1 Paka-aị 20 - FỊAFỊA BAỊBỤLỤ

Devidi Raba Ọkịm

¹ Kụra mẹ ḅio kala fẹngụ sakị (kụra ḅẹ tẹra akalụ ḅụ ọkị mu sonio akalụ la) amadapụ paka mu owu sọ-sọ sakị mẹ ḅụ, Johabụ nwẹnị ọmụ-ogbo mẹ na paka tẹ Amọnị ḅẹ apụ opu sịẹ mẹ gbaịn-koro tẹ anị ḅio sime aị sime-a, tẹ nwẹnị owu kẹ Raba paka ḅẹ tẹ anị ikelema-koro tẹ sime. Kụma Jeruselemu ḅụ mie Devidi sime ye. Johabụ nwẹnị Raba ḅaa fama tẹ anị fama.

² Devidi nwẹnị ịna amadaḅọ (Mịlịkọnị) sịḅị ḅụ ori ama-da sun mẹ siin ọkị, tẹ ḍọkị-ẹrị mịnẹ ịn kẹ anị mịẹ golu iku ataḅịla kala kurusu na gbasịm, anịsakị anị ḅio yelatẹ ḍụḅarị emi. In nwẹnị anị kẹ Devidi sure. Opu ama mẹ ḅio ọ̀ ḅẹlẹma gburo-gburo ḅara kẹ ye fọịn ḅom.

³ Ọ̀ nwẹnị tomi ma tẹ anị ḅio sime apụ ma ọkị-ḅo tẹ ịn kẹ fụkụ-fụkụma na, ikulele egbe-tongu na, kumbu na, kẹ kọrịnama kọrị apụ mịẹ; mị-ḅara mie Devidi kẹ Amọnị ḅẹ apụ opu ama mamgba mịẹ ḅara. Anịtẹrẹmẹ Devidi na tomi mamgba na pịkịma Jeruselemu ḅom.

Devidi Filisiteni Ḅẹ Nonji-atomi Ma Na Owu-Sọm

⁴ Miemẹ ḅọrọ tẹso, Filisiteniapụ ma pịkị ọmụ saakịm Geza ḅụ. Anịsakị ḅụ mie Sibekayi, Husa ḅẹ ḅọ ḅe ḍụḅa tomi nẹngị-nẹngịtẹ nonji-atomi ma ḅụụ paka-ḅo gbọrụḅọ Sipayị nwẹn-sịn ḅọ ḅaa yee, tẹ Filisiteniapụ ma sịḅị-tuum.

⁵ Filisiteniapụ ma na gbin ọmụ pịkị siin korom; tẹ Ẹlịhananị, Jayẹ owiḅọtụḅọ ḅe Lami, Golayatị Gati ḅị ḅọ ḅe iyimbere ḅe ḅaam; ọ̀ sụḅa pịkọ mẹ gbala ḅịtẹ ḍori apụ kẹ ḅịtẹ ḍoriarị ye mẹ ẹngbẹsẹ mẹ ọkụ.

⁶ Ọmụ pịkị siin Gati ḅụ korom, anị yọ mẹ tẹ ḍụḅa ḅụratẹ gbọrụ ḅara gbọrụ ḅara ḅụụ sonio aḅara-tụngbalị na, gbọrụ ḅụọ gbọrụ ḅụọ ḅụụ sonio aḅụọ-tụngbalị arịmgba si ini finji sụa gbọrụ Tomḅọ sime anga mẹ; oriḅe sọ ḍụḅa tomi nẹngị-nẹngịtẹ nonji-atomi ma ḅụụ paka-ḅom.

⁷ Ori Izirẹlị pilema tẹso, Devidi iyimbere Sime-a owiḅọtụḅọ Jonatanị ọ̀ ḅaam.

⁸ Mịna apụ ma Gati ḅụ ḍụḅa tomi nẹngị-nẹngịtẹ nonji-atomi ma ḅụụ ịn paka-ḅom; tẹ Devidi ḅara ḅụ na, ori afịrịmẹnjịapụ ma ḅara na ḅụ ịn ḅịkịm.