1 Paka-aị 18 - FỊAFỊA BAỊBỤLỤ

Devidi Ọmụ Ḅụ Nyana Owu-ḅara-iḅi Ma

¹ Miemẹ ḅọrọ tẹso, Devidi Filisiteniapụ ma nẹngịma tẹ Gati na anị ḅe kala-ama ma na ọkịm Filisiteniapụ ma ḅara ḅụ tẹ kẹ ò suku-ḅio sunm.

² Ò Mohabụ nẹngịmam, tẹ Mohabụ ḅẹ apụ ma ḅo Devidi fịrịmẹnjịapụ sọ tẹ igbigi oso-oso ḅo ọ̀ pịrịm.

³ Devidi pịkị Adadeza, Zoba ḅẹ amadaḅọ nẹngịmam ori Hamatị la ḅẹ-muarị ogbo, ọ̀ gbala mu ọ̀ ḅẹrẹtọn mịẹ-pakama ḅẹ-muarị Yuferetisi tọrụ ḅụ.

⁴ Devidi ọ̀ ḅara ḅụ kirimẹnjị-ọmụarụ maa ẹndẹ oyia asi finji ofori kịnị puku (7,000) na, ḅụọ kẹ mẹnjị ọmụgbin-apụ kịnị maa puku, oyia ẹndẹ finji (20,000) na kun ọkịm; kụma Devidi kirimẹnjị-ọmụarụ ma dọkụ asụ mamgba aḅụọ pẹlẹ-pẹlẹ-siin tẹ ọmụ-arụ sọnọa si dọkụ na-iḅi asụ kọnmam.

⁵ Damasịkọsị ḅẹ, Siriya ḅẹ apụ fịrịmam ḅo ḅarasụa Adadeza, Zoba ḅẹ amadaḅọ pịrị ḅẹ apụ ḅụụ Devidi Siriya ḅẹ kịnị maa puku, jeia ẹndẹ finji (22,000) ḅaam.

⁶ Anịtẹso Devidi nwẹnị ọmụapụ itu-itu kẹ Damasịkọsị ḅẹ Siriya ḅụ koroma; Siriya ḅẹ apụ ma nwẹnị ḅọ Devidi fịrịmẹnjịapụ sọ tẹ igbigi oso so ḅo ọ̀ pịrịm. Devidi mu anga mu anga KỊNỊNYANAḄỌ ḅe owu-ḅara-iḅi kẹ ọ̀ pịrịm.

⁷ Devidi nwẹnị Adadeza fịrịmẹnjịapụ dogi golu-golu ekpeke ma ọkị tẹ arị kẹ Jeruselemu ḅo.

⁸ Adadeza opu ama Tibatị na, Kunu na ḅụ Devidi gburo-gburoma ojo-ikulele ọkịm; anị mie Sọlọmọnị kẹ ojo minji-sụaye mẹ, ḅeriaị ma na ojo ye-sụa-aị ma na mịẹ yee.

⁹ Tohi, Hamatị ḅẹ amadaḅọ Devidi, Adadeza, Zoba ḅẹ amadaḅọ ḅe bebe ọmụ-ogbo mẹ nẹngịma ye naa tẹso,

¹⁰ ọ̀ nwẹnị ori owiḅọtụḅọ Adoramụ kẹ Amadaḅọ Devidi fịrịma, ò ḅii-ḅịḅị kẹ ọ̀ pịrị, tẹ ò tokini ori Adadeza na owu-sọ tẹ ọ̀ nẹngịmam ẹrẹsị; gbala Adadeza tọnwa sakị kẹ Tohi na ọmụgbin tẹ ẹrẹsị. Ịn golu na, seleḅa na, ojo na kẹ mịẹ wararị tọrụ-kịrịkịrị aị kẹ ḍiepịrị-aị ḅụ ọ̀ fịrịmam.

¹¹ Mịna aị ma sọ Amadaḅọ Devidi kẹ seleḅa na golu na tẹ ọ̀ sịẹ-sịẹ mamgba, Idọmụ na, Mohabụ na, Amọnị na, Filisiteni na, Amalẹkị na ḅụ dogi-ḅo aị ma ḅụụ sụa mịẹ fịafịama KỊNỊNYANAḄỌ ḅe pịrịm.

¹² Egbele Zeruya owiḅọtụḅọ Abisahị ịn kẹ Fụn Tụndụ Ogboku sịn anga ḅụ Idọmụ ḅẹ kịnị maa puku sọnọ ẹndẹ finji (18,000) ḅaam.

¹³ Ọ̀ nwẹnị ọmụapụ itu-itu kẹ Idọmụ ḅụ koroma; tẹ Idọmụ ḅẹ apụ mamgba nwẹnị ḅo Devidi fịrịmẹnjịapụ sọ. Devidi mu anga mu anga KỊNỊNYANAḄỌ ḅe owu-ḅara-iḅi kẹ ọ̀ pịrịm.

¹⁴ Mị-ḅara mie Devidi kẹ Izirẹlị mẹmgba da ḅara; tẹ karakara ḅẹrẹkọn na tomi na iḅi ḅẹ ḅara na kẹ ori atomi mamgba na mịẹm.

¹⁵ Zeruya owiḅọtụḅọ Johabụ ọmụ-ogbo mẹ kẹ sịḅị-dam; Ayiludu owiḅọtụḅọ Jehosafatị anie ḍiri kokoḅọ;

¹⁶ Ayitubu owiḅọtụḅọ Zadọkụ na, Abịyata owiḅọtụḅọ Ayimẹlẹkị na anie agbamịẹapụ; Sẹraya anie ḍiri-kẹẹḅọ;

¹⁷ Jehohada owiḅọtụḅọ Bẹnaya Devidi ḅụụ-ḍikiḍikiapụ ịn kẹ Keretayịtị na Pẹlẹtayịtị apụ sịn apụ ma kẹ sịḅị-dam; anịsakị Devidi owiapụ-awọmẹ anie amadaḅọ ḅe warị-ḅio ḅẹ akọrịnama ma ḅẹ opu-apụ ma sịḅịdapụ.