1 Paka-aị 21 - FỊAFỊA BAỊBỤLỤ

Devidi Tọn Tẹ In Tomi Ma Kịẹnm

¹ Ekwesu saakị tẹ Izirẹlị si anga ḅụ sịẹm tẹ Devidi toluma tẹ ori Izirẹlị ḅụ simearị atomi kịẹnm.

² Anieḅụ Devidi Johabụ na, ọmụ-ogbo mẹ ḅẹ ḅẹrẹtọn-apụ ma na ḅẹẹm, “Ó muu, tẹ Izirẹlị kịẹn, Biyasẹba ḅụ ọkị mu Danị la, tẹ ḅo anị pakaye ḍuko ị̀ pịrịị, mịẹ tẹ àrị ịna kịẹn-ḅịḅị nimi ḅẹ ḅara.”

³ Johabụ nwẹnị pakịrị, “Yee KỊNỊNYANAḄỌ ḅe in la ḅara mẹ ḅẹ kiri sonioa si kẹ ịna kịẹn-ḅịḅị ḅụ sụa! Ị̀ nyana amadaḅọ, ini ọkọ la kụma, inimgba ị̀ nyanaḅọ ḅe afịrịmẹnjịapụ-a mọ? Ị̀ nyanaḅọ ḅe nwẹnị tiegotẹ miemẹ ḅiiarị? Ò tiegotẹ mịẹ gbẹẹ-a ye kẹ ḅo Izirẹlị ọgọnọ gbanarị?”

⁴ Kụma amadaḅọ ḅe ẹkwẹn-ḅịḅị Johabụ nẹngịmam. Anieḅụ Johabụ so tẹ bebe Izirẹlị mẹmgba mẹnjị tolu, tẹ pịkị Jeruselemu ḅom.

⁵ Johabụ nwẹnị tomi ma kịẹn-ḅịḅị mẹ kịẹn gboloma tẹ anị pakaye kẹ Devidi pịrị. Inimgba ḅụ Izirẹlị ḅụ inetẹ owu-sọ ḅarị apụ kịnị tẹra puku ofori, puku sọnọma si, oyia ẹndẹ finji (1,100,000); na kịnị maa puku ofori puku tesi, jeia ẹndẹ finji (470,000) na Juda ḅụ.

⁶ Kụma kịnị kịẹn mẹ ḅụ Livayị na, Benijamịnị na ori ịn kịẹn sụa-a, anị gotẹ ọkọ mịẹ ye, amadaḅọ ḅe tọn ye mẹ Johabụ ḅụụ-ḅẹlẹ-a ẹrẹsị.

⁷ Kụma miemẹ Tamụnọ ḅụụ-ḅẹlẹ-a tẹ ori Izirẹlị fomum.

⁸ Devidi nwẹnị Tamụnọ ḅẹẹ, “À gburo-gburotẹ ḅara kẹ si mịẹm anie à miemẹ mịẹ tẹ mẹ ḅụ. Kụma mịọkụ arị ị́ tẹkẹm, ị́ fịrịmẹnjịḅọ ḅe mịẹ-irima mẹ saakị siin; kẹ gotẹ ọkọ ḅẹẹarị, à kpọma oḅori ḅara kẹ ye mịẹ tẹ.”

⁹ Anịtẹso KỊNỊNYANAḄỌ ḅe nwẹnị ẹkwẹn kẹ Devidi so-ḅịrịḅọ Gadi pịrị, tẹ ḅẹẹm,

¹⁰ “Mu Devidi ḅẹẹ, ‘Mie KỊNỊNYANAḄỌ ḅe ḍuko yee, ye ḅụ ḅẹ tẹrẹị à nwẹn kẹ ị́ pịrịarị; arị ḅụ gberie sẹlẹ-ọkị, mịẹ tẹ arị anị kẹ ị́ mịẹ ḅẹ ḅara.’ ”

¹¹ Anieḅụ Gadi Devidi ḍọkụma-ḅom tẹ nwẹnị ọ̀ ḅẹẹ mie KỊNỊNYANAḄỌ ḅe ḍuko yee, “Ị́ ḅụụ-ḅẹlẹ ye sẹlẹ-ọkị:

¹² tẹra kụra ḅuru-ḅa, anịanịa iḅi kẹ ị́ tọn apụ tẹra akalụ kẹ ị́ ḅaa guluguluma, ị́ na fịya-a apụ okologie kẹ ị́ tọrụ ḅalaḅalamarị ogbo; anieofori-ofori, KỊNỊNYANAḄỌ ḅe okologie tẹra aḍin ḅụ so-ọmụ kẹ ama mẹ kuro ḅa, anịsakị KỊNỊNYANAḄỌ ḅe enjẹlị bebe Izirẹlị ye-yọ mẹmgba ḅụ kịnị ḅaa ḅẹ? Mịọkụ à kẹ pịkịma mu ḍuko ị̀ fịrịmaḅọ ḅe pịrị ḅarịye kẹ ḅiokoromatẹ ḍuko ị̀ pịrị.”

¹³ Devidi nwẹnị Gadi ḅẹẹ, “À gburo-gburotẹ ḅụụ-ḅalaḅala ḅụ emi; yee à ḅịkị KỊNỊNYANAḄỌ ḅe ḅara-ḅio sọ, kẹ gotẹ ọkọ ḅẹẹarị, ori ọkụrụkụrụ gburo-gburo lamam ẹrẹsị; kụma yee à ḅịkị tomḅọ ḅara-ḅio sọ ma.”

¹⁴ Anieḅụ KỊNỊNYANAḄỌ so-ọmụ kẹ Izirẹlị fịrịmam; tẹ Izirẹlị ḅẹ kịnị nine apuku, jei ẹndẹ finji (70,000) fịịm.

¹⁵ Tamụnọ nwẹnị enjẹlị ḅe kẹ Jeruselemu fịrịma ò mu anị fama; kụma ori anị fama ḅẹ mịẹarị ogbo, KỊNỊNYANAḄỌ ḅe nwẹnị ẹrị, tẹ ọ̀ tọn siye mẹ ḅụ pịkị; tẹ ọ̀ nwẹnị kịnị-ḅa enjẹlị ḅe ḅẹẹ, “Iḅi tẹẹ! Mịọkụ ị́ ḅara ọlọ-sịẹmaa.” Anịsakị KỊNỊNYANAḄỌ ḅe enjẹlị ḅe Ọnanị, Jebusayịtị ḅọ ḅe mgbọlụ-sẹlẹ-kiri ḅụ sịẹsime wararị.

¹⁶ Devidi ọ̀ tọrụ saakị tẹ ori atọrụngbọ kẹ KỊNỊNYANAḄỌ ḅe enjẹlị ḅe ẹrịm so na kiri na ogboku sịẹsime wararị, tẹ ọ̀ ḅara-ḅio ḅụ okologie nụnụ tẹ anị sụn-pakama Jeruselemu da wararị. Anịtẹso Devidi na omongiapụ ma na akpa kẹ kapa gbin sụa wararị tẹ nwẹnị ịna atọrụ-kuḅu kẹ ḅịkị koro.

¹⁷ Tẹ Devidi nwẹnị Tamụnọ ḅẹẹ, “Tọn ịn pịrị tẹ ịn tomi ma kịẹn ḅọ yẹrị-yaa mọ? Yẹrị mie si-sịḅịḅịo mẹ sụa lama tẹ si mịẹ ḅọọ. Kụma mịna anana ma nwẹnị tiye mịẹ? Yei KỊNỊNYANAḄỌ, ị̀ Tamụnọ, arị ị́ tẹkẹm, yee ị́ ḅara mẹ yẹrị na, ị̀ ḍa warị mẹ na ọgọnọ gbana; yee fomu-ḅara mẹ ị́ atomi ma ọgọnọ gbana ma.”

Devidi Agbamịẹ-Anga Nama KỊNỊNYANAḄỌ Ḅe Pịrịm

¹⁸ Anịtẹso KỊNỊNYANAḄỌ ḅe enjẹlị ḅe nwẹnị tọn Gadi pịrị ò Devidi ḅẹẹ mịnẹ ò mu Ọnanị, Jebusayịtị ḅọ ḅe mgbọlụ-sẹlẹ-kiri mẹ ḅụ agbamịẹ-anga nama KỊNỊNYANAḄỌ ḅe pịrị.

¹⁹ Anieḅụ Devidi nwẹnị Gadi KỊNỊNYANAḄỌ ḅe ẹrẹ ḅụ kọn ọ̀ pịrị ẹkwẹn-ḅịḅị ḅụ saakị mu.

²⁰ Mị sakị mẹ Ọnanị ịn kẹ witi sịn fịye mgbọlụ sẹlẹarị; ọ̀ nwẹnị tọrụ pịkị tẹ enjẹlị ḅe ẹrị, tẹ ori inia owiapụ-awọmẹ tẹ ori na simearị apụ nwẹnị ịna ḅụụ ḅọị.

²¹ Devidi Ọnanị ḍọkụma-ḅoarị ogbo, Ọnanị ḅe nwẹnị ḍiki tẹ Devidi ẹrị tẹ mgbọlụ-sẹlẹ-kiri mẹ ḅụ mẹnjị ọ̀ dama-mu, tẹ kụn kẹ Devidi pịrịm amịna tọrụkuḅu kẹ kiri-ḅio ḅịkị-koro ḅụ.

²² Devidi nwẹnị Ọnanị ḅẹẹ, “Mgbọlụ-sẹlẹ-kiri mẹ kẹ ị̀ pịrị mịẹ tẹ arị anị ḅụ agbamịẹ-anga nama KỊNỊNYANAḄỌ ḅe pịrị — anị la igbigi ḅịḅị ḅụ anị kẹ ị̀ pịrị — mịẹ tẹ fomu-ḅara mẹ tomi ma ḅụụ so ḅẹ ḅara.”

²³ Anịtẹso Ọnanị nwẹnị Devidi ḅẹẹ, “Anị ọkịị; tẹ yee ị̀ nyana amadaḅọ ḅe ò ḍikim iḅi tẹ ori anị kẹ mịẹ ḅẹ ye mịẹ; ḍikii, à dọkịma-agba gotẹ pootẹ-anambulo ma kẹ ị́ pịrịm, mgbọlụ-sẹlẹ-asịn ma fịnị mẹ sọọ, ịn kẹ witi sịn fịye mgbọlụ mẹ mgbọlụ agba mịẹ ye sọọ. Arịmgba à kẹ ị́ pịrịm.”

²⁴ Kụma Amadaḅọ Devidi nwẹnị Ọnanị ḅẹẹ, “Ẹn-ẹn, anị la igbigi ḅịḅị à nwẹn kẹ anị fẹ ḅa; à kẹ KỊNỊNYANAḄỌ ḅẹ pịrị gotẹ sime ị́ pịrị ye ọkị ḅịa, anịanịa à fẹ-a ye kẹ dọkịma-agba mịẹ.”

²⁵ Anieḅụ Devidi kiri mẹ gotẹ golu kpoo ẹndẹ oyia asi finji kẹ Ọnanị gbẹẹm.

²⁶ Devidi nwẹnị anịanga agbamịẹ-anga nama KỊNỊNYANAḄỌ ḅe pịrị tẹ dọkịma-agba na, dein-pịrị-agba na mịẹ ọ̀ pịrị, tẹ KỊNỊNYANAḄỌ ḅe sịn, tẹ ọ̀ nwẹnị ọ̀ pakịrị, So-ḅio fịnị kẹ dọkịma-agba mịẹ anga mẹ fịrịma ḅụ.

²⁷ Anịtẹso KỊNỊNYANAḄỌ ḅe tọn enjẹlị ḅe pịrịm tẹ ọ̀ nwẹnị ori okologie kẹ anị ḅẹ lubulu ḅio suu.

²⁸ Devidi KỊNỊNYANAḄỌ ḅe anị sakị ḅụ Ọnanị, Jebusayịtị ḅọ ḅe mgbọlụ-sẹlẹ-kiri ḅụ ọ̀ pakịrịm ẹrị tẹso, ọ̀ nwẹnị anịanga kẹ ori agba mịẹ anga sọma.

²⁹ Gbala KỊNỊNYANAḄỌ ḅe Ọḅọkụ-Igbe mẹ koko akpụrụ-warị mẹ tẹ ịkpa ḅio Mozizi pike ye mẹ na, dọkịma-agba mịẹ anga mẹ na anịsakị ḅụ Gibiyọnị ḅụ gele ye-yọ mẹ ḅụ emi ẹrẹsị;

³⁰ kụma Devidi KỊNỊNYANAḄỌ ḅe enjẹlị ḅe okologie mẹ ḍiki ḅalafaam gotẹ, ori inetẹ mu anị tọrọkọ Tamụnọ ḅịḅị ḅii-a.