1 Paka-aị 11 - FỊAFỊA BAỊBỤLỤ

Devidi Ḅo Izirẹlị Na Juda Na Amadaḅọ Sọm

¹ Anịtẹso bebe Izirẹlị mamgba nwẹnị amịna ḅụụ kobiri gboloma tẹ Hẹbụrọnị ḅụ Devidi ḍọkụma-mu tẹ ọ̀ ḅẹẹ, “Ḍikii, wamịnị ma anie sime ị́ pịrị mgbe na meni na.

² Ḅọrọtẹ sakị ḅụ, Sọlụ Ama-daarị sakị ḅụ sọ, ị́yẹrị mie Izirẹlị ḅọrọma pakama tẹ ọkị-ḅo suu ḅọ; tẹ KỊNỊNYANAḄỌ ị́ Tamụnọ ḅe ị́ ḅẹẹm, ‘Ị́yẹrị ị̀ atomi Izirẹlịapụ ma ḍikiḍikiḅọ so ḅa, tẹ ḅẹrẹtọn ị̀ atomi Izirẹlịapụ ma pịrị ḅa.’ ”

³ Anieḅụ Izirẹlị ḅẹ omongiapụ mamgba nwẹnị Hẹbụrọnị ḅụ amadaḅọ ḅe ḍọkụma-ḅo; tẹ Devidi nwẹnị KỊNỊNYANAḄỌ ḅe tọrọkọ ini na ọḅọkụ fị Hẹbụrọnị ḅụ, tẹ ịn nwẹnị Izirẹlị ḅẹ amadaḅọ ḅara ḅụ pulo kẹ Devidi sịḅị ḅụ sara. KỊNỊNYANAḄỌ ḅe ẹkwẹn mẹ wẹrịtẹ kọn ḅara Samụwẹlị ḅụụ ḅụ.

⁴ Devidi na Izirẹlị mẹmgba na nwẹnị so Jeruselemu mu, anie Jebusi, ama mẹ nyana Jebusayịtị apụ ma sime-sime anga mẹ.

⁵ Ama mẹ nyana Jebusayịtị apụ ma nwẹnị Devidi ḅẹẹ, “Ị́ sọ mịanga ḅo ḅịa.” Anịsọ, Devidi Zayọnị ḅụ kụrọ-tẹịn anga mẹ ọkịm, anie, Devidi opu ama mẹ.

⁶ Devidi nwẹnị ḅẹẹ, “Tarị Jebusayịtị apụ ma ḅaaḅọ-ḅaaḅọ, sịḅịdaḅọ na ḅẹrẹtọnḅọ na sọ ḅa.” Egbele Zeruya owiḅọtụḅọ Johabụ anie tarị mẹnjị iwo ḅọ, anieḅụ ọ̀ nwẹnị ḅo sịḅịdaḅọ sọ.

⁷ Devidi nwẹnị kụrọ-tẹịn anga mẹ ḅụ sime, anịẹrẹsị ịn nwẹnị anị sịn. “Devidi Opu ama.”

⁸ Ọ̀ nwẹnị opu ama mẹ ḅụ Kiri sara pakama anga mẹ ḅụ saakị ama mẹ nama ikelema-koro; tẹ Johabụ nwẹnị opu ama mẹ ḅụ kirikọn si anga tẹlẹma.

⁹ Devidi nwẹnị ḍụḅa tọrọkọ-tọrọkọ mu gbala kụrọmamgba Nyana KỊNỊNYANAḄỌ ḅe ori na emi ẹrẹsị.

Devidi Ereso Ọmụgbin Apụ

¹⁰ Mịna apụ ma anie Devidi opu atomi ma sịḅịdapụ ma, inima tẹ ori amakiri mẹ ḅụ KỊNỊNYANAḄỌ ḅe wẹrịtẹ Izirẹlị gboloma ẹkwẹn kọn ḅara ḅụ Izirẹlị mẹmgba na gbolomatẹ ọ̀ palị sịẹma kụrọmatẹ ọ̀ kẹ amadaḅọ mịẹ apụ ma.

¹¹ Mie Devidi opu atomi ma gboloma ḍukoye mẹ: Jasobiyamụ Akimoni furo-ḅẹ-ḅọ ḅe anie ini “Tẹra apụ Ma” sịḅịdaḅọ. Ori ọ̀ sụḅa kẹ kịnị jeia si (300) na owu-sọ tẹ gbọrụ sakị mẹ ḅụ ịn ḅaa famam.

¹² Ini “Tẹra” opu apụ ma ḅụụ ọ̀ palịḅọ anie Ẹlịyeza, Aho furo ḅẹ Dodo owiḅọtụḅọ ḅe.

¹³ Ọ̀ Pasị-damimu ḅụ Devidi na simearị ogbo, Filisiteniapụ ma nwẹnị kobiri tẹ owu kẹ ḅo. Ịn kẹ bali siin mbịaka kiri mẹ ḅẹ gbọrụ pakịrị so-paka ḅin wararị, tomi ma nwẹnị Filisiteniapụ ma ḅụ mangị-so.

¹⁴ Kụma kiri mẹ ogboku ḅụ ọ̀ sịẹ anga ò sikima-a tẹ Filisiteniapụ ma ḅaa tẹ anị ḍụḅa pakamam. KỊNỊNYANAḄỌ ḅe ịna ḅọrọmam gburo-gburotẹ owu-ḅara-iḅi ḅụ.

¹⁵ Kịnị asuei ma ḅụụ sịḅịda tẹra apụ ideri Adulamụ ḅụ sime ịkụ mẹ ḅẹ fukuru mẹ ḅio Devidi ḍọkụma-mum, Filisiteni ḅẹ ọmụ-ogbo Rẹfayimu ḅẹ tụndụ ogboku kobiri wararị ogbo.

¹⁶ Anị sakị mẹ ḅụ Devidi kụrọ-tẹịn anga mẹ ḅụ emi; Filisiteniapụ ma pịkị anị sakị ḅụ Bẹtịlịhẹmụ ḅụ kobiri wararị.

¹⁷ Ḅụụ-fụkama ye ḅii ḅara ḅụ Devidi nwẹnị ḅẹẹ, “yei, mimgbe kịnị paa mu Bẹtịlịhẹmụ ogigo-ḅọkọ ḅụ simearị suḅe mẹ ḅio ḅẹ minji ḍuu ḅo ị̀ pịrị tẹ à ḅuu tẹ!”

¹⁸ Mie ḅụ tẹra opu-apụ ma nwẹnị Filisiteniapụ ma kobiri-ogbo mẹ kan-tolu tẹ mu Bẹtịlịhẹmụ ogigo-ḅọkọ ḅụ simearị suḅe mẹ ḅio minji mẹ ḍu ọkị tẹ kẹ ḅo Devidi pịrị. Kụma Devidi anị ḅuu ḍụkụ-a; ori anị kẹ sara nguma KỊNỊNYANAḄỌ ḅe pịrị,

¹⁹ tẹ ḅẹẹm, “Ị̀ Tamụnọ minini ma mịnẹ yẹrị miemẹ mịẹ. Ndẹẹ à mịnapụ ma tẹ ịn ḍumo-tọrụ ḅụ ḅaa apụ ọmbie ḅuu ḅẹ ḅara? Kẹ gotẹ ọkọ ḅẹẹarị, fịị kẹ sịḅị-ogbo gbana ḅụ ini anị ọkị-ḅom.” Anịẹrẹsị ori anị ḅuu ḍụkụ-a. Ma aị ma mie tẹra opu apụ ma mịẹ aị.

²⁰ Kịnị suei ma ḅẹ sịḅịdaḅọ anie Johabụ iyimbere Abisahị. Ori ọ̀ sụḅa kẹ kịnị jeia si gbin tẹ ịn ḅaam, tẹ ẹrẹ fịm tẹra apụ ma sikima.

²¹ Kịnị asuei ma ḅụụ ori kụn nyana tẹịnm, tẹ ḅẹrẹtọn in pịrị ḅọ sọm; kụma ori iwo ḅo “Tẹra apụ Ma” na gbasị-a.

²² Kabuzili ḅẹ Jehohada owiḅọtụḅọ Bẹnaya anie ḅiokpọ ịnyọ nyana owiḅọ, tọnwa gburo-gburotẹ amịẹaị mịẹḅọ. Ori mie Mohabụ ḅẹ gburo-gburotẹ maa kụrọ apụ ḅaa ye. Eene mgbọlị sara gbọrụ ene ḅụ ori mie pịkị olulu ḅio koro mu gbọrụ ọkụkụ ḅaa ḅọ.

²³ Ọ̀ sọnọma ḅụọ-kuḅu na pakịrị na (2.2 m) kẹ gele wararị tẹ pịkị kpokoro ḅụratẹ gbọrụ Ijiputi-ḅẹ-ḅọ ḅaam. Ḅịtẹ-ḍoriapụ kẹ ḅịtẹ sololo tẹ ḍoriarị sịn mẹ kpokoro la ḅara la tẹ pembe sụḅa ọ̀ ḅara emi; kụma Bẹnaya nwẹnị gbọrụ mgbele ọkị tẹ kẹ ideri Ijiputi-ḅẹ-ḅọ ḅe dama-mu tẹ ọ̀ ḅara ḅụ sụḅa mẹ pụkọ-ọkị tẹ ori nyana sụḅa mẹ kẹ ọ̀ ḅaa.

²⁴ Bẹnaya Jehohada owiḅọtụḅọ ḅe mịna aị ma mịẹm tẹra opu-apụ ma sikima kụma.

²⁵ Kịnị asuei ma ḅụụ ọ̀ kụn nyana Lamam, kụma ori iwo ḅo “Tẹra apụ Ma” na gbasị-a. Devidi nwẹnị ọ̀ kẹ ọ̀ ḅụụ-ḍikiḍikiapụ ma sịḅị dama.

²⁶ Ọmụ-ogbo mẹ ḅẹ opu atomi ma anie. Johabụ iyimbere Asahẹlị, Bẹtịlịhẹmụ ḅẹ Dodo owiḅọtụḅọ Ẹlịhananị,

²⁷ Samọtị, Arọdị ḅẹ ḅọ ḅe, Hẹlẹzị, Pẹlẹti ḅẹ ḅọ ḅe,

²⁸ Tẹkowa ḅụ ḅo Ikesi tụḅọ ḅe, Abiyeza, Anatọtị ḅụ ḅo ḅọ ḅe,

²⁹ Sibekayi, Husa ḅẹ ḅọ ḅe, Ilayi, Aho ḅẹ ḅọ ḅe,

³⁰ Maharayị, Nẹtofa ḅẹ ḅọ ḅe, Nẹtofa ḅụ ḅo Bena owiḅọtụḅọ Hẹlẹdị,

³¹ Benijamịnị ḅio ḅe Gibiya ḅụ ḅo Ribayị tụḅọ Itayi, Bẹnaya, Piratọnị ḅẹ ḅọ ḅe,

³² Urayị, Gahasi tụndụ-ogboku ma na kpeki anga ḅụ ḅo ḅọ ḅe, Abiyẹlị, Aba ḅẹ ḅọ ḅe,

³³ Azimavẹtị, Baharumi ḅẹ ḅọ ḅe, Ẹlịyaba, Salịboni ḅẹ ḅọ ḅe,

³⁴ Hasemu, Gizọnị ḅẹ ḅọ ḅe, Jonatanị, Harari ḅẹ Sagi owiḅọtụḅọ ḅe

³⁵ Ayihamụ, Harari ḅẹ Saka owiḅọtụḅọ, Họ owiḅọtụḅọ Ẹlịfalị,

³⁶ Ẹfa, Mẹkẹratị ḅẹ ḅọ ḅe, Ayija, Pẹlọnị ḅẹ ḅọ ḅe,

³⁷ Hẹziro, Kamẹlị ḅẹ ḅọ ḅe, Naharayị, Ezibayị owiḅọtụḅọ ḅe,

³⁸ Jowẹlị, Netanị iyimbere ḅe, Miba, Hagiri owiḅọtụḅọ ḅe,

³⁹ Zẹlẹkị, Amọnị ḅẹ ḅọ ḅe, Birọtị ḅẹ Naharayị, Zeruya owiḅọtụḅọ Johabụ ọmụ-aị dogiḅọ ḅe,

⁴⁰ Ịra Jataya ḅẹ ḅọ ḅe, Garẹbụ Jataya ḅẹ ḅọ ḅe,

⁴¹ Yuraya Hitahiti ḅọ ḅe, Zabadi, Alahi owiḅọtụḅọ ḅe,

⁴² Adina, Rubẹnị furo ḅẹ Siza owiḅọtụḅọ ḅe, oriḅe tẹ Rubẹnị furo-ḅẹ-apụ ma kẹ sịḅịda tẹ kịnị suei ma ḅio ḅẹ ḅẹrẹtọn ḅọ ḅe,

⁴³ Hanani, Mahaka owiḅọtụḅọ ḅe, Josafatị, Mitini ḅẹ ḅọ ḅe,

⁴⁴ Uziya, Asịtẹra ḅẹ ḅọ ḅe, Sama na Jehiyẹlị na, Aro ḅẹ Ọtamụ owiapụ-awọmẹ ma,

⁴⁵ Jediyẹlị, Simiri tụḅọ ḅẹ na, ori iyimbere Joha na, Tizi ḅẹ ḅọ ḅe,

⁴⁶ Ẹlịyẹlị, Mahavi ḅẹ ḅọ ḅe, Jeribayị na, Josavaya na, Ẹlịnamụ awọmẹ ma na, Itima, Mohabụ ḅẹ ḅọ ḅe,

⁴⁷ Ẹlịyẹlị na, Obẹdị na, Jasịyẹlị na, Zoba ḅụ ḅo apụ ma.