1 Kọrịntị 7 - FỊAFỊA BAỊBỤLỤ

Kịrayịsị Ḍukamẹnjịarị Owiapụ Na Ereme Na Sime Ḅụ Pọlụ Toluma Ye

¹ Mịọkụ à ḅo ḍiri ḅio ọ́ kẹẹ aị la tẹ. Owiḅọ ẹrẹḅọ sime-a mẹ iḅiye.

² Kụma owiapụ na ereme na kura-a ḅara kẹ gbolomarị ḅara si ḅakarị ẹrẹsị, owiḅọ nwẹn-sịn owiḅọ amịna taḅọ nyana-a, tẹ ẹrẹḅọ nwẹn-sịn ẹrẹḅọ pịkị amịna diḅọ nyana-a.

³ Diḅọ amịna taḅọ na gboloma ḅii sakị, ḅii sakị árị ori na gbolomaa, tẹ ẹrẹḅọ ma sọ pịkị á di na gboloma ḅii sakị, ḅii sakị ori arị na gbolomaa; ọrụḅọ-ọrụḅọ osi ḅọ ḅii ḅara kẹ mḅọ na mịẹ furo ḅinmaa.

⁴ Taḅọ ḅarana ḅẹrẹtọn árị oju pịrị ḅịa, kụma diḅọ ḅe mie tọn ḅarịye; anie diḅọ ḅe sọ ḅarana ḅẹrẹtọn ori oju pịrị ḅịa ḅara, kụma taḅọ ma mie tọn ḅarịye.

⁵ Ọmịnị ọmịna oju ma kẹ tọrụ-kpọ jụmọ-jụmọ pịrị ma, anie ọ́ ḅụụ ọlọ tẹ tẹkẹ ḅẹ kala saakị ḅụ sikima; anịtẹso ọ́ pịkị saakị ama-na-ere-na gboloma-gboloma ḅara gbolomaa. Mị-ḅara ḅụ ọ́ ḅarị mu Ekwesu daaḍiki, tẹ ḅụụ ọlọ-a ḅụ ḅo kịnị la-la ye mẹ ḅio sọ ḅịa.

⁶ À ḅara-sikima tẹ oloko sụa ọ́ pịrị-a, kụma ọmịna ḅụụ-ḅẹlẹ, ḅẹlẹ ọmịnị ọkịị.

⁷ Sụntẹ, inweni-mgba à sime-ḅara sime kụma ị̀ ḅụụ-ḅẹlẹ ḅa, kụma Tamụnọ kẹ ọrụḅọ-ọrụḅọ pịrị ḍiepịrịye emi. Gbọrụḅọ mie ḅẹḅẹ, osi-ḅọ anie.

⁸ Amụ ama-na-ere-na ḍumo mẹ ḅụ sọ-a apụ ma na diapụ-fịtẹ-ereme ma na kụma, à ḍuko ọ́ pịrịarị mịnẹ ini in simearị ḅara mẹ kẹ ngẹrị angaa, yẹrị sọ ẹrẹḅọ sime-a tẹ angarị ḅara mẹ.

⁹ Kụma ọmịnị inetẹ ọmịna ḅụụ ọlọ ḅịa ḅẹḅẹ, ọmịnị owiḅọ anịanịa ẹrẹḅọ simee — anie iḅi papaa sime tẹ owiḅọ na ẹrẹḅọ na gboloma ḍọkị ḅụụ-ḅalaḅala nyana nẹngịm.

¹⁰ À sụa ama-na-ere-na pịrịarị oloko yẹrị ḅarana sụa-a, KỊNỊNYANAḄỌ ḅe tọnm: anie, ẹrẹḅọ á di wẹrịso ma;

¹¹ árị ọ̀ wẹrịso so-so, á jen owiḅọ sime ma, tẹ arị inetẹ inema ḅịa ḅẹḅẹ á mu á di na ḅẹrẹ-famaa. Owiḅọ pịkị ọ̀ ta siya ma.

¹² Mịọkụ à ḍuko kirikọn-apụ pịrịarị (yẹrị mie ọkọ ḅẹẹarị, KỊNỊNYANAḄỌ ḅe ḍuko-a), Kịrayịsị ḍukamẹnjị owiḅọ Kịrayịsị minini-a ẹrẹḅọ simem tẹ á ḅiim arị ori na anga ḅẹḅẹ, ori árị na siya ma.

¹³ Anịsakị Kịrayịsị ḍukamẹnjị ẹrẹḅọ Kịrayịsị minini-a owiḅọ simem, tẹ ò ḅiim ori árị na anga ḅẹḅẹ, árị ori na siya ma.

¹⁴ Tamụnọ ẹrẹḅọ ma ḅụ ḅọrọ tẹ à di, Kịrayịsị minini-a ḅọ ḅe ọkịarị, ọ̀ pịkị Kịrayịsị ḍukamẹnjị owiḅọ gotẹ ọ̀ ta Kịrayịsị minini-a ḅọ ma ọkịarị, anieofori ịna awọmẹ ḅofa Tamụnọ nimi-a apụ awọmẹ sọ; kụma ye sime-ḅara ḅụ, Tamụnọ ini ọkị tẹ.

¹⁵ Kụma Kịrayịsị minini-a ḅọ mẹ nwẹnị Kịrayịsị ḍukamẹnjịḅọ mẹ na siya ḅii-ḅii, mḅọ inetẹ so ḅa, anị ḅọrọ diḅọ-o, taḅọ-o. Tamụnọ gotẹ ọ́ sịn ye dein ḅụ anga.

¹⁶ Ị́yẹrị Kịrayịsị ḍukamẹnjị taḅọ, ndẹẹ ị́ mịẹ tẹ inetẹ nimi ḅẹ ḅara, mịnẹ í inetẹ í di ḅọrọma ḅịa ḅara? Anịanịa, ị́yẹrị Kịrayịsị ḍukamẹnjị diḅọ, ndẹẹ ị́ mịẹ tẹ inetẹ nimi ḅẹ ḅara, mịnẹ í inetẹ ị́ ta ḅọrọma ḅịa ḅara?

Ọ́ Tamụnọ Gotẹ Ọ́ Sịn Ḅara Kẹ Ḍumo Kọn

¹⁷ Ọrụḅọ-ọrụḅọ KỊNỊNYANAḄỌ ḅe kẹ mḅọ pịrị ḍiepịrịye sime-ḅara ḍiki tẹ ori mḅọ sịn sakị mḅọ sime kiri ḅụ angaa. Mị oloko mẹ mie sọsị mamgba ḅio à tolumarị ye.

¹⁸ Tarị-ḅụụ sin tẹ owiḅọ Tamụnọ sịn-ḅịḅị mẹ minini, minini, mḅọ amịna ḅụ tarị-ḅụụ sin elekima mẹ sin ḅẹ ḍọkị ma; tarị-ḅụụ sin-a owiḅọ Tamụnọ sịn-ḅịḅị mẹ minini, minini mḅọ tarị-ḅụụ sin ḅẹ ḍọkị ma.

¹⁹ Owiḅọ tarị-ḅụụ sin tẹ, anịanịa tarị-ḅụụ sin-a, mẹ gberie ḅụ sọ ofori; ye ḅụ simearị ye anie Tamụnọ ḅịḅị poki tẹ ọ̀ tọn koroma aị mịẹ.

²⁰ Ọkọẹrẹsị, ọrụḅọ-ọrụḅọ Tamụnọ sịn-ḅịḅị mẹ ḅo mḅọ la sakị mḅọ sime kiri ḅụ simee.

²¹ Ị́yẹrị omoniḅọ tẹ Tamụnọ sịn-ḅịḅị mẹ ḅo ị́ lam ḅẹḅẹ, bala ma, kụma ị́ mịẹ tẹ ị́ sịḅị tomḅọ sọ ḅẹ ḅara emi-emii, mịẹ.

²² Kẹ gotẹ ọkọ ḍukoarị, KỊNỊNYANAḄỌ ḅe omoni kiri ḅụ sịn tomḅọ mẹ anie KỊNỊNYANAḄỌ ḅe ḅụụ amịna sịḅị nyana tẹ tomḅọ; anị gbọrụ ḅara ḅụ Kịrayịsị furo tụḅọ kiri ḅụ sịn tẹ tomḅọ mẹ anie Kịrayịsị omoniḅọ.

²³ Tamụnọ ye fama tẹ kẹ ọ́ fẹẹm; ọkọẹrẹsị ọmịnị omoni sọ tomi pịrị ma.

²⁴ Ị̀ amịnapụ, ọrụḅọ-ọrụḅọ Tamụnọ mḅọ sịn sakị mḅọ sime kiri ḅụ sime tẹ ori na gbọrụ ḅụ simee.

Amụ-sime-a Owiapụ Na Ereme Na, Pịkị Diapụ-Fịtẹ-Ereme Na Gboloma Ye

²⁵ Mịọkụ à ḅo amụ owiapụ, anịanịa ereme, sime-a apụ gboloma ye ḅụ ọ́ kẹẹ ye mẹ la tẹ. À KỊNỊNYANAḄỌ ḅe ḅara ḅo oloko nyana ọ́ pịrị-a, kụma KỊNỊNYANAḄỌ ḅe ḅụụ ḅụ emi, tẹ ḅioḅẹngbọ-kẹ-sịrẹrẹ-niḅi ḅọ ḅara ḅụ, àrị ì kuroma ḅụ anị sime na-iḅi ḅara ḍukoarị.

²⁶ Mịọkụ simearị ḅụụ-ḅalaḅala mẹ gotẹ, à kuromarị mịnẹ tomḅọ mḅọ simearị, ẹrẹḅọ, anịanịa owiḅọ, sime-a ḅara mẹ sime mḅọ sime nẹngịm.

²⁷ Ị́ ẹrẹḅọ nyana wararị ḅarị ya? Ọkọ ḅẹḅẹ, á ḅụụ ḅara-siin ma; ị́ ẹrẹḅọ sime-a ḅarị ya? Ọkọ ḅẹḅẹ, ẹrẹḅọ sime ḍọkị ma.

²⁸ Kụma ị́ ẹrẹḅọ sime-sime, í siye mịẹ-a; amụ owiḅọ sime-a ẹrẹḅọ owiḅọ sime-sime, á siye mịẹ-a. Kụma à ḅii-a mịnẹ, ene-ḅaaene-ḅaaene owiapụ na ereme na ḅụụ paka ḅarị ḅụụ-fụka ḅo ọ́ la.

²⁹ Ị̀ amịnapụ, à fiearị ye anie, wa nyana sakị ḅarị boowa, tẹ mịọkụ saakị tọrọkọ mu ama-na-ere-na, gbala in sime-a nwẹn ḅẹẹ ḅara anga ḅa;

³⁰ owuarị apụ ḅioḅẹlẹarị apụ sọ ḅa; ḍẹrịarị apụ ḅo ḅioḅẹlẹ-a apụ sọ ḅa; ye fẹẹarị-apụ ịn fẹẹ tẹ ye sọ ḅarị ịna nye-a ḅara sime ḅa;

³¹ tomikiri ḅẹ aị kẹ ye sịn-arị ḅọ, ḅo ini arị kẹ mịẹ ḅarịye ofori ḅara sime ḅa. Kẹ gotẹ ọkọ ḍukoarị, mị tomikiri mẹ, mịọkụ anị simearị ḅara mẹ, anị ḅarị ọkọ sime tọrọkọ mu alama ḅịa.

³² À ḅiiarị ọ́ ḅụụ-ḅalaḅala nyana ma. Amụ ẹrẹḅọ sime-a owiḅọ ḅe KỊNỊNYANAḄỌ ḅe kọrịnama tẹ ọ̀ kọrịarị ye mẹ anie ọ̀ ḅụụ ḅẹrẹ tẹịn ye, ọ̀ ḅụụkụrọma tẹ KỊNỊNYANAḄỌ ḅe ḅioḅẹlẹma ḅẹ ḅara ḍọkịarị ẹrẹsị.

³³ Kụma ẹrẹḅọ sime wararị owiḅọ ḅe tomikiri ḅẹ aị mie ọ̀ balarị, ọ̀ mịẹ tẹ ọ̀ ta ḅioḅẹlẹma ḅẹ ḅara ẹrẹsị;

³⁴ mie ḅụ, tọrụ maa anga, maa anga da tẹ. Owiḅọ nyana-a ẹrẹḅọ anịanịa ḅụụ-gboloa iriawọ-tụḅọ ma, KỊNỊNYANAḄỌ ḅe kọrịnama mẹ mie á ḅụụ ḅẹrẹ ye, tẹ á ḅiiarị mịnẹ árị á ḅụụ wẹrị fịafịama, oju na tẹmẹ na ḅụ; kụma owiḅọ nyana wararị ẹrẹḅọ ma tomikiri ḅẹ aị mie á gotẹ ḅụụ-ḅalaḅalarị, árị á di ḅioḅẹlẹma ḅẹ ḅara.

³⁵ Kẹ ḅarasụa ọ́ pịrị mie à gotẹ miemẹ ḍukoarị. Àrị ọ́ mịẹ ḅẹ ye ḅụ ó kiki gotẹ ḍuko-a. Anie nakara, à ḅiiarị ó kura tẹ pịkị mịẹ na-iḅi ye mịẹ, tẹ nwẹnị gbọrsịḅị ọmịna ḅụụ saakị KỊNỊNYANAḄỌ ḅe fịrị mẹ pịrị, gberie-sọ ó kiki-a ḅara ḅụ.

³⁶ Owiḅọ ẹrẹḅọ ọlọ tẹ sime ḅẹ tẹ ḅiya tẹ amụ sime-a ogbo ò ḅo árị na gboloma ḅẹ kuroma nyanarị ḅẹḅẹ, ọ̀ sakị fama ma tẹ arị na sime pakamaa, tẹ ò ḅiotọn-arị ḅara mẹ mịẹ. Miemẹ ḅụ siye ofori.

³⁷ Kụma gbọrụ owiḅọ nwẹnị jụmọ tọn mḅọ pịrị-a ḅara ḅụ, amịna ḅioḅẹngbọ ḅụ tọn kuroma mịnẹ mḅọ ẹrẹḅọ sime ḅịa, tẹ anị ḅụ sịẹ tọrọkọ mu ḅẹḅẹ, mḅọ ẹrẹḅọtụḅọ ma sime-a ye mẹ sọ siye-a.

³⁸ Mie ḅụ, ẹrẹḅọ sime owiḅọ ḅe mịẹ ḅara mẹ iḅim, kụma amịna ḅụụ ọlọ tẹ ẹrẹḅọ sime-a ḅọ ḅe mịẹ ḅara mẹ iḅitẹịn tẹ.

³⁹ Owiḅọ sime wararị ẹrẹḅọ ma di ḍumo wararị sakị goyegoye á sime ọ̀ pịrịm, kụma á di ḅe fịtẹ ḅẹḅẹ, árị inetẹ á ḅụụ-ḅẹlẹ owiḅọ sime ḅa, kụma á paa Kịrayịsị ḍukamẹnjịḅọ rẹ simee.

⁴⁰ Kụma á diḅọ ofori ḅara mẹ sime mẹ ḅụ á ḅioḅẹlẹ nyana tẹịn ḅa. À nwẹn ḍuko ye mẹmgba ì kuroma ḅụ ḅo ye, tẹ à kuromarị mịnẹ Tamụnọ Tẹmẹ ḅe ị̀ ḅụụ ḅio emi.