1 Paka-aị 15 - FỊAFỊA BAỊBỤLỤ

Ịn Ḅụụ Tẹlẹma Kẹ Ọḅọkụ-Igbe Mẹ Ọkị Pịrịarị

¹ Devidi, Devidi opu ama mẹ ḅio warị-warị nama tẹ kẹ ọ̀ ḅụ pịrịm; tẹ gbọrụ anga tẹlẹma kẹ Tamụnọ Ọḅọkụ Igbe mẹ pịrị, tẹ akpụrụ-warị pike anị pịrịm.

² Anịtẹso Devidi nwẹnị ḅẹẹ, “Livayị furo-ḅẹ-apụ sikima ja apụ Ọḅọkụ-Igbe mẹ dogi ḅịa, kẹ gotẹ ọkọ ḅẹẹarị, KỊNỊNYANAḄỌ ḅe ịn sẹlẹ-ọkịm ini KỊNỊNYANAḄỌ ḅe Ọḅọkụ-Igbe mẹ dogi tẹ fịrịmẹnjị ọ̀ pịrị gbamaso.”

³ Devidi nwẹnị Izirẹlịapụ mamgba kobiri Jeruselemu ḅụ KỊNỊNYANAḄỌ ḅe Ọḅọkụ-Igbe mẹ ọkị-ḅo ọ̀ tẹlẹma anị pịrị tẹ sime-kiri ḅụ koroma ḅẹ ḅara.

⁴ Devidi nwẹnị Erọnị owiapụ-awọmẹ ma na, Livayị furo-ḅẹ-apụ ma na kobiri gboloma:

⁵ Kohatị owiapụ-awọmẹ ḅụ, Yuriyẹlị ịn kẹ sịḅị-dam, na ori amịnapụ kịnị sonioa si (120) na;

⁶ Mẹrarị owiapụ-awọmẹ ḅụ, Asaya ịn kẹ sịḅị-dam, na ori amịnapụ kịnị oyia asi, gbọrụ ḅọ finji (220) na;

⁷ Gasọnị owiapụ-awọmẹ ḅụ, Jowẹlị ịn kẹ sịḅị-dam, na ori amịnapụ kịnị sonioa si oyi finji (130) na;

⁸ Ẹlịzafanị owiapụ-awọmẹ ḅụ, Sẹmaya ịn kẹ sịḅị-dam na ori amịnapụ kịnị oyia asi (200) na;

⁹ Hẹbụrọnị owiapụ-awọmẹ ḅụụ, Ẹlịyẹlị ịn kẹ sịḅị-dam, na ori amịnapụ kịnị inia si (80) na;

¹⁰ Uziyẹlị owiapụ-awọmẹ ḅụ, Amịnadabụ ịn kẹ sịḅị-dam, na kịnị sọnọa si oyi finji na maa apụ na (112).

¹¹ Anịtẹso Devidi nwẹnị agbamịẹapụ Zadọkụ na, Abịyata na, Livayị furo ḅụ Yuriyẹlị na, Asaya na Jowẹlị na, Sẹmaya na Ẹlịyẹlị na, Amịnadabụ na sịn kobiri tẹ ịn ḅẹẹ,

¹² “Livayị furo mẹ ḅụụ ọmịnị anie ḍapụ ma awarị ma sịḅịdapụ; ọmịnị na, ọmịna amịnapụ na, ọmịna aḅụụ mịẹ fịafịamaa, mịẹ tẹ ó mu KỊNỊNYANAḄỌ, Izirẹlịapụ tẹkẹarị Tamụnọ ḅe Ọḅọkụ-Igbe mẹ ọkị-ḅo à tẹlẹma tẹ kẹ anị pịrị tẹ anga mẹ ḅụ wẹrị ḅẹ ḅara.

¹³ Tarị sakị mẹ ḅụ ọmịnị anị dogi-a ẹrẹsị KỊNỊNYANAḄỌ wamịna Tamụnọ ḅe ịganị ḅụ fomu-ḅara kẹ wa pịrịm, gbala wa anị tọn tẹ ḅara ḅụ anị bala na-iḅi ḅara kẹ anị bala-a ẹrẹsị.”

¹⁴ Anieḅụ agbamịẹapụ ma na Livayị furo-ḅẹ-apụ ma na nwẹnị KỊNỊNYANAḄỌ Izirẹlị ḅẹ Tamụnọ ḅẹ Ọḅọkụ-Igbe mẹ ọkị-ḅo mẹ gotẹ ịna aḅụụ mịẹ fịafịamam.

¹⁵ Livayị furo-ḅẹ-apụ ma nangwọtẹ asịn kẹ Tamụnọ Ọḅọkụ-Igbe mẹ dogim ịna apana ọgọnọ ḅụ KỊNỊNYANAḄỌ ḅe ẹkwẹn-ḅịḅị ḅụ Mozizi wẹrịtẹ tọn tẹ ḅara.

¹⁶ Devidi nwẹnị pịkị tọn Livayị furo ḅe asịḅịdapụ ma pịrị ini ịna mịnapụ ma ḅụ kịnị tọn, nume-su ḅarị apụ na, farị-farịaị na, ọbọ na, alili na, saịn-saịn-aị na farị na-iḅi tẹ ḅioḅẹlẹ ḅara kẹ ye-yọ fiema pakama ḅarị apụ.

¹⁷ Anieḅụ Livayị furo-ḅẹ-apụ ma nwẹnị Jowẹlị owiḅọtụḅọ Hemanị na ori amịnapụ ḅụ Bẹrẹkaya owiḅọtụḅọ Asafụ na, ịna amịnapụ Mẹrarị owiapụ-awọmẹ ma ḅụ, Ẹtanị, Kusaya owiḅọtụḅọ ḅe na tọn;

¹⁸ tẹ kẹ ịna ḅụụ sụa apụ maaịn karama ọrụ ḅụ anie, ịna mịnapụ Zẹkaraya na, Jazịyẹlị na, Sẹmiramọtị na, Jaziyẹlị na, Uni na, Ẹlịyabụ na, Bẹnaya na, Masẹya na, Matitaya na, Ẹlịfẹlẹhu na, Mikinaya na, ogigo-ḅọkọ koruapụ ma Obed-edọmụ na, Jehẹlị na.

¹⁹ Ini ojo kẹ mịẹ wararị saịn-saịn-aị mẹ farị ḅarị apụ anie nume-suapụ ma Hemanị na, Asafụ na, Ẹtanị na.

²⁰ Zẹkaraya na, Azẹlị na, Sẹmiramọtị na, Jaziyẹlị na, Uni na, Ẹlịyabụ na, Masẹya na, Bẹnaya na anie Alamọtị ḅẹẹ ḅara kẹ ọbọ farị ḅarị apụ;

²¹ anịsakị Matitaya na, Mikinaya na, Obed-edọmụ na, Jehẹlị na, Azaziya na, nwẹnị alili kẹ farị aị ma saakị ḅa anị ḅẹ ọrụtọn ḅara ḅụ.

²² Livayị furo-ḅẹ-apụ ma ḅụụ farị-farịaị ma kẹ sịḅịdaḅọ Kenanaya farị aị ma datụkụma ḅa, ori anị fie ye naa wararị ẹrẹsị.

²³ Bẹrẹkaya na, Ẹlịkena na, Ọḅọkụ-Igbe mẹ ogigo-ḅọkọ mẹ ḍikiḍiki apụ sọ ḅa.

²⁴ Agbamịẹapụ Sẹbanaya na, Josafatị na, Nẹtanẹlị na, Amasayị na, Zẹkaraya na, Bẹnaya na, Ẹlịyeza na Tamụnọ Ọḅọkụ-Igbe mẹ tọrọkọ sime tẹ ọdụ mẹ ofuro ḅa. Obed-edọmụ na, Jehaya na sọ-sọ tẹ Ọḅọkụ-Igbe mẹ ogigo-ḅọkọ mẹ ḍikiḍiki ḅa.

Ịn Ọḅọkụ-Igbe Mẹ Kẹ Jeruselemu Ḅom

²⁵ Anịtẹso Devidi na, Izirẹlị ḅẹ omongiapụ ma na, ḅẹrẹtọn kịnị maa ẹndẹ oyia asi finji-finji pịrịarị apụ ma na nwẹnị ḍereku ḅụ Obed-edọmụ warị KỊNỊNYANAḄỌ ḅe Ọḅọkụ-Igbe mẹ ọkị ḅẹ mu.

²⁶ Kẹ mịẹ tẹ Tamụnọ ḅarasụa KỊNỊNYANAḄỌ ḅe Ọḅọkụ-Igbe mẹ dogi ḅe Livayị furo-ḅẹ-apụ ma pịrị ḅẹ ẹrẹsị ịn sọnọma owi-anambulo na, sọnọma ejimina na kẹ agba mịẹm.

²⁷ Devidi iḅi ḅụra tẹ opu sịnịnị kapa sụam, anị Ọḅọkụ-Igbe mẹ dogiarị Livayị furo-ḅẹ-apụ mamgba sọ wẹrịtẹ sụa ḅara, nume-suapụ ma na, Kenanaya, nume-suapụ ma farịarị aị ma sịḅịdaḅọ ḅe na; Devidi agbamịẹapụ sịnịnị kapa sụam.

²⁸ Mị-ḅara mie Izirẹlị mẹmgba ọdụ ofuro-ofuro tẹ, saịn-saịn-aị na, ọbọ na, alili na farị-farị tẹ, oloku na kẹ KỊNỊNYANAḄỌ ḅe Ọḅọkụ-Igbe mẹ kẹ ḅo ḅara.

²⁹ KỊNỊNYANAḄỌ ḅe Ọḅọkụ-Igbe mẹ ḅo Devidi opu ama mẹ la ḅara ḅụ, Sọlụ ẹrẹḅọtụḅọ Mịkalị nwẹnị ikiḅa-ḅọkọ ḅụ toluma ḍiki tẹ Amadaḅọ Devidi sẹkị-sẹkị tẹ ḅioḅẹlẹarị ḅara ẹrị tẹso, á nwẹnị á tẹmẹ ḅioḅẹngbọ ḅụ ò ḍiki-sima.