1 Paka-aị 14 - FỊAFỊA BAỊBỤLỤ

Devidi Akọrịnama Jeruselemu Ḅụ

¹ Taya ḅẹ amadaḅọ Hiramụ nwẹnị fịrịmẹnjịapụ na, in kẹ sida sịn-arị opu asịn aḅiri na, pịkị ḍụḅarị kẹ warị nama apụ na, akanịapụ na kẹ Devidi fịrịma, warị nama ọ̀ pịrị gotẹ.

² Devidi nwẹnị ḅio kẹ tọnma nimi mịnẹ KỊNỊNYANAḄỌ ḅe ọ̀ kẹ Izirẹlị ḅụ amadaḅọ mịẹ tẹ mẹ mịẹ pakama tẹ, anieḅụ ori ama-da mẹ ori atomi Izirẹlịapụ ma gotẹ ḅẹlẹma saakị gele lamam.

³ Jeruselemu ḅụ Devidi ja ereme sime tẹ ja owiapụ-awọmẹ na eremịna-awọmẹ na iyim.

⁴ Maa Jeruselemu ḅụ ori iyi awọmẹ ma ẹrẹ: Samuha na, Sobabụ na, Netanị na, Sọlọmọnị na,

⁵ Ibiha na, Ẹlịsua na, Ẹlịpẹlẹtị na,

⁶ Noga na, Nẹfẹgi na, Jafịya na,

⁷ Ẹlịsama na, Biliyada na, Ẹlịfẹlẹtị na.

Devidi Filisiteniapụ Ma Nẹngịmam

⁸ Filisiteniapụ ma Izirẹlị mẹmgba amadaḅọ ḅara ḅụ ịn pulo kẹ Devidi sịḅị sara tẹ naa tẹso, Filisiteniapụ mamgba nwẹnị Devidi ḍọkị kẹ paka-ḅo; Devidi anị naam, tẹ nwẹnị paka ini na donia ḅẹ mu.

⁹ Mị sakị mẹ Filisiteniapụ ma ḅo tẹ Refehimu ḅẹ tụndụ ogboku mẹ gbaịn tẹ fọịn tẹ

¹⁰ Devidi nwẹnị Tamụnọ ḅịḅị ḅii, “À mu owu kẹ Filisiteniapụ ma paka mọ? Ị́ ịn kẹ ị̀ ḅara-ḅio su ḅarị mọ?” KỊNỊNYANAḄỌ ḅe nwẹnị ọ̀ ḅẹẹ, “Muu, arị ịn kẹ ị́ ḅara ḅio su ḅa.”

¹¹ Anieḅụ ọ̀ nwẹnị so Balị-perazimu mu, tẹ anịanga ḅụ ịn nẹngịma; tẹ Devidi nwẹnị ḅẹẹ, “Tamụnọ ye kan-toluarị ẹgẹnẹ-minji ye kan ḅara kẹ ị̀ ḅara ḅụ ị̀ na fịya-a apụ ma kan sara tẹ.” Anịẹrẹsị in kẹ anịanga mẹ sịn ẹrẹ anie Balị Pẹrazimu.

¹² Ini ịna oru-atamụnọ ma wẹrịsom, tẹ Devidi nwẹnị tọn tẹ ini arị dọkịmam.

¹³ Filisiteniapụ ma anịsọ pịkị siin mu tụndụ-ogboku mẹ gbaịn tẹ fọịnm.

¹⁴ Devidi siin Tamụnọ ḅịḅị ḅii tẹso, Tamụnọ nwẹnị ọ̀ ḅẹẹ, “Da-da ịn dama-mu ma, kana-ḅọrọ tẹ ịn kẹ balịsamụ sịn opu asịn ma na dama-dama ḅụ owu kẹ ịn pakaa.

¹⁵ Ị́ ịn kẹ balịsamụ sịn opu asịn ma sịḅị ọgọnọ ḅụ mẹnjị aḅụọ fiearị naa tẹrẹmẹ mu owu paka; kẹ gotẹ ọkọ ḅẹẹarị, à tarị ị́ tọrọkọ-pẹlẹma mu Filisiteniapụ ọmụ-ogbo mẹ ḅaa tẹẹ.”

¹⁶ Devidi Tamụnọ wẹrịtẹ tọn ọ̀ pịrị ḅara mịẹm, tẹ ịn Gibiyọnị ḅụ Filisiteni ḅẹ ọmụ-ogbo mẹ ḅaa nwenii mu Geza lam.

¹⁷ Devidi ereso nwẹnị mu ama mamgba la, tẹ KỊNỊNYANAḄỌ ḅe nwẹnị Devidi ḍiki-ḅalafa mẹ kẹ ḅo sịẹ-sịẹ mamgba ọgọnọ gbana.