1 Paka-aị 17 - FỊAFỊA BAỊBỤLỤ

Netanị Kẹ Ḅo Devidi Pịrị Oku-ḅịḅị

¹ Mị sakị mẹ Devidi ò warị ḅio angarị. Gbọrụ ene ḅụ,, Devidi nwẹnị Netanị ịkịankoroḅọ ḅe sịn ḅo tẹ ọ̀ ḅẹẹ, “Ḍikii, yẹrị ịn kẹẹ sida sịn-arị sịn warị ḅio angarị, kụma KỊNỊNYANAḄỌ ḅe Ọḅọkụ mẹ ḅẹ Ọḅọkụ Igbe mẹ akpụrụ suku-ḅio emi.”

² Netanị nwẹnị Devidi ḅẹẹ, “Í ḅioḅẹngbọ ḅụ sime ye goyegoye mịẹ, kẹ gotẹ ọkọ ḅẹẹarị, Tamụnọ ị́ na emii.”

³ Kụma anị gbọrụ ḍin mẹ ḅụ, KỊNỊNYANAḄỌ ḅe nwẹnị ḍuko Netanị pịrị,

⁴ “Mu ḍuko ị̀ fịrịmẹnjịḅọ Devidi pịrịị, mie KỊNỊNYANAḄỌ ḅe ḅẹẹ ḅara: ‘ị́yẹrị à sọ tẹ anga ḅẹ warị nama ị̀ pịrị ḅịa.

⁵ Kẹ gotẹ ọkọ ḅẹẹarị, Ijiputi ḅụ àrị Izirẹlị ḅọrọma pakama-ḅo ene kụra ḅio ḅo mịmgba la amụ à gbọrụ warị ḅio ḅụ sọ anga-a, kụma à gbọrụ anga ḅụ anga ḅọrọma mu jen anga anga tẹ, anie à gbọrụ akpụrụ-warị ḅụ so mu jen akpụrụ-warị la ḅara.

⁶ Anga-anga ma tẹ àrị Izirẹlị mẹmgba na mẹnjị anga mamgba ḅụ à tọnm ị̀ atomi ma ḍikiḍiki kẹ ḅẹẹ Izirẹlị ḅẹ ḅẹrẹkọn apụ ma ḅụụ àrị ẹkwẹn gbọrụmgbọ kọn pịrị tẹ ḅọ emi, tẹ gbela: Í tiegotẹ ịn kẹ sida sịn-arị sịn kẹ warị nama ị̀ pịrị-a?’”

⁷ “Ọkọẹrẹsị mie ị́ kẹ ị̀ fịrịmẹnjịḅọ Devidi ḅẹẹ ḅarị ye, mie Kụrọmamgba Nyana KỊNỊNYANAḄỌ ḅe ḍuko yee, ‘Ị́ anana ḍikiḍikiarị osuka ḅio arị ị́ ọkịm mịnẹ ḅo ḅẹrẹtọn ị̀ atomi Izirẹlị pịrị ḅọ sọ.

⁸ Àrị ị́ na í mu anga mu anga ḅụ sime tẹ, tẹ ị́ na fịya-a apụ mamgba pẹlẹ-siin tẹẹ, ị́ tọrọkọ ḅụ. À tomikiri mẹ ḅụ gburo-gburotẹ apụ ma ẹrẹ mẹ pembe ẹrẹ pakama ị́ pịrị ḅa.

⁹ À gbọrụ anga tọn ị̀ atomi Izirẹlị pịrị tẹ ịn kẹ anịjụ wẹrị ḅa, mịẹtẹ ini ịna ḅara-kuḅu ḅẹ ye-yọ nyana tẹ anga tẹ ḅarị jen kẹ ḅụụ-kọsị ye pịrị ḅịa; anịsakị kụrọ-kụrọ ye kẹ tomi na mịẹ apụ ḅarị pịkị ịn ḅaa guluguluma ḅịa, tarị tarị

¹⁰ à ḅẹrẹkọn-apụ tọn tọn tẹ ini ị̀ atomi Izirẹlị ḍikiḍikiarị sakị anị sime-sime ḅara; àrị ị́ na fịya-a apụ mamgba nẹngịma fama tẹ kẹ í suku-ḅio suu ḅa. Anịtẹrẹmẹ à mịẹfinji ị́ pịrịarị mịnẹ à warị pakama ị́ pịrị ḅa.

¹¹ Í ene kara tẹ í mu ị́ aḍapụ na sime sakị arị ị́ ḅụụ paka-ḅo í soku-ḅẹ owiapụ-awọmẹ ma ḅẹ gbọrụḅọ kẹ í kiri ḍima tẹ ori ama-da mẹ mịẹ pakama ḅa.

¹² Ọ̀ warị nama ị̀ pịrị ḅa, anịsakị arị ori emine mẹ mịẹ-pakama gbamaso ḅa.

¹³ Àrị ọ̀ ḍa sọ ḅa, anịsakị ori ị̀ owiḅọtụḅọ sọ ḅa; ị̀ ḅẹlẹma mẹ tẹ jike-jike-a ye mẹ àrị ọkị ḅịa ọ̀ ḅụụ ḅụ, à wẹrịtẹ ị́ tọrọkọ sime ḅọ ḅe ḅụụ anị ọkị ḅara,

¹⁴ kụma àrị ị̀ warị mẹ na ị̀ ama-da mẹ na ḅio ọ̀ mịẹ kụrọma gbamaso ḅa, anịsakị ori emine mẹ à nwẹn mịẹ-pakama gbamaso ḅa.’ ”

¹⁵ Netanị mịna ẹkwẹn mamgba koro ḅara na, ori ẹrị aị mamgba na ḍuko Devidi pịrịm.

Devidi Ịmịẹtẹ-Ḅẹẹ Tẹkẹ Kọnm

¹⁶ Anịtẹso Devidi nwẹnị mu KỊNỊNYANAḄỌ ḅe tọrọkọ lẹgị-sime tẹ ḅẹẹ, “Yẹrị tụḅọ, yei KỊNỊNYANA-TAMỤNỌ, anịsakị ị̀ warị mẹ tọ warị tẹ ị́ ị̀ kẹ ḅo mị-ḅara mẹmgba lama?

¹⁷ Miemẹ anie ị́ tọrụ ḅụ kalịye; ị́ pịkị iḅere-iḅerea sakị ḅụ ị́ fịrịmẹnjịḅọ ḅe warị sime ḅarị ḅara ḍukom, tẹ tọrọkọ-jụ ḅụọ-ḅụọ ma sime ḅarị ḅara kẹ ì ḍie tẹ, yei KỊNỊNYANA-TAMỤNỌ!

¹⁸ Jen tẹ àrị inetẹ kẹ ị́ ḅẹẹ ḅẹ ye tiye, ị́ kẹ yẹrị ị́ fịrịmẹnjịḅọ ḅe pịrị kụn ḅụ? Kẹ gotẹ ọkọ ḅẹẹarị, ị́ ị́ fịrịmẹnjịḅọ ḅe nimi wararị.

¹⁹ Yei KỊNỊNYANAḄỌ, ị̀ sịḅị ẹrẹsị, na anị wẹrịtẹ í ḅioḅẹngbọ sime-ḅara ḅụ ị́ mịẹ tẹ à mịna opu aị mamgba nimim mịnẹ ị́ nwẹn sime gburo-gburotẹ ye mẹmgba kọrị tẹ. Í pembe gbọrụḅọ-sọ ofori, Yei KỊNỊNYANAḄỌ,

²⁰ anịsakị í sikima jen Tamụnọ ofori, wa wẹrịtẹ wamịna aḅeri kẹ naa tẹ aị mamgba ḅụ,

²¹ Tomikiri ḅụ jen sịẹ tẹ ị́ atomi Izirẹlị mẹ na kịka ye tiye, inima tẹ ị́ pakịrị-ọkị tẹ kẹ ị́ atomi mịẹ apụ ma?. Ị́ mịẹ ịn pịrị gburo-gburotẹ pịkị tẹmẹ-naịn-naịnma aị ma gotẹ í opu ḍie-paka tẹẹ tomikiri mamgba ḅụụ. Ị́ Ijiputi ḅụ ịn ḅọrọmam, tẹ ịna tọrọkọ ḅụ sịẹ-sịẹ ma dee-pakamam.

²² Ị́ nwẹnị ị́ atomi Izirẹlị kẹ ị́ atomi sọma gbamaso; tẹ Yei KỊNỊNYANAḄỌ, ị́yẹrị nwẹnị ịna Tamụnọ sọ.”

²³ “Yee mịọkụ ị́ fịrịmẹnjịḅọ ḅe na, ọ̀ warị na gboloma ye ḅụ ị́ kọn tẹ ẹkwẹn mẹ ọkọ paka gbamaso, Yei KỊNỊNYANAḄỌ, tẹ ị́ wẹrịtẹ ḍuko ḅara mịẹ.

²⁴ Anịsakị ị́ ẹrẹ paka tẹ ḍụḅa gbamaso ḅa, tẹ tomi ḅẹẹ ḅa, ‘Kụrọmamgba Nyana KỊNỊNYANAḄỌ ḅe anie Izirẹlịapụ tẹkẹarị Tamụnọ ḅee.’ Tẹ ị́ fịrịmẹnjịḅọ Devidi warị mẹ nwẹnị ị́ tọrọkọ ḅụ paka-ḅo ḅa.

²⁵ Gbala ị́yẹrị ị̀ Tamụnọ ḅe mịẹfinji ị́ fịrịmẹnjịḅọ ḍie tẹ mịnẹ ị́ warị pakama ọ̀ pịrị ḅa ẹrẹsị; anịẹrẹsị ị́ fịrịmẹnjịḅọ ị́ tọrọkọ ḅụ ḅiokpọ tẹ tẹkẹ ḅụ.

²⁶ Anịsakị Yei KỊNỊNYANAḄỌ, ị́yẹrị anie Tamụnọ tẹ mịọkụ mị iḅiye mẹ kẹ ị́ fịrịmẹnjịḅọ karịma ḅọọ.

²⁷ Anịẹrẹsị yee mịọkụ anị ị́ ḅụụ-ḅẹlẹye sọ tẹ ị́ ị́ fịrịmẹnjịḅọ warị mẹ boma mịẹ tẹ anị ị́ tọrọkọ ḅụ sime tọrọkọ-tọrọkọ mu gbamaso ḅarị ḅara; kẹ gotẹ ọkọ ḅẹẹarị, Yei KỊNỊNYANAḄỌ, ị́yẹrị boma tẹ ye boma gbamaso tẹẹ.”