1 Kọrịntị 9 - FỊAFỊA BAỊBỤLỤ

Fịrịmẹnjịḅọ La Na-iḅi Kiri Na Ori Akọrịnama Na

¹ Yẹrị ị̀ sịḅị nyana tomḅọ! Yẹrị Kịrayịsị fịrịmẹnjịḅọ! Wanyanaḅọ Jizọsị Kịrayịsị ḅe jen sakị àrị ori ẹrị tẹẹ! Anịsakị à kọrị KỊNỊNYANAḄỌ ḅe pịrị kọrịnama mẹ anị ḅụ paka-ḅo ye pịkị ọmịnị!

² Ja apụ fịrịmẹnjịḅọ ḅara kẹ ị̀ ọkị-a sọ, à nimi lamam ọmịnị, ọmịnị ọkọ kẹ ị̀ ọkịarị. Ọ́ KỊNỊNYANAḄỌ ḅe ḅụ sime tẹ kọn-arị ḍumo mẹ kẹ tomi ḍiearị mịnẹ yẹrị Kịrayịsị fịrịmẹnjịḅọ.

³ Tomi ị̀ sọkịrịarị sakị mie à kẹ ị̀ ḅụụ ḍụarị ḅara.

⁴ Tomi à kọrịarị kọrịnama mẹ gotẹ à fị ḅẹ ye na à ḅuu ḅẹ ye na kẹ ị̀ pịrị ḅẹ kụrọ à nyana-a?

⁵ À kụrọ nyana-a, osi afịrịmẹnjịapụ ma mịẹarị ḅara mịẹ, jen-a jen-a KỊNỊNYANAḄỌ ḅe amịnapụ ma na Pita na mịẹarị ḅara, tẹ Kịrayịsị ḍukamẹnjị ẹrẹḅọ sime tẹ árị ị̀ ḅụụ sọ tẹ à kọn-arị mẹnjị mẹ kọn ma ḅọrọ?

⁶ Anịanịa, ini oloko sụa mịnẹ Banabasị na ị̀ na kịngẹ wa ḅarana ḍọkị ḅo ye kẹ anga?

⁷ Tụḅọ ọmụḅọ jen sakị ḅarana amịna ḅụụ koko tẹ, mḅọ ọmụ-ogbo ḅụ emi ogbo? Tụḅọ amịna ḍiḅi ḍụọ ḅio paka-ḅo fịye fị fị-a? Tụḅọ amịna ḅara-kuḅu ḅẹ anana ḅụ paka-ḅo ndo-minji ḅuu-ḅuu-a?

⁸ À tomi ene-ḅaaene-ḅaaene mịẹarị aị ngẹrị kẹ tọnma na-iḅi-a, kẹ gotẹ ọkọ ḍukoarị, Oloko mẹ sọ anị gberie mẹ ḍukoarị.

⁹ Mozizi Oloko mẹ ḅio wa goom, “Mbịaka sẹlẹ ị́ pịrịarị pootẹ-nambulo ḅe ḅịḅị fịna ma.” Ọ́ sịn-arị pootẹ-nambulo mie Tamụnọ ḅụ ḅẹrẹ ye?

¹⁰ Karakaramatẹ ọ̀ wamịnị tomi ma ḅẹẹ-a? Anị sime-ḅara ḅụ, wamịnị mie in gotẹ anị kẹẹ ye. Anị ḅọrọ ḍụọ-ḍiḅiḅọ-o, fịye-sokuḅọ-o, mḅọ kọrịarị kọrịnama ḅụ ḅo ye mḅọ sọ ḅịḅị la ḅa mie mḅọ ḅiokpọma tẹ mḅọ gotẹ kọrịnama mẹ kọrịarị ye.

¹¹ Wa ọmịna ogboku tẹmẹ ḅụ ḅẹ sịnmgbọlị ḍiḅi tẹ ḅara, wa ọmịna ḅụ tomina sọye fị kụma ḅaka?

¹² Osi apụ ọmịna ḅụ mị sọye mẹ ḅẹ kụrọ nyanarị kụma, wamịna nye ịna nye nẹngị na-iḅi-a? Kụma mị kụrọ mẹ amụ wa kẹ mịẹye ḅụ suu-a. Anie nakara, wa ye goyegoye inema tẹ, mịẹtẹ Kịrayịsị gboloma Iḅi Oku mẹ kiki ḅẹ ye paka ḅịa ḅara.

¹³ Piki-pikiye-ofori ḅara ḅụ, ó nimi wararị mịnẹ Tamụnọ-warị mẹ ḅio kọrịnama kọrịarị apụ ma, Tamụnọ-warị mẹ ḅụ mie ini ịna fị-fị ye nyanarị, tẹ ḅo agbamịẹ-anga mẹ ọgọnọ ḅẹ agba mịẹarị apụ ma sọ agbamịẹ-aị ma ḅụ ḍiekiri nyanarị ye.

¹⁴ Anị gbọrụ ḅara ḅụ KỊNỊNYANAḄỌ ḅe tọn tẹ mịnẹ Iḅi-Oku mẹ ḍukoarị apụ ma sọ anị ḅụ angaa.

¹⁵ Kụma mịna aị ma tẹ à mịẹ ḅẹ kụrọ nyana aị ma ḅụ à mịẹ tẹ ye ofori; à nwẹn kẹẹarị ḍiri mẹ sọ à kẹ ịgbanị ị̀ ḅụụ pịrị-a mịnẹ ọmịnị anị ḅara kẹ ị̀ na angaa, angaa. Arị ọkọ sime ye mịẹ ḅẹ nakara à tarị fịị. Gbọrụḅọ-sọ yẹrị kẹ karakara ḅara kẹ ḅụụ-tọn-arị ye mẹ kẹ papaa ẹkwẹn sọma ḅịa!

¹⁶ À kụrọ nyana-a à kẹ ḅụụ boma, arị Iḅi Oku mẹ ḍukoarị ye mẹ kịngẹ gotẹ. Anị sime-ḅara ḅụ, ịn tọn ị̀ pịrị ye mie à mịẹarị ye. Àrị Iḅi Oku mẹ ḍuko-a kụma à tẹkẹlẹ tẹẹ!

¹⁷ À nwẹnị ì ḅiotọn kọrịnama kọrịarị ḅẹ kụma, à gbẹẹ-ye nyana ḅa; kụma kọrị ị̀ gbarị ḅịa kọrịnama ḅara mie à kẹ anị kọrịarị; kẹ gotẹ ọkọ ḍukoarị, Tamụnọ mị fịrị mẹ saakị ị̀ pịrịm à mẹnjịị.

¹⁸ Ọkọ ḅẹ kụma, à tọ gbẹẹ-ye ọkị ḅẹ? Yẹrị anie Iḅi Oku mẹ ḍukoarị, tẹ gbẹẹ-ye ọkị-a, pịkị à nyana kụrọ sọ kẹ mịẹye ḅụ suu-a mẹ anie iḅi tẹ anị ḅụ à fịarị ye.

¹⁹ Yẹrị ị̀ sịḅị tomḅọ, yẹrị gbọrụḅọ-sọ omoniḅọ-a; kụma àrị ị̀ ḅụụ kẹ ḅẹḅọ-ḅẹḅọ omoniḅọ sọma tẹ, mịẹtẹ anị inetẹ mịẹ ḅarị ḅẹḅẹ à tọnwa atomi nyana ọkị ḅarị ḅara.

²⁰ À Juu-ḅẹ-apụ na kọrịnama kọrịarị ḅẹḅẹ, à Juu-ḅẹ-apụ ḅara kẹ ḍumo kọn-arị, mịẹ tẹ, anị inetẹ mịẹ ḅarị ḅẹḅẹ, arị ịna ḅụ tọnwa-apụ nyana ọkị ḅarị ḅara. Karakaraye Mozizi Oloko mẹ ị̀ ḅụụ kụrọ nyana-a ḅẹ sọ, àrị ị̀ ḅụụ kẹ anị kụrọ nyana wararị ḅara wẹrịarị, anị kẹ opu ye mịẹarị apụ na ị̀ na kọrịnama kọrịarị ḅẹḅẹ, mịẹtẹ àrị ịn nyana ọkị ḅarị ḅara.

²¹ Anị gbọrụ ḅara ḅụ, à Ja asịẹ ḅẹ apụ na kọrịnama kọrịarị ḅẹḅẹ, à Ja asịẹ ḅẹ apụ ḅara kẹ ḍumo kọn-arị, Juu-ḅẹ-apụ Oloko mẹ suku-ḅio ofori ḅara, mịẹtẹ à Ja asịẹ ḅẹ apụ ma nyana ọkị ḅarị ḅara. Mie fie-a mịnẹ à Tamụnọ oloko koko-a; karakara-ḅara-ḅụ Kịrayịsị oloko suku-ḅio àrị emi.

²² Minini lọkọ wararị apụ ogboku ḅụ, yẹrị sọ minini lọkọ wararị ḅọ ḅara simearị, mịẹtẹ àrị ịn nyana ọkị ḅarị ḅara. Mie ḅụ à ḅo ye mamgba sọ tomi mamgba pịrị tẹ, mịẹ ḅara, mịẹ ḅara sọ à paa ịna ḅụ ḅẹ ja apụ ḅọrọma ḅarị ḅara.

²³ Mie-mẹmgba à mịẹarị, Iḅi Oku mẹ gotẹ, mịẹtẹ ja apụ sọ anị ḅẹ boma mẹ nyana ḅarị ḅara.

²⁴ Ó nimi lama wararị ḅara ḅụ, tọnwa-apụ mangị pikiarị kiri, gbọrụḅọ paa kirikọn-apụ ma ḅọrọ fama tẹ anị ḅẹ ḍiepịrịye mẹ ọkịarị. Ọkọẹrẹsị, ị́yẹrị sọ kụrọma mangị tẹ mu ḍiepịrịye mẹ ọkịị.

²⁵ Mangị pikiya tii kọn ḍin ḅọ, ḍin ḅọ sakị ọkị tẹ ḅụụ aḍaka ḍikiḍikim, mḅọ paa ene la ḅịa ḍiepịrịye mẹ ọkị ḅẹ gotẹ, kụma wamịnị ịnyọ gbalakị pịrịarị ye anie sime-gbamaso ḅarị ḍiepịrịye.

²⁶ Anie à gotẹ da-da mangị kunoma mẹ dama-muarị; anie à gotẹ pịkị mgbụlụḅa-ḅakụḅọ ḅara ḅụ papaa anga mgbụlụḅa ḅakụ-a ye.

²⁷ Àrị mgbụlụḅa da-da oju ḅio suu tẹ kẹ anị mịẹ kụrọmarị, anieofori à ḅofa papaa owu sọ ḅọ sọ, à ja apụ sịn ḅo owu kiri mẹ ḅụ sịẹma tẹso.