1 Paka-aị 13 - FỊAFỊA BAỊBỤLỤ

Ọḅọkụ-Igbe Mẹ Ịn Kẹ Jeruselemu Ḅo Tẹẹ Kiriyati-jeharimụ Ḅụụ

¹ Devidi ḅẹrẹtọn kịnị maa ẹndẹ oyia asi finji-finji na, ḅẹrẹtọn kịnị sonioa si sonioa si na pịrịarị apụ ma na, sịḅịdaḅọ goḅọ-goḅọ na ḅịḅị-ọkịyam.

² Anịtẹso ọ̀ nwẹnị Izirẹlị tomina-ogbo mẹ ḅẹẹ, “Anị ọmịna ḅụụ ḅẹlẹ-ḅẹlẹ, tẹ pịkị KỊNỊNYANAḄỌ wamịna Tamụnọ ḅe tọn ḅara ḅẹḅẹ, ó yee wa ḅịḅị kẹ wamịna mịnapụ kirikọn Izirẹlị mẹmgba ḅụ sime apụ ma na, ịna ama ma tẹ osuka simearị anga ma ḅụ simearị agbamịẹapụ na, Livayị furo-ḅẹ-apụ ma na fịrịma, mịẹ tẹ ịn ḅo wamịnị na gboloma ḅẹ ḅara.

³ Anịtẹso kụma wa mu siin wamịna Tamụnọ Ọḅọkụ Igbe mẹ ọkị-ḅo wamịna ḅụụ pịrị ḅa; kẹ gotẹ ọkọ ḅẹẹarị, Sọlụ ene ma ḅụ wa anị bala-a.”

⁴ Tomina-ogbo mẹmgba ọkọ mịẹ mẹ mininim, kẹ gotẹ ọkọ ḅẹẹarị, anị tomi mamgba tọrụ ḅụ kuram.

⁵ Anieḅụ Devidi Izirẹlị mẹmgba tẹ Ijiputi ḅẹ Sịẹ Awụ Tọrụ ḅụ ọkị mu Hamatị sọarị anga ḅụ sime apụ kobirim, Kiriyati-jeharimụ ḅụ Tamụnọ Ọḅọkụ-Igbe mẹ ọkị-ḅo gotẹ.

⁶ Devidi na Izirẹlị mẹmgba na nwẹnị iwo Bala mu, anie Kiriyati-jeharimụ mẹ, sime Juda pịrị anga mẹ, mịẹ tẹ ini anịjụ ḅụ Tamụnọ Ọḅọkụ-Igbe mẹ tẹ ịn Sẹrubimu ma ọgọnọ-jụ ḅụ simearị emine mẹ ọgọnọ lẹgị-sime wararị KỊNỊNYANAḄỌ ḅe ẹrẹ kẹ kuro wararị ye mẹ ọkị-ḅo ḅẹ ḅara.

⁷ Ịn nwẹnị Abinadabụ warị ḅụ Tamụnọ Ọḅọkụ-Igbe mẹ dogi ọkị ịwọ yedogi-kirimẹnjị-arụ ọgọnọ, tẹ Uza na Ahiyo na nwẹnị anị dọkụ.

⁸ Devidi na Izirẹlị mẹmgba na nwẹnị ịna ịnyọ mẹmgba kẹ Tamụnọ tọrọkọ ḅụ ḅioḅẹlẹ-ḅẹlẹtẹ nume-sunm, alili na, ọbọ na, akwa na, saịn-saịn na farị-farịtẹ ọdụ ofurom.

⁹ Ịn ḅo Kidọnị ḅẹ mgbọlụ-sẹlẹ-kiri la tẹso, pootẹ-anambulo maa aḅụọ gbisinim, Uza nwẹnị ḅara sụma mu Ọḅọkụ-Igbe mẹ ọlọ.

¹⁰ KỊNỊNYANAḄỌ ḅe ịganị Uza pịrị tẹ ò fomum; ọ̀ ḅara kẹ Ọḅọkụ-Igbe mẹ lama ye mẹ gotẹ; tẹ ọ̀ nwẹnị Tamụnọ tọrọkọ anịanga ḅụ fịị.

¹¹ KỊNỊNYANAḄỌ ḅe Uza ḅaa ye mẹ gotẹ Devidi nwẹnị ịganị; ọkị-ḅo mịmgba la ịn kẹ anịanga mẹ sịn-arị ẹrẹ Pẹrẹzi-uza.

¹² Devidi nwẹnị anị ene Tamụnọ mangịma; tẹ ọ̀ nwẹnị ḅẹẹ, “Ndẹẹ à Tamụnọ Ọḅọkụ-Igbe mẹ kẹ ama ḅo ị̀ ḅụụ pịrị ḅẹ ḅara?”

¹³ Anieḅụ Devidi ḅarị Ọḅọkụ-Igbe mẹ kẹ ama mu tẹ kẹ Devidi opu ama mẹ ḅio suu-a, kụma ori anị ọkị kẹ sikima mu Obed-edọmụ Gati ḅẹ ḅọ ḅe warị ḅụ wẹrịm.

¹⁴ Tamụnọ Ọḅọkụ-Igbe mẹ Obed-edọmụ warị ḅio ọ̀ warị-kpo mẹ na tẹra akalụ simem; KỊNỊNYANAḄỌ ḅe nwẹnị Obed-edọmụ warị kpo mẹ na, ọ̀ nyana aị mamgba na boma.