1 Kọrịntị 8 - FỊAFỊA BAỊBỤLỤ

Kẹ Agbamịẹ Oru Pịrị Tẹ Fịye Gboloma Ye

¹ Mịọkụ à ḅo ịn kẹ agbamịẹ oru pịrị tẹ fịye ḅụ ọ́ kẹẹ ye la tẹ. Tomi ḍuko, ḍuko ḅara ḅụ, “Wamịna ḅụ ye-nimia-ḅọ ofori.” Anịsọ ọkọ sime ye-nimi mẹ ḅụụ-gelema mie anị dogi-ḅoḅo ye, kụma ḅẹlẹma mie Kịrayịsị ḍukamẹnjị ogbo mẹ nama saakịarị.

² Amịna ḅụụ kẹ ye-nimiḅọ ọkịarị ḅọ mẹ, karakaramatẹ mḅọ nimi la anga ofori.

³ Kụma Tamụnọ ọ̀ ḅẹlẹmarịḅọ nimi wararị.

⁴ Mie ḅụ, kẹ agba mịẹ oru pịrị tẹ fịye gboloma ye mẹ ḅụ, wa nimi wararị mịnẹ oru fụḅara mẹ, ofori ye mie anị sịẹ pịrị ye; wa nimi wararị, mịnẹ kpọkpọ gbọrụ Tamụnọ ḅe sikima jen ofori.

⁵ Ọkị mịnẹ tomi kẹ tamụnọ sịn-arị aị emi, anị ḅọrọ So-ḅio-o, kiri-ḅio-o; tẹ ịn pịkị tọnwa aị kẹ “tamụnọ amẹẹ” na “kịnịnyanapụ na sịn-arị”

⁶ sọ, wamịnị kịngẹ kụma kpọkpọ gbọrụ Tamụnọ ngẹrị mie wa nyana ye, anie Ḍaḅọ ḅe tẹ ye mamgba Tẹmẹ ḅọ ḅe, tẹ wa pịkị ḍumo pịrịarị ḅọ ḅe; tẹ kpọkpọ gbọrụ KỊNỊNYANAḄỌ kịngẹ mie emi ye, anie Jizọsị Kịrayịsị, ḅụụ ḅụ ye mamgba ḅọrọtẹ tẹmẹ tẹ, wa pịkị ḅụụ ḅụ angarị ḅọ ḅe.

⁷ Kụma ḅẹḅọ-ḅẹḅọ mị karakara mẹ nimi-a. Ja apụ oru afụḅara na nangwọ sakị kẹ mịẹye gboloma tẹ ẹrẹsị, ḅo mịmgba la sọ ini ọkọ sime fịye fị sakị, fị sakị ini ọkịarị oru fịye mie ịn fịarị ye; ịna tẹmẹ ḅioḅẹngbọ lọkọ wararị ẹrẹsị, ini ọkịarị fịye mẹ in pilemarị.

⁸ Anị sime-ḅara, sime-ḅara sọ, fịye rẹ wa mịẹtẹ wa Tamụnọ na sime ḅarị ḅara iḅi tarị ḅara nẹngị ḅịa; wa ye fị-a ẹrẹsị wa fama ḅẹ gberie-sọ ofori, anịsakị wa ye fị ye ẹrẹsị wa nyana ḅẹ gbọrụ sọye sọ pịkị ofori.

⁹ Anị sime-ḅara, sime-ḅara sọ, ẹbịị, ḍụkụ tẹ ị́ ḅụụ-ḅẹlẹ tẹ ị́ mịẹarị ye mẹ minini la-a apụ ma kẹ mu siye ḅio suu ma.

¹⁰ Ọkị mịnẹ ị́yẹrị ye nimim nwẹn ḅẹẹ ḅọ ḅe oru warị ye fịarị, tẹ tẹmẹ kụrọ-a ḅọ ḅe ị́ ẹrị kụma, anị ọ̀ mịẹtẹ ori oru warị ḅẹ fịye kẹ fị-fị ye sọma ḅịa?

¹¹ Tẹ mie ḅụ í ye-nimi mẹ mịẹtẹ ị́ mịnaḅọ, tẹ Kịrayịsị gotẹ fịịḅọ ḅe mu gulugulu fa tẹ!

¹² Tẹ mị-ḅara ḅụ, ị́ kẹ Kịrayịsị ḍukamẹnjị amịnapụ mịẹarị siye mẹ, tẹ kẹ ịna tẹmẹ kpọ-a ḅioḅẹngbọ mẹ lamarị ye mẹ, ḅo ị́ kẹ Kịrayịsị mịẹ si sọ tẹẹ.

¹³ Ọkọẹrẹsị, ḅịḅị-ḅio sụa fị fịye mie tẹ ị̀ mịnaḅọ siye mịẹarị ḅẹḅẹ, à ḅarị jen kẹ nama pẹị ḅịa, mịẹtẹ ị̀ mịnaḅọ ḅe ḅarị mu siye ḅio sọ ḅịa ḅara.