1 Pita 2 - FỊAFỊA BAỊBỤLỤ

Ḍumo Wararị Ḍụḅarị Ḅe Na Fịafịa Sịẹ Mẹ Na

¹ Ọkọẹrẹsị, ó siye goyegoye ḅụ ḅụụ ḅelemaa; ọ́ ḅarị iruo ma, anịanịa tomina tọrụ iḅi ọkị ḅẹ ḅara mịẹ, anịanịa afana, anịanịa ja apụ mịẹ sima ẹkwẹn kọn, mịẹ ma.

² Ịwọma iyi awọmẹ ḅara ḅụ, tẹmẹ ḅụ ḅẹ ndo mẹ ndo mẹ, sakị mamgba ọ́ tarịị, mịẹtẹ ọmịnị anị ndo mẹ ndo tẹ ḍụḅa paka-ḅo tẹ ḅọrọma ḅarị ḅara.

³ Fịafịa Ḍiri mẹ ḅẹẹarị ḅara ḅụ, “Ọ́ ḅarana KỊNỊNYANAḄỌ ḅe sime iḅi ḅara mẹ la ḅara ḍọkị-ẹrị tẹ.”

⁴ Ọ́ KỊNỊNYANAḄỌ ḅe ḍọkụma-ḅoo, ḍumo wararị ḍụḅarị tẹ tomḅọ kẹ ye ḅụ sọ-a ye ọkị tẹ sịkị ye mẹ, kụma Tamụnọ kẹ ye ḅụ sọ ye kịẹn tẹ sẹlẹ-ọkị ye mẹ.

⁵ Ó ḍumo wararị aḍụḅarị ḅara kẹ ḅoo, tẹ ọmịna aḅụụ kẹ pịrịị, ini ọ́ kẹ tẹmẹ ḅụ ḅẹ Tamụnọ-warị nama, anịanga ḅụ ọ́ fịafịa agbamịẹapụ fịrịmẹnjị tẹ Tamụnọ ọkị gbẹẹ tẹmẹ ḅụ ḅẹ agba mịẹ ọ̀ pịrị ḅa, Jizọsị Kịrayịsị ḅe ḅụ.

⁶ Kẹ gotẹ ọkọ ḍukoarị, Fịafịa Ḍiri mẹ ḅẹẹarị, “À gbọrụ yelatẹ ḍụḅarị sẹlẹ-ọkịm, àrị anị kẹ Zayọnị ḅụ ịkọlị palị ḍụḅarị ḅara koromarị, tẹ ọ̀ ḅụụ minini ḅọ, minini ḅọ papaa ḅara ọlọ ḅịa.”

⁷ Ọmịnị minini apụ ma ḅụụ mị ḍụḅarị mẹ kpọma yelam; kụma ini tẹ minini-a apụ ma ḅụụ: Warị nama apụ ma ye ḅụ ofori ḅara kẹ sịkị ḍụḅarị mẹ ḅọ arịmgba ḅụ kụrọ nyana tẹịn ye sọm.

⁸ Jen anga ḅụ Fịafịa Ḍiri mẹ pịkị ḅẹẹm, “Mie kịnị pụmbụma ḅẹ ḍụḅarị mẹ, mịẹtẹ ịn ḅịkị ḅẹ ịkụ mẹ.” In gotẹ pụmbụ ye ini ẹkwẹn mẹ minini-a; anị ḅara anie Tamụnọ tọn ịn pịrị ḅara.

⁹ Kụma ọmịnị ma anie Tamụnọ sẹlẹ-ọkị tẹ furo, Amadaḅọ agbamịẹapụ, fịafịa sịẹ, sime Tamụnọ pịrị atomi, sẹlẹ pakama-ḅo tẹ Tamụnọ ḅụụ-buama amịẹaị ma ḍuko wasama ḅẹ apụ, anie kanakana ḅio ọ́ sịn pakama-ḅo ḅalafama bele ḅio suu Tamụnọ ḅe.

¹⁰ Sakị ḅẹ gbọrụ sakị ḅụ ọmịnị Tamụnọ atomi-a, kụma mịọkụ ọmịnị ori atomi sọ tẹ; sakị ḅẹ gbọrụ sakị ḅụ ọ́ Tamụnọ ọkụrụkụrụ nimi-a, kụma mịọkụ ọmịnị ori ọkụrụkụrụ nyana tẹ.

Tamụnọ Omoniapụ

¹¹ Ì ikiapụ, sisi àrị ọ́ tẹkẹm, tomikiri mẹ ḅụ ọmịnị kịnị tọrụ-nimiapụ na amịna ama koroma-so wararị apụ na ḅara ḅụ, ọ́ ḍụkụ tẹ ḅụụ sịkị meni-oju gotẹ lẹlẹarị aị ma pịrị ma, anie sakị mamgba tẹmẹ na ọmụ gbin-arị aị ma.

¹² Yee oru nimi apụ ma ogboku ḅụ ọmịna ḍumo kọn ḅara iḅi lama, mịẹtẹ in si-mịẹapụ kẹ ọ́ sịn-arị sọ, ini ọ́ mịẹarị iḅi amịẹaị ma lekiri tẹ Tamụnọ tokini ḅa ò ḅo ḅarị Ene ḅụ.

¹³ KỊNỊNYANAḄỌ ḅe sịḅị ẹrẹsị, ọ́ sịḅị-tuu, tomi tọn ḅara ḅụ, kụrọ-ḅara ḅụ simearị ḅọ goḅọ-goḅọ pịrị: anị ḅọrọ Tomikiri mẹ daarị ḅọ tẹ tẹịn ḅẹrẹtọn kụrọ nyanaḅọ ḅe-o,

¹⁴ ḅẹrẹtọn apụ tẹ ori tọn tẹ fomu-ḅara kẹ siye mịẹ apụ pịrị, tẹ tokini kẹ iḅiye mịẹ apụ pịrịarị apụ ma-o.

¹⁵ Kẹ gotẹ ọkọ ḍukoarị, Tamụnọ ḅiiarị, mịnẹ ó gberie-sọ nimiatẹ oḅori ẹkwẹn kọn-arị atomi ma aḅịḅị gbaịn, ọ́ mịẹarị iḅi aị ḅụ.

¹⁶ Ọmịnị ọmịna sịḅị atomi ḅara ọ́ nwẹn kẹ angaa; kụma anị sime-ḅara, sime-ḅara sọ, ọ́ ḍụkụ tẹ ọmịnị ọmịna sịḅị atomi nwẹn ḅẹẹ ye mẹ ḅo si ḅọị ye sọma, kụma ọmịnị Tamụnọ omoni ḅara ọ́ nwẹn kẹ ḍumo kọn.

¹⁷ Ọ́ ḅẹḅọ-ḅẹḅọ mangịmaa, ọmịnị ọmịna ḅụụ sọ tẹ mininiarị apụ ma ḅẹlẹmaa, tẹ Tamụnọ mangịma tẹ Tomikiri daarị ḅọ ḅe mangịmaa.

Kịrayịsị Tọrụsiẹrị Mẹ Ḅẹ Elekima Mẹ

¹⁸ Ọmịnị Fịrịmẹnjị kịnị pịrịarị apụ ọ́ sịḅị-tuu ọmịna sịḅịdapụ ma pịrịị, tẹ ḅintẹ ḅara kẹ ịn mangịmaa, iḅi ḅara kẹ kịnị na mịẹ, tẹ ini sọ tomi ḅẹẹ ḅara kẹ ini ọkịarị apụ ma ngẹrị-a, kụma gadapụ-gadapụ ḅara kẹ kịnị na mịẹarị apụ ma sọ.

¹⁹ Tamụnọ miemẹ gotẹ ó boma ḅa, ọ́ nwẹnị ọ́ daa na-iḅi-a tọrụsiẹrị mẹ ḅẹ akụ mẹ inema alamarị ḅẹḅẹ, anie ọ́ Tamụnọ ḅiiarị ye mẹ nimi wararị ẹrẹsị.

²⁰ Ọmịnị ọ́ mịẹ siye ḅẹ fomuye daarị kụma tọ tokini ḅịḅị sime ọ́ pịrị? Kụma ọmịnị ọ́ mịẹ kuraye ḅụ ḅẹ tọrụsiẹrị ẹrịarị ḅẹḅẹ, Tamụnọ anị gotẹ ó boma ḅa.

²¹ Miemẹ mie Tamụnọ gotẹ ọ́ sịn yee, kẹ gotẹ ọkọ ḍukoarị, Kịrayịsị ḅioju sọ ó gotẹ tọrụsiẹrịm, tẹ ò ḍikima mịẹ ḅẹ elekima koroma-so ọ́ pịrị tẹ, mịẹtẹ ọmịnị ori amẹnjị-aḅụọ ma ḍiki-mẹnjị ḅẹ ḅara.

²² Ori ḅe ọ̀ gbọrụ si sọ mịẹ-a, gbọrụḅọ-sọ amụ pịkị ọ̀ ḅịḅị-ḅio paka-ḅo iruo ẹkwẹn sọ naa-a.

²³ Ini ọ̀ gọlị sakị, ọ̀ gọlị kẹ pakịrị-a; ọ̀ tọrụsiẹrị sakị ọ̀ kịnị ẹrẹma-a, kụma ori ò ḅiokpọ kẹ Tamụnọ ḅụụ gbanam, anie Karakara mịẹ Ḅẹrẹkọnḅọ ḅe.

²⁴ Kịrayịsị ḅarana ori oju ḅio wamịna asi ma dogi tẹ kẹ ẹngbẹsẹ-sịn mẹ mum, mịẹtẹ wa fịị si pịrị tẹ ḍumo karakara mịẹ pịrị ḅẹm. Ori oju kiri mẹ ḅẹ ịnọ ma ḅụ mie wa ḅọrọ tẹ gwọ ye.

²⁵ Etela iri-faa tẹ anana anie ọ́ kịka yee, kụma mịọkụ Tamụnọ ọ́ kẹ pịkị ọmịna atẹmẹ Ḍikiḍikiḅọ, pịkị Kokoḅọ ḅe ḍukamẹnjị ḅẹ ḅo tẹẹ.