1 Paka-aị 12 - FỊAFỊA BAỊBỤLỤ

Benijamịnị Furo Ḅụ Tarị Devidi Ḍukamẹnjịapụ

¹ Mịna apụ ma mie Kisi owiḅọtụḅọ Sọlụ gotẹ Devidi ḅụụ wọkọrọ-wọkọrọ ḅara kẹ inetẹ mẹnjịma ḅọrọ-a tẹ Zikilagị ḅụ simearị tẹ ọ̀ ḍọkụma-ḅo owiapụ; anịsakị anị opu-apụ ma tẹ ọmụ ḅio ḅarasụa ọ̀ pịrị apụ ma ḅụụ ini emi.

² Inima anie iboli-tẹịn-apụ, tẹ inetẹ ama-ḅara anịanịa ere-ḅara kẹ okoro-ḍiein tẹịn, pịkị ḍụḅarị apakịrị-apakịrị kẹ ḍiki ḅụ fịnatẹ kẹ ye gbin apụ; ini Benijamịnị furo-ḅẹ-apụ, Sọlụ amịnapụ.

³ Sịḅịdaḅọ ḅe anie Ayiheze, Johasị ọ̀ palịm, ini maa apụ ma anie Sema Gibiya ḅẹ ḅọ ḅe owiapụ-awọmẹ; pịkị Azimavẹtị owiapụ-awọmẹ Jazịyẹlị na, Pẹlẹti na; Bẹraka na, Jehu, Anatọtị ḅẹ ḅo ḅe na,

⁴ Isimaya, Gibiyọnị ḅẹ ḅọ, “Kịnị Suei Ma” ḅio ḅẹ opuḅọ, pịkị “Kịnị Suei Ma” kẹ sịḅịdaḅọ ḅe na Jerimaya na, Jahazịyẹlị na, Johananị na, Jozabadị, Gẹdẹra ḅẹ ḅọ ḅe na,

⁵ Eluzaị na, Jerimọtị na, Behalaya na, Sẹmaraya na, Sẹfataya, Arifu ḅọ ḅe na,

⁶ Ẹlịkena na, Isiya na, Azarẹlị na, Joheza na, Jasobiyamụ, Kora ḅẹ ḅọ ḅe na,

⁷ Johela na, Zẹbadaya, Gẹdọ ḅẹ Jerohamụ owiapụ awọmẹ ma.

Gadi Furo Ḅụ Devidi Ḍukamẹnjịapụ

⁸ Devidi ịkpa mẹ ḅio kụrọ-tẹịn anga mẹ ḅụ simearị sakị Gadi furo-ḅẹ-apụ ḅụụ owu-sọ ḍin Lama tẹ, ekpeke na, sụḅa na kẹ owu-sọ ḅara-ḅaatẹ opu owu-akọnịapụ ḅọrọ-so ọ̀ ḍọkụma-mum, ịna tọrụkuḅu ọkụkụ tọrụkuḅu sime-ḅara simem, tẹ tụndụ ma ọgọnọ ḅẹ atuu ma ḅụụ-nwana-nwana ḅara kẹ ḅụụ-nwana-nwanam.

⁹ Ẹza anie sịḅịdaḅọ, Obadaya maaịn karamam, Ẹlịyabụ tẹrẹị karamam,

¹⁰ Misimana ini karamam, Jerimaya sọnọ karamam,

¹¹ Atayị sonio karamam, Ẹlịyẹlị sọnọma karamam,

¹² Johananị nine karamam, Ẹlịzabadị eseni karamam,

¹³ Jerimaya oyi karamam, Makịbanayị oyi gbọrụḅọ finji karamam.

¹⁴ Mịna Gadi ḅẹ apụ ma anie ọmụ-ogbo mẹ ḅẹ alapụ, ịna ḅụụ ịrụ-tẹịn ḅọ kịnị sonioa si kẹ sịḅị-dam, opu-apụ ma kịnị maa ẹndẹ oyia asi finji nẹngị atomi kẹ sịḅị-dam.

¹⁵ Mịna apụ ma mie ẹgẹnẹ-minji anga-anga gbaịn wararị sakị kụra mẹ ḅẹ tarị akalụ mẹ ḅụ Jodanị tọrụ mẹ saḅa mu tụndụ ogboku ma ḅụ sime apụ ma dee gala-gala ịrụa-saakịarị-anga anga na, ịrụa-ideriarị-anga anga na su fama ye.

Benijamịnị na Juda na Ḅụụ Ḅo Devidi Ḍukamẹnjịapụ

¹⁶ Benijamịnị na Juda na ḅụụ ḅẹ ja owiapụ nwẹnị Devidi ḍọkụma-ḅo kụrọ-tẹịn anga mẹ ḅụ.

¹⁷ Devidi nwẹnị saakị paka ịn dama-mu tẹ ịn ḅẹẹ. “Ọ́ nwẹnị ikia ḅara kẹ ị̀ ḍọkụma-ḅo tẹ ḅarasụa ị̀ pịrị ḅarị ḅẹḅẹ, ì ḅioḅẹngbọ na ọmịnị na gberie mịẹ ḅa kụma ó ḅo ị̀ kẹ mu ị̀ na fịya-a apụ ḅara-ḅio dẹrịma ḅarị ḅẹḅẹ, gbọrụ mịẹ-irima sọ ị̀ aḅara ma ḅio ofori ḅẹsọ, yee wamịna aḍapụ ma Tamụnọ ḅe ẹrị tẹ ọ́ kọn.”

¹⁸ Anịtẹso Tamụnọ Tẹmẹ ḅe nwẹnị ḅo Amasayị “Kịnị Suei Ma” kẹ sịḅịda ḅọ ḅe ḅụụ sọ, tẹ ọ̀ nwẹnị ḅẹẹ, yei Devidi, wa sime ị́ pịrịm; yei Jese owiḅọtụḅọ wa ịna emii! Dein, dein sime ị́ pịrịị, Dein pịkị sime-ḅarasụa ị́ pịrịarị apụ pịrịị Gbala ị́ Tamụnọ ḅarasụa ị́ pịrịm. Anịtẹso Devidi nwẹnị ịn daa-ọkị, tẹ ịn kẹ ori ọmụ-ogbo itu ma ḅẹ opu-apụ mịẹ.

Manasẹ Ḅụụ Devidi Ḍukamẹnjịapụ

¹⁹ Filisiteniapụ ma ḅo Amadaḅọ Sọlụ na owu-sọ ḅẹ tẹ Devidi ini na mẹnjị-ḅo sakị Manasẹ atomi ma ḅẹ ja apụ so mu ọ̀ ḅụụ sọm. (Anịsọ ọ̀ ḅarasụa ịn pịrị-a, gbala Filisiteni ḅẹ Sịḅịdapụ ma ḅịḅị-ọkịya tẹ ọ̀ fịrịma pịkịm ẹrẹsị, tẹ ḅẹẹm, “Wamịna aḍumo fama ḅara ḅụ, ọ̀ pịkịma-so ọ̀ sịḅịdaḅọ Sọlụ ḍọkụma-mu ḅa.”)

²⁰ Ò so Zikilagị mu sakị mịnapụ ma tẹ Manasẹ ḅụụ so tẹ ọ̀ ḍọkụma-mu apụ ma anie; Adina na, Jozabadị na, Jediyẹlị na, Mayịkẹlị na, Jozabadị na, Elihu na, Zilẹtahị na. Mịna apụ ma anie Manasẹ atomi ḅụụ kịnị maa ẹndẹ oyia asi finji finji kẹ sịḅịdapụ.

²¹ Inimgba opu owu-akọnịapụ ḅara ḅụ, ịn ḅarasụa Devidi pịrịm owu kẹ ama gbaịn tẹ fọịn itu mẹ paka ḅụ, tẹ ḅo ọmụ-ogbo mẹ ḅẹrẹtọn apụ sọm.

²² Ene-ḅaaene-ḅaaene ḅarasụa Devidi pịrị gotẹ tomi ḅo-ḅo ḅoarị nwenii Tamụnọ ọmụ-ogbo pembe ọmụ-ogbo nwẹnị paka-ḅo.

Devidi Ọmụ-ogbo Mẹ Ḅẹ Kịẹn-ḅịḅị

²³ Ma ma anie kpo-kpo ma ḅẹ itu-itu ma ḅụ ọmụ-aị dogitẹ kẹ ọmụgbin ḅẹ apụ ma kịẹn-ḅịḅị tẹ Hẹbụrọnị ḅụ Devidi ḍọkụma-ḅo apụ, kẹ Sọlụ ama-da kiri mẹ pịkị ḅọrọma kẹ ọ̀ pịrị ḅẹ ẹrẹsị KỊNỊNYANAḄỌ ḅe ẹkwẹn-ḅịḅị mẹ wẹrịtẹ ḅẹẹ ḅara.

²⁴ Juda furo ḅụ ekpeke na sụḅa na dogiarị apụ kịnị tẹra ẹndẹ fa si (6, 800).

²⁵ Simiyọnị furo ḅụ gburo-gburotẹ owu-akọnịapụ kịnị sọnọa si ofori kịnị maa ẹndẹ fa si (7,100).

²⁶ Livayị furo ḅụ kịnị oyi gbọrụ ẹndẹ finji na, kịnị oyia asi na.

²⁷ Jehohada, Erọnị warị mẹ ḅẹ sịḅịdaḅọ ḅe suku-ḅio kịnị esenia ẹndẹ, sonioa si finji (3,700) emi.

²⁸ Zadọkụ asambịrịma owu-akọnịḅọ na, ọ̀ ḍa warị ḅụ owu sịḅịda si maa apụ finji na.

²⁹ Sọlụ amịnapụ Benijamịnị furo-ḅẹ-apụ ḅụ kịnị sọnọma ẹndẹ, oyia asi finji (3,000). Ịna ḅụ ḅẹ opu anga Sọlụ warị mẹ minini tẹ sịḅị-tuu anị pịrịm.

³⁰ Iferemu furo-ḅẹ-apụ ḅụ eresoarị opu owu-akọnị kịnị maa puku, oyi maa ẹndẹ finji (20, 800) ịna aḍapụ awarị ḅụ ḅom.

³¹ Manasẹ furo kẹ maa anga ḍie gbọrụ pakịrị mẹ ḅụ ẹrẹ gom ḅo Devidi kẹ amadaḅọ mịẹ kẹ ḅẹẹ apụ kịnị maa apuku, sọnọ ẹndẹ finji (18,000);

³² Ịsaka atomi ḅụụ sakị fie ye naa tẹ anị sakị ḅụ Izirẹlị mịẹ na-iḅi ye nimi alapụ oyia asi na ịna amịnapụ tẹ ịna suku-ḅio ịn ḅẹrẹtọn pịrịarị apụ mamgba na;

³³ Zẹbulọnị ḅụ ọmụgbin-aị mamgba kẹ owu-sọ ḍịn tẹ kẹ ḅụụ tẹlẹma ọmụ pịrị wararị gbọrụ ḅioḅẹngbọ kẹ owu-sọ apụ ḅarasụa Devidi pịrị ḅẹ-ḅiiarị apụ kịnị sonio apuku, sọnọ ẹndẹ finji (50,000);

³⁴ Nafutali ḅụ ḅẹrẹtọn-apụ maa ẹndẹ, oyia asi finji (1,000) na, ịna tomi ekpeke na, sụḅa na dogi wararị apụ ini apuku, oyi maa ẹndẹ finji, na kịnị oyia asi na (37,000);

³⁵ Danị furo ḅụ, ḅụ tẹlẹma owu pịrị wararị apụ kịnị tẹra puku, oyi gbọrụ ẹndẹ finji, na kịnị oyia asi na (28,600);

³⁶ Asa ḅụ ḅụụ, tẹlẹma owu pịrị wararị apụ kịnị sọnọa puku (40,000);

³⁷ Rubẹnị na, Gadi na afuro ḅụ na Manasẹ furo ḅụ maa anga ḍiya ḅẹ gbọrụ pakịrị tẹ Jodanị ḅụ iwo pakịrị ḅụ sime apụ ma ḅụụ na, kẹ ọmụgbin gbin aị mamgba dogi wararị kịnị jeia puku (120,000) na.

³⁸ Mịna ọmụ atomi mamgba, ọmụgbin ọrụtọn ḅara kẹ ḅụụ tẹlẹma tẹ Hẹbụrọnị ḅom Devidi kẹ Izirẹlị mẹmgba ḅụụ amadaḅọ mịẹ ḅẹ ḅintẹ kuroma ḅụ; anị gbọrụ ḅara ḅụ Izirẹlị ḅụ kirikọn-apụ mamgba Devidi kẹ amadaḅọ mịẹ gbọrụ kuroma mẹ nyanam.

³⁹ Ịn Devidi na anịjụ tẹra aḍin simem tẹ fị-na-ḅuu-naarị, gbala ịna mịnapụ ḅụụ tẹlẹma ịn pịrịm ẹrẹsị.

⁴⁰ Izirẹlị ḅụ ḍereku emi gotẹ ịna mịnapụ tẹ ala-jụjụ-ḅio Ịsaka na, Zẹbulọnị na, Nafutali na ḅụ sime apụ sọ tọnwa fịaị kẹ yedogi-anama na, nambulo na, kụrọ-sịḅịsụa-asụ na, pootẹ-nambulo na ọgọnọ gbana tẹ kẹ ḅom — fịlawa na, ịla asịnmgbọlụ na, samụnọtẹ girepu-asịnmgbọlụ (anie resini) na, iru na pulo na. Pootẹ-nambulo na anana na sọ ịn kẹ ḅom.