1 Paka-aị 19 - FỊAFỊA BAỊBỤLỤ

Devidi Amọnị Ḅe Apụ Na Siriya Ḅẹ Apụ Na Nẹngịmam

¹ Miemẹ ḅọrọtẹ so Amọnị ḅẹ apụ ma amadaḅọ Nahasi fịịm, tẹ ori owiḅọtụḅọ nwẹnị ò kiri ḅụ ama-da.

² Devidi nwẹnị ḅẹẹ, “Àrị iḅi ḅara kẹ Nahasi owiḅọtụḅọ Hanunu ḅe na sime ḅa, kẹ gotẹ ọkọ ḅẹẹarị, ọ̀ ḍa ị̀nịna iḅiọkụ simem ẹrẹsị.” Anieḅụ Devidi nwẹnị fịrịmẹnjịapụ fịrịma mu ọ̀ ḍa ḅe gbolomaye ḅụ ḅiokpọma ẹkwẹn kọn ọ̀ pịrị ḅẹ mu. Devidi afịrịmẹnjịapụ nwẹnị Amọnị ḅẹ apụ ma ama ḅio Hanunu ḅiokpọma ḅẹ ḅo.

³ Kụma Amọnị ḅẹ sịḅịdapụ ma nwẹnị Hanụnụ ḅẹẹ, “Í ḅiotọn mịnẹ Devidi kẹ ị́ ḍa pịrịarị kụn mie ọ̀ kẹ fịrịma ḅo í ḅiokpọma ḅẹ ḅo ye? Ori afịrịmẹnjịapụ ma ịn ḅo ama mẹ sime-ḅara ḍọkị-nimi tẹ anị fama ḅẹ ḅara kẹ ḅo anị ḍiki ḅẹ ḅo-a.”

⁴ Anieḅụ Hanunu nwẹnị Devidi afịrịmẹnjịapụ ma ọkị tẹ ịna mpọrị sẹịn siin, tẹ ịna konju ḅiri ḅụ ịna opu akapa ma ogboku kịrị fongolo siin, tẹ ịn fịrịma pịkị; tẹ in som.

⁵ In fịrịmẹnjịapụ ma ḅụụ paka ye mẹ ḍuko Devidi pịrị tẹso, ọ̀ nwẹnị kịnị fịrịma mu ini na bịama, gbala ịn gburo-gburo ḅara kẹ Ḅụụ-jịrịarị ẹrẹsị, amadaḅọ ḅe nwẹnị ḅẹẹ, “Ó Jeriko ḅụ sime nwenii tẹ ọmịna mpọrị ma paka-ḅo ḍụḅa tẹ, tẹrẹmẹ ọ́ pịkịma-ḅo.”

⁶ Amọnị ḅẹ apụ ma ḅo ịna ḅụụ kẹ Devidi na fịya-a apụ sọma tẹ mẹ ẹrị tẹso, Hanunu na, Amọnị ḅẹ apụ ma na nwẹnị seleḅa puku jeia si, tesi finji na pakịrị jeia puku na (3,000,000) anie (1,000) kẹ mu Mẹsopotemịya na, Aramụ-maka na, Zoba na ḅụ kirimẹnjị-ọmụarụ na, asụ-dọkụ-ọmụapụ na ọkọ

⁷ Ini kirimẹnjị-ọmụarụ inia puku (32,000) na, Mahaka ḅẹ amadaḅọ na ori ọmụ-ogbo na ọkọm, oriḅe tẹ ḅo Medeba tọrọkọ ḅụ akpụrụ-warị pike tẹ sime ḅọ ḅe. Amọnị ḅẹ apụ ma nwẹnị ịna opu ama ma ḅio ḅẹlẹma paka-ḅo owu-sọ ḅẹ ḅo.

⁸ Devidi anị naa tẹso, ọ̀ nwẹnị Johabụ na, opu atomi mamgba ọmụ-ogbo mẹ fịrịma pakama.

⁹ Amọnị ḅẹ apụ ma nwẹnị ịna opu ama mẹ ḅio paka-ḅo tẹ mẹnjị ama mẹ sọ-muarị anga mẹ ḅụ sime tẹ ḅụụ Tẹlẹma kẹ owu mẹ pịrị, anịsakị ḅo wararị amadapụ ma nwẹnị amịna ḅụụ ḅelema tẹ finjima wararị ye-yọ ḅụ sime.

¹⁰ Johabụ ẹrịm mịnẹ ọḅụ-na-kuḅu-na ḅụ owu mẹ tẹlẹma ọ̀ pịrị wararị ye ḅụ, ọ̀ nwẹnị Izirẹlịapụ ma ḅụụ ḅiri-ḅiri ḅụ sẹlẹ-ọkị apụ ma ḅụụ ja apụ sẹlẹ-ọkị, tẹ ịn kẹ ọrụtọn koroma Siriya ḅẹ apụ ma ẹbị;

¹¹ ọ̀ nwẹnị ori atomi ma ḅụ kirikọn-apụ ma kẹ ori iyimbere Abisahị suku-ḅio koroma tẹ ini nwẹnị tẹlẹma kẹ Amọnị ḅẹ apụ ma pịrị.

¹² Ọ̀ nwẹnị ḅẹẹ, “Siriya ḅẹ apụ ma ị̀ ḅụụ kụrọ ḅaka ḅaka, anịrẹ í ḅo ḅarasụa ị̀ pịrị ḅa; kụma Amọnị ḅẹ apụ ma ị́ ḅụụ kụrọ ḅaka ḅaka, anịrẹ à ḅo ḅarasụa ị́ pịrị ḅa.

¹³ Iḅi ḅiokpọ nyana, yee wa owiapụ ḅara kẹ ye mịẹ kẹ wamịna atomi na, wamịna Tamụnọ ḅe opu ama ma na pịrị; anịsakị yee KỊNỊNYANAḄỌ ḅe ọ̀ ḅụụ anị iḅi ḅara ḍiki tẹ mịẹ.”

¹⁴ Anieḅụ Johabụ na ori na sime apụ na nwẹnị owu mẹ kẹ Siriya ḅẹ apụ ma tọrọkọ sọma ịn kpeki; tẹ ịn nwẹnị ọ̀ tọrọkọ ḅụ mangị.

¹⁵ Amọnị ḅẹ apụ ma Siriya ḅẹ apụ ma mangịarị ẹrị tẹso, ini nwẹnị pịkị Johabụ iyimbere Abisahị tọrọkọ ḅụ mangị, tẹ mu opu ama mẹ ḅio sọ Anịtẹso Johabụ nwẹnị Jeruselemu ḅo.

¹⁶ Kụma Siriya ḅẹ apụ ma Izirẹlị ịn nẹngịma tẹ ẹrị tẹso, ịn nwẹnị fịrịmẹnjịapụ kẹ Yuferetisi ọgọnọ-jụ ḅụ simearị Siriya ḅẹ apụ ma fịrịma pakama-ḅo Adadeza ọmụ-ogbo mẹ ḅẹ ḅẹrẹtọnḅọ Sobakị ịn kẹ sịḅị-dam.

¹⁷ Ini anị ḍuko Devidi pịrị tẹso, ọ̀ nwẹnị Izirẹlị mẹmgba kobiri ḅo gboloma, tẹ Jodanị mẹ saḅa-koro, tẹ ḅo ịn la, tẹ ori ọmụapụ kẹ in sime na-iḅi ḅara koroma ịn pịrịm. Tẹ Devidi owu mẹ kẹ tẹlẹma Siriya ḅẹ apụ ma pịrị fama tẹso, ịn nwẹnị ori na sọ.

¹⁸ Siriya ḅẹ apụ ma Izirẹlị tọrọkọ ḅụ mangịm; Devidi nwẹnị kirimẹnjị-ọmụarụ maa ẹndẹ oyia asi finji ofori ọmụ-arụ gbọrụ puku (7,000) dọkụ ḅarị apụ na, ḅụọ kẹ mẹnjị ọmụgbin apụ kịnị sọnọ apuku (40,000) na, Sobakị ịna ọmụ-ogbo ḅẹ ḅẹrẹtọnḅọ ḅe na sọ ḅaam Siriya ḅẹ ma ḅụụ ḅụ.

¹⁹ Adadeza afịrịmẹnjịapụ ma ẹrịm mịnẹ Izirẹlị in nẹngịma tẹ, ḅẹ ye ḅụ, ịn nwẹnị Devidi na dein ḅụ sime, tẹ ò suku-ḅio sime. Anieḅụ Siriya ḅẹ apụ ma ḅarị jen-maaịn kẹ ḅarasụa Amọnị ḅẹ apụ ma pịrị ḅẹ-ḅii-a.