1 Paka-aị 22 - FỊAFỊA BAỊBỤLỤ

¹ Anịtẹso Devidi nwẹnị ḅẹẹ, “Mịanga ḅụ mie KỊNỊNYANA-TAMỤNỌ ḅe warị mẹ sime ḅarịye, anịsakị mịanga sime Izirẹlị dọkịma-agba mịẹ anga pịrị ḅa.”

Tamụnọ-warị Mẹ Nama Gotẹ Devidi Tẹlẹma Ḅụụ

² Devidi tọnm ini igoniapụ tẹ Izirẹlị ḅio sime apụ kobiri gboloma, tẹ ọ̀ nwẹnị ḍụḅarị pẹlẹapụ tọn ịn tẹlẹma tẹ aḍụḅarị ma tẹlẹma kẹ Tamụnọ warị mẹ nama pịrị.

³ Devidi kẹ ngbọ tẹmẹ tẹ kẹ ogigo-aḅọkọ ma ḅakụ, kẹ warị ọlọ kụrọma ḅẹ sụntẹ ikulele mịẹ ḅẹ iku tọn nimi ọkụ ofori gburo-gburotẹ ḅara kẹ ja ikulele na ojo-ikulele na koko ḅẹ opu ye koko awarị sọ namam,

⁴ na kịẹnkịẹn-ọkụ-ofori ḅẹ ịn kẹ sida sịn-arị opu sịn-aḅiri na; Sayịdọnị ḅẹ apụ na Taya ḅẹ apụ na arị ọkị-ḅo Devidi pịrịm.

⁵ Gbala Devidi ḅẹẹm, “Ì owiḅọtụḅọ Sọlọmọnị ḅe ori asambịrịma wararị, tẹ ọ̀ sịḅịḅio-kuḅua, anịsakị warị mẹ tẹ nama kẹ KỊNỊNYANAḄỌ ḅe pịrị ḅarịye mẹ iḅi ḅụra nyanam, tẹ ama mamgba ikelema-koro ḅụ ereso tẹ ebube nyana ḅa; ọkọẹrẹsị à tẹlẹma anị pịrị ḅa.” Anieḅụ Devidi gburo-gburo ḅara kẹ warị nama aị kobiri tẹrẹmẹ ọ̀ fịịm.

⁶ Anịtẹso ọ̀ nwẹnị ori owiḅọtụḅọ Sọlọmọnị sịn, tẹ tọn ọ̀ pịrị ọ̀ warị nama kẹ KỊNỊNYANAḄỌ, Izirẹlịapụ tẹkẹarị Tamụnọ ḅe pịrị.

⁷ Devidi Sọlọmọnị ḅẹẹm, “Ị̀ tụḅọ, warị nama kẹ KỊNỊNYANAḄỌ ị̀ Tamụnọ ḅe ẹrẹ mẹ pịrị mẹ í ḅioḅẹngbọ ḅụ simem.

⁸ Kụma KỊNỊNYANAḄỌ ḅe ị̀ ḅẹẹm, ‘Ị́ tọnwa opu ọmụ gbin tẹ ọmbie ọsụma lama tẹẹ; ị́ ḅarị warị nama tẹ kẹ ị̀ ẹrẹ go ḅịa, kẹ gotẹ ọkọ ḅẹẹarị, ị̀ tọrọkọ tomikiri mẹ ḅụ ị́ ọmbie ọsụma sara lama tẹẹ.

⁹ Kụma ị́ gbọrụ owiḅọtụḅọ iyi ḅa. Ò dein tomḅọ sọ ḅa, tẹ ori na fịya-a apụ mamgba ikelema-koro ḅụ à dein kẹ ọ̀ pịrị ḅa; ịn kẹ ọ̀ sịn ḅarị ẹrẹ Sọlọmọnị, anịsakị à dein na gbene na kẹ ori ene ma ḅụ Izirẹlị pịrị ḅa.

¹⁰ Ọ̀ gbọrụ warị nama tẹ kẹ ị̀ ẹrẹ go ḅa. Ori ị̀ tụḅọ sọ ḅa tẹ yẹrị ọ̀ ḍa sọ ḅa, anịsakị àrị ori ama-da emine mẹ mịẹ pakama gbamaso ḅa Izirẹlị ḅụ.’ ”

¹¹ “Ị̀ tụḅọ, KỊNỊNYANAḄỌ ḅe mịọkụ ị́ na simee, mịẹ tẹ ị́ KỊNỊNYANAḄỌ ị́ Tamụnọ ḅe warị mẹ nama ḅẹ ḅara, ọ̀ wẹrịtẹ í gboloma ye ḍuko ḅara ḅụ.

¹² Yee KỊNỊNYANAḄỌ ḅe ḅarana ye tọn-pẹlẹ kuroma na, ye fie ye naa na kẹ ị́ pịrị, mịẹ tẹ ori Izirẹlị kẹ ị́ pịrị da sakị ị́ KỊNỊNYANAḄỌ ị́ Tamụnọ ḅe oloko koko ḅẹ ḅara.

¹³ Anịtẹrẹmẹ mie ị́ lolo ḅarịye, ị́ ị́ ḅụụ ẹbị tẹ kẹẹ wararị oloko ma na, kụrọ Mozizi ḅara sime sakị KỊNỊNYANAḄỌ tọn Izirẹlị pịrị aị ma na kẹ elekima sụa-sụa. Kụrọ sịẹsimee, tẹ iḅi ḅiokpọ nyana-a. Ḅalafa ma; ḅụụ-tukutuku ma.

¹⁴ À ḅụụ kọsị lama tẹ KỊNỊNYANAḄỌ ḅe warị mẹ nama gotẹ golu kpo-kpo puku ẹndẹ, inia si oyi tẹra puku finji na puku jeia si na, seleḅa pakịrị-pakịrị puku ẹndẹ, inia si oyi tẹra puku finji na puku jeia asi ḅẹ oyia akiri na, iku tọn nimi ọkụ ofori ḅara ḅẹ gburo-gburotẹ ojo na, ja ikulele na à nwẹn kobiri koroma tẹẹ; opu asịn aḅiri na ḍụḅarị na sọ à kobiri koroma tẹ. Ị́ jaị kẹ mịna aị ma ḅụ sụa nyanam.

¹⁵ Ị́ tọnwa kọrịnama-kọrịapụ nyana wararị: ḍụḅarị pẹlẹ apụ na, ḍụḅarị kẹ warị nama apụ na, akanịapụ na, kịẹnkịẹn-ọkụ-ofori apụ tẹ ḅara akọrịnama mamgba ḍịn apụ na,

¹⁶ golu na, seleḅa na, ojo na, ikulele na kẹ kọrịnama kọrị ḍin apụ emii. Saakị tẹ saakị kọrịị! KỊNỊNYANAḄỌ ḅe ị́ na simee!”

¹⁷ Devidi pịkị tọn Izirẹlị ḅẹ tọrọkọ tarị apụ mamgba pịrịm ịn ḅarasụa ori owiḅọtụḅọ Sọlọmọnị pịrịị, tẹ ḅẹẹm,

¹⁸ “Ọmịna KỊNỊNYANA-TAMỤNỌ ḅe ori ọmịnị na ofori mọ? Anga-anga ḅụ amụ ò dein kẹ ọ́ pịrị-a? Kẹ gotẹ ọkọ ḅẹẹarị, ori ama mẹ nyana tẹ anga sime apụ ma kẹ ḅo ị̀ ḅara-ḅio su tẹẹ; tẹ ama mẹ ḅo KỊNỊNYANAḄỌ ḅe na, ori atomi na suku-ḅio sime tẹẹ.

¹⁹ Mịọkụ ọmịnị ọmịna kuroma na, ḅioḅẹngbọ na kẹ KỊNỊNYANAḄỌ ọmịna Tamụnọ ḅe ḍọkị ọgọnọ gbanaa. Ọ́ saakị tẹ KỊNỊNYANA-TAMỤNỌ ḅe fịafịa ye-yọ mẹ namaa, mịẹ tẹ KỊNỊNYANAḄỌ ḅe Ọḅọkụ-Igbe mẹ na, Tamụnọ fịafịa ẹfẹrẹ ma na ḅo nama KỊNỊNYANAḄỌ ḅe ẹrẹ pịrị gbọrụ warị-ḅio mẹ sọ ḅẹ ḅara.”