1 Pita 1 - FỊAFỊA BAỊBỤLỤ

¹ Pita, Jizọsị Kịrayịsị fịrịmẹnjịḅọ ḅe ḅara ḅo ḍiri: Tamụnọ sẹlẹ-ọkị tẹ atomi ma tẹ Pọnịtịyọsị na, Galesiya na, Kapadosiya na, Esiya na, Bitiniya na ibe ma ḅụ gala-gala tẹ angarị apụ ma pịrị ye mẹ.

² Tamụnọ Ḍaḅọ ḅe wẹrịtẹ ye tọn ḅara ḅụ ori ọ́ sẹlẹ-ọkị tẹ ọ́ kẹ fịafịa atomi mịẹm, ọ̀ Tẹmẹ ḅe ḅụ, tẹ ó Jizọsị Kịrayịsị ḅịḅị poki tẹ ori ọmbie mẹ ọmịnị asana fịafịama ḅẹ ḅara. Yee ḍiki-ḅụụjịrị na, dein na, ḅintẹ ḅara kẹ ọmịna nye sọ.

Ḍumo Wararị Ḅiokpọmaye

³ Ó yee wa ịmịẹtẹ kẹ Tamụnọ pịkị wa Nyanaḅọ Jizọsị Kịrayịsị Ḍa ḅe ḅẹẹ! Ori opu ọkụrụkụrụ mẹ ẹrẹsị ori ịwọ ḍumo kẹ wa pịrịm, fịị ḅụ Jizọsị Kịrayịsị saakịma ḅụ. Miemẹ ḍumo wararị ḅiokpọmaye kẹ wamịna ḅụụ ḅio ḅinmam,

⁴ anie ḅụ, wa tọrụ kẹ Tamụnọ kẹ ori atomi wẹrịma wararị opu aboma ma nyana ḅẹ ḅara ḍikiarị. Ori arị kẹ So-ḅio ọ́ wẹrịma wararị, anịanga ḅụ arị ḅụrụ ḅịa, sii ḅịa, pịkị ḍisi ḅịa.

⁵ Arị sime ọ́ pịrịm, ọmịnị minini ḅụ Tamụnọ kụrọ mẹ wẹrị kpaịnma ḅọrọma pịrị wararị apụ ma, anie Tamụnọ tẹlẹma wẹrị wararị tẹ kunoma sakị mẹ ḅụ ọ̀ mịẹfinji ḅarịye mẹ.

⁶ Ó miemẹ gotẹ ḅioḅẹlẹẹ, karakaraye mịọkụ ọ́ daarị kịrị-kịrị adaa-ḍiki ma ẹrẹsị ọ́ kẹlẹ kẹ kururu na-iḅim ḅẹsọ.

⁷ Ọ́ karakara minini nyana na nyana-a na, mie in nimi ḅẹ tẹ ọ́ daaḍikiarị. Golu tẹ inetẹ gulugulu fa ḅarịye mẹ sọ, ịn fịnị kẹ anị daaḍikiarị tẹ ọmịna minini mẹ, tẹ yela kpọma golu nẹngị ye mẹ rẹ mie ịn daaḍiki tẹ nimi ḅẹ ye anị ene la ḅarị ḅoto. Anị ọkọ paka tẹ ḅẹḅẹ, ó tokini na, ebube na, kụn na nyana ḅa, Jizọsị Kịrayịsị amịna ḅụụ ḍie-pakama ḅarị Ene mẹ ḅụ.

⁸ Jen sakị amụ ọmịnị ori ẹrị-a sọ, ọmịnị ọ̀ ḅẹlẹmarị; mịọkụ sọ ọ́ paa ori ẹrị-a sọ, ọ́ paa ọ̀ ḅụụ ḅụ minini nyanarị. Mie ḅụ ọ́ nwẹnị opu ebube nyana wararị ḅioḅẹlẹ, tẹ tomina ẹkwẹn-ḅịḅị inetẹ ḍuko ḅịa ye nyanarị,

⁹ tẹ anị gotẹ ọkọ mịẹ ye, ọmịna atẹmẹ ma ḅọrọma nyana tẹ, anie mie ọ́ pịkị gotẹ ọ̀ ḅụụ minini nyanarị ye mẹ.

¹⁰ Mị ḅọrọma mẹ gboloma ye mie ịkịankoroapụ ma kpọma anị ḅio ḍọkị-nimi ḅẹ tẹ pịkị sọkịrị ye, tẹ ịn nwẹnị ḍuko mịnẹ mị ḍiepịrịye mẹ ọmịnị mie Tamụnọ kẹ pịrị ḅarịye.

¹¹ Ịn pịkị ḍọkị-nimi ḅẹm, sakị mẹ na, anị ḅo ḅẹ ḅara na. Mị sakị mẹ mie Kịrayịsị Tẹmẹ ḅe tẹ ịna ḅụụ ḅio sime ḅọ ḅe ḅara kẹ tọkịma sime ye, tẹ ịn nwẹnị Kịrayịsị ye-inema alama ḅụ ẹrị ḅẹ atọrụsiẹrị ma na arị ḍuka ma-ḅo ḅarị ebube mẹ na ḅẹ ịkịan kuro.

¹² Tamụnọ mịẹfinji mịna ịkịankoroapụ ma pịrịm, mịnẹ ịna kọrịnama mẹ ḅẹ iḅi ini fị ḅịa, kụma ọmịnị, anie ini arị aị ma gboloma ye, tẹ Fịafịa Tẹmẹ ḅe So-ḅio ḅo kụrọ ḅụ Iḅi Oku mẹ ḅẹ oku-mẹnjịapụ ḍuko wasama ye mẹ ḍuko sakị mẹ. Mịna aị ma enjẹlị apụ sọ nimi ḅẹ ḍọkịm.

Ḅo Fịafịa Ḍumo Kọn Ḅẹ Sịn-ḅịḅị

¹³ Ọkọẹrẹsị, ó ḅioḅẹngbọ mẹmgba karakarama tẹ kẹ ọ́ mịẹ ḅẹ ye mẹ pịrị. Ọ́ karakara sime tẹ gbọrsịḅị ọmịna ḅiokpọ mẹmgba kẹ Kịrayịsị amịna ḅụụ ḍie-pakama ḅarị sakị mẹ ḅụ ịn kẹ ọ́ pịrị ḅarị boma mẹ ọgọnọ gbanaa.

¹⁴ Ọ́ Tamụnọ ḅịḅị pokii, tẹ ọ́ ḍụkụ tẹ amụ ó gberie-sọ nimi-a sakị ḅụ ḅẹrẹtọn ọmịna ḍumo pịrị, pịrị akuroma ma ọ́ da-mu arị tọn ḅara wẹrịma.

¹⁵ Anie nakara, ọmịna mịẹye mẹmgba ḅụ ọ́ fịafịa, anie ọ́ sịn ḅụụ pịrị Tamụnọ ḅe fịafịa ḅara mẹ.

¹⁶ Fịafịa Ḍiri mẹ mẹẹ, “À fịafịa wararị ẹrẹsị ọmịnị sọ fịafịa.”

¹⁷ Ọ́ Tamụnọ tẹkẹarị sakị ọ́ Ḍa kẹ ọ̀ sịn-arị, ori anie gbọrụ ḅara kẹ kịnị mamgba kọrịnama kọn-arị ḅọ ḅe, ọrụḅọ-ọrụḅọ mịẹ ye sime-ḅara ḅụ; ọkọẹrẹsị, ọmịna aḍumo ḅụ kirikọn wararị sakị mẹ, mị tomikiri mẹ ḅụ, ọ́ kẹ ọ̀ kụn.

¹⁸ Kẹ gotẹ ọkọ ḍukoarị, ọ̀ gbẹẹ tẹ ọmịna atẹngịapụ ma da-saḅama ọ́ pịrị papaa ḍumo mẹ ḅẹ omoni mẹ ḅio ọ́ pakama-ḅo ye ḍụḅa la ḅara ó nimim. Anie mẹ golu na, seleḅa na gulugulu ḅara kẹ gulugulu ḅẹ ye-a;

¹⁹ aniemẹ anie yela agba tẹ Kịrayịsị mịẹ ye mẹ, anie ḅẹkụ ḅụụ ḅụ ofori anana tụḅọ kẹ mịẹ agba ọkụ.

²⁰ Tamụnọ ọ̀ sẹlẹ koroma wẹrịm tomikiri mẹ amụ tẹmẹ-a ogbo, tẹ ó gotẹ ori ọ̀ pakama-ḅo tẹ mịna kunoma ene ma ḅụ.

²¹ Ọ̀ ḅụụ mie ọ́ ḅọrọ tẹ Tamụnọ minini ye, anie fịị ḅụ ọ̀ saakịma tẹ ebube kẹ ọ̀ pịrị ḅọ ḅe; anie ḅụ, ọmịna minini na ḅiokpọ na Tamụnọ ḅụ sọ ḍiḅi wararị.

²² Mịọkụ ọ́ karakara mẹ minini tẹ anị ḅẹẹ ḅara mịẹarị ye ḅụ, tẹ ọmịna aḅụụ mamgba sịkịrị fịafịa tẹ mẹ, tẹ ḅo aka ofori ḅẹlẹma nyana ọmịnị na sọ tẹ Kịrayịsị minini apụ ma pịrị tẹ ḅara, ọ́ tẹmẹ-la ḅara kẹ jụmọ-jụmọ ḅẹlẹma, ọmịna ḅioḅẹngbọ mẹmgba ḅụ.

²³ Kẹ gotẹ ọkọ ḍukoarị, ḍumo wararị tẹ pịkị sime gbamaso Tamụnọ ḅe ẹkwẹn mẹ ḅụ ọ́ ḅọrọ tẹ sin iyi tẹ, ḅo gbọrụ ḍaḅọ awọmẹ sọ tẹ, anie fịị fịị-a tẹ sime gbamaso ḅọ ḅe.

²⁴ Anie Fịafịa Ḍiri mẹ ḍuko ḅara, “Tomi mamgba osuka na kịkarị, tẹ ịna ebube mẹmgba fịlawa amẹẹ kịkarị. Osuka mẹ kpatụarị, fịlawa mẹ siin-sararị,

²⁵ kụma KỊNỊNYANAḄỌ ḅe ẹkwẹn mẹ sime mu ḅẹẹ-sakị ḅẹẹ-sakị laarị.” Mị ẹkwẹn mẹ anie Iḅi Oku mẹ tẹ in ḍuko pakama ọ́ pịrị ye mẹ.