1 Pita 5 - FỊAFỊA BAỊBỤLỤ

Tamụnọ Anana Ogbo Mẹ

¹ Yẹrị sọ omongiḅọ ḅara ḅụ, arị ọmịna ogboku simearị sọsị omongiapụ ma tẹkẹm. À ḅarana Kịrayịsị atọrụsiẹrị ma ẹrịm, anịsakị à pịkị ori ebube mẹ ḅụ kiri nyana ḅa anị tolu-paka sakị. Àrị ọ́ tẹkẹm,

² ọmịnị anana-ḍikiḍikiapụ sọ Tamụnọ kẹ ọ́ pịrị anana ogbo mẹ pịrịị, tẹ minini ḅụụ pịrị fịrị ḅara kẹ iḅiọkụ anị ḍikiḍikii, Tamụnọ ḅiiarị ọ́ mịẹ ḅẹ ḅara, minini tẹ ḅụụ saakị pịrị-a ḅara-a. Gbẹẹ ye ngẹrị tẹmẹ ọ́ nwẹn sụa ma, tẹ ọmịna kọrịnama kọrịị, fịrịmẹnjị ḅẹ ḍọkịarị karakara kuroma ḅụ.

³ Ọ́ ḅẹrẹ tọn-tọn ịn pịrị ḅara kẹ ịn kẹ ọmịna ḅara sụa wararị apụ ma na anga ma, kụma ọmịnị ọmịna ḍumo kẹ in ḍikima tẹ anga ḅẹ ḅara sọma anana ogbo mẹ pịrịị.

⁴ Anịsakị Sịḅịda Anana Ḍikiḍikiḅọ ḅe ḅo sakị, ò ḍisi-ḍisia ebube ama-da sun kẹ ó sure ḅa.

⁵ Ọmịnị asawọ ma sọ ọkọ ḍikima tẹ sịḅị-tuu omongiapụ ma pịrịị, tẹ ọmịnị-mgba ḅụụ iderima kẹ tọrọkọ kikima ḅịtẹ sọma tẹ fịrịmẹnjị jụmọ-jụmọ pịrịị, kẹ gotẹ ọkọ ḍukoarị, Fịafịa Ḍiri mẹ ḅẹẹarị, “Tamụnọ ḅụụ-gelemarị ḅọ na tụḅụrụarị, kụma ḅụụ iderimarị ḅọ mẹ mie ori iḅi tọrụ kẹ ḍikiarị.”

⁶ Ọkọẹrẹsị, ọmịnị ọmịna ḅụụ iderimaa, Tamụnọ kụrọtẹ ḅara mẹ suku-ḅio ḅụ, mịẹtẹ ori iḅi sakị ḅụ ọ̀ nwẹnị ọ́ saakị-gelema ḅẹ ḅara.

⁷ Ọmịnị ọmịna aḅalaḅala mamgba ḅụ ḅara-siin ọ̀ pịrịị, ori ọ́ balarị ẹrẹsị.

⁸ Ọ́ tọrụ kẹ kiri lamaa, ọmịnị ẹbịị! Ekwesu, si kẹ ọ́ tọn-arị ḅọ ḅe, ọkụkụ oloku ḅara oloku ma ḅọrọarị, tẹ ọ̀ kanị pẹị ḅẹ ḅọ ḍọkịarị.

⁹ Ọmịnị ọmịna minini ḅụ sịẹ-kụrọ, tẹ ḍụkụ ọ̀ pịrị ma, kẹ gotẹ ọkọ ḍukoarị, bebe tomikiri mẹ ḅụ, ó pembema Kịrayịsị minini apụ mamgba, ó nimi ḅara ḅụ, mịna gbọrụ atọrụsiẹrị ma ẹrịarị.

¹⁰ Kụma ọ́ kẹlẹ kẹ tọrụsiẹrị tẹso, sakị, ḍiki-ḅụụjịrị ye mẹmgba Tamụnọ ḅe, tẹ ọ́ sịn-arị ó ḅo Kịrayịsị na gbọrụ ḅụ sime tẹ ó sime gbamaso ebube nyana ḅẹẹ ḅọ ḅe, ọ́ mịẹtẹ ó busunu ḅa, tẹ kụrọ-sịẹ na, ịnyọ na, jike jike-a kuno na kẹ ọ́ pịrị ḅa.

¹¹ Kụrọ sime ọ̀ pịrị gbamasom. Amẹnị.

Kunoma Ḅii-ḅịḅị

¹² Sayịlasị, tẹ à ḅioḅẹngbọ kẹ ḅụụ ḅụ gbana wararị Kịrayịsị ḍukamẹnjị mịnaḅọ ḅara kẹ ọkị ḅọ ḅe, mie ḅarasụa ị̀ pịrị tẹ à mị kpụlụ ḍiri mẹ kẹẹ ọ́ fịrịmarị. À ḅiiarị àrị ọmịna ḅiokpọma, tẹ ḍuko-pakama ọ́ pịrị mịnẹ miemẹ Tamụnọ karakara ḍiki-ḅụụjịrị. Ọmịnị anị ḅụ sịẹ-kụrọọ.

¹³ Ọmịna mịnaḅọ ma, Babịlọnị ḅụ simearị sọsị mẹ, Tamụnọ kẹ sụa sẹlẹ-ọkị ḅọ ma, ó ḅiim, tẹ ì tụḅọ Makị sọ ó ḅiim.

¹⁴ Ọ́ ḅẹlẹma ḅara ḅụ ekpe kẹ jụmọ-jụmọ fịnama tẹ ọmịna aḅụụ ḅii. Yee dein ọmịnị sime Kịrayịsị pịrị apụ mamgba na sime.