ḍimarị ḅọ-a.”

³⁰ Anịtẹso Sọlụ nwẹnị ḅẹẹ, “À si mịẹ tẹẹ: anịsọ paa mịọkụ mẹ ḅụ ị̀ atomi ma ḅẹ omongiapụ ma na, Izirẹlị na tọrọkọ ḅụ kụn kẹ ị̀ pịrịị, tẹ ị̀ na pịkịma-soo, mịẹtẹ àrị inetẹ sunsin KỊNỊNYANAḄỌ ị́ Tamụnọ ḅe pịrị ḅẹ ḅara.”

³¹ Anieḅụ Samụwẹlị pịkịma Sọlụ ḍuka-mum; tẹ Sọlụ sunsin KỊNỊNYANAḄỌ ḅe pịrịm.

³² Anịtẹso Samụwẹlị nwẹnị ḅẹẹ, “Egagị Amalẹkị ḅẹ apụ ma amadaḅọ ḅe ọkị-ḅo mịanga ḅụ ị̀ pịrịị.” Tẹ Egagị nwẹnị ḅiokpọ nyana ḅara kẹ ọ̀ ḍọkụma-ḅo. Egagị ḅe nwẹnị ḅẹẹ, “Tụkụma ḅara ḅụ fịị akụ mẹ ḅọrọ tẹẹ.”

³³ Samụwẹlị nwẹnị ḅẹẹ, “Í okologie wẹrịtẹ mịẹtẹ ereme ḅarị awọ nyana-a ḅara sime tẹ ḅara, mie í iyingi sọ eremịna ogboku ḅụ ḅarị tụḅọ nyana ḅịa ḅara.” Tẹ Samụwẹlị nwẹnị Giligalị ḅụ KỊNỊNYANAḄỌ ḅe tọrọkọ Egagị kẹ pakịrị-pakịrị pẹlẹ.

³⁴ Anịtẹrẹmẹ Samụwẹlị so Rama mum, tẹ Sọlụ nwẹnị iwo so ọ̀ warị mu Sọlụ ḅẹ Gibiya ḅụ.

³⁵ Tẹ Samụwẹlị ḅarị jen-maaịn kẹ Sọlụ ẹrị-a nwenii ọ̀ fịị ḅẹ ene mẹ lam; kụma Samụwẹlị, Sọlụ gotẹ ḅioḅum. Tẹ KỊNỊNYANAḄỌ ḅe nwẹnị ọ̀ Sọlụ kẹ amadaḅọ mịẹ Izirẹlị pịrị ye mẹ ḅụ tiye-ì-gbo ḅẹẹ.