1 Samụẹlị 1 - FỊAFỊA BAỊBỤLỤ

Ẹlịkena Na, Ò Furo Na, Silo Ḅụ

¹ Ramatahimu-zofimu ḅụ Iferemu tụndụ ọgọnọ ḅẹ opu sịẹ mẹ ḅẹ gbọrụ owiḅọ simem. Oriḅe ẹrẹ anie Ẹlịkena, Jerohamụ owiḅọtụḅọ, pịkị Elihu taa-owiḅọtụḅọ, pịkị Tohu ile-owiḅọtụḅọ, pịkị Zufu ọsịkịsịkị-owiḅọtụḅọ, Iferemu furo-ḅẹ-ḅọ ḅe.

² Ọ̀ maa ereme simem; gbọrụḅọ ẹrẹ Ana, anịsakị osi-ḅọ ma ẹrẹ Pẹnina. Pẹnina awọmẹ iyim, kụma Ana awọmẹ iyi-a.

³ Mịọkụ ḅị owiḅọtụḅọ ḅe kụra-kụra ḅụ ori opu ama ḅụ so Silo ḅụ mu agba mịẹ-mịẹ ye-mamgba nyana KỊNỊNYANAḄỌ ḅe pịrịarị, Ịlayị maa owiapụ-awọmẹ Hofini na Finihasi na, KỊNỊNYANAḄỌ ḅe agbamịẹapụ sọ sime anga mẹ ḅụ.

⁴ Ene tẹ Ẹlịkena agba mịẹ sakị mịẹ sakị ọ̀ tọnwa kiri kẹ ọ̀ ta Pẹnina na, arị owiapụ-awọmẹ na, eremịna-awọmẹ mamgba na pịrị ḅa.

⁵ Anịsakị ori Ana ḅẹlẹmam ḅẹsọ, gbọrụ kiri ngẹrị mie ọ̀ kẹ Ana pịrị ḅarịye, gbala KỊNỊNYANAḄỌ ḅe á furo pụnmam ẹrẹsị.

⁶ Pẹnina árị afana á ḅụụ-sịnịsịnịma ḅẹ ḅara kẹ ḅẹlẹma arị ịganịma lamam, anie KỊNỊNYANAḄỌ ḅe kẹ á furo pụnma ye ẹrẹsị

⁷ Mị-ḅara mie kụra-kụra ḅụ anị mịẹ ma-mu ḅara; árị iwo KỊNỊNYANAḄỌ ḅe warị mẹ mu sakị mu sakị, mie á kẹ árị ịganịma-ịganịma ḅara. Anịẹrẹsị Ana tẹmẹ-la ḅara kẹ owu ḅa, tẹ fịye fị ḅịa.

⁸ Á di Ẹlịkena nwẹnị á ḅẹẹ, “Ana, í tiegotẹ tẹmẹ-la ḅara kẹ owuarị? Anịsakị ị́ tiegotẹ fịye fị-a? Í tiegotẹ í ḅioḅẹngbọ ḅụ kururuarị? Arị ị́ ḅụụ ḅụ oyi awọmẹ nẹngị-a?”

Ana Na, Ịlayị Na

⁹ Silo ḅụ ịn fịye fị fama, tẹ minji ḅuu tẹso, Ana nwẹnị saakị. Mịọkụ Ịlayị agbamịẹḅọ ḅe KỊNỊNYANAḄỌ ḅe tẹkẹ-warị mẹ ḅẹ ḅọkọ amasịn ma akaka ịkasiye mẹ ọgọnọ lẹgị-sime wararị.

¹⁰ Á pokolo ḅara kẹ ḅụụ-ḅalaḅala nyanam, tẹ KỊNỊNYANAḄỌ ḅe tẹkẹ, tẹ tẹmẹ-la ḅara kẹ ye ḅụụ ḅụ akụ ḅara kẹ owum.

¹¹ Á nwẹnị ịlọ minini KỊNỊNYANAḄỌ ḅe pịrị tẹ ḅẹẹ, “yei Kụrọmamgba nyana KỊNỊNYANAḄỌ, ị́yẹrị nwẹnị karakara-ḅara-ḅụ toluma ị́ fịrịmẹnjị-ẹrẹḅọtụḅọ ma ḅụụ ḅẹ ḅụụ-fụka mẹ ḍiki, tẹ ị̀ kẹ ḅiokoroma, tẹ ị́ fịrịmẹnjị-ẹrẹḅọtụḅọ ma kẹ ḅioḅọrọma-a, kụma nwẹnị gbọrụ owiḅọtụḅọ kẹ ị́ fịrịmẹnjị-ẹrẹḅọtụḅọ ma pịrị, pịrị, anịrẹ ò ḍumo-ene mamgba ḅụ arị ọ̀ kẹ KỊNỊNYANAḄỌ ḅe pịrị ḅa, anịsakị gbọrụ sịḅị-sẹịn ogie sọ ọ̀ sịḅị la ḅịa.”

¹² Árị KỊNỊNYANAḄỌ ḅe tọrọkọ tẹkẹ tọrọkọ-tọrọkọ muarị sakị, Ịlayị á ḅịḅị ḍiki tẹ kẹ elekima sụarị.

¹³ Á ḅioḅẹngbọ ḅụ mie Ana ẹkwẹn-arị ye; á ḅịḅị-ḅọkọ ngẹrị mie jikearị ye, kụma kịnị á pọkọ naa-a; anịẹrẹsị Ịlayị nwẹnị iru ḅuu tọrụ-ḅaama ẹrẹḅọ ḅara kẹ arị ọkị.

¹⁴ Ịlayị nwẹnị á ḅẹẹ, “Ị́ iru ḅuu tọrụ-ḅaama mu tọ-sakị la ḅẹ? Í ḅuu iru mẹ siin ị́ tọrụ ḅụ.”

¹⁵ Kụma Ana nwẹnị pakịrị, “Ẹn-ẹn, ị̀ nyanaḅọ, yẹrị anie ye ḅẹlẹma ḅụụ-fụkamarị gbọrụ ẹrẹḅọ, tọrụ-ḅaa-a iru, anịanịa, kụrọ iru sọ à ḅuu-a kụma anịngẹ-kụraḅio ị̀ tẹmẹ mie arị ọsụma KỊNỊNYANAḄỌ ḅe tọrọkọ sararị ye.

¹⁶ Ị́ fịrịmẹnjị-ẹrẹḅọtụḅọ kẹ ofori-ofori ẹrẹḅọ ọkị ḅara ọkị ma; kẹ gotẹ ọkọ ḅẹẹarị, anịngẹ-kụraḅio opu ḅio-sẹsẹ na, ịganị na ḅụ mie arị ẹkwẹn-arị ye.”

¹⁷ Anịtẹso Ịlayị nwẹnị pakịrị, “Dein na muu, anịsakị Izirẹlịapụ tẹkẹarị Tamụnọ ḅe í ḅiiarị tẹ ọ̀ ḅara ḅụ ḅii ye mẹ kẹ ị́ pịrịị.”

¹⁸ Tẹ á nwẹnị ḅẹẹ, “Yee, ị́ fịrịmẹnjị-ẹrẹḅọtụḅọ ị́ tọrụ ḅụ ḍiki-ḅụụjịrị nyana.” Anịtẹso ẹrẹḅọ ma so arị etela dama-mum, tẹ fịye fịm, tẹ á tọrụ ḅarị jen-maaịn kẹ fụrụ-a.

Samụwẹlị Iyi Na, Ọ̀ Kẹ Mịẹye Ḅụ Suu Na

¹⁹ Dede-funfun ḅụ ịn saakịm, tẹ KỊNỊNYANAḄỌ ḅe tọrọkọ sunsinm; anịtẹso ịn pịkịma-so Rama ḅụ ịna warị mum. Tẹ Ẹlịkena ọ̀ ta Ana na nimiam, tẹ KỊNỊNYANAḄỌ ḅe á kẹ ḅiokoromam;

²⁰ tẹ ala-a ḅẹ sakị ḅụ Ana nwẹnị sime kọn tẹ gbọrụ owiḅọtụḅọ iyi, tẹ á nwẹnị Samụwẹlị kẹ ẹrẹ kẹ ò koro gbala árị mẹẹ, “À KỊNỊNYANAḄỌ ḅara ò ḅiim ẹrẹsị.”

²¹ Ẹlịkena nwẹn-sịn owiḅọ ḅe na, ọ̀ warị mẹmgba na nwẹnị kụra-kụra ḅe agba mẹ mịẹ, pịkị ò minini ịlọ suma ḅẹ mu.

²² Kụma Ana á mu-a, gbala arị á di ḅẹẹm, “Tụḅọ ḅe ndo-kụma gbọrụ sakị, arị ori ọkị-ḅo ḅa, mịẹ tẹ ori ọ̀ ḅụụ ḍie-pakama ḅẹ ḅara KỊNỊNYANAḄỌ ḅe tọrọkọ ḅụ, tẹ anịjụ sime gbamaso ḅẹ ḅara ẹrẹsị.”

²³ Á di Ẹlịkena ḅe nwẹnị á ḅẹẹ, “Ị́ ẹrịm iḅitẹịn tẹ ị́ mịẹ ḅẹ ye mịẹ, koru nwenii ị́ tụḅọ ḅe ḅịḅị ndo siin sakị la; yee KỊNỊNYANAḄỌ ḅe paa ori ẹkwẹn-ḅịḅị ngẹrị mịẹ-pakama.” Anieḅụ ẹrẹḅọ ma simem, tẹ arị owiḅọtụḅọ ḍikiḍiki nwenii arị ọ̀ ḅịḅị ndo siinm.

²⁴ Arị ọ̀ ḅịḅị ndo siin tẹso, á nwẹnị ọ̀ saakị dogi á ḅụụ sụa, pịkị tẹra akụra sịḅị ḅụ ḅọrọtẹ owi-nambulo na, fịturu mịẹ fịlawa gbọrụ opu akpa pembe ye na, iru gbọrụ akpa na ọkị sụa; tẹ á nwẹnị ori ọkị Silo ḅụ KỊNỊNYANAḄỌ ḅe warị ḅo; anịsakị tụḅọ ḅe asambịrịma wararị.

²⁵ Anịtẹso ini owi-nambulo ḅe ḅaam, tẹ ịn tụḅọ ḅe ọkị-ḅo Ịlayị pịrịm.

²⁶ Á nwẹnị ḅẹẹ, “yei ị̀ nyanaḅọ! Ị̀ nyanaḅọ í ḍumo-sime wararị ogbo, yẹrị anie ẹrẹḅọ ma tẹ mịanga ị́ tọrọkọ sịẹsime tẹ KỊNỊNYANAḄỌ ḅe tẹkẹ sime ẹrẹḅọ ma.

²⁷ Mie à gotẹ tẹkẹ tụḅọ ḅe, anịsakị KỊNỊNYANAḄỌ ḅe à ḅiiarị tẹ ọ́ ḅara ḅụ ḅii ye mẹ kẹ ị̀ pịrị tẹẹ.

²⁸ Ọkọẹrẹsị arị ọ̀ kẹ KỊNỊNYANAḄỌ ḅe pịrị tẹ; ò ḍumo mu laa ḅiri laa ḅiri ò sime KỊNỊNYANAḄỌ ḅe pịrịm.” Tẹ ini anịjụ ḅụ sunsin KỊNỊNYANAḄỌ ḅe pịrịm.