1 Samụẹlị 12 - FỊAFỊA BAỊBỤLỤ

Samụwẹlị ḅaaḅaa ḅẹẹ Fịrị Fịrịma-ḅịḅị

¹ Samụwẹlị nwẹnị Izirẹlị mẹmgba ḅẹẹ, “ḍikii, à nwẹn mịẹ ḅẹẹ tẹ ó ḍuko ị̀ pịrị aị mamgba ḅụ arị ọmịna pọkọ pokim, tẹ à, gbọrụ amadaḅọ pakama-ḅo ọ́ pịrị tẹẹ.

² Anịsakị ḍikii, amadaḅọ ḅe mịọkụ ọmịna tọrọkọ simetẹ mẹnjịarị; yẹrị arị omongitẹ iḅulu ḅịya tẹẹ, anịsakị ḍikii, ì owiapụ-awọmẹ ọmịnị na emi; ị̀ kala-sakị ḅụ arị ọmịna tọrọkọ simetẹ mẹnjị nwenii ḅo mịmgba lam.

³ Mie yẹrị mịanga ḅụ; ọ́ KỊNỊNYANAḄỌ ḅe tọrọkọ na, ò pulo kẹ sịḅị ḅụ saratẹ ḅọ ḅe tọrọkọ na ḅụ ḍie-pakama ị̀ ẹngbẹsẹẹ. Jene à tụḅọ pootẹ-nambulo anịanịa tụḅọ yedogi-nama, anịanịa inoma ḅara kẹ tụḅọ ḅara ḅụ ye ọkị tẹ? Jene tụḅọ ḅara arị ọḅụ-fị tẹ anị kẹ ị̀ atọrụngbọ pụnma tẹ? Ó ḍie-pakama ị̀ ẹngbẹsẹẹ, anịsakị arị anị pịkịma mḅọ pịrị ḅa.”

⁴ Tomi ma nwẹnị pakịrị, “Amụ ị́ wamịnị inoma tẹ wamịna aḅara ḅụ ye ọkị, anịanịa wa ponoma, anịanịa ḅẹḅọ-ḅẹḅọ ḅara ḅụ ḅẹẹye-ḅẹẹye sọ ọkị-a.”

⁵ Samụwẹlị nwẹnị in ḅẹẹ, “KỊNỊNYANAḄỌ ḅe ogbo-sịẹḅọ sọ ọmịnị ẹngbẹsẹẹ, pulo kẹ sịḅị ḅụ saratẹ ḅọ ḅe mịmgba ḅụ ḅẹrẹ-kiri-simeḅọ sọ ọ́ pịrị mịnẹ ị̀ ḅara-ḅio ḅụ ó gberie-sọ ḍọkị-ẹrịa.” Tẹ ini nwẹnị pakịrị, “Inn, KỊNỊNYANAḄỌ ḅe ogbo-sịẹḅọ sọọ.”

⁶ Samụwẹlị nwẹnị tomi ma ḅẹẹ, “KỊNỊNYANAḄỌ ḅe anie ogbo-sịẹ ḅo, oriḅe tẹ Mozizi na, Erọnị na tọn tẹ Ijiputi ḅẹ ama mẹ ḅio ọmịna aḍapụ ma pakama-ḅo ḅọ.

⁷ Anịẹrẹsị mịọkụ ó jike-a ḅara kẹ sịẹsimee. Mịẹtẹ arị inetẹ KỊNỊNYANAḄỌ ḅe tọrọkọ KỊNỊNYANAḄỌ ḅe mịẹ ọmịnị na, ọmịna aḍapụ na pịrị ḅọrọma amịẹaị mamgba gboloma aị ma ḍuko ọ́ pịrị ḅẹ ḅara.

⁸ Jekọbụ na ò furo-ḅẹ-apụ mẹnjị Ijiputi sọ-mu tẹ Ijiputi-ḅẹ-apụ ma in ponoma sakị, anị sakị ḅụ ọmịna aḍapụ ma owu KỊNỊNYANAḄỌ ḅe pịrịm, tẹ KỊNỊNYANAḄỌ ḅe Mozizi na, Erọnị na kẹ in fịrịmam, inima tẹ Ijiputi ḅụ ọmịna aḍapụ ma pakama-ḅo tẹ in mịẹ tẹ in mịanga ḅụ sime apụ ma.

⁹ Kụma ịn KỊNỊNYANAḄỌ ịna Tamụnọ ḅe kẹ ḅioḅọrọmam, tẹ ori ịn kẹ Hazọ ọmụ-ogbo mẹ ḅẹ ḅẹrẹtọnḅọ Sisera ḅe na, Filisiteniapụ ma na, Mohabụ ḅẹ amadaḅọ ḅe na ḅara-ḅio ḅụ dẹrịmam; tẹ ini ini na owu-sọm.

¹⁰ Tẹ in nwẹnị owu KỊNỊNYANAḄỌ ḅe pịrị tẹ ḅẹẹ, ‘Wa si mịẹ tẹẹ, gbala wa KỊNỊNYANAḄỌ ḅe sịkị tẹẹ, tẹ fịrịmẹnjị Balị na, Asịtarọtị ere-oru ma pịrị tẹ ẹrẹsị; kụma mịọkụ wamịnị na fịya-a apụ ma ḅara-ḅio wa ḍụa-ḅọrọma pakama-ḅoo; anịsakị wa fịrịmẹnjị ị́ pịrị ḅa.’

¹¹ Tẹ KỊNỊNYANAḄỌ ḅe nwẹnị Jerubalị (Gidiyọnị) na, Barakị na, Jẹfụta na, Samụwẹlị na fịrịma ḅo ọmịnị na fịya-a apụ ma ḅara pakịrị-pakịrị ḅụ ọ́ ḍụa-ḅọrọma pakama-ḅom, tẹ ọ́ kpaịn simem.

¹² Anịsakị ọmịnị ẹrịm mịnẹ Nahasi, Amọnị ḅẹ amadaḅọ ḅe ḅo ọ́ da-paka tẹso, ọ́ nwẹnị ị̀ ḅẹẹ, ‘Ẹn-ẹn, kụma gbọrụ amadaḅọ paa ḅẹrẹtọn wa pịrị ḅa,’ KỊNỊNYANAḄỌ ọmịna Tamụnọ ḅe ọmịna amadaḅọ sọ wararị ogbo ḅụ.

¹³ Anịsakị mịọkụ ọmịnị amadaḅọ ḅe, oriḅe tẹ ọ́ sẹlẹ-ọkị tẹ ḅọ ḅe ḍikii, oriḅe tẹ ó ḅii ḅọ ḅe, ḍikii, KỊNỊNYANAḄỌ ḅe gbọrụ amadaḅọ kẹ ọ́ pịrị tẹẹ.

¹⁴ Ọ́ nwẹnị KỊNỊNYANAḄỌ ḅe ḍiki-ḅalafaa ḅa, tẹ fịrịmẹnjị ọ̀ pịrị, tẹ ọ̀ pọkọ poki, tẹ sịḅị kụrọma KỊNỊNYANAḄỌ ḅe tọn ye mẹ pịrị ḅịa, tẹ ọmịnị-o, amadaḅọ ḅe tẹ ama-da ọ́ pịrịarị ḅọ ḅe-o, KỊNỊNYANAḄỌ ọmịna Tamụnọ ḅe ḍuka mẹnjị-mẹnjị, ye ọmịnị na iḅi ḅa;

¹⁵ kụma ọ́ KỊNỊNYANAḄỌ ḅe pọkọ poki ḅịa, kụma sịḅị kụrọma KỊNỊNYANAḄỌ ḅe tọn ye mẹ pịrị-pịrị, anịrẹ KỊNỊNYANAḄỌ ḅe ḅara mẹ ọmịnị na, ọmịna amadaḅọ na da-paka ḅa.

¹⁶ Anịẹrẹsị mịọkụ ọ́ jike-a ḅara kẹ sịẹsime tẹ mị gburo-gburotẹ ye mẹ tẹ KỊNỊNYANAḄỌ ḅe ọmịna tọrọkọ mịẹ ḅarịye mẹ ẹrịị.

¹⁷ Mịmgba anie ịn kẹ witi sịn mbịaka mẹ pẹlẹ ene mẹ anị-a? À KỊNỊNYANAḄỌ ḅe sịn ḅa mịẹtẹ ò so-alagba na, eene na kẹ fịrịma ḅẹ ḅara, anịsakị ó nimi tẹ ẹrị ḅa mịnẹ ọmịna si-sịḅịḅio mẹ tẹ ọ́ KỊNỊNYANAḄỌ ḅe ḍiki-tọrụ ḅụ gbọrụ amadaḅọ ḅii ọmịna aḅụụ pịrị ye mẹ gburo-gburom.”

¹⁸ Anieḅụ Samụwẹlị KỊNỊNYANAḄỌ ḅe sịnm, tẹ anị gbọrụ ene mẹ ḅụ KỊNỊNYANAḄỌ ḅe so-alagba na, eene na kẹ fịrịmam; tẹ tomi mamgba nwẹnị gburo-gburo ḅara kẹ KỊNỊNYANAḄỌ ḅe na, Samụwẹlị na ḍiki-ḅalafaa.

¹⁹ Tẹ tomi mamgba nwẹnị Samụwẹlị ḅẹẹ, “KỊNỊNYANAḄỌ ị́ Tamụnọ ḅe tẹkẹ ị́ afịrịmẹnjịapụ pịrị, mịẹtẹ wa fịị ḅịa ḅara, kẹ gotẹ ọkọ ḅẹẹarị, wa pịkị gbọrụ amadaḅọ ḅii wamịna-aḅụụ pịrị tẹ mị siye mẹ kẹ mu wamịna asi mamgba ḅụ sụa tẹ ḅẹẹ-sakị.”

²⁰ Samụwẹlị nwẹnị tomi ma ḅẹẹ, “ọ́ ḅalafa ma, mị siye mẹmgba sọ ọ́ nwẹn mịẹ tẹẹ, anịsọ ọ́ KỊNỊNYANAḄỌ ḅe ḍukamẹnjị tọrụ pịkị akaka da ma, kụma ọmịnị ọmịna ḅioḅẹngbọ mẹmgba kẹ fịrịmẹnjị KỊNỊNYANAḄỌ ḅe pịrịị;

²¹ tẹ tọrụ pịkị akaka ḅio papaa aị ma tẹ sọye mịẹ ọ́ pịrị, anịanịa ọ́ ḅọrọma ḅịa aị ma ḍiki ma, kẹ gotẹ ọkọ ḅẹẹarị, arị aị ma anie papaa aị.

²² Kẹ gotẹ ọkọ ḅẹẹarị, KỊNỊNYANAḄỌ ḅe ori atomi kẹ wakị-nguma ḅịa, ori opu ẹrẹ mẹ ẹrẹsị, anị gbala KỊNỊNYANAḄỌ ḅe ḅụụ-ḅẹlẹm ọ́ kẹ gbọrụ atomi mịẹ ọ̀ ḅụụ pịrị.

²³ Anie sikima, yee anị ḅioḅọrọma ye sọ mịnẹ yẹrị tẹkẹ ọ́ pịrị dasịẹma tẹ KỊNỊNYANAḄỌ ḅe ḅụụ si mịẹ ḅarị mẹ; anịsakị arị iḅitẹ karakara etela mẹ kẹ ó toluma ḅa.

²⁴ Ọmịnị paa KỊNỊNYANAḄỌ ḅe ḍiki-ḅalafaa tẹ minini nyana ḅara kẹ ọmịna ḅioḅẹngbọ mẹmgba kẹ fịrịmẹnjị ọ̀ pịrịị, kẹ gotẹ ọkọ ḅẹẹarị, gburo-gburotẹ opu aị ma tẹ ọ̀ mịẹ-mịẹ ọ́ pịrị tẹ aị ma ọ́ nwẹn kẹ ḅiokoromaa.

²⁵ Kụma ọ́ nwẹnị paa si-sịḅịḅio-sụa ḅara kẹ ye mịẹ-mịẹ, ọmịnị-o, ọmịna amadaḅọ-o, ini ọmịnị ọfịn siin ḅa.”